Man Blong Wok Blong Jeova—“Oli Sperem Hem Blong Kavremap Sin Blong Yumi”

“[“Oli sperem hem blong kavremap sin blong yumi. Oli mekem hem i harem nogud from ol rong blong yumi,” NW]. . . . Ol sobodi ya we hem i karem, i mekem yumi i gud bakegen.”—AES. 53:5.

1. ?Wanem samting we yumi mas tingbaot taem yumi mekem Memoriol? ?Wanem profet tok we bambae i givhan long yumi blong mekem samting ya?

YUMI mekem Memoriol blong tingbaot ded blong Jisas, mo blong tingbaot olgeta samting we ded mo laef bakegen blong hem i mekem i kamtru. Miting blong Memoriol i mekem yumi tingbaot se hae rul blong Jeova bambae i win, bambae hem i leftemap tabu nem blong hem i kam hae olgeta, mo ol samting we hem i wantem bambae oli kamtru, we wan long olgeta hemia blong sevem ol man. Ating i no gat wan narafala profet tok long Baebol we i soemaot gud moa i bitim profet tok blong Aesea 53:3-12, sakrefaes blong Jisas mo samting we sakrefaes ya i mekem. Aesea i tokbaot olsem wanem Man blong Wok blong God bambae i harem nogud long bodi blong hem, mo i talemaot plante smosmol save long saed blong ded blong hem, mo ol blesing we bambae ol tabu brata blong hem mo “ol narafala sipsip” oli kasem from ded blong hem.—Jon 10:16.

2. ?Profet tok blong Aesea i pruvum wanem? ?Bambae hem i gat wanem paoa long yumi?

² Seven handred yia bifo we Jisas i bon long wol ya, Jeova i pusum Aesea blong talemaot se Man blong Wok blong Hem bambae i stap fasgud long hem, nating se hem i kasem traem gogo i ded. Samting ya i pruvum se Jeova i trastem fulwan we Pikinini blong hem bambae i stap fasgud long hem. Taem yumi stadi long profet tok ya, bambae hat blong yumi i fulap long tangkiu, mo bilif blong yumi tu bambae i kam strong.

Ol Man Oli “Lukluk Nogud Long Hem” Olsem We “Hem i Nating Nomo”

3. ?From wanem i stret nomo blong ol man Jiu oli mekem welkam long Jisas? ?Be taem Jisas i kam, oli mekem wanem?

³ Ridim Aesea 53:3. !Traem tingbaot olsem wanem Pikinini ya blong God, wan nomo we hem i gat, i mas lego wok ya we hem i glad blong mekem klosap long Papa blong hem long heven, mo kamdaon long wol ya blong givim laef blong hem olsem wan sakrefaes blong sevem ol man long sin mo ded! (Fil. 2:5-8, NW) Aninit long Loa blong Moses, oli kilim ol anamol blong mekem sakrefaes, be ol sakrefaes ya oli olsem sado nomo blong sakrefaes blong Jisas, we i tekemaot olgeta sin blong yumi blong olwe. (Hib. 10:1-4) Taswe, i stret nomo sipos ol man oli mekem welkam long Jisas mo oli ona long hem, antap moa, ol man Jiu we oli stap wet long Mesaea ya we God i promes se bambae i kam. (Jon 6:14) Be ol man Jiu oli no mekem olsem. Oli “lukluk nogud long hem” olsem we “hem i nating nomo,” stret olsem profet tok blong Aesea i talem. Aposol Jon i raetem se: “Hem i kamtru long stret ples blong hem, be ol man ples blong hem oli no glad long hem, oli no wantem luk hem.” (Jon 1:11) Aposol Pita i talem long ol man Jiu i se: “God blong ol olfala blong yumi bifo . . . i leftemap nem blong man blong wok blong hem, Jisas. Hemia sem Jisas ya we yufala i tekem hem i go long kot, mo we biaen long taem ya we Paelat i talem finis, se hem i save go fri, yufala i girap, yufala i talem long fes blong Paelat se yufala i no wantem hem. Jisas ya, hem i Man we i stret mo i tabu, be yufala i no wantem hem.”—Wok 3:13, 14.

