Karem Yok

9, 10. ?Long taem bifo, yok i wan pijatok we i minim wanem? ?Mo from wanem Jisas i singaot ol man blong oli putum yok blong hem long solda blong olgeta?

⁹ ?Yu yu makem narafala tok ya we Jisas i talem long Matiu 11:28, 29 se: “Yufala i mas putum yok blong mi long solda blong yufala, blong yufala i wok wetem mi”? Long taem blong Jisas, maet ol man olbaot oli harem se oli stap wok wetem wan yok long solda blong olgeta. Stat long taem bifo olgeta, yok i olsem wan pijatok we i minim wok slef no man i no fri. (Jenesis 27:40, NW; Levitikas 26:13, NW; Dutronome 28:48, NW ) Plante man blong wok we Jisas i storian wetem olgeta, oli wok wetem wan prapa yok long solda blong olgeta, blong oli karem ol hevi samting. I gat ol defdefren kaen yok. Sam oli sidaon gud long solda blong man, mo i isi blong karem. Be sam yok oli ravem skin long nek mo solda blong man, mo oli givim soa. From we Jisas i wan kapenta, ating hem i mekem plante yok. I sua se hem i save olsem wanem blong katem gud wan wud, blong wokem wan yok we i “isi nomo” blong karem. Maet hem i bin fasem skin blong buluk no wan kaliko long ol yok, long ples we i tajem solda mo nek blong ol man, blong mekem se i no ravem skin.

¹⁰ Taem Jisas i talem se, “Putum yok blong mi long solda blong yufala,” maet hem i stap yusum wan pijatok blong soem se hem i save givim wan yok we i “isi nomo” blong karem, i no givim soa long nek mo solda blong man. Taswe, Jisas i gohed se: “Ol samting we bambae mi givim long yufala blong yufala i karem, oli no hevi.” Tok ya i soemaot se yok we hem i putum long man i no save mekem man i harem nogud, mo wok we hem i givim i no had olsem wok blong slef. I tru, taem Jisas i singaot ol man blong putum yok blong hem long solda blong olgeta, hem i no stap talem se bambae oli kam fri long olgeta trabol we i stap mekem olgeta oli harem nogud. Nating se i olsem, tingting ya we hem i givim long olgeta we i defren long hemia we oli holem fastaem, i save mekem olgeta oli harem gud. Mo tu, bambae oli spel long tingting blong olgeta sipos oli jenisim sam samting long laef blong olgeta, mo sipos oli jenisim sam fasin we oli stap folem. Be samting we i impoten moa hemia blong holem gudfala promes blong fiuja i stap klia long tingting blong olgeta mo bilif strong long hem. Hemia nao bambae i mekem se oli no moa wari tumas long ol samting blong laef.

Yu Yu Save Faenem Pis

11. ?Olsem wanem yumi save se Jisas i no stap talem long ol man blong oli tekemaot yok we oli stap karem mo putum narawan?

¹¹ Plis makem: Jisas i no talem long ol man blong oli tekemaot yok we i stap finis long solda blong olgeta mo putum narafala yok ya long ples blong hem. Gavman blong Rom i gohed blong rul long kantri blong olgeta, olsem we tede ol defdefren gavman oli rul long ol kantri we ol Kristin oli stap long olgeta. Ol man long faswan handred yia, oli no kam fri long bigfala takis we gavman blong Rom i putum long olgeta. Oli kasem ol sik mo trabol long saed blong mane. Sam samtaem oli mestem mo oli mekem sin. Nating se i olsem, taem oli folem ol tijing blong Jisas, oli faenem pis long laef blong olgeta, olsem yumi save faenem tede.

12, 13. ?Jisas i makem wanem wok we bambae i givim pis long tingting blong man, mo samfala oli mekem wanem taem oli harem tok blong hem?

¹² I kam klia se pijatok blong Jisas long saed blong yok i joen bigwan wetem wok blong pulum ol man oli kam disaepol. Bigfala wok blong Jisas i blong tijim ol man, antap moa, long saed blong Kingdom blong God. (Matiu 4:23) Taswe, taem hem i talem se, “Putum yok blong mi long solda blong yufala,” hemia i min se oli mas mekem semfala wok blong tijim ol narafala olsem Jisas i mekem. Ol Gospel oli soem se Jisas i pulum ol man we hat blong olgeta i stret, blong oli livim prapa wok blong olgeta mo folem hem. Wok i wan bigfala wari long laef blong plante man. Traem tingbaot tok we hem i talem blong singaot Pita, Andru, Jemes mo Jon: ‘Yufala i biaen long mi, yufala i kam man blong mi. Bambae mi mi mekem yufala i kam man blong pulum man.’ (Mak 1:16-20) Hem i soemaot long ol man ya blong pulum fis, olsem wanem oli save harem gud sipos oli mekem semfala wok we hem i stap putum long fasples long laef blong hem, mo sipos oli letem hem i lidim olgeta mo givhan long olgeta long wok ya.

