Baebol i Talem Wanem
?Yumi Mas Mekem Wanem Fasin Long Ol Olfala?
LONG yia 2003, long Yurop, ples i hot bitim mak. Hem i no bin hot olsem blong 60 yia. Plante taosen man oli ded from. Klosap olgeta man we oli ded oli olfala. Long taem ya, sam olfala oli stap olgeta nomo from we famle blong olgeta i go spel. Sam narafala, ol nes mo dokta long hospital we oli gat tumas wok, oli no gat taem blong lukaotgud long olgeta. Niuspepa ya Le Parisien i talem se long Paris nomo, 450 dedbodi i stap we i no gat man i kam berem olgeta. Niuspepa i tokbaot ol man we i luk olsem se oli no gat famle mo fren, nao oli stap olgeta nomo taem oli ded. Hem i se: “?Yumi stap long wanem kaen wol? Naoia yumi no moa wantem save long ol papa mama mo ol olfala bubu blong yumi tu.”
Evri manis, bitim 795,000 man long wol oli kasem 66 yia blong olgeta. Namba ya i hae moa i bitim olgeta yia bifo, mekem se wok ya blong lukaot long ol olfala i kam wan bigfala wari long wol. Nancy Gordon we hem i wan daerekta blong ol sensas we Ofis blong Sensas i mekem long Yunaeted Stet, hem i talem se: “Tede i gat moa olfala long wol i bitim olgeta taem bifo. Taswe, yumi mas luklukgud long fasin blong ol wanwan kantri long saed blong trabol blong ol olfala, mo janis we oli gat naoia blong laef longtaem moa.”
God we i wokem yumi, hem i tingbaot ol olfala. Mo long Tok blong hem Baebol, hem i talem wanem fasin yumi mas mekem long olgeta.
Respektem Ol Olfala
Loa we God i givim long Moses i pulum ol man blong respektem ol olfala. Loa ya i talem se: “Yufala i mas bodaon long ol olfala, mo yufala i mas ona gud long olgeta.” (Levitikas 19:32) Ol man we oli obei long God oli mas “bodaon” long ol olfala (1) blong soem respek long olgeta mo (2) blong soem tu se oli onagud long God ya we oli mekem wosip long hem. Oli mas leftemap ol olfala mo ona long olgeta, mo oli mas luk olgeta olsem ol impoten memba blong famle.—Ol Proveb 16:31; 23:22.
Ol Kristin tede oli no moa stap aninit long Loa blong Moses. Be ol rul insaed long Loa ya oli soemaot tingting blong Jeova mo ol samting we hem i ting se oli impoten, olsem fasin blong tinghae long ol olfala. Ol Kristin long faswan handred yia oli kasem save long rul ya. Buk blong Ol Wok i soem se ol faswan Kristin oli folem rul ya. Long taem ya, i gat sam wido long Jerusalem we oli pua, mo yumi save se sam long olgeta oli mas olfala. Nao ol aposol oli putumap seven ‘man we oli gat gud nem,’ blong oli seraot kakae long ol woman ya evri dei. Oli tingbaot wok ya blong lukaot long ol wido ya olsem wan “impoten bisnes.”—Ol Wok 6:1-7, NW.
Aposol Pol i soem se olgeta long Kristin kongregesen tu oli mas folem rul ya blong “bodaon long ol olfala.” Hem i talem long yangfala Kristin elda ya Timote se: “Bambae yu no tok strong long man we i olfala. Yu mas toktok gud long hem, olsem we hem i stret papa blong yu. . . . Yu mas toktok gud long woman we i olfala, olsem we hem i stret mama blong yu.” (1 Timoti 5:1, 2) Yang man ya Timoti i gat wan wok long kongregesen we i mekem se samtaem hem i mas tijim mo givim advaes long ol olfala, be Pol i talem long hem se hem i no mas daonem ol olfala man. Hem i mas toktok wetem respek long olgeta, olsem we hem i mekem long stret papa blong hem. Mo hem i mas soemaot semfala ona long ol olfala woman long kongregesen. I olsem we aposol Pol i stap talem long Timote, mo long olgeta Kristin, se oli mas “bodaon long ol olfala.”
Ol man blong God oli no nidim wan loa blong talem long olgeta se oli mas kaen long ol olfala mo respektem olgeta. Tingbaot Josef long Baebol. Hem i spenem bigfala mane blong tekem olfala papa blong hem i kamdaon long Ijip. Samting ya i mekem se Jekob we i gat 130 yia long taem ya, i no fesem bigfala hadtaem ya we kakae i sot long kantri blong hem. Taem Josef i luk papa blong hem bakegen afta moa long twanti yia, hem i “putum han blong hem i goraon long nek blong papa blong hem, i stap holem hem, mo i stap krae longtaem.” (Jenesis 46:29) Josef i laef longtaem bifo we Isrel i kasem Loa, be hem i soemaot tingting blong God taem hem i gat sore mo bigfala respek long olfala blong hem.
Taem Jisas i stap long wol, hem tu i tingbaot ol olfala. Hem i tok strong long ol lida blong skul we oli yusum ol kastom blong skul olsem eskius blong no lukaot long ol olfala blong olgeta. (Matiu 15:3-9) Mo tu, Jisas i lukaot long mama blong hem wetem lav. Taem hem i stap harem i soa tumas long pos, hem i putum mama blong hem long han blong aposol ya we hem i laekem tumas, Jon, se hem i mas lukaot long hem.—Jon 19:26, 27.
God i No Save Lego Ol Gudfala Man Blong Hem
Wan man blong raetem Ol Sam i prea se: “Naoia mi mi kam olfala. Plis yu no tanem baksaed long mi. Naoia mi mi no moa strong. Plis yu no lego mi.” (Ol Sam 71:9) God i no save “tanem baksaed” long ol man we oli stap tru long hem, nating se oli olfala tumas we oli harem se oli no moa save mekem wan gudfala wok. Man blong raetem Sam ya i no harem se Jeova i lego hem, be hem i luksave se hem i nidim blong dipen moa long God taem hem i kam olfala. Taem man i stap tru long Jeova olsem, Jeova bambae i givhan long hem long olgeta yia blong laef blong hem. (Ol Sam 18:25) Plante taem hem i yusum ol narafala Kristin blong givhan long man olsem.
From ol tok ya antap, yumi luksave klia se olgeta man we oli wantem ona long God oli mas ona long ol olfala tu. God i tinghae long ol olfala, mo hem i wokem yumi blong yumi tekem fasin blong hem. Taswe i gud we oltaem yumi folem tingting blong hem long saed blong olgeta we ‘hea blong olgeta i waet.’—Ol Sam 71:18.
[Tok blong pija long pej 25]
Ol Kristin oli soem ona mo respek long ol olfala