Mekem Stamba Tok i Kamaot Klia

OL BRATA we oli givim plante tok finis, oli save gud se evri tok i mas gat wan stamba tok no nem blong hem. Taem oli rerem wan tok, stamba tok blong hem i givhan long olgeta blong oli yusum ol save nomo we i laenap wetem bigfala tingting long tok ya, mo tu, i givhan long olgeta blong oli tingting dip long ol save ya. From samting ya, taem oli givim tok ya, oli no tokbaot plante defren poen we oli no nidim, be oli eksplenem gud ol poen nomo we oli mekem stamba tok i klia long tingting blong ol man. Taem ol bigfala poen wanwan oli joen gud wetem stamba tok mo oli givhan blong mekem mining blong stamba tok ya i kamaot klia, ol man oli luksave se ol poen ya oli impoten, nao oli holem long tingting blong olgeta.

I gat plante tingting insaed long wan tok. Be yu mas tingbaot se, stamba tok no nem blong tok ya i blong soemaot tingting we yu mas mekem i kamaot klia. Sipos yu tingbaot samting ya, ol tok blong yu bambae oli kam gud moa. Taem yu tokbaot Kingdom, Baebol, mo laef bakegen long ded, i gat plante defren poen we yu save talem. Be stamba tok blong yu bambae i givim wan tingting nomo. Hemia sam eksampol blong wan tingting nomo we stamba tok no nem blong tok i givim: “Kingdom i Wan Prapa Gavman,” “Kingdom Blong God Bambae i Mekem Wol i Kam Paradaes,” “Baebol i Kamaot Long God,” “Baebol i Stret Blong Lidim Yumi Long Laef Blong Yumi,” “Promes Ya Blong Laef Bakegen i Leftemap Tingting Blong Olgeta We Oli Harem Nogud Taem Man i Ded,” mo “Promes Ya Blong Laef Bakegen i Givhan Long Yumi Blong Stanap Strong Taem Ol Man Oli Agensem Yumi.” Ale, nating se olgeta tok ya evriwan oli tokbaot Kingdom, Baebol, no laef bakegen, be olgeta wanwan oli tokbaot defdefren samting. Taswe, yu mas tokbaot stret samting we i stap long stamba tok.

Taem Jisas Kraes i stap prij long wol, stamba tok blong hem i mekem bigfala tingting blong Baebol i kamaot klia. Hem i talem se: “Kingdom blong heven i kam klosap finis.” (Mat. 4:17, NW) ?Jisas i mekem olsem wanem, blong stamba tok ya i kamaot klia? Long olfala lanwis we oli raetem Baebol long hem, tok ya Kingdom i stap bitim 110 taem long ol fo Gospel. Yes, Jisas i talem tok ya “kingdom” plante taem. Be i no hemia nomo. Ol save we hem i tijim ol man long hem, mo ol merikel we hem i mekem, oli soemaot klia se hem i Pikinini blong God, mo Mesaea, mo Man ya we Jehova bambae i givim Kingdom long hem. Jisas i soemaot tu, se hem nao i openem rod blong plante narafala oli joen long Kingdom ya. Hem i tokbaot klia ol fasin we ol man oli mas gat sipos oli wantem kasem blesing ya. Ol tijing mo ol bigfala wok blong hem oli soemaot klia ol samting we Kingdom blong God bambae i mekem long ol man. Mo taem hem i yusum paoa blong God blong ronemaot wan rabis spirit long man, hem i talem long ol man se samting ya i pruvum we ‘kingdom blong God i kasem’ olgeta finis. (Luk 11:20, NW) Kingdom ya nao we Jisas i talem long ol man blong hem se oli mas witnes long hem.—Mat. 10:7, NW; Mat. 24:14, NW.

Jusum Stamba Tok We i Stret Long Save. Yu no nid blong givim olgeta save long saed blong wan stamba tok, olsem we Baebol i mekem. Be i impoten yet we tok blong yu i gat wan stamba tok.

Sipos yu nao yu mas jusum stamba tok, fastaem yu mas tingbaot se tok blong yu i mas mekem wanem long ol man. Nao taem yu jusum ol bigfala poen blong raetem long plan blong yu, yu meksua se ol poen ya oli sapotem stamba tok ya.

Sipos stamba tok i stap finis, yu mas tingting gud long hem. Yu traem kasem save long tingting we i stap insaed long hem we yu mas mekem i kamaot klia. Ating yu mas tingting longtaem lelebet blong kasem save from wanem oli jusum stamba tok ya, mo wanem we yu mas tokbaot folem stamba tok no nem blong tok ya. Sipos yu nao yu mas jusum ol save blong tokbaot folem wan stamba tok we i stap finis, yu mas jusum ol save we i stret nomo long stamba tok ya. Sipos oli talem wan buk we yu mas yusum ol save blong hem, be yu mas tingting gud yet, blong yu save stret rod blong yusum ol save ya blong mekem stamba tok i kamaot klia. Yu mas tingbaot tu, from wanem save ya i gud long ol man we bambae yu toktok long olgeta, mo wanem samting we tok blong yu i mas mekem long olgeta. Hemia bambae i givhan long yu blong yu save wanem samting we yu mas mekem i kamaot klia long tok blong yu.

Rod Blong Mekem Stamba Tok i Kamaot Klia. Taem yu stap jusum ol save long tok blong yu, mo taem yu stap putum ol save i go long stret ples blong hem, yu mas rere tu blong mekem stamba tok i kamaot klia. Sipos yu yusum ol save nomo we i sapotem stamba tok, mo sipos yu folem stret rod blong mekem wan gudfala plan, bambae yu mekem stamba tok i kamaot klia.

Sipos yu talem stamba tok bakegen mo bakegen, hemia tu i save mekem i kamaot klia. Yu save tingbaot wan singsing blong lav. Man we i singsing i talemaot bakegen mo bakegen se hem i lavem wan woman, hemia stamba tok blong singsing ya. Hem i talem ol defren tok blong mekem tingting ya i kamaot klia. Maet hem i no yusum tok ya “lav” oltaem. Hem i save yusum sam narafala wod we oli gat sem mining, sam pijatok, sam tok we i naes tumas, mo sam narafala rod bakegen. Nating se i olsem, stamba tok yet hemia “lav.” Yu save mekem sem mak long tok blong yu. Yu mas talem bakegen mo bakegen tingting we i stap long stamba tok ya, olsem tingting blong lav we i kamaot bakegen mo bakegen long singsing ya. Samtaem yu save yusum ol narafala wod blong talem stamba tok ya, no blong talem tingting we i stap long stamba tok ya. Ol defren rod ya bambae oli mekem se stamba tok no nem blong tok ya i bigfala tingting we ol man oli kasem.

Yu save folem fasin ya long wok blong prij tu. Nating se storian i sot nomo, be sipos yu mekem stamba tok i kamaot klia, man we yu storian wetem hem bambae i no fogetem bigfala tingting ya. Taem yu mekem Baebol stadi long wan man, yu mas mekem bigfala tingting i kamaot klia, nao bambae i isi blong man ya i tingbaot bakegen samting we hem i lanem. Sipos yu traehad blong jusum wan stamba tok we i stret, mo yu mekem i kamaot klia, bambae ol tok we yu mekem long fored blong ol man oli gud moa, mo bambae yu kam wan gudfala tija blong Tok blong God.