¹³ Sam man Isrel oli kasem save long tok blong Jisas mo oli folem. Traem tingbaot samting we i hapen long sanbij, we Luk 5:1-11 i tokbaot. Fo man blong pulum fis oli bin wok strong blong fulnaet, be oli no kasem wan fis. !Nao wantaem nomo, ol net blong olgeta oli fulapgud long ol fis! Hemia i no kamaot olsem nomo, Jisas nao i mekem samting ya i hapen. Taem ol man ya blong pulum fis oli lukluk i kam long so, oli luk wan bigfala hip man we oli stap lesin long Jisas, oli stap intres gud long ol tijing blong hem. Samting ya i soemaot long ol man ya blong pulum fis, wanem nao mining blong tok we Jisas i talem long olgeta, se: ‘I stat naoia, bambae yufala i man blong pulum man.’ ?Taem oli harem tok ya blong Jisas, oli mekem wanem? “Olgeta oli pul long tufala bot ya, oli gobak long so, nao oli livim olgeta samting blong olgeta, oli biaen long Jisas, oli kam man blong hem.”

14. (a) ?Olsem wanem yumi save faenem pis long laef blong yumi tede? (b) ?Jisas i talemaot wanem gud nius we i mekem man i harem gud?

¹⁴ Yu tu yu save mekem olsemia. Wok blong tijim ol man long trutok blong Baebol i stap gohed yet. Samwe long sikis milian Witnes blong Jeova long wol oli obei finis long tok blong Jisas blong ‘putum yok blong hem long solda blong olgeta.’ Olgeta ya oli kam ol “man blong pulum man.” (Matiu 4:19) Sam long olgeta oli mekem wok ya fultaem olsem we hemia faswan wok long laef blong olgeta. Samfala, oli naf blong mekem wok ya haftaem. Olgeta evriwan oli faenem se oli gat pis long tingting blong olgeta from wok ya, ale oli no moa wari tumas long saed blong laef. Oli stap mekem samting we oli harem gud long hem, hemia wok blong talemaot gud nius—“gud nius blong kingdom.” (Matiu 4:23, NW ) Oltaem yumi glad blong tokbaot gud nius, be hemia i tru moa long saed blong spesel gud nius ya. Baebol i givim ol stamba save we yumi nidim blong halpem plante man blong oli bilif strong se oli save daonem wari long laef blong olgeta.—2 Timoti 3:16, 17.

15. ?Olsem wanem ol tijing blong Jisas long saed blong laef oli save givhan long yu?

¹⁵ Samfala we oli jes stat blong kasem save long Kingdom blong God, oli kasem sam gudfala frut finis from ol tijing blong Jisas long saed blong laef. Plante oli save talem stret se ol tijing blong Jisas oli bin putum pis long laef blong olgeta mo halpem olgeta blong jenisim laef blong olgeta fulwan. Yu tu yu save kasem gudfala frut ya, sipos yu stadi gud long ol rul we yumi faenem long ol stori blong laef mo wok blong Jisas, antap moa, ol Gospel blong Matiu, Mak, mo Luk.

Rod Blong Harem Gud

16, 17. (a) ?Weples yumi save faenem sam stamba tijing blong Jisas? (b) ?Yumi mas mekem wanem blong faenem pis long laef blong yumi from ol tijing blong Jisas?

¹⁶ Klosap long hot taem blong yia 31 K.T.,a Jisas i mekem wan tok we olgeta man long wol oli save long hem, hemia Bigfala Toktok blong hem Antap long Hil. Tok ya we i talemaot plante tijing blong Jisas, i stap long Matiu japta 5 kasem 7. Yu save faenem sam moa tijing blong Jisas long ol narafala ples long ol Gospel tu. Plante samting we Jisas i talem i isi nomo blong kasem save long hem, be maet i hadwok blong folem long laef blong yu. I gud we yu tekem taem blong ridim ol japta ya, mo tingting gud long olgeta. Letem ol toktok blong hem oli gat paoa long tingting mo fasin blong yu.

