?Wanem Tingting Blong God Long Saed Blong Ol Strong Dring?

GOD we i Wokem yumi, mo we i wantem se yumi harem gud, i no putum tabu long fasin blong dring smol waen mo ol narafala strong dring.a Defren olgeta, hem i givim ‘waen blong mekem man i glad, olifoel blong mekem fes blong hem i saen mo kakae blong mekem hem i strong.’ (Ol Sam 104:15) Wan taem, Jisas Kraes i mekem se i gat glad long wan mared taem hem i tanem wota i kam “bes waen.”​—Jon 2:3-10.

I stret nomo blong ting se Man we i Wokem yumi i save gud olsem wanem strong dring i save spolem bodi mo bren blong yumi. Papa blong yumi long heven i givim Baebol long yumi blong ‘tijim yumi blong givhan long yumi,’ mo hem i givim strong woning long yumi long fasin ya blong dring bitim mak. (Aesea 48:17) Tingbaot ol klia woning ya:

“Yufala i no dring waen, gogo yufala i lusum hed. Samting ya bambae i spolem yufala nomo.” (Efesas 5:18) ‘Man we i stap dring we i lusum hed bambae i no save go insaed samtaem long niufala wol ya we God i king long hem.’ (1 Korin 6:9-11) Tok blong God i agensem fasin ya we man i ‘dring we i lusum hed, mo i stap mekem lafet blong mekem nogud nomo, mo i stap mekem ol narafala samting olsem.’​—Galesia 5:19-21.

Naoia bambae yumi tokbaot sam long ol denja we i kamaot taem man i dring tumas.

Denja We i Kamaot From Fasin Blong Dring Bitim Mak

I tru se strong dring i save mekem i gud smol long bodi blong yumi. Be i gat sam samting insaed long hem we paoa blong olgeta i strong tumas mo oli save jenisim wok we tingting mo bodi blong yumi i stap mekem. Taem man i dring bitim mak, samting ya i save mekem ol problem olsem i kamaot:

Strong dring i spolem tingting blong man, nao hem i “no save tingting gud.” (Ol Proveb 23:33) Allen, man blong dring ya we yumi tokbaot long laswan haf, i eksplenem se: “Fasin blong drong i no wan sik blong bodi nomo; hem i wan sik blong tingting mo fasin tu. Yu no tingbaot soa we fasin ya i mekem long ol narafala man.”

Man we i dring bitim mak i no fraet blong mekem ol samting we oli rong. Baebol i givim woning se: “Waen mo swit waen, oli tekemaot gudfala tingting.” (Hosea 4:11, NW) ?Tok ya i minim wanem? Taem yumi dring bitim mak, paoa blong dring ya i save trikim tingting blong yumi. Ale sloslo, ol nogud tingting mo filing we yumi stap blokem oltaem, yumi ting se oli oraet nomo, mo samtaem oli save pulum yumi blong mekem samting we i no stret. Strong dring i save slakem tingting we yumi gat blong mekem samting we i stret. Hem i save spolem ol gudfala fasin blong yumi, nao yumi no moa frengud wetem God.

Tingbaot John. Hem i rao wetem waef blong hem mo i kros tumas, nao i aot i go long wan ba. Hem i dring blong mekem se kros blong hem i godaon, ale wan woman i kam long hem. Hem i gohed blong dring gogo, hem i aot wetem woman ya mo i slip wetem hem. Biaen, John i harem nogud bigwan, from we strong dring nao i mekem se hem i no fraet blong mekem rabis fasin ya, we hem i no save tingbaot blong mekem sipos hem i gudhed.

Man we i dring bitim mak i no lukaotgud long toktok mo aksen blong hem. Baebol i stanemap ol kwestin ya se: “?Hu i stap oltaem long trabol? ?Hu i stap rao mo faet? Olgeta we oli wekap let, we oli dring wan moa glas, laswan. “ (Ol Proveb 23:29, 30, Contemporary English Version) Dring bitim mak i save mekem yu yu “harem olsem we yu stap long bigsi, nao yu stap traot, no yu stap hang antap long mas blong sip, we bigsi i stap sakem i go olbaot.” (Ol Proveb 23:34) Wan man we i fuldrong long waen, i save wekap we “i gat kil olbaot long bodi blong hem, be i no tingbaot se wanem i bin hapen long hem.”​—Ol Proveb 23:35, CEV.

Dring bitim mak i save spolem helt. “Long en blong hem, [strong dring] i kakae olsem snek i kakae man, mo hem i wokem posen blong hem stret olsem posen snek i mekem.” (Ol Proveb 23:32, NW) Ol dokta oli pruvum se waestok ya i tru nomo. Taem man i dring tumas, strong dring i kam wan strong posen we i mekem se hem i save kasem plante kaen kansa, hepataetas, sik blong leva (cirrhosis), sik blong suga, strok, hat problem, i save spolem pankreas, mo i save spolem bebi we i stap long bel blong mama (fetal alcohol syndrome [FAS]). Hemia sam nomo long ol nogud samting we i kamaot from fasin blong dring tumas. Mo wan samting we i moa nogud, hemia se dring bitim mak olsem i save mekem se man i hafded, no i save ded olgeta. Be long ol buk blong ol dokta, oli no talemaot wan narafala frut we i moa nogud.

Denja we i moa nogud. Nating se wan man i no kam drong taem i dring, be sipos hem i dring bitim mak, hem i save spolem fasin fren blong hem wetem God. Baebol i talem klia se: “Yufala ya we i stap girap long eli moning blong go lukaot waen, nao yufala i stap dring go kasem medel naet, gogo yufala i hablok, sore tumas long yufala.” ?From wanem? Aesea i eksplenem olsem wanem dring bitim mak i spolem fasin fren we man i gat wetem God, i se: “Yufala i no save tingbaot ol samting we Hae God i stap mekem, yufala i no save luksave ol wok ya we hem i stap wokem.”​—Aesea 5:11, 12.

Tok blong God i givim advaes long yumi se yumi no mas “kampani wetem ol man we oli dring waen tumas.” (Ol Proveb 23:20, NW) Ol olfala woman oli kasem woning ya blong no “dring plante waen gogo oli slef long fasin ya.” (Taetas 2:3, NW) ?From wanem? From we plante taem, ol man oli no luksave se sloslo oli stap dring plante moa strong dring. Mo biaen, maet man ya blong dring i askem se “?From wanem mi no save wekap gud? Naoia mi mas dring wan glas bakegen.” (Ol Proveb 23:35) Taem man i mas dring long moning blong kasem paoa bakegen from ol samting we hem i mekem long naet bifo, man ya i kasem wan mak we i nogud olgeta long saed blong dring.

Baebol i givim woning se olgeta man we oli ‘dring lusum hed, mo oli stap mekem lafet blong ronem woman, mo oli dring grog blong kam fuldrong, bambae oli mas talemaot laef blong olgeta long fes blong God, we hem i stap rere blong jajem ol man we oli ded, wetem ol man we oli laef.’ (1 Pita 4:3, 5) Mo from we yumi laef long wan taem we i strong tumas, Jisas i givim woning ya se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas long laef blong wol ya. I nogud Dei ya blong [Jeova] i kam kasem yufala wantaem nomo, we yufala i no tingbaot nating, olsem we yufala i fas long wan trap.”​—Luk 21:34.

?Be, man we i dring bitim mak i save mekem wanem, blong hem i no ‘westem taem blong hem long fasin ya blong drong’?

[Futnot]

[Tok blong pija long pej 4]

Man we i dring bitim mak i save kasem plante trabol