?Olsem Wanem Blong Makemaot Waes Blong God?

“LONG taon ya, i gat wan puaman i stap we i waes gud, we i save sevem taon ya, be i no gat man i save lukluk long hem.” Hemia ol tok we waes King Solomon i talem long en blong wan stori long saed blong wan waes man we i pua. Waes man ya i sevem wan taon, mekem se ol man oli no lus. Be sore tumas, ‘i no gat man i save tingbaot pua man ya.’—Prija 9:14-16.

Ol man oli gat fasin blong ting nating long olgeta we oli pua, nating se ol puaman ya oli bin mekem sam gudfala wok. Samting ya i tru long saed blong Jisas. Long wan profet tok, Aesea i tokbaot hem i se: “Nao yumi lukluk nogud long hem, yumi tanem baksaed long hem. Hem i wan man we i harem nogud plante taem, mo i savegud olgeta samting we i stap mekem man i harem nogud. Yumi tanem fes blong yumi, olsem we hem i nating nomo, mo i no gat man i save lukluk i go long hem.” (Aesea 53:3) Samfala man oli luk nogud long Jisas jes from we hem i no gat haenem mo hem i no rij olsem ol lida long taem blong hem. Nating se i olsem, waes blong hem i bitim waes blong olgeta man long wol ya. Ol manples blong Jisas oli no wantem luksave se Jisas we i “pikinini blong man ya blong wokem haos” i soemaot waes ya mo i mekem ol bigbigfala wok. Be oli mekem wan bigfala mastik, from se stori i gohed i talem se Jisas “long ples ya, hem i no mekem plante merikel, from we oli no bilif long hem.” !Ol man ya bambae oli lus!—Matiu 13:54-58.

Yumi no mas mekem sem mastik. Jisas i talem se: “Ol gudfala wok blong ol man we oli stap folem waes blong God, oli stap soemaot we waes ya i tru.” Ol man we oli stap mekem wok blong God mo i givhan long ol narafala blong kasem waes blong God, ol narafala oli makemaot olgeta, i no from haenem no ol rij samting ya we oli gat, be from “gudfala frut” we oli soemaot—bilif mo wok blong olgeta we i stanap long Baebol.—Matiu 7:18-20; 11:19.