Ol Yangfala Oli Askem . . .
?Olsem Wanem Mi Save Bos Long Ol Filing Blong Mi?
“Mi mi kam kros long papa mama blong mi, mo mi talem ol samting we mi mi no minim blong talem. Afta, mi go stap longwe long tufala gogo kros blong mi i godaon.—Kate we i gat 13 yia blong hem.
“Bigfala problem blong mi se mi stap fraet. Samtaem mi harem se insaed long mi sloslo mi stap kam emti.”—Ivan we i gat 19 yia blong hem.
OL FILING oli gat bigfala paoa. Oli save jenisim tingting mo fasin blong yu. Oli save pulum yu blong mekem wan gudfala samting no wan samting we i nogud. Samtaem oli strong moa i winim tingting blong yu. Jacob we i gat 20 yia blong hem, i talem se: “Klosap oltaem mi harem se mi mi no naf. Plante taem mi no naf blong mekem samting we mi mi wantem mekem. Ale mi krae. Sipos no, mi kam kros nao mi faerap long olgeta we oli stap klosap long mi. I hadwok long mi blong bos long ol filing blong mi.”
Blong kam wan bigman long tingting blong yu we yu save tekem ol gudfala desisen, yu mas lanem blong bos long ol filing blong yu. Sam man we oli gat bigfala save long bisnes ya, oli talem se sipos yumi save bos long ol filing blong yumi mo yumi save rod blong winim trabol wetem ol defren kaen man, hemia i moa impoten i bitim we yumi gat hed. Nating se i olsem wanem, be Baebol i soemaot se i impoten tumas blong bos long ol filing blong yumi. Ol Proveb 25:28 i talem se: “Sipos yu no save holem kros blong yu, bambae i no gat man i save givhan long yu. Bambae yu kam olsem taon we i no gat bigfala stonwol i goraon long hem, we i isi nomo blong ol enemi blong hem oli kam mekem faet long hem.” ?From wanem i hadwok blong bos long ol filing blong yumi?
Bigfala Traem Long Ol Yangfala
Ol yangfala, ol olfala, ol man mo woman we oli gruap long ol defdefren ples mo famle, olgeta evriwan oli faenem i hadwok blong bos long ol filing blong olgeta. Be samting ya i hadwok moa long olgeta we oli stap pastru long ol yia blong yangtaem. Buk blong Ruth Bell (Changing Bodies, Changing Lives) i talem se: “Bighaf blong ol yangfala oli konfius long filing blong olgeta. Oli save gat filing we i narakaen, i gud, i mekem olgeta oli fraet, no i fasfas. Plante long olgeta oli save gat plante defren filing wantaem long saed blong wan samting. . . . Maet yu yu gat wan filing, nao smoltaem biaen, filing blong yu i jenis i kam defren olgeta.”
Mo tu, from we yu no bin laef longtaem, i gat plante samting we yu yu no save yet. (Ol Proveb 1:4) Taswe, taem wan samting i kamaot we i no bin kamaot bifo, no taem yu fesem wan niufala traem, yu save harem se yu fraet mo se samting ya i bigwan tumas long yu. Yumi glad tumas se God we i Wokem yumi, hem i kasem save long ol filing blong yumi. Hem i save tu ‘ol samting we oli stap mekem tingting blong yu i trabol.’ (Ol Sam 139:23, NW ) God i givim advaes long Baebol we i save givhan long yumi.
Bigfala Samting Blong Bos Long Ol Filing
Blong bos long ol filing blong yu, wan bigfala samting we yu mas lanem hemia blong bos long ol tingting blong yu. Sipos yu tingting long nogud saed blong laef oltaem, samting ya i save daonem paoa blong yu, hemia paoa we yu nidim blong yu save girap mo mekem wan samting. (Ol Proveb 24:10) ?Be olsem wanem yu save lanem blong tingting long gudfala saed blong laef, nao long rod ya, yu save bos long ol filing blong yu?
Wan samting se, yu no mas tingbaot ol nogud samting we oli save mekem tingting blong yu i foldaon no oli save mekem yu yu fraet. Baebol i givim advaes se yumi mas tingting long ol samting we oli “hae” mo oli “stret.” Sipos yu mekem olsem, yu save tingting long gudfala saed blong laef, mo ronemaot ol tingting we oli mekem se yu tingbaot nogud saed blong laef oltaem. (Filipae 4:8) Maet yu luk se i no isi blong mekem olsem, be sipos yu traehad, yu save mekem.
