“Yufala i Mas Putum Yok Blong Mi Long Solda Blong Yufala”

¹ Long wol ya we i fulap long wari mo ol trabol, yumi haremgud taem yumi obei long tok blong Jisas we i singaot yumi blong kam long hem mo kasem pis we hem i save putum long tingting blong olgeta man. (Mat. 11:29, 30) Taem yumi agri blong tekem yok ya blong kam wan disaepol blong Jisas, yumi joen long wan wok we i traem bilif blong yumi, be i mekem yumi haremgud tu. Yok ya i joen long wok ya blong talemaot gud nius blong Kingdom mo halpem ol man blong joen wetem yumi, blong yumi evriwan yumi save harem gud aninit long yok ya blong Jisas we i no strong tumas.—Mat. 24:14; 28:19, 20.

² Faenem Trufala Pis Long Wok Blong Prij: Jisas i no askem ol man blong hem blong oli karem yok blong hem mo ademap wetem hemia we oli gat finis, nogat. Hem i singaot olgeta blong oli lego yok blong olgeta we i hevi mo karem yok blong hem we i no hevi nating. Bambae yumi no moa kam taed from ol wari mo from we rabis wol ya i mekem we yumi no moa gat hop, mo bambae yumi no moa wok from ol sas samting we oli no save stap longtaem. (Luk 21:34; 1 Tim. 6:17) Nating we yumi bisi, mo yumi mas wok strong blong kasem ol samting we yumi nidim evri dei, be yumi putum wosip blong Jeova i stap long faswan ples long laef blong yumi. (Mat. 6:33) Sipos yumi gat stret tingting long wanem samting we i moa impoten, bambae yumi faenem se wok blong prij i givim trufala glad, mo i no hevi.—Fil. 1:10.

³ I tru, yumi harem gud taem yumi tokbaot ol samting we oli stap long hat blong yumi. (Luk 6:45) Ol Kristin oli tinghae long Jeova mo ol promes we hem i mekem long saed blong Kingdom. !Taswe, yumi rili harem gud taem yumi joen long wok blong prij mo yumi “talemaot gud nius” long saed blong ol gudfala samting, mo yumi lego ol wari blong yumi blong evri dei oli stap biaen! (Rom 10:15) I tru se moa we yumi mekem wan wok, moa we yumi kam gud long wok ya mo yumi kasem moa glad long hem. From samting ya, sipos yumi naf blong givim moa taem long wok blong prij, bambae yumi save harem gud moa. !Mo taem ol man oli lesin long tok we yumi talem long olgeta, yumi rili harem gud! (Wok 15:3) Nating sipos ol man we yumi mitim oli no intres no oli agens, wok blong prij bambae i givim pis long tingting blong yumi, sipos yumi holem tingting ya se traehad blong yumi i mekem Jeova i glad, mo se olgeta gudfala frut we yumi kasem oli kamaot from we Jeova i blesem yumi.—Wok 5:41; 1 Kor. 3:9.

⁴ Sipos yumi folem Jisas taem hem i singaot yumi, yumi save haremgud long janis ya blong wok klosap long hem olsem ol Witnes blong Jeova. (Aes. 43:10; Rev. 1:5) !I no gat wan samting nating we i save mekem yumi haremgud moa!