Yu Save Trastem Promes Ya

“SIPOS yu kasem wan leta we i talem se wan famle blong yu i ded mo i livim wan presen blong yu, lukaot. Maet wan man i stap traem blong trikim yu.”

Hemia woning we United States Postal Inspection Service i putum long Web saet blong hem. ?From wanem? From we plante taosen man oli kasem wan leta we i talem se, ‘Wan famle blong yu i ded mo i livim wan presen blong yu.’ Plante man oli sanembak 3,500 vatu blong kasem wan pepa we i eksplenem long olgeta weples oli save faenem presen ya, mo olsem wanem blong kasem hem. Biaen oli harem nogud nomo. Olgeta man oli kasem semfala pepa, mo oli no kasem wan presen nating.

Ol kaen trik olsem oli wokgud from we i stret nomo we ol man oli wantem kasem wan presen we i kamaot long wan bubu blong olgeta. Baebol i toktok gud long saed blong ol man we oli livim wan presen long ol smol bubu blong olgeta, i talem se: “Taem gudfala man i ded, ol gudgudfala samting we hem i gat, ol smol bubu blong hem oli save tekem i blong olgeta.” (Ol Proveb 13:22) Blong talem stret, Jisas Kraes hem wan i talem wan tok we ol man oli savegud mo oli glad long hem, taem hem i mekem Bigfala Toktok blong hem antap long Hil, i se: ‘Olgeta we tingting blong olgeta i stap daon oli save harem gud, from we God bambae i givim wol ya long olgeta.’​—Matiu 5:5, futnot.

Taem yumi ridim ol tok ya blong Jisas, yumi rimemba samting we tabu spirit i pulum Deved, king blong Isrel, blong raetem plante handred yia bifo se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”​—Ol Sam 37:11.

“Tekem graon ya i blong olgeta”​—!hemia wan nambawan promes! ?Be olsem wanem? ?Yumi save trastem promes ya, no hem i wan trik olsem hemia we yumi tokbaot antap? Si, yumi save trastem promes ya. Graon i wan nambawan wok blong Jeova, mo from we Hem nao i Wokem graon ya mo graon ya i blong Hem , hem i gat raet blong livim graon ya olsem wan presen long eni man we hem i jusum. King Deved i talemaot wan promes we Jeova i mekem long Jisas Kraes, Pikinini blong Hem we hem i laekem tumas, i se: “Ol narafala kantri ya, wetem olgeta man long wol, yu yu save askem olgeta long mi, nao mi bambae mi givim olgeta long yu, oli blong yu.” (Ol Sam 2:8) Taswe, aposol Pol i tokbaot Jisas se “olgeta samting ya blong wol oli blong hem nomo.” (Hibrus 1:2) Olsem nao, yumi save trastem Jisas taem hem i talem se “God bambae i givim wol ya” long ol man we tingting blong olgeta i stap daon, from we hem i rili minim samting ya, mo hem i gat paoa blong mekem promes ya i kamtru.​—Matiu 28:18.

Taswe, wan impoten kwestin i stap se, ?Promes ya bambae i kamtru olsem wanem? Long ful wol tede, i luk olsem se ol raf man mo ol man we oli flas, olgeta nao oli win long laef mo oli tekem eni samting we oli wantem. ?Sipos oli tekem evri samting, wanem i stap yet blong olgeta we tingting blong olgeta i stap daon? Mo tu, ol doti oli spolem graon, mo ol man we oli griri mo oli no tingbaot frut blong ol rabis wok blong olgeta, oli karemaot ol rij samting blong graon gogo oli spolem hem nomo. ?Bambae i gat gudfala graon i stap yet, we yumi glad blong tekem i blong yumi? Mifala i singaot yu blong yu ridim haf we i kam biaen, blong faenem ansa long ol impoten kwestin ya, mo long sam narafala kwestin bakegen.

“Bambae Oli Tekem Graon Ya”​—?Olsem Wanem?

“ATING yu savegud gudfala tok ya blong Jisas we i talem se ‘God bambae i givim wol ya long olgeta we oli gat tingting daon.’ ?Be taem yu luk ol samting we ol man oli stap mekem long ol narafala mo long graon ya tu, yu ting se bambae i gat wan samting i stap blong ol man we oli gat tingting daon oli tekem i blong olgeta?”​—Matiu 5:5; Ol Sam 37:11.

Myriam, wan Witnes blong Jeova, i yusum kwestin ya blong statem wan storian long Baebol. Man ya we Myriam i toktok wetem hem i talem se, sipos Jisas i bin mekem promes ya, graon ya bambae i rili wan gudfala samting we ol man oli glad blong tekem, be hem i no jes wan rabis graon we man i no save laef long hem.