4. ?Olsem wanem Jisas i savegud ol sik?

⁴ Aesea i talemaot tu se Jisas bambae i “savegud olgeta samting we i stap mekem man i harem nogud.” Taem Jisas i stap prij, i sua se samtaem hem i taed, be i no gat wan ples long Baebol we i talem se hem i sik. (Jon 4:6) Be Jisas i savegud ol sik we ol man we hem i prij long olgeta, oli kasem. Hem i sore long olgeta mo i mekem plante long olgeta oli kamgud bakegen. (Mak 1:32-34) Long rod ya, Jisas i mekem profet tok ya i kamtru, we i talem se: “Olgeta samting we i stap mekem yumi harem nogud, hem i karem olgeta evriwan. Ol sobodi we hem i karem, hemia ol sobodi blong yumi.”—Aes. 53:4a; Mat. 8:16, 17.

I Olsem Se ‘God Nomo i Kilim Hem’

5. ?Wanem tingting we plante man Jiu oli gat long ded blong Jisas? ?From wanem samting ya i mekem se hem i harem nogud moa?

⁵ Ridim Aesea 53:4b. Plante long ol man we oli laef long taem blong Jisas oli no kasem save from wanem hem i safa mo i ded. Oli bilif se God i panisim hem, olsem se God i mekem hem i kasem wan sik we i nogud olgeta. (Mat. 27:38-44) Ol man Isrel oli jajem hem se hem i tok nogud long God. (Mak 14:61-64; Jon 10:33) Be Jisas i no wan man blong mekem sin mo i no tok nogud long God. Mo from we Man blong Wok ya blong Jeova i lavem Papa blong hem tumas, tingting ya se hem i mas ded from we hem i tok nogud long papa blong hem i mekem se hem i harem nogud moa. Nating se i olsem, hem i gohed nomo blong mekem samting we Jeova i wantem.—Mat. 26:39.

6, 7. ?Olsem wanem Jeova i “kilim” Man blong Wok we i fasgud long hem? ?From wanem samting ya i mekem God i “glad”?

⁶ Yumi no sapraes long profet tok ya blong Aesea we i talem se ol man bambae oli talem se ‘God i kilim’ Jisas Kraes. Be maet yumi sek long profet tok ya we i talem se: “Jeova i glad blong kilim hem i ded.” (Aes. 53:10, NW) Yumi save se Jeova i talem tok ya: “!Yufala i luk! Hemia man blong wok blong mi, we mi mi . . . jusumaot hem, mo mi mi glad tumas long hem.” ?Taswe, olsem wanem Jeova i save “glad blong kilim hem i ded”? (Aes. 42:1) ?Olsem wanem yumi save talem se samting we i hapen long Jisas i mekem Jeova i glad?

⁷ Blong kasem save long profet tok ya, yumi mas tingbaot se taem Setan i tok agensem hae rul blong Jeova, hem i talem tu se olgeta man blong God long heven mo long wol, oli no save holemstrong long Hem. (Job 1:9-11; 2:3-5) Taem Jisas i fasgud long God gogo kasem we hem i ded, hem i ansarem ol giaman tok ya blong Setan long fasin we i stret olgeta. Taswe, nating se Jeova i letem ol enemi blong Jisas oli kilim hem i ded, be i sua se Jeova i harem nogud tumas taem hem i luk we ol man oli kilim Man blong Wok we hem i jusumaot. Nating se i olsem, Jeova i glad tumas taem hem i luk we Pikinini blong hem i stap tru fulwan long hem. (Prov. 27:11) Mo tu, Jeova i glad tumas from we hem i save se ded blong Pikinini blong hem bambae i givhan bigwan long ol man we oli tanem tingting blong olgeta from sin blong olgeta.—Luk 15:7.

“Oli Sperem Hem Blong Kavremap Sin Blong Yumi”

8, 9. (a) ?Olsem wanem “oli sperem [Jisas] blong kavremap sin blong yumi”? (b) ?Olsem wanem Pita i pruvum samting ya?