¹⁷ I klia se yumi save folem plante defren plan blong stadi long ol tijing blong Jisas. Be i gud yumi putum ol stamba tijing blong Jisas long ol grup, nao yumi traem mekem wan grup i wok long laef blong yumi evri dei blong manis. ?Olsem wanem blong mekem olsem? Yumi no mas ridim olgeta hareap nomo. Tingbaot rij haeman ya we i askem long Jisas Kraes se: “?Bambae mi mas mekem olsem wanem blong kasem laef ya we i no save finis?” Taem Jisas i talemaot sam impoten haf long Loa blong God, hem i talem se hem i stap folem olgeta finis. Be, hem i save se i mas mekem moa. Jisas i talem long hem blong traehad moa blong folem ol rul blong God long laef blong hem wan, mo blong mekem wok olsem wan disaepol. Be i luk olsem se man ya i no wantem traehad olsem. (Luk 18:18-23) Taswe, wan man we i wantem kasem save long ol tijing blong Jisas tede, i mas rimemba se i no naf jes blong agri wetem ol tijing ya. Sipos hem i wantem daonem wari long laef blong hem, hem i mas bilif fulwan long ol tijing ya mo folem olgeta.

18. Soemaot olsem wanem blong yusum gud bokis we i joen wetem stadi ya.

¹⁸ Faswan samting we yu save mekem blong lukluk gud long ol tijing blong Jisas mo folem olgeta, i blong ridim faswan poen long bokis we i joen wetem stadi ya. Hem i tokbaot Matiu 5:3-9. I tru, yumi evriwan i save tingting longtaem long ol nambawan advaes long ol vas ya. ?Be, sipos yumi traem luksave ol bigfala tingting long olgeta, yumi faenemaot wanem long saed blong stret tingting mo fasin we yumi mas gat? ?Wanem samting bambae i rili givhan long yu blong winim ol wari long laef? ?Sipos yu yu putum tingting blong yu moa long ol samting long saed blong spirit, mo yusum moa taem blong mekem olgeta, olsem wanem samting ya bambae i mekem i gud long yu? ?I gat wan samting long laef blong yu we yu nidim blong lego hem, blong yu save spenem moa taem long ol samting long saed blong spirit? Sipos yu mekem olsem, bambae yu glad moa long laef blong yu naoia.

19. ?Yumi save mekem wanem blong kasem save we i dip moa?

¹⁹ I gat wan samting moa we yu save mekem. I gud blong tokbaot ol vas ya wetem wan narafala man blong God, maet man no woman blong yu, wan famle no wan fren blong yu. (Ol Proveb 18:24; 20:5) Tingbaot se haeman ya we i rij i askem kwestin long wan narafala man, hemia Jisas, long saed blong samting we i joen wetem laef blong hem. Ansa long kwestin ya i save mekem laef blong hem long fiuja i glad moa mo i longfala. I tru, Kristin brata no sista blong yu we yu storian wetem hem, bambae i no olsem Jisas. Be nating, storian long saed blong ol tijing blong Jisas bambae i givhan long yutufala evriwan. Yu no mas wet blong mekem samting ya.

20, 21. ?Yu save folem wanem plan blong kasem save long ol tijing blong Jisas, mo olsem wanem blong luksave sipos yu stap kamgud moa?

²⁰ Lukluk bakegen long bokis ya “Ol Tijing Blong Givhan Long Yu.” I gat plante grup blong ol tijing ya, hemia blong mekem se yu save tingbaot wan grup evri dei. Fastaem, ridim tok blong Jisas long ol vas we oli stap. Nao tingting gud long ol tok blong hem. Tingbaot olsem wanem yu save mekem tok ya i wok long laef blong yu. Sipos yu harem se yu stap mekem samting ya finis, ale, tingbaot wanem samting moa we yu save mekem blong folem tijing ya. Traem folem long ful dei ya. Sipos i hadwok long yu blong kasem save long hem no blong luksave olsem wanem blong mekem i wok, gohed long hem long nekis dei. Be, yu no nid blong kasem hem fulwan bifo we yu go long nekis tijing. Ale, long nekis dei bakegen, yu save tingting long wan narafala tijing. Long en blong wik, traem tingtingbak long wanem we yu bin mekem blong folem fo no faef long ol tijing ya blong Jisas. Long seken wik, yu save gohed long sam moa tijing, wan niuwan evri dei. Yu no mas letem tingting blong yu i foldaon sipos yu luk se yu kam slak bakegen blong folem wan tijing. Samting ya i stap hapen long evri Kristin. (2 Kronikel 6:36; Ol Sam 130:3; Prija 7:20; Jemes 3:8) Long namba tri mo fo wik, gohed blong folem ol tijing ya.

