Japta 22

Jisas i Singaot Fo Disaepol Oli Biaen Long Hem

LONG Nasaret, ol man ples blong Jisas oli traem kilim hem i ded. Nao hem i aot long ples ya, i go long Kapaneam, kolosap long bigfala lugun blong Galili. Samting ya i mekem wan narafala profet tok blong Aesea i kamtru. Profet tok ya i talem se ol man Galili we oli stap kolosap long solwora, bambae oli luk wan bigfala laet.

Tru, Jisas i givim laet long ol man long ples ya, from we hem i stap talemaot Kingdom long olgeta. Long taem ya nao, hem i faenem fo disaepol blong hem. Bifo finis, fofala ya oli bin wokbaot wetem hem. Be taem oli aot long Judia wetem Jisas, oli kambak long Galili, oli lego Jisas, nao oli gobak long wok blong olgeta blong pulum fis. Ating Jisas i lukaotem olgeta, from we hem i save se hemia stret taem blong pulum sam man blong oli givhan long hem oltaem long minista wok blong hem. Mo tu, hem i save trenem olgeta blong oli gohed long minista wok ya, taem bambae hem i no moa stap.

Taem Jisas i stap wokbaot long sanbij, hem i luk Saemon Pita mo ol man we oli wok wetem hem, oli stap wasem ol net blong olgeta. Ale hem i wokbaot i go kolosap long bot blong Pita, hem i klaem long bot ya, nao i askem long Pita blong i pusumaot bot ya lelebet, blong i stap drif kolosap long so. Nao Jisas i sidaon long bot ya, i stap tijim ol man we oli hivap long sanbij.

Biaen, Jisas i talem long Pita i se: “I gud yufala i tekem bot ya i go longwe, long dip wora, yufala i sakem net blong yufala, blong pulum sam fis.”

Be Pita i ansa, i se: “Masta, mifala i stap hadwok tumas long samting ya, kam kasem delaet, we mifala i no pulum wan fis nating. Be from we yu yu talem olsem, mi save go sakem net.”

Nao taem olgeta oli go mekem olsem, oli kasem fis long net blong olgeta, we i plante we plante. Nao from we net blong olgeta kolosap i brok, oli singaot long ol fren blong olgeta long narafala bot, blong oli kam givhan long olgeta. Taem narafala bot ya i kam, oli fulumap tufala bot ya we kolosap tufala i draon. Taem Pita i luk samting ya, hem i nildaon long Jisas, i se: “Masta, plis yu gowe long mi, from we mi mi man nogud.”

Be Jisas i talem long Pita, i se: “Yu no fraet. Yu yu man blong pulum fis, be i stat naoia, bambae yu yu man blong pulum man.”

Jisas i singaot brata blong Pita tu, we nem blong hem Andru. Hem i talem long tufala se: “Yutufala i biaen long mi, yutufala i man blong mi. Bambae mi mi mekem yutufala i man blong pulum man.” Nao Jisas i luk tu narafala man, nem blong tufala Jemes mo Jon, we tufala i wok wetem Pita mo Andru. Tufala i pikinini blong man ya Sebedi. Hem i singaot tufala, blong tufala i biaen long hem, nao wantaem nomo, tufala i girap, tufala i biaen long Jisas. Ale fofala evriwan oli livim bisnes blong olgeta blong pulum fis, oli kam ol faswan disaepol we oli folem Jisas oltaem. Luk 5:1-11; Matyu 4:13-22; Mak 1:16-20; Aesea 9:1, 2.

▪ ?From wanem Jisas i singaot ol disaepol blong hem, oli biaen long hem? ?Hu ya olgeta ya?

▪ ?Pita i fraet long wanem merikel we Jisas i mekem?

▪ ?Jisas i singaot ol disaepol ya blong oli mekem wanem wok?