⁸ Ridim Aesea 53:6. Ol sinman oli olsem ol sipsip we oli lusum rod, oli go olbaot blong traem faenem rod blong kam fri long sik mo ded we oli kasem long Adam. (1 Pita 2:25) From we ol pikinini blong Adam oli no stretgud olgeta, i no gat wan long olgeta we i naf blong pembak samting we Adam i lusum. (Sam 49:7) Be from bigfala lav blong Jeova, hem “i putum ol sin blong yumi evriwan i go long man ya nomo,” hemia Pikinini blong hem we Hem i laekem tumas mo Man blong Wok we Hem i jusumaot. Taem Jisas Kraes i agri blong “oli sperem hem blong kavremap sin blong yumi” mo blong “oli mekem hem i harem nogud from ol rong blong yumi,” hem i karem ol sin blong yumi i go long pos mo i ded long ples blong yumi.

⁹ Aposol Pita i raetem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem. [“Hem i karem olgeta sin blong yumi long bodi blong hem long pos, blong yumi save finis long sin mo yumi save stap laef long stret fasin,” NW].” Biaen, Pita i yusum tok blong Profet Aesea i se: “Ol sobodi ya we hem i karem, i mekem yufala i gud bakegen finis.” (1 Pita 2:21, 24; Aes. 53:5) Samting ya i openem rod blong ol sinman oli frengud wetem God, olsem ol narafala tok ya blong Pita i talem, se: “Kraes we laef blong hem i stret olgeta, hem i tekem ples blong yufala we laef blong yufala i no stret, nao i ded blong tekemaot sin blong yufala blong tekem yufala i kam long God. Hem i ded wan taem nomo, we bambae i no moa save ded bakegen samtaem.”—1 Pita 3:18.

‘Hem i Olsem Smol Sipsip We Oli Stap Tekem i Go Blong Kilim’

10. (a) ?Jon Baptaes i tokbaot Jisas olsem wanem? (b) ?From wanem ol tok blong Jon oli stret nomo?

¹⁰ Ridim Aesea 53:7, 8. Taem Jon Baptaes i luk Jisas i stap kam, hem i talem se: “!Olgeta! Man ya, hem i smol sipsip blong God, we hem bambae i tekemaot sin blong olgeta man long wol.” (Jon 1:29) Taem Jon i tokbaot se Jisas i olsem smol sipsip, maet hem i tingbaot ol tok ya blong Aesea we i talem se: “Hem i olsem smol sipsip nomo we oli stap tekem i go blong kilim.” (Aes. 53:7) Profet Aesea i talemaot se: “Hem i glad nomo blong letem laef blong hem gogo i ded.” (Aes. 53:12) Samting we i pulum intres blong yumi hemia se, long naet we Jisas i stanemap Memoriol blong ded blong hem, hem i givim wan kap waen long ol 11 aposol blong hem we oli stap tru long hem, mo i talem se: “Hemia [“i minim,” NW] blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.”—Mat. 26:28.

11, 12. (a) ?Fasin ya we Aesak i rere blong letem papa blong hem i kilim hem olsem wan sakrefaes, i soemaot wanem long saed blong sakrefaes blong Jisas? (b) ?Taem yumi mekem Memoriol, wanem samting we yumi mas tingbaot long saed blong Bigfala Ebraham ya, Jeova?

¹¹ Olsem Aesak bifo, Jisas i letem nomo blong ol man oli kilim hem, olsem wan sakrefaes long olta. Olta ya i olsem ol samting we Jeova i wantem blong Pikinini blong hem i mekem. (Jen. 22:1, 2, 9-13; Hib. 10:5-10) Nating se Aesak i rere nomo blong letem papa blong hem i kilim hem olsem wan sakrefaes, be Ebraham nao i faswan we i rere blong givim sakrefaes ya. (Hib. 11:17) Long sem fasin, Jisas i rere mo i agri se hem i mas ded, be Jeova nao hem i Stamba man we i mekem rere rod blong ransom ya. Sakrefaes blong Jisas i soemaot bigfala lav we God i gat long ol man.

¹² Jisas i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Aposol Pol i raetem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) Taswe, yumi stap ona long Jisas taem yumi tingbaot ded blong hem. Be yumi no mas fogetem se man we i mekem rere rod blong sakrefaes ya i kamtru, hemia Bigfala Ebraham ya, Jeova. Yumi mekem Memoriol blong leftemap nem blong hem.

