Kam Klosap Long God

“Kingdom Blong Yu i Stap Oltaem, Gogo i No Save Finis”

2 SAMUEL 7:1-16

LONG olgeta yia we oli pas, ol man oli sakemaot plante lida blong gavman. Samfala, ol man oli vot blong aotem olgeta, mo sam narafala, oli fosem olgeta nomo blong finis long wok ya. ?Be olsem wanem long Jisas Kraes, King we i rul long Kingdom blong God long heven? ?I gat wan samting we i save blokem hem blong i no rul olsem King ya we God i putumap? Yumi save faenem ansa long ol tok we Jeova i talem long King Deved blong Isrel bifo. Ol tok ya oli stap long buk blong 2 Samuel japta 7.

Taem yumi stat blong ridim japta ya, yumi lanem se Deved i sem tumas from we hem i man nomo, be hem i stap long wan naesfala haos blong king. Be Bokis we i Saen blong Promes blong God i stap long wan haos tapolen nomo.a Deved i talemaot samting we hem i wantem mekem, hemia blong wokem wan gudfala haos, no wan tempol, blong Jeova. (Vas 2) Be Deved bambae i no wokem haos ya. Jeova i talem long profet Natan blong i go talem long Deved, se wan pikinini blong hem nao bambae i wokem haos tempol.—Vas 4, 5, 12, 13.

Samting we Deved i wantem mekem i tajem hat blong Jeova. Jeova i wantem mekem i gud long Deved from we Deved i onagud long Hem mo from stamba tingting we Jeova i gat. Ale, God i mekem wan promes wetem Deved se bambae Hem i jusum wan man long laen blong hem, blong bambae i rul gogo i no save finis. Natan i talemaot strong promes ya blong God long Deved se: “Olgeta ya we bambae oli stap kamaot biaen long yu, oltaem bambae mi mekem olgeta oli stap gud, mo bambae mi mekem kingdom blong yu i stap oltaem, gogo i no save finis. Mo oltaem, ol king blong yufala bambae oli stap kamaot long olgeta ya we bambae oli stap kamaot biaen long yu.” (Vas 16) ?Hu ya man long promes ya we bambae i stap blong olwe, mo i rul gogo i no save finis?—Ol Sam 89:20, 29, 34-36.

Jisas blong Nasaret i kamaot long laen blong Deved. Taem wan enjel i talemaot se bambae Jisas i bon, hem i se: “Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.” (Luk 1:32, 33) Yes, promes we God i mekem wetem Deved i kamtru long Jisas Kraes. Taswe, i no ol man we oli jusum Jisas blong rul. God nao i mekem wan strong promes we i givim raet long hem blong rul blong olwe. Yumi mas rimemba se ol promes we God i mekem, oltaem oli kamtru.—Aesea 55:10, 11.

I gat tu impoten samting we yumi lanem long stori ya long 2 Samuel japta 7. Faswan hemia: Yumi save se Jisas bambae i rul, i no gat wan samting no wan man we i save blokem hem. Taswe, yumi save se long rul blong hem bambae hem i mekem samting we hem i talem finis. Bambae hem i mekem ol samting we God i wantem oli kamaot long wol, olsem we oli kamaot finis long heven.—Matiu 6:9, 10.

Nambatu samting we stori ya i tijim yumi long hem, hemia wan samting long saed blong Jeova, we i tajem hat blong yumi. Tingbaot se Jeova i luk mo i glad tumas long samting we Deved i wantem mekem. Yumi harem gud blong save se Jeova i luk mo i glad tumas long fasin blong yumi blong onagud long hem mo holemstrong long wosip blong hem. Samtaem long laef blong yumi, i gat sam samting we yumi no save blokem, olsem sik mo fasin blong kam olfala. Ol samting ya oli save blokem yumi blong yumi no mekem samting we yumi wantem tumas blong mekem, long wok blong God. Sipos i olsem, yumi harem gud blong save se Jeova i lukluk samting we yumi wantem tumas long hat blong yumi. Hem i luk se yumi wantem onagud long hem mo holemstrong long wosip blong hem.

[Futnot]