!Ol Fasin Blong God Oli Hae We Oli Hae!

20, 21. (a) ?Ol Sam 145:​7-9 i presem Jeova from wanem fasin blong hem? (b) ?Ol fasin ya blong God oli mekem wanem long ol man we oli lavem hem?

²⁰ Olsem yumi luk finis, vas 1 kasem 6 blong Sam 145 oli soem plante samting we oli mas pulum yumi blong presem Jeova from bigfala paoa blong hem. Vas 7 kasem 9 oli tokbaot ol nambawan fasin blong God we oli soemaot se hem i hae we i hae. Deved i singsing se: “Bambae oli stap tokbaot olgeta gudgudfala fasin blong yu, mo bambae oli stap singsing blong talemaot we yu yu kaen tumas. Hae God, hem i God we i lavem yumi, mo i gat sore long yumi. Hem i no save kros kwik, oltaem hem i stap lavem yumi. Hem i mekem olgeta samting we i gat laef, mo oltaem hem i gat sore long olgeta. Oltaem hem i stap mekem i gud tumas long yumi evriwan.”

²¹ Faswan samting we Deved i tokbaot long ol vas ya, hemia gudfala fasin mo stret fasin blong Jeova we hem i kaen tumas​—hemia ol samting we Setan i agensem Jeova from. ?Ol fasin ya oli mekem wanem long ol man we oli lavem God mo we oli wantem stap aninit long rul blong hem? Tru ya, gudfala fasin blong Jeova mo stret fasin blong hem blong rul long ol man, i mekem ol man we oli wosip long hem oli glad tumas, ale oli no save stop blong presem hem from. Mo tu, Jeova i soemaot gudfala fasin ya blong hem long “yumi evriwan.” Yumi hop se fasin ya bambae i pulum plante moa man yet, blong oli tanem tingting blong olgeta mo mekem wosip long trufala God ya bifo we i let tumas.​—Ol Wok 14:​15-17.

22. ?Jeova i mekem olsem wanem long ol man blong hem?

²² Mo tu, Deved i tinghae long ol fasin we God hem wan i bin talemaot taem hem i “kam pas long fes blong Moses, mo i talemaot bakegen long hem se, ‘Mi mi Hae God, . . . Fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap lavem man mo oltaem mi stap holemstrong promes blong mi.’ ” (Eksodas 34:6) Taswe Deved i save talem se: “Hae God, hem i God we i lavem yumi, mo i gat sore long yumi. Hem i no save kros kwik, oltaem hem i stap lavem yumi.” Nating se Jeova i hae we i hae, be hem i soem respek long ol man blong hem, taem hem i kaen long olgeta. Hem i gat sore long man, taswe hem i glad blong yusum ransom sakrefaes blong Jisas blong fogivim sin blong ol man we oli tanem tingting blong olgeta. Jeova i no save kros kwik, hem i givim janis long ol man blong hem blong oli winim slak fasin we i save blokem olgeta blong oli no go insaed long niufala wol we stret fasin i stap long hem.​—2 Pita 3:​9, 13, 14.

Oltaem Jeova i Stap Lavem Yumi

“Hae God, . . . oltaem hem i stap lavem yumi.”​—OL SAM 145:8.

1. ?Lav blong God i bigwan olsem wanem?

“GOD [hem] i lav.” (1 Jon 4:​8, NW ) Tok ya we i mekem yumi haremgud tumas, i soem se Jeova i lavem ol man we hem i rul long olgeta. !Ol man we oli no obei long hem, olgeta tu oli kasem blesing from lav blong hem, taem oli haremgud long san mo ren we hem i givim! (Matiu 5:​44, 45) God i lavem olgeta man, taswe ol enemi blong hem tu oli save tanem tingting blong olgeta from sin, kam long hem, mo kasem laef. (Jon 3:16) Be, ol rabis man we oli no wantem jenisim fasin blong olgeta, Jeova bambae i spolem olgeta i no longtaem, nao ol man we oli lavem hem bambae oli save laef olwe long niufala wol we stret fasin nomo i stap long hem.​—Ol Sam 37:​9-11, 29; 2 Pita 3:13.

2. ?Wanem spesel lav ya we Jeova i soem long olgeta we oli givim laef blong olgeta i go long hem?

² Jeova i soem lav we i spesel long ol man we oli wosipim hem long trufala fasin, mo hem i soem lav ya oltaem. I gat wan Hibru tok we i eksplenem gud lav ya, mining blong Hibru tok ya hemia “lav we i kaengud,” no “lav we i stap tru oltaem.” Deved we i king blong Isrel bifo, hem i tinghae tumas long lav blong God we i kaengud. From ol samting we i hapen long laef blong hem wan mo from we hem i tingting dip long fasin we God i mekem long ol narafala, hem i save singsing wetem strong bilif se: “Hae God, . . . oltaem hem i stap lavem yumi [no, “hem i gat lav we i stap tru oltaem,” NW ].”​—Ol Sam 145:8.