Man Blong Wok i “Mekem Plante Man Oli Kam Stret Man”

13, 14. ?Olsem wanem Man blong Wok blong Jeova i “mekem plante man oli kam stret man”?

¹³ Ridim Aesea 53:11, 12.a Jeova i talem long saed blong Man blong Wok we hem i jusumaot, i se: “Stret man ya we i man blong wok blong mi, bambae hem i mekem plante man oli kam stret man.” ?Olsem wanem hem i mekem samting ya? Lashaf blong vas 12 i givim ansa, i se: “Hem [Man blong Wok] i givhan long ol man nogud.” Evri pikinini blong Adam oli bon wetem sin, oli “man nogud,” taswe oli kasem ‘pei blong sin,’ hemia ded. (Rom 5:12; 6:23) I nidim we ol sinman oli frengud bakegen wetem Jeova. Profet tok blong Aesea japta 53 i tokbaot long naes fasin olsem wanem Jisas i ‘givhan,’ no i safa long bihaf blong yumi ol sinman, i se: “Ol sobodi ya we hem i karem, i mekem yumi i gud bakegen. Panis ya we hem i kasem, i mekem we yumi gat pis.”—Aes. 53:5.

¹⁴ Taem Jisas Kraes i karem ol sin blong yumi mo i ded long ples blong yumi, hem i “mekem plante man oli kam stret man.” Pol i raetem se: “Kraes i nambawan olsem, from we God i glad blong letem olgeta [“fasin blong hem,” NW] i stap long Kraes. Mo from we blad blong Kraes i ron long [“pos,” NW], God i glad blong mekem rod long Kraes blong i tekem olgeta samting long heven mo long wol oli kam joen long hem bakegen blong oli gat pis.”—Kol. 1:19, 20.

15. (a) ?“Olgeta samting long heven” we Pol i tokbaot, oli hu? (b) ?Hu olgeta ya nomo we oli save kakae bred mo dring waen long taem blong Memoriol? ?From wanem?

¹⁵ “Olgeta samting long heven” we blad blong Jisas i mekem se oli joen bakegen wetem Jeova, hemia ol Kristin we tabu spirit i makemaot olgeta, mo we Jeova i jusumaot olgeta blong oli go rul wetem Kraes long heven. God i talem se ol Kristin we hem “i singaot” olgeta blong oli kasem gudfala laef long heven, ‘hem i luk olgeta se oli stret man mo oli save laef.’ (Hib. 3:1; Rom 5:1, 18) Biaen, Jeova i agri long olgeta blong oli kam ol spirit pikinini blong hem. Tabu spirit i soemaot long olgeta se bambae oli “joen long Kraes blong kasem haf long ol gudgudfala samting we God i putum olgeta oli tabu, se bambae oli blong Kraes.” Bambae oli kam king mo pris long Kingdom blong hem long heven. (Rom 8:15-17; Rev. 5:9, 10) Oli kam haf blong Isrel long saed blong spirit, “Isrel blong God,” mo oli stap insaed long “niufala promes.” (Jer. 31:31-34; Gal. 6:16, NW) From we oli joen long niufala promes ya, oli gat raet blong kakae bred long taem blong Memoriol, mo dring long kap blong red waen ya tu we Jisas i tokbaot se: “Kap ya i saen blong niufala promes blong God, mo blad blong mi, we bambae i ron from yufala, hem bambae i mekem promes ya i stanap.”—Luk 22:20.

16. ?Wanem ya “olgeta samting long wol”? ?Long wanem rod oli kam stret man long fored blong Jeova?

¹⁶ “Olgeta samting long wol,” oli ol narafala sipsip blong Kraes we bambae oli kasem laef we i no save finis long wol ya. Man blong Wok we God i jusumaot, bambae i mekem olgeta ya tu oli kam stret man long fored blong Jeova. Olgeta ya oli bilif long ransom sakrefaes blong Jisas, mo long rod ya oli “wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet.” From samting ya, Jeova i luk olgeta olsem we oli stret man mo oli fren blong hem, be oli no kam ol spirit pikinini blong hem. Mo Jeova i givim nambawan promes ya long olgeta se oli save laef tru long “bigfala trabol.” (Rev. 7:9, 10, 14; Jem. 2:23) Ol narafala sipsip ya oli no joen long niufala promes mo bambae oli no laef long heven, taswe oli no kakae bred mo oli no dring waen long taem blong Memoriol, be oli joen long miting ya blong soem respek.