²¹ Long en blong wan no tu manis, ating yu wok finis long olgeta 31 tijing ya. ?Bambae yu harem olsem wanem? Bambae yu glad moa, ating yu no moa wari tumas. Nating se yu kamgud smol nomo, ating bambae wari i godaon, no yu faenem rod blong winim plante wari, mo yu gat wan plan we yu save gohed long hem. Yu no mas fogetem se, i gat plante narafala nambawan tijing blong Jisas we oli no stap long lis ya. Traem faenem sam long olgeta, mo mekem oli wok long laef blong yu.—Filipae 3:16.

22. ?Wanem i save kamaot sipos yumi folem ol tijing blong Jisas, mo bambae yumi stadi long wanem narafala poen?

²² Ating yu luksave finis se, nating we yumi mas wok blong karem yok blong Jisas, be hem i isi blong karem. Ol tijing blong hem mo wok we ol disaepol oli mas mekem, i no hevi tumas. Aposol Jon we hem i wan gudfala fren blong Jisas, i karem yok ya blong bitim 60 yia, nao biaen hem i talem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Yu tu yu save bilif fulwan long samting ya. Sipos yu gohed longtaem blong folem ol tijing blong Jisas, bambae yu luk we yu no moa harem nogud tumas long ol samting we i mekem ol man tede oli wari bitim mak. Bambae yu luk we yu gat pis long tingting blong yu. (Ol Sam 34:8) Be i gat wan narafala samting we yumi mas tingbaot long saed blong yok ya blong Jisas we i isi nomo blong karem. Jisas i bin talem se hem i ‘wan kwaet man, mo tingting blong hem i stap daon.’ ?Olsem wanem samting ya i joen wetem ol tijing we yumi kasem long Jisas mo wok we yumi mas mekem blong folem hem? Long nekis stadi, bambae yumi tokbaot samting ya.—Matiu 11:29.

“Yufala i Mas Lan Long Mi”

“Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.”—MATIU 11:29.

1. ?From wanem yumi save harem gud moa mo kasem plante gudfala samting sipos yumi lan long Jisas?

OLTAEM Jisas Kraes i tingting stret, i tijim man long stret rod, mo i mekem fasin we i stret. Hem i no stap longtaem long wol ya, be hem i harem gud mo i karem frut long wok blong hem, mo hem i stap glad. Hem i hivimap ol disaepol blong hem, i tijim olgeta olsem wanem blong wosip long God, blong laekem ol man, mo blong winim paoa blong wol ya. (Jon 16:33) Hem i fulumap hat blong olgeta wetem ol gudfala tok long saed blong fiuja. “Gud nius ya, i givim save long saed blong laef mo ol samting we bambae oli no save kam nogud samtaem.” (2 Timoti 1:10, NW ) ?Sipos yu bilif se yu yu wan disaepol blong Jisas, traem talem se wan disaepol i olsem wanem? Sipos yumi tingbaot wanem we Jisas i talem long saed blong ol disaepol, yumi save lanem olsem wanem blong mekem laef blong yumi i kamgud moa. Blong mekem olsemia, yumi mas gat sem tingting olsem hem, mo yumi mas folem sam stamba rul.—Matiu 10:24, 25; Luk 14:26, 27; Jon 8:31, 32; 13:35; 15:8.

2, 3. (a) ?Wanem ya wan disaepol blong Jisas? (b) ?From wanem i impoten blong tingbaot kwestin ya: ‘?Mi mi disaepol blong hu?’

² Long Grik haf blong Baebol we samfala oli kolem Niutesteman, tok ya “disaepol” i minim wan man we i tingting strong long wan samting, no wan man we i stap lanem samting. Wan tok we i klosap sem mak i stap long stamba vas blong stadi ya, Matiu 11:29: “Yufala i mas putum yok blong mi long solda blong yufala, blong yufala i wok wetem mi, from we mi mi wan kwaet man, mo tingting blong mi i stap daon. Mo yufala i mas lan long mi, nao bambae yufala i save faenem pis long laef blong yufala.” Yes, wan disaepol hem i man we i stap lanem samting. Plante taem, ol Gospel oli yusum tok ya “disaepol” blong minim ol man blong Jisas, we oli folem hem taem hem i prij mo we hem i tijim olgeta. Maet samfala oli bilif nomo long ol tijing blong Jisas, mo samfala oli haedem bilif blong olgeta tu. (Luk 6:17; Jon 19:38) Ol Gospel, oli tokbaot ‘ol disaepol blong Jon [Baptaes] . . . mo ol disaepol blong ol Farisi.’ (Mak 2:18, NW ) Be Jisas i givim woning long ol man blong hem blong “lukaot long ol tok we ol Farisi . . . oli stap tijim ol man long hem.” Taswe, i gud yumi tingbaot kwestin ya: ‘?Mi mi wan disaepol blong hu?’—Matiu 16:12.

