?Wanem Ya Kingdom Blong God?

“Gud nius ya blong kingdom . . . ”—MATIU 24:14, NW.

LONG Bigfala Toktok we Jisas i mekem antap long hil, hem i mekem wan prea blong tijim ol man blong hem olsem wanem blong prea long God. Long prea ya, hem i askem long God se: “Plis, yu mekem kingdom blong yu i kam.” Plