Japta 39

Ol Man We Oli Flas Mo Ol Man We Tingting Blong Olgeta i Stap Daon

FASTAEM, Jisas i storeyan long ol gudfala fasin blong Jon Baptaes. Afta, hem i tokbaot fasin blong ol flas man long taem blong hem. Hem i talem se: “Oli olsem ol pikinini ya we oli stap sidaon long open ples, oli stap singsingaot long olgeta, se ‘Mifala i stap bloem bambu blong yufala i danis, be yufala i no save danis. Mifala i stap singsing long sing blong ded, be yufala i no save krae.’ ”

?Wanem mining blong tok ya blong Jisas? Hem i gohed blong eksplenem se: “Taem Jon i kam, hem i stap livim kakae blong hem blong mekem wosip, mo hem i no dring waen. Nao olgeta oli stap talem se ‘Hem i gat wan devel i stap long hem.’ Be taem mi, mi Pikinini blong Man, mi kam, mi stap kakae, mi stap dring. Nao oli stap talem se ‘Yu luk. Man ya i man blong kakae tumas, i man blong drong. Hem i stap fren long ol man blong tekem mane blong takis, mo ol man nogud.’ ”

Nomata wanem samting Jisas mo ol disaepol blong hem oli mekem, be ol man oli no glad long olgeta. Jon Baptaes i wan ‘Nasaraet,’ taswe hem i stap olsem wan puaman mo hem i stap livim plante samting blong mekem wosip long God. Hem i mas mekem olsem, from we taem hem i stap yet long bel blong mama blong hem, wan enjel i talem se: “Hem bambae i no save dring waen mo grog.” From samting ya, ol man ya oli stap talem se hem i gat wan devel i stap long hem. Taem Jisas i kam, hem i mekem defren fasin. Hem i no stap folem plante rul long saed blong kakae mo dring, hem i stap mekem olsem ol narafala man nomo. From samting ya, oli talem se hem i man blong kakae tumas, mo man blong drong.

!I strong tumas blong mekem se olgeta evriwan oli glad! Ol man ya oli olsem ol pikinini we oli stap pleplei long open ples. Sam long olgeta oli no wantem danis taem ol narafala oli bloem bambu. Samfala oli no wantem krae taem ol narafala oli singsing long sing blong ded. Be Jisas i gohed blong talem se: “Be frut blong waes blong God i stap soemaot we waes ya i tru.” Yes ol frut we oli stap kamaot long laef blong Jon mo Jisas—hemia ol wok blong tufala—oli soemaot klia we ol tok blong ol man ya oli gyaman nomo.

Nao Jisas i stat tok strong long ol man blong ol trifala taon ya, Korasin, Betsaeda, mo Kapaneam. Hem i bin mekem bighaf blong ol merikel blong hem long fes blong ol man long ol taon ya. Jisas i talem se sipos hem i bin mekem ol merikel ya long tufala taon ya Taea mo Saedon—long ples ya we nem blong hem Fenisia—bambae ol man blong tufala ples ya oli save tanem tingting blong olgeta from sin blong olgeta. Bambae oli save putum rabis klos we oli somap long bag nomo, mo oli save putum ases blong faea long bodi blong olgeta blong soemaot se oli sore tru. Taswe hem i tok strong long ol man Kapaneam. I luk olsem we Jisas i bin spenem plante taem long taon ya, taem hem i mekem minista wok blong hem raonabaot long ples ya. Nao Jisas i talem long ol man blong taon ya se: “Long dei ya we God bambae i jajem olgeta man, panis blong yufala bambae i strong moa, i winim panis we ol man ya bifo blong Sodom bambae oli kasem.”

Nao long fored blong ol man ya, Jisas i talem tangkyu long Papa blong hem long heven. Hem i wantem presem Papa blong hem from we God i stap haedem ol gudfala trutok long saed blong speret long fes blong ol waesman mo ol man we oli skul gud. Be hem i soemaot ol gudfala samting ya long ol man we oli olsem smol pikinini nomo, from we tingting blong olgeta i stap daon.

Nao Jisas i leftemap tingting blong ol man, i singaot olgeta se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.”

?Olsem wanem Jisas i save givim spel long ol man? Hem i save mekem olgeta oli kam olsem friman. Ol lida blong ol skul oli mekem ol man oli olsem slef, from we oli putum ol strong rul mo ol kastom long solda blong olgeta, olsem ol loa blong Sabat dei. Jisas i save tekemaot ol rul ya blong oli no stap holem ol man olsem we oli slef long ol rul ya. Mo tu, ol man we oli harem nogud from wok blong ol gavman mo ol man we oli harem nogud long tingting blong olgeta from ol sin we oli bin mekem, oli save harem gud. I olsem we Jisas i save givim spel long olgeta. Hem i soemaot long olgeta olsem wanem oli save kasem fogif blong God, mo olsem wanem oli save fren gud wetem hem.

‘Yok ya we wok blong hem i isi,’ Jisas i save putum long ol man taem oli givim laef blong olgeta i go long God fulwan. Nao oli save mekem wosip long Papa blong yumi long heven, we hem i laekem yumi mo hem i gat sore long yumi. Mo Jisas i givim long ol man sam samting we oli no hevi blong karem. Hemia ol loa blong God long Baebol we yumi mas obei long olgeta blong kasem laef. Taem yumi obei long ol loa ya, i no olsem we yumi karem wan hevi samting. Matyu 11:16-30; Luk 1:15; 7:31-35; 1 Jon 5:3.

▪ ?Olsem wanem ol flas man long taem blong Jisas oli olsem sam pikinini?

▪ ?From wanem Jisas i wantem talem tangkyu long Papa blong hem long heven?

▪ ?Olsem wanem ol man oli stap karem ol hevi samting? ?Olsem wanem Jisas i save givim spel long olgeta?