³ Sipos yumi wan disaepol blong Jisas, mo sipos yumi bin lan long hem, ale, ol narafala oli mas harem gud long saed blong spirit taem oli stap kampani wetem yumi. Oli mas luksave se fasin blong yumi i kam kwaet moa, mo yumi gat tingting daon. Maet yumi wan bigman long wok blong yumi, maet yumi gat pikinini, no maet yumi gat wok blong lukaot long ol sipsip long Kristin kongregesen. ?Olsem wanem nao? ?Olgeta we oli stap long han blong yumi, oli harem se yumi stap mekem long olgeta olsem we Jisas i bin mekem long olgeta we oli stap long han blong hem?

Fasin We Jisas i Mekem Long Ol Narafala

4, 5. (a) ?From wanem i no hadwok tumas blong save olsem wanem Jisas i bin mekem long ol man we oli trabol? (b) ?Wanem i hapen long Jisas taem hem i stap kakae long haos blong wan Farisi?

⁴ Yumi nidim blong save olsem wanem Jisas i bin mekem long ol narafala, antap moa, long olgeta we oli harem nogud from ol bigfala trabol. Ating hemia i no hadwok tumas blong lanem, from we Baebol i storian plante long fasin we Jisas i mekem long ol narafala, mo long samfala we oli trabol tumas. Bambae yumi makem tu, olsem wanem ol lida blong skul, antap moa ol Farisi, oli bin mekem long ol man we oli trabol olsem. Bambae yumi kasem save long plante samting sipos yumi luk olsem wanem fasin blong olgeta i defren long hemia blong Jisas.

⁵ Long yia 31 K.T., Jisas i stap wokbaot long Galili, i stap prij. “Nao wan long ol Farisi . . . i singaot Jisas blong i go kakae long haos blong hem.” Jisas i no agensem samting ya, ale, hem i go long haos blong man ya. “Jisas i go insaed long haos blong Farisi ya, i go sidaon blong i kakae. Nao wan woman blong taon ya we i wan woman nogud, hem i harem we Jisas i stap kakae long haos blong Farisi ya, nao hem i go karem wan botel senta, i kam long ples ya. Botel ya, oli wokem long wan ston, nem blong hem alabasta. Nao woman ya i kam long bak blong Jisas, i bendaon long leg long hem. Hem i stap krae, mo wota blong ae blong hem i stap folfoldaon i go long leg blong Jisas, i mekem leg blong hem i wetwet. Nao hem i waepem leg blong Jisas long hea blong hem blong mekem i drae, mo i kis long leg blong Jisas, nao i kafsaedem senta ya i go long hem.”—Luk 7:36-38.

6. ?Maet from wanem nao woman ya we i gat ‘plante sin’ i stap long haos blong Farisi ya?

⁶ Traem tingbaot samting ya. Wan buk i talem se: “Woman ya (vas 37) i tekem janis blong go long ples ya we oli stap mekem lafet long hem, blong hem i kasem sam haf kakae we i stap. Kastom blong ol man long taem ya i blong letem olgeta we oli sot long sam samting oli mekem olsemia.” Samting ya i givhan long yumi blong kasem save olsem wanem woman ya i save kam long lafet ya nating se oli no bin singaot hem. Maet i gat sam narafala tu, we oli bin kam blong karem haf kakae we i stap long en blong lafet ya. Be fasin blong woman ya i defren. Hem i no stanap i stap, blong wet nomo se ol man oli gohom, no gat. Woman ya i no gat gudnem tu, ol man oli save “ol sin blong hem.” Jisas i talem se hem i save long “ol sin blong hem, we i plante tumas.”—Luk 7:47.

7, 8. (a) ?Sipos sem samting i hapen long yumi, olsem we i stap long Luk 7:36-38, maet yumi mekem wanem? (b) ?Saemon i mekem wanem?

⁷ Traem tingbaot sipos yu yu stap laef long taem bifo, mo wan woman i mekem long yu olsem we woman ya i mekem long Jisas. ?Bambae yu yu mekem wanem? ?Bambae yu sem taem woman ya i kam klosap long yu? ?Bambae yu harem olsem wanem sipos samting ya i hapen long yu? (Luk 7:45) ?Bambae yu harem nogud mo yu kros long hem?