!Bigfala Tangkiu Long Jeova Mo Man Blong Wok We Hem i Glad Long Hem!

17. ?Olsem wanem stadi ya long ol profet tok blong Aesea we oli tokbaot Man blong Wok, i givhan long yumi blong yumi rerem tingting blong yumi from Memoriol?

¹⁷ Stadi ya long ol profet tok blong Aesea we oli tokbaot Man blong Wok, i wan gudfala rod blong yumi rerem tingting blong yumi from miting blong Memoriol blong tingbaot ded blong Jisas Kraes. Stadi ya i givhan long yumi blong ‘yumi luklukgud long Jisas [we] i Bigfala Man we God i yusum blong givim bilif long yumi mo mekem bilif ya blong yumi i stret gud.’ (Hib. 12:2, NW) Yumi lanem se Pikinini blong God i no mekem fasin stronghed, olsem Setan i bin mekem. Jisas i no folem fasin blong Setan, be hem i glad tumas we Jeova i tijim hem, hem i luk Papa blong hem olsem Haefala Masta mo King blong heven mo wol. Yumi bin luk se taem Jisas i stap prij long wol ya, hem i gat sore long ol man we hem i prij long olgeta, i mekem plante long olgeta we oli sik oli kamgud bakegen mo i givhan long plante blong oli fren wetem God. Long rod ya, hem i soemaot ol samting we hem, Mesaea King blong niufala wol, bambae i mekem taem “hem i stanemap [fasin blong God blong jajem man] . . . long wol ya.” (Aes. 42:4) Taem hem i wok strong blong talemaot Kingdom, olsem ‘wan laet long ol man long olgeta kantri,’ hemia i soemaot long ol man blong hem se olgeta tu, oli mas wok strong blong talemaot gud nius long olgeta ples long wol.—Aes. 42:6.

18. ?From wanem profet tok blong Aesea i mekem hat blong yumi i fulap long tangkiu long Jeova mo Man blong Wok ya we i stap tru long hem?

¹⁸ Profet tok blong Aesea i mekem yumi kasem save gud tu long bigfala samting we Jeova i lego long hem, taem hem i sanem Pikinini ya blong hem we hem i laekem tumas, i kam long wol blong i harem nogud mo i ded from yumi. Jeova i no glad blong luk se Pikinini blong hem i safa, be hem i glad tumas taem hem i luk se Jisas i stap tru fulwan long hem gogo kasem we hem i ded. Yumi tu yumi mas glad olsem Jeova, taem yumi luksave olgeta samting we Jisas i mekem blong pruvum se Setan i wan man blong giaman, mo blong leftemap tabu nem blong Jeova. Long fasin ya, hem i soemaot se i stret nomo we Jeova i stap olsem Hae King blong heven mo wol. Mo tu, Jisas i karem ol sin blong yumi mo i ded long ples blong yumi. Long rod ya, hem i mekem se smol kampani blong ol brata blong hem we tabu spirit i makemaot olgeta, wetem ol narafala sipsip, oli save kam stret man long fored blong Jeova. Taem yumi joen wanples long Memoriol, i gud we hat blong yumi i fulap long tangkiu long Jeova mo long Man blong Wok ya we i stap tru long hem.

[Futnot]

Blong Tingtingbak

• ?Olsem wanem Jeova i “glad” taem oli “kilim” Pikinini blong hem?

• ?Olsem wanem ‘oli sperem Jisas blong kavremap sin blong yumi’?

• ?Olsem wanem Man blong Wok i “mekem plante man oli kam stret man”?

• ?Olsem wanem stadi ya blong ol profet tok long saed blong Man blong Wok i rerem tingting mo hat blong yu from Memoriol?

[Tok blong pija long pej 26]

‘Yumi lukluk nogud long hem olsem we hem i nating nomo’