Japta 59

?Jisas Hem i Rili Hu?

JISAS wetem ol disaepol blong hem oli tekem wan bot, nao oli kam kasem wan ples, nem blong hem Betsaeda. Nao sam man oli tekem wan blaenman i kam long Jisas. Oli askem long Jisas blong i putum han blong hem long hem, blong mekem man i kamgud bakegen. Nao Jisas i holem han blong man ya, i lidim hem i go afsaed long velej. Nao hem i putum spet blong hem long ae blong man ya, mo i askem long hem, i se: “?Yu yu save luk sam samting?”

Nao man ya i ansa long hem, i se: “Mi luk ol man. Oli olsem tri nomo, be oli stap wokbaot.” Jisas i putum han blong hem long ae blong man ya bakegen, nao ae blong hem i kamgud, i save luk olgeta samting i klia gud. Nao Jisas i talem strong long man ya se hem i no mas pas long velej, be hem i mas gohom wantaem.

Nao Jisas mo ol disaepol blong hem oli aot, oli go long wan velej, nem blong hem Siseria Filipae. Velej ya i longwe long not long Palestaen, mo i naes tumas. Blong kasem hem, oli mas wokbaot i go samwe long 48 kilomita, mo oli mas klaem 350 mita antap. Ating oli mas wokbaot tu dei blong kasem velej ya.

Taem oli stap long rod, Jisas i seraot long olgeta, nao hem i go long wan kwaet ples, hem wan, blong prea. Naen no ten manis biaen hem i mas ded. Nao hem i stap tingbaot ol disaepol blong hem. Plante oli no moa biaen long hem. Sam narafala oli harem nogud. Oli no kasem save from wanem Jisas i no wantem se ol man oli mekem hem i king long olgeta. Mo tu, oli no save from wanem Jisas i no mekem wan saen long paoa blong heven, taem ol enemi blong hem oli askem long hem, blong pruvum se hem i king. ?Olsem wanem long ol aposol blong hem? ?Oli ting se hem i hu? Taem oli kam kolosap long ples we Jisas i stap prea, Jisas i askem long olgeta, i se: “?Ol man oli stap taltalem mi se mi hu?”

Oli ansa, oli se: “Sam man oli stap talem se yu Jon Baptaes, mo sam oli stap talem se yu Elaeja. Mo sam narafala man oli stap talem se yu Jeremaea no wan long ol profet bifo.” !Yes, ol man oli ting se Jisas i wan long olgeta ya we i girap finis, i laef bakegen!

Nao hem i askem long olgeta, i se: “?Be yufala, yufala i stap talem mi se mi hu?”

Pita i ansa wantaem, i se: “Yu yu Mesaea. Yu yu Pikinini blong God ya we i laef we i no save ded.”

Jisas i glad long ansa blong Pita. Nao hem i talem se: “Mi mi talem long yu, yu Pita. . . . Mo bambae mi mi stanemap jyos blong mi long ston ya, mo ded bambae i no naf blong winim jyos ya.” Tok ya blong Jisas i min se bambae hem i hivimap wan kampani. Nao ol man long kampani ya bambae oli stap tru long hem gogo oli ded. Be bambae ded i no save holem olgeta. Nao hem i talem long Pita se: “Bambae mi mi givim ol ki blong kingdom blong heven long yu.” (GNB)

Ale Jisas i stap talem long Pita se bambae hem i kasem spesel blesing. Samting ya i no min se Pita i hae moa long ol narafala aposol. Mo Jisas i no minim se jyos blong hem bambae i stanap long Pita. No gat. Jisas hem wan, hem i ston we jyos bambae i stanap long hem. Jisas bambae i givim tri ki long Pita. I olsem we Pita bambae i openem rod long tri defren grup, blong oli save go insaed long Kingdom blong heven.

Long Pentekos long 33 K.T., Pita i yusum faswan ki. Hem i talem long ol man Jyu we oli tanem tingting blong olgeta from sin, wanem we oli mas mekem blong kasem laef. Biaen, hem i yusum seken ki blong givim jans long ol man Sameria blong go insaed long Kingdom blong God. Biaen bakegen, long 36 K.T., hem i save yusum namba tri ki blong openem rod long ol hiten man we oli no sakomsaes. Long taem ya, Konilyas mo ol fren blong hem oli gat jans tu blong go insaed long Kingdom blong God.

Ale Jisas i gohed blong storeyan wetem ol aposol blong hem. Hem i talem long olgeta se bambae hem i mas go long Jerusalem mo i mas harem nogud long plante samting. Biaen hem i mas ded. Ol aposol blong Jisas oli no kasem save se taem tri dei i pas finis, bambae God i mekem Jisas i laef bakegen long ded, i leftemap hem i go antap long heven. Taswe Pita i tekem hem i go long saed blong rod, i stap tok strong long hem blong blokem hem, i se: “Masta, plis, yu kaen long yu wan. Bambae ol samting ya oli no kamtru long yu nating.” (NW) Be Jisas i tanem baksaed long hem, i tok strong long Pita, i se: “Setan, yu gowe long mi. Yu yu stap blokem mi nomo. Tingting blong yu i no tingting blong God, i tingting blong man nomo.”

I gat sam narafala man we oli stap wokbaot wetem Jisas mo ol aposol blong hem. Ale, hem i singaot olgeta, oli kam kolosap long hem, nao hem i eksplenem long olgeta se i no isi blong biaen long hem. Hem i talem se: “Man we i wantem kam biaen long mi i mas blokem ol samting we hem nomo i wantem, nao evri dei i mas karem [pos] blong hem, i mas biaen long mi. From we man we i wantem sevem laef blong hem, bambae i lusum laef blong hem. Be man we i lusum laef blong hem from mi, no from gud nyus blong mi, hem bambae i sevem laef blong hem.”

Yes ol man we oli biaen long Jisas oli mas no fraet mo oli mas blokem ol samting we olgeta nomo oli wantem. Olsem ya nao, Jisas i no save sem long olgeta, hem i save blesem olgeta. Taswe hem i talem se: “Ol man blong naoia oli stap mekem sin, mo oli stap mekem i krangke long God. Mo sam man blong mi oli sem blong talemaot nem blong mi no tok blong mi long fes blong olgeta. Be taem we bambae mi mi Pikinini blong Man, mi kam wetem ol tabu enjel, long bigfala paoa blong Papa blong mi, bambae mi tu mi sem blong talemaot nem blong ol man ya blong mi.” Mak 8:22-38; Matyu 16:13-28; Luk 9:18-27.

▪ ?From wanem Jisas i stap wari long ol disaepol blong hem?

▪ ?Ol man oli ting se Jisas hem i hu?

▪ ?Wanem ol ki we Jisas i givim long Pita? ?Bambae Pita i save yusum ol ki ya olsem wanem?

▪ ?Olsem wanem Jisas i stretem Pita? ?From wanem?