⁸ Sipos yu bin stap long lafet ya, maet yu gat tingting we i sem mak lelebet long Farisi ya Saemon. “Farisi ya we i singaot Jisas blong i kam kakae long haos blong hem, hem i luk samting ya. Mo long tingting blong hem, hem i stap tingting se, ‘Man, sipos man ya i wan profet tru, bambae hem i savegud se woman ya we i stap tajem hem, hem i wan woman nogud.’ ” (Luk 7:39) Be Jisas i no tingting olsem. Hem i wan man we i gat bigfala sore. Hem i kasem save long trabol we woman ya i gat long laef blong hem, mo hem i luksave se woman ya i stap harem nogud tumas. Baebol i no talem wanem samting i mekem se woman ya i folem wan laef we i fulap long sin. Sipos i tru se hem i wan woman blong rod, i luk olsem we ol man blong taon ya we oli strong long skul blong ol man Jiu, oli no bin mekem wan samting blong traem givhan long hem.

9. ?Wanem ansa blong Jisas, mo maet wanem frut i bin kamaot biaen?

⁹ Be Jisas i wantem givhan long woman ya. Hem i talem long hem se: “Ol sin blong yu, mi mi tekemaot finis.” Nao hem i gohed olsem: “Bilif blong yu i mekem yu yu gud bakegen. Yu go, yu no moa wari bakegen.” (Luk 7:48-50) Stori ya i finis long ples ya. Maet samfala oli talem se Jisas i no givhan long woman ya bigwan. Hem i blesem hem nomo, nao i sanem hem i gowe. ?Yu yu ting se woman ya i gobak long ol rabis fasin blong hem bakegen? Yumi no save, be makem nekiswan tok blong Luk. Hem i talem se Jisas i “stap wokbaot, i stap pas long ol taon mo long ol vilej. Hem i stap prij, mo i stap talemaot gud nius ya we God i stap kam King blong ol man blong hem.” Disaepol Luk i talem tu se “sam woman” oli biaen long Jisas mo ol disaepol blong hem, “oli stap yusum ol mane blong olgeta blong givhan long Jisas wetem ol man blong hem.” Yumi no save talem stret, be woman ya we i gat tangkiu from samting we Jisas i mekem, mo we i tanem tingting blong hem, maet i wan long ol woman we oli biaen long Jisas. Maet hem i stat folem wan laef we God i glad long hem, mo maet tingting blong hem i kam klin long fored blong God. Maet hem i gat wan niufala risen blong laef, mo maet lav we hem i gat long God i gru i kam bigwan moa.—Luk 8:1-3.

Fasin Blong Jisas i Defren Long Hemia Blong Ol Farisi

10. ?Olsem wanem stori blong Jisas mo woman ya long haos blong Saemon i save givhan long yumi?

¹⁰ ?Klia stori ya i lanem yumi long wanem samting? I tru se hem i tajem filing blong yumi. Tingbaot se yu yu stap long haos blong Saemon. ?Bambae yu harem olsem wanem? ?Bambae yu yu mekem olsem Jisas, no bambae yu gat tingting olsem Farisi ya we Jisas i stap long haos blong hem? I tru, Jisas hem i Pikinini blong God, mo ating yumi no save gat sem filing mo fasin blong hem stret. Be, i sua se yumi no wantem gat fasin blong Farisi ya Saemon. Sipos yumi folem fasin blong ol Farisi, hemia i no samting blong harem gud from.

11. ?From wanem yumi no wantem gat fasin olsem ol Farisi?

¹¹ Taem yumi stadi long Baebol mo ol narafala save, yumi luk se ol Farisi oli flas from we oli ting se oli stap lukaotgud long laef blong ol man mo long kantri blong olgeta. Oli no bilif se Loa blong God i klia mo i isi blong kasem save long hem. Long sam haf blong Loa we oli ting se i no klia, oli ademap sam moa rul bakegen, blong mekem se ol man oli no nidim blong yusum tingting blong olgeta blong tekem wan gudfala disisen. Ol lida blong skul ya oli traem blong putumap ol loa blong kavremap olgeta samting, wetem ol smosmol samting long laef tu.a

12. ?Wanem tingting we ol Farisi oli gat long saed blong olgeta bakegen?