Tingbaot yangfala woman ya we nem blong hem Jasmine. Hem i harem nogud, i talem se: “Mi mi harem se mi no naf nating blong mekem ol samting we mi mas mekem, olsem ol niufala wok, mo ol niufala desisen. Ol filing blong mi oli slak we oli slak. Mi faenem i hadwok blong spel long tingting blong mi.” Ol yangfala oli no mas sapraes sipos oli harem olsem samtaem. I tru, long taem olsem, oli save fraet, mo maet oli no save wanem rod blong folem. Baebol i tokbaot yangfala man ya Timoti, we hem i naf gud blong mekem ol wok blong hem. Be hem tu i gat filing ya se hem i no naf.—1 Timoti 4:11-16; 2 Timoti 1:6, 7.
Ating yu yu fraet taem yu mas mekem wan wok we yu no bin mekem bifo. Maet yu tingting se, ‘Neva bambae mi save mekem wok ya.’ Be yu yu save bos long filing ya sipos yu no tingting long nogud saed blong bisnes ya. Yu mas tingbaot nomo blong lanemgud wok ya. Yu mas askem plante kwestin long saed ya, mo yu mas folem advaes.—Ol Proveb 1:5, 7.
Taem yu kam gud long wan wok, yu no moa fraet nao. Yu no mas tingting oltaem long ol slak fasin blong yu, from we samting ya i save kilim paoa blong yu mo blokem yu blong yu no moa traehad blong kam gud. Wan taem, samfala oli tok blong daonem aposol Pol, be hem i ansa long olgeta se: “Maet mi no skul gud blong tok, be mi mi savegud ol stamba blong gud nius, mi no sot nating long saed ya.” (2 Korin 10:10; 11:6) Yu tu yu save gat strong tingting olsem, sipos yu luksave ol samting we yu yu gud long hem, mo sipos yu lukluk i go long God blong i givhan long yu blong winim ol slak fasin blong yu. God i save givhan bigwan long yu, olsem hem i bin givhan long plante man long taem bifo.—Eksodas 4:10.
Wan narafala samting we i save givhan long yu blong bos long ol filing blong yu, hemia blong traehad blong kasem ol mak we oli stret long yu, oli no strong tumas. Mo yu no mas traem bitim mak ya we i stret long yu. Mo tu, yu no mas skelem yu wetem ol narafala we maet oli gat moa janis bitim yu. Long Galesia 6:4, Baebol i givim gudfala advaes ya se: “Olgeta man wanwan oli mas traem ol wok we olgeta nomo oli mekem. Nao oli save makem we oli kam man olsem wanem from ol wok blong olgeta nomo, i no from wok blong sam narafala man.”
No Kam Kros Kwik
I hadwok tu blong holem kros blong yumi. Plante yangfala oli olsem Kate we yumi tokbaot fastaem finis. Taem oli kam kros, oli talem ol nogud tok no oli mekem wan nogud samting we i spolem narafala.
I tru, yumi evriwan, sam samtaem yumi kam kros. Be tingbaot Ken we hem i fas man blong kilim narafala i ded. Ken i kam “kros tumas,” nao God i givim woning long hem se kros ya i save pulum hem blong mekem bigfala sin. God i talem long Ken se: “Yu yu mas winim [fasin nogud ya].” (Jenesis 4:5-7) Ken i no lesin long advaes ya blong God. !Be yu yu mas letem God i givhan long yu, nao yu save holem kros blong yu mo blokem sin!
Bakegen, yu nidim blong bos long ol tingting blong yu. Long Ol Proveb 19:11, Baebol i talem se: “Sipos yu gat hed [“fasin luksave,” NW ], bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.” Taem narafala i mekem yu yu harem nogud, traem luksave from wanem hem i mekem olsem. ?Hem i minim nomo blong spolem yu? ?Ating hem i no tingting gud fastaem? ?Maet hem i no save se hem i stap mekem i no stret? Sipos yu fogetem mastik blong narafala, yu yu stap soemaot wan fasin blong God, hemia sore. Mo tu, samting ya i save givhan long yu blong holem kros blong yu.
?Be olsem wanem sipos narafala i mekem samting we i nogud tumas, we yu yu gat raet blong kros from? Baebol i talem se: “Sipos yufala i kros, yufala i no letem we kros ya i lidim yufala, blong yufala i mekem sin.” (Efesas 4:26) Sipos yu ting se yu nidim blong tokbaot bisnes ya wetem narafala ya, yu save mekem olsem. (Matiu 5:23, 24) Sipos no, maet i gud blong fogetem nomo—lego kros mo gohed long laef blong yu.
