Japta 41

Ol Wok Blong Jisas Oli Mekem Trabol

JISAS i kakae long haos blong Saemon. Nao biaen, hem i go long seken trep blong hem long Galili, hem i stap prij long ol taon mo velej long ples ya. Long fas trep blong hem long Galili, Pita mo Andru mo Jemes mo Jon, fofala disaepol we hem i jusumaot fastaem, oli folem hem. Be long seken trep, olgeta 12 aposol mo sam woman tu, oli folem hem. I gat Meri we i woman Magdala, mo Susana, mo Joana, we man blong hem i wan haeman blong king Herod.

Minista wok blong Jisas i stap kam bigwan moa. Be long semtaem, wok blong hem i mekem plante trabol i kamaot. Ol man oli tekem wan man i kam long Jisas we man ya i blaen, mo i no save toktok, i gat wan devel i stap long hem. Ale Jisas i mekem hem i gud bakegen, nao man ya i save toktok mo i save luk olgeta samting. Be olgeta man oli sapraes tumas, oli talem se: “!Man! Ating hemia nao Laen blong Deved ya we yumi stap wet long hem.”

Plante man tumas oli stap hivap raon long haos we Jisas i stap long hem. Oli mekem we hem mo ol disaepol blong hem oli no gat spel nating, oli no gat taem blong kakae. Samfala oli ting se maet hem i “Laen blong Deved.” Be i gat sam tija blong Loa mo sam Farisi we oli kam long Jerusalem blong tok agens long Jisas mo daonem wok blong hem. Taem we ol famle blong Jisas oli harem nyus blong samting ya, oli kam blong tekemaot hem. ?From wanem?

From we ol stret brata blong Jisas oli no bilif yet se hem i Pikinini blong God. Mo tu, ol trabol mo rao we oli kamaot from ol wok blong Jisas, ol famle blong hem oli neva luk samting ya bifo, taem Jisas i stap wetem olgeta long Nasaret. Taswe olgeta oli ting se wan samting i rong long tingting blong Jisas. Oli stap talem se: “Hed blong hem i krangke.” Ale oli kam blong tekemaot hem.

Ol man oli luk taem Jisas i ronemaot devel long man ya, nao hem i kamgud bakegen. Ol tija blong Loa mo ol Farisi oli save se samting ya i rili bin hapen. Be oli wantem daonem Jisas mo ol wok blong hem, ale oli talem long ol man se: “Man ya, be Bielsebal, jif blong ol devel, hem nomo i stap givim paoa long hem blong i ronemaot devel long man.”

Jisas i save tingting blong olgeta, nao hem i singaot ol tija blong Loa mo ol Farisi oli kam long hem. Nao hem i talem se: “Sipos ol man blong jif oli seraot, nao haf i agens long narafala haf, be ol wok blong jif ya bambae i foldaon. Mo i no gat wan velej no wan haos we ol man blong hem oli seraot, haf i agens long narafala haf, we bambae hem i save stap gud. Sipos Setan i stap ronemaot ol devel blong hem, hemia i min se hem nomo i agens long hem. ?Olsem wanem bambae hem i save holem ol man blong hem?”

!Tok ya blong Jisas i stret nomo! !Oli no save talem wan samting bakegen long hem! Ol Farisi oli stap talem se olgeta tu oli save ronemaot ol devel. Taswe Jisas i askem long olgeta se: “?Mo sipos i tru we mi mi stap ronemaot devel long han blong paoa blong Bielsebal, be olsem wanem long ol man blong yufala? ?Oli stap ronemaot devel long man olsem wanem?” Jisas i stap talem long olgeta se rul ya we oli yusum blong jajem wok blong hem, oraet oli mas yusum sem rul blong jajem wok blong olgeta. Nao hem i givim woning long olgeta, i se: “Be sipos mi stap ronemaot devel long man long paoa blong Speret blong God, hemia i min se [kingdom blong God i bin kamtru long yufala finis, GNB].”

Jisas i stap ronemaot ol devel, nao samting ya i pruvum se paoa blong hem i save winim paoa blong Setan. Blong soemaot samting ya, hem i talem wan pija tok, i se: “I no gat man i save go nomo insaed long haos blong wan strong man blong stilim olting blong hem. ?Bambae hem i go insaed olsem wanem? Be sipos i tekem rop, i fasem strong man ya fastaem, yes, hemia nao i save go stilim olting blong hem. Man we i no biaen long mi, hem i agens long mi. Man we i no joen long mi blong tekem ol man oli kam wan ples, hem i stap ronem ol man oli go wanwan.” I klia nomo we ol Farisi oli agens long Jisas. Samting ya i soemaot se olgeta oli man blong Setan nomo. Oli stap ronem ol man Isrel oli go wanwan, oli agens long Jisas.

From samting ya, Jisas i givim woning long ol man ya blong Setan se man we i “tok nogud long Tabu Speret, bambae God i no save tekemaot sin ya.” Hem i eksplenem se: “Man we i tok nogud long mi, mi Pikinini blong Man, bambae God i fogivim hem. Be man we i tok nogud long Tabu Speret, bambae God i no save fogivim hem samtaem, long wol ya mo long nyufala wol we bambae i kam.” Ol tija blong Loa mo ol Farisi ya oli mekem sin ya we God i no save fogivim, from we oli stap talem se Setan i givim paoa long Jisas blong mekem ol merikel ya. Be i klia nomo we tabu speret blong God i stampa blong ol merikel blong Jisas. Matyu 12:22-32; Mak 3:19-30; Jon 7:5.

▪ ?Olsem wanem seken trep blong Jisas long Galili i defren long faswan trep?

▪ ?From wanem ol famle blong Jisas oli kam blong tekemaot hem?

▪ ?Ol Farisi oli mekem wanem blong daonem paoa blong Jisas mo ol merikel blong hem? ?Olsem wanem Jisas i ansa long olgeta?

▪ ?Ol Farisi ya oli mekem wanem sin? ?From wanem?