¹² Josephus, we i man blong raetem histri long faswan handred yia, hem i tokbaot fasin tinghae we ol Farisi oli gat. Oli ting se oli kaen, oli gat sore, oli mekem i stret long evriwan, mo oli ting se oli naf gud blong mekem wok blong olgeta. Ating i tru se sam Farisi oli gat fasin olsem. Maet Nikodimas i wan long olgeta we yumi tingbaot. (Jon 3:1, 2; 7:50, 51) Sloslou, sam long olgeta ya oli folem Kristin fasin blong laef. (Ol Wok 15:5) Kristin aposol Pol i tokbaot fasin blong sam Jiu wetem ol Farisi, i se: “Olgeta ya oli wantem God tumas. Oli wantem hem, be oli no save prapa rod blong faenem hem.” (Rom 10:2) Be ol Gospel oli tokbaot fasin we ol Farisi oli soemaot long ol man raonabaot long olgeta—oli flas, oli tinghae long olgeta bakegen, oli ting se oli stret man, oli faenem poen long ol narafala, oli daonem mo jajem ol narafala.

Tingting Blong Jisas

13. ?Jisas i talem wanem long saed blong ol Farisi?

¹³ Jisas i tok strong long ol tija blong Loa mo ol Farisi se oli gat tu fes. “Oli stap putum ol hevi samting long solda blong ol man, we i had blong ol man oli karem, be olgeta oli no save mekem wan samting nating blong givhan long ol man, blong oli karem ol hevi samting ya.” Yes, oli mekem i hevi tumas long ol man, mo yok we oli fosem ol man blong karem i strong tumas. Biaen Jisas i talem long ol tija blong Loa mo ol Farisi se hed blong olgeta i “krangke.” Wan krangke man i wan denja long ol narafala. Jisas i talem tu se ol tija blong Loa mo ol Farisi oli ‘man blong lidim man, be oli blaen.’ Hem i talem se ‘oli tanem baksaed long ol nambawan tok blong Loa we i talem se man i mas mekem i stret, mo i mas gat sore long man, mo i mas holem promes blong hem.’ ?Yu yu glad sipos Jisas i gat sem tingting long saed blong yu olsem we hem i gat long ol Farisi?—Matiu 23:1-4, 16, 17, 23.

14, 15. (a) ?Fasin we Jisas i mekem long Matiu Livae i soemaot wanem long saed blong ol Farisi? (b) ?Stori ya i lanem yumi long wanem impoten samting?

¹⁴ Eniman we i ridim ol Gospel bambae i luksave se plante Farisi oli gat fasin blong faenem poen long narafala. Taem Jisas i singaot Matiu Livae we i man blong tekem mane blong takis, blong i kam wan disaepol, Livae i mekem wan bigfala kakae blong Jisas. Baebol i talem se: “Nao ol Farisi mo sam long olgeta we oli tija blong Loa, oli tok long ol man blong Jisas, oli talem se, ‘?Olsem wanem yufala i stap kakae wanples wetem ol man ya blong tekem mane blong takis mo ol man nogud ya?’ Nao Jisas i talem long olgeta se, ‘. . . Mi mi no kam blong singaot olgeta we oli stret man finis, blong oli tanem tingting blong olgeta from ol sin blong olgeta. Be mi mi kam blong singaot ol man nogud, blong oli tanem tingting blong olgeta.’ ”—Luk 5:27-32.

¹⁵ Livae i kasem save long wan narafala samting tu we Jisas i talem long dei ya, se: “I gud yufala i go lanem mining blong tok ya blong Baebol we God i talem se, ‘Mi mi no wantem fasin ya we man i stap kilim anamol blong mekem sakrefaes long mi, mi mi wantem we oltaem man i gat sore long man.’ ” (Matiu 9:13) Nating we ol Farisi oli talem se oli bilif long ol hanraet blong ol olfala Hibru profet, be oli no folem tok ya we i kamaot long Hosea 6:6. Mastik blong olgeta se, oli strong moa blong folem kastom, i bitim we oli soemaot sore long man. Yumi wanwan i save askem se: ‘?Ol man oli save mi olsem wan man we i traem fosem ol narafala blong folem ol rul we oli stret long prapa tingting blong mi nomo, no we oli stret long tingting blong bighaf blong ol man raonabaot? ?No oli tingbaot mi olsem wan man blong soemaot sore mo kaen fasin?’

16. ?Wanem fasin blong ol Farisi, mo olsem wanem yumi save lukaot blong no mekem sem mak long olgeta?