I gud blong makem tu se, long saed blong kros, fasin blong ol fren blong yu i save gat paoa long yu. Taswe Baebol i talem se: “I nogud yu stap fren long ol man blong faerap, we oli save kros kwik. Yu mas lukaot gud. Sipos no, bambae yu tekem fasin blong olgeta, nao bambae i strong blong yu jenisim fasin ya blong yu bakegen.”—Ol Proveb 22:24, 25.
Sipos yu kampani wetem ol man we oli traehad blong blokem kros blong olgeta, samting ya i save givhan long yu tu blong kontrolem kros. I gat fulap man mo woman olsem long ol Kristin kongregesen blong ol Witnes blong Jeova. Plante long olgeta ya we oli bigman long tingting blong olgeta, oli olfala moa long yu mo oli bin winim plante trabol finis long laef blong olgeta. I gud we yu traem savegud olgeta. Lukluk gud long fasin blong olgeta blong winim ol trabol. Maet oli save givhan long yu blong mekem “waes desisen” taem wan trabol i kasem yu. (Ol Proveb 24:6, NW ) Jacob, we yumi ridim tok blong hem finis, i talem se: “Mi mi tinghae tumas long ol fren we oli pulum mi mi go long Tok blong God. Sipos mi tingbaot se Jeova i lavem mi, nating we mi fraet long plante samting, filing mo tingting blong mi i kam kwaet.”
Sam Narafala Gudfala Advaes
Wan buk we i tokbaot ol eksasaes i talem se: “Ol man we oli stadi long bisnes ya oli pruvum se taem yu muvmuvum bodi blong yu, ol kemikol long blad oli wokgud tugeta nao oli mekem se yu haremgud. Ol defdefren fasin blong muvmuvum bodi oli save mekem se level blong ol hormone mo oksijen long blad i jenis, maet i kam antap no maet i godaon.” I kliagud se eksasaes i save mekem i gud long bodi blong yu. Baebol i talem se: “Eksasaes i save givhan long bodi blong yu.” (1 Timoti 4:8, Today’s English Version) I gud yu folem wan program blong trenem bodi blong yu lelebet. Yu save harem gud from. I gud tu blong tekem ol kakae we i gud long bodi.
Nao traem tingbaot wanem miusik mo sinema we yu yu stap jusum. Niuspepa ya The Harvard Mental Health Letter i tokbaot wan stadi we samfala oli mekem, i se: “Olgeta we oli lukluk ol stori blong faet . . . oli kam kros mo oli wantem faet tu. . . . Olgeta we oli lukluk ol raf fasin oli gat tingting blong agensem ol narafala, mo blad presa blong olgeta i kam antap.” From samting ya, yu mas waes mo jusumgud ol samting we yu stap lukluk mo lesin long hem.—Ol Sam 1:1-3; 1 Korin 15:33.
Antap long olgeta samting ya, beswan rod blong lanem blong bos long ol filing blong yu, i blong frengud wetem God. Hem i wantem se yumi toktok wetem hem long prea, blong talemaot ol filing blong yumi long hem. Aposol Pol i leftemap tingting blong yumi i se: “Sipos yufala i trabol from sam samting, i nogud yufala i stap tingting tumas, . . . Yufala i mas askem long [God], mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala.” Yes, tingting blong yu i save kam strong, we yu naf blong fesem enikaen trabol long laef. Aposol Pol i gohed, i talem se: “Mi mi naf blong mekem evri samting long paoa blong Hemia we i stap givim paoa long mi.” (NW )—Filipae 4:6, 7, 13.
Yangfala Malika i talem se: “Mi mi lanem finis blong prea, mo prea, mo prea bakegen. Mi save se Jeova i stap tingbaot mi, from samting ya, tingting blong mi i kwaet mo mi save bos long ol filing blong mi.” God i save givhan long yu tu blong yu lanem blong bos long ol filing blong yu.
[Tok blong makem poen long pej 13]
Blong bos long ol filing blong yu, wan bigfala samting we yu mas lanem hemia blong bos long ol tingting blong yu
[Tok blong pija long pej 14]
Kampani wetem olgeta we oli olfala moa long yu, hemia i save tijim yu blong bos long ol filing blong yu