Ansa blong man ya i soem we hem i gat gudfala tingting long saed blong fiuja. ?Be olsem wanem? ?I gat sam pruf we i mekem se yumi tu yumi save gat wan gudfala tingting long saed blong fiuja? Yes i gat, from we Baebol i givim ol pruf se promes ya bambae i kamtru. Samting ya i laenap gud wetem stamba tingting blong God long saed blong ol man mo graon. Mo yumi save trastem Jeova se taem hem i mekem plan, plan ya bambae i kamtru. (Aesea 55:11) ?Taswe, wanem nao stamba tingting blong God long saed blong ol man, mo olsem wanem bambae i mekem tingting ya i kamtru?

God i Wantem Se Graon i Stap Blong Olwe

Jeova God i wokem graon blong wan spesel risen. “Hae God i mekem skae wetem olgeta samting we i stap long hem. Hem nao i God. Hem i wokem wol ya, mo i mekem i strong, blong i save stap longtaem. Taem hem i mekem, hem i no mekem blong i ples nating nomo, hem i mekem blong man i save stap long hem. Mo hem i talem se, ‘Mi nao mi Hae God. I no gat narafala god i stap.’ ” (Aesea 45:18) Taswe, God i wokem graon speseli blong ol man oli save stap long hem. Mo tu, long plan blong God, graon ya i mas stap longtaem, blong olwe, blong ol man oli laef long hem. “Yu yu putum wol ya i stap strong long fandesen blong hem, we bambae hem i no save muf nating.”​—Ol Sam 104:5; 119:90.

Stamba tingting blong God long saed blong wol i klia tu, taem yumi luk wok we God i givim long Adam mo Iv. Hem i talem long tufala se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” (Jenesis 1:28) Wol ya i mas stap blong olwe olsem haos we God i givim long Adam mo Iv mo long ol smol bubu blong tufala. Plante yia biaen, man blong raetem Sam i talem se: “Heven i ples blong Hae God nomo, be wol ya, hem i givim long man.”​—Ol Sam 115:16.

Blong mekem stamba tingting blong God i kamtru, Adam mo Iv, wetem ol smol bubu blong tufala tu, oli mas lukluk i go long Jeova God, Bigman ya we i Wokem olgeta samting mo i Givim Laef long olgeta. Oli mas luk hem olsem King blong olgeta, mo oli mas obei long Hem. Jeova i soemaot samting ya i klia nomo taem i givim oda ya long man se: “Olgeta tri long ples ya, yu yu save kakae frut blong olgeta. Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.” (Jenesis 2:16, 17) Sipos Adam mo Iv tufala i wantem stap laef olwe long garen blong Iden, tufala i mas obei long oda ya we i klia nomo. Mo sipos tufala i obei long God, bambae tufala i soem tangkiu long Papa blong tufala long heven, from olgeta samting we Hem i mekem blong tufala.

Taem Adam mo Iv tufala i jusum blong no obei long God mo tufala i minim nomo blong brekem loa we God i putum long tufala, tufala i tanem baksaed long God we i stamba blong olgeta samting we tufala i gat. (Jenesis 3:6) Mo taem oli mekem samting ya, oli lusum naesfala Paradaes, we God i wokem blong tufala fastaem, mo blong ol smol bubu blong tufala biaen. (Rom 5:12) ?Olsem wanem? ?God i jenisim stamba tingting blong hem long saed blong wol from we tufala ya i no obei long hem?

Wan God We i No Save Jenis

Tru long profet Malakae, Jeova i talem se: “Mi mi Hae God, mo mi no save jenis samtaem.” (Malakae 3:6) Franis man ya L. Fillion we i gat hae save long saed blong Baebol, i talem se vas ya i laenapgud wetem ol promes blong God we oli mas kamtru. Fillion i raetem se: “Long taem bifo, Jeova i save spolemgud ol man we oli rebel agens long hem, be from we hem i no save jenisim ol promes blong hem, bambae hem i mekem ol promes ya blong bifo oli kamtru, nomata wanem samting i hapen.” Jeova i no save fogetem ol promes we hem i bin mekem, nating se i mekem long wan man, long wan nesen, no long olgeta man. Bambae hem i mekem olgeta promes ya evriwan oli kamtru long stret taem blong hem. “Promes ya we hem i mekem wetem yumi bambae hem i no save fogetem samtaem. Oltaem bambae hem i stap holem promes ya we i mekem wetem yumi, mo wetem olgeta we bambae oli kamaot biaen long yumi, gogo i no save finis.”​—Ol Sam 105:8.

?Nating se i olsem, olsem wanem yumi save sua se Jeova i no jenisim stamba tingting blong hem long saed blong wol? Yumi save sua long promes ya from we insaed long Tok blong God, Baebol, yumi faenem ol vas we oli talem se stamba tingting blong God i blong givim wol ya long ol man we oli obei long hem. (Ol Sam 25:13; 37:9, 22, 29, 34) Sam narafala vas blong Baebol oli tokbaot ol man we Jeova i blesem olgeta, oli talem se ol man ya bambae oli stap sef, bambae oli stap gud “long ol plantesen blong grep blong olgeta, mo oli save sidaon aninit long ol fig tri blong olgeta,” mo ‘bambae i no gat man i save mekem olgeta oli fraet.’ (Maeka 4:4; Esikel 34:28) Ol man we Jeova i sevem olgeta bambae oli ‘wokem haos blong olgeta mo oli save stap gud long hem. Bambae oli planem plantesen blong grep, mo oli dring waen blong ol grep ya.’ Bambae oli stap long pis wetem ol wael anamol tu.​—Aesea 11:6-9; 65:21, 25.

Baebol i tokbaot wan narafala samting we i olsem pija blong promes blong God we bambae i kamtru. Taem King Solomon i rul, nesen blong Isrel i stap long pis mo oli gat plante samting. Aninit long rul blong Solomon, “ol man Juda mo ol man Isrel oli stap gud, i stat long Dan long not, i go kasem Bereseba long saot, mo evri famle oli save stap gud aninit long ol grep blong olgeta mo ol figtri blong olgeta.” (1 King 4:25) Baebol i talem se Jisas i “waes moa long King Solomon,” mo wan profet i tokbaot rul blong Jisas long Ol Sam, i talem se: “Long taem blong hem, bambae stret fasin i kam bigwan long kantri blong mifala mo mifala i gat gudfala laef oltaem, olsem we mun i stap saen oltaem.” Long taem ya, “bambae i gat plante kakae long ples ya, we bambae ol hil oli fulap gud long hem.”​—Luk 11:31; Ol Sam 72:7, 16.

Jeova bambae i holem promes blong hem, mo bambae hem i meksua se graon we hem i wantem givim long ol man i stap yet, antap moa, bambae graon ya i kam stret gud olgeta bakegen, olsem fastaem. Long Revelesen 21:4, Baebol i talem se long niufala wol, God “bambae i ravemaot wota blong ae blong [ol man]. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” Traem tingbaot, samting ya we God i promes blong mekem, hem i wan Paradaes stret.​—Luk 23:43, NW.

?Olsem Wanem Blong Tekem Graon Ya?

Wol ya bambae i kam paradaes aninit long rul blong wan gavman we i stap long heven, hemia Kingdom we Jisas Kraes i King blong hem. (Matiu 6:9, 10) Fastaem, Kingdom ya bambae i “spolem ol man ya we oli stap spolem wol.” (Revelesen 11:18; Daniel 2:44) Biaen, Jisas Kraes, “Pikinini ya blong King, we Hem i Stamba blong Pis,” bambae i mekem profet tok ya i kamtru se: “Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet.” (Aesea 9:6, 7) Aninit long rul blong Kingdom ya, plante milian man, wetem olgeta we bambae oli laef bakegen, bambae oli gat janis blong tekem graon ya i blong olgeta.​—Jon 5:28, 29; Ol Wok 24:15.

?Hu bambae i gat janis blong tekem graon ya? Jisas i talem se: “Olgeta we tingting blong olgeta i stap daon oli save harem gud, from we oli save kasem ol samting we God i promes blong givim long ol man blong hem.” (Matiu 5:5) ?Tok ya ‘tingting we i stap daon’ i minim wanem? Ol diksinari oli talem se tok ya i minim wan man we i kaen, we i no bitim mak, i gat fasin obei mo i kwaet. Be mining blong Grik tok we yumi tanem i kam ‘tingting we i stap daon’ i dip moa yet. Long buk ya New Testament Wordbook, William Barclay i tokbaot man we tingting blong hem i stap daon i se: “Ol fasin blong hem oli kaen, be tingting blong hem i strong olsem aean.” Fasin ya i makem wan man we i naf blong fesem ol traem be i no kam kros from samting ya, mo i no gat tingting blong givimbak long man we i mekem nogud long hem. Fasin ya i kamaot from we man ya i frengud wetem God, nao fasin fren ya i givim paoa long hem.​—Aesea 12:2; Filipae 4:13.

Man we tingting blong hem i stap daon i glad blong obei long ol rul blong God long evri haf blong laef blong hem. Hem i no gat strong tingting blong mekem ol samting folem prapa tingting blong hem, no blong folem tingting blong narafala man. Mo tu, hem i glad blong letem Jeova i tijim hem. Long Ol Sam, Deved i raetem se: “Ol man we tingting blong olgeta i stap daon, [Jeova] i stap lidim olgeta long ol rod we i stret, mo i stap tijim olgeta long ol samting we hem nomo i wantem.”​—Ol Sam 25:9; Ol Proveb 3:5, 6.

?Olsem wanem long yu? ?Bambae yu yu wan long “ol man we tingting blong olgeta i stap daon” we oli tekem graon ya i blong olgeta? Sipos yu stadigud long Baebol blong savegud Jeova mo ol samting we hem i wantem, mo yu mekem ol samting we yu lanem i wok long laef blong yu, yu tu yu save gat hop blong tekem graon ya i blong yu, mo blong laef olwe long paradaes long wol.​—Jon 17:3.