¹⁶ Talemaot poen blong ol narafala, hemia nao fasin blong ol Farisi. Oli lukaot enikaen poen nomo long narafala, mo sipos oli no save faenem wan, oli talemaot wan giaman poen nomo. Oli rao oltaem long ol man, mo oli mekem olgeta oli tingbaot ol mastik blong olgeta nomo. Oli flas from we oli stap mekem taet blong olgeta long ol smosmol lif olsem min, dil, mo kamin. Oli putum klos we i soemaot olgeta olsem ol man blong ona long God, mo oli traem blong lidim nesen ya. Tru ya, sipos yumi wantem folem fasin blong Jisas, yumi mas blokem fasin ya blong lukaot poen long narafala mo mekem ol smosmol rong oli kam ol bigfala samting.

?Olsem Wanem Jisas i Stretem Trabol?

17-19. (a) Traem storian long fasin blong Jisas taem wan samting i hapen we i save mekem bigfala trabol i kamaot. (b) ?Wanem i mekem se woman ya i wari mo i fraet? (c) ?Sipos yu yu stap taem woman ya i kam long Jisas, bambae yu mekem wanem?

¹⁷ Fasin blong Jisas blong stretem trabol i defren olgeta long fasin blong ol Farisi. Tingbaot wanem we Jisas i mekem taem wan samting i hapen we i save mekem bigfala trabol i kamaot. Yu save ridim stori ya long Luk 8:42-48. Hem i long saed blong wan woman we sik blong woman i bin stap long hem oltaem blong 12 yia.

¹⁸ Gospel blong Mak i talem se woman ya “i fraet, mo i seksek.” (Mak 5:33) ?From wanem? From we hem i save se hem i brekem Loa blong God. Levitikas 15:25-28 i tokbaot woman we sik blong woman i no kam long hem long stret taem blong hem, be i stap kam oltaem nomo. Woman ya i stap olsem we hem i doti gogo kasem we sik ya i finis, mo blong wan wik biaen bakegen. Sipos hem i tajem wan samting no wan narafala man no woman, olgeta ya tu oli kam doti. Be tingbaot woman ya long taem blong Jisas. Ol man oli fasfas raon long hem. Taswe, blong kam klosap long Jisas, hem i mas pusum ol man ya mo pas long medel blong bigfala hip ya. Tru ya, taem yumi ridim stori ya tede, yumi harem se yumi sore yet long woman ya, nating se samting ya i hapen 2,000 yia finis.

¹⁹ ?Sipos yu bin stap long taem ya, bambae yu yu tingting olsem wanem long samting we i hapen? ?Bambae yu yu talem wanem? Traem luk olsem wanem Jisas i mekem long woman ya. Hem i soem kaen fasin, lav, i tingbaot filing blong hem, mo hem i no talem wan tok nating we i save givim tingting long woman ya se hem i mekem wan trabol.—Mak 5:34.

20. ?Sipos loa long Levitikas 15:25-28 i stap long yumi tede, wanem traem we maet yumi gat?

²⁰ ?Stori ya i save lanem yumi long wanem samting? Maet yu yu wan elda long Kristin kongregesen tede. Nao tingbaot sipos ol Kristin tede oli mas folem loa ya long Levitikas 15:25-28, ale wan Kristin woman i brekem loa ya from we hem i harem se i no moa gat rod, mo i no moa gat wan bakegen we i save givhan long hem. ?Bambae yu mekem wanem? ?Bambae yu tok strong long hem long fored blong ol narafala, blong soemaot mastik blong hem mo mekem hem i sem? Ating bambae yu talem se: “!Mi mi neva save mekem olsemia! Bambae mi folem eksampol blong Jisas mo mi traehad blong soem kaen fasin, lav, sore, mo tingbaot filing blong hem.” !Sipos i olsem, hemia i gud tumas! Be, samting we i hadwok, i blong mekem toktok ya i wok mo i rili folem eksampol blong Jisas.

21. ?Jisas i tijim ol man long wanem samting long saed blong Loa?

²¹ Klosap olgeta man we oli stap kampani wetem Jisas, oli harem se oli gat pis long laef blong olgeta. Hem i leftemap tingting blong olgeta mo i mekem olgeta oli harem gud. Taem i gat wan klia Loa blong God long saed blong wan samting, man i mas folem. Sipos i no gat wan klia loa, wanwan man i mas tekem wan disisen we tingting blong hem i no jajem hem from. Mo ol disisen we ol man oli mekem, oli save soemaot se oli lavem God. Loa i no blokem olgeta fulwan, oli fri blong jusum sam samting, olgeta nomo. (Mak 2:27, 28) God i lavem ol man blong hem, hem i wok oltaem blong mekem i gud long olgeta, mo hem i rere blong soem sore taem oli mestem. Jisas tu i gat ol fasin ya.—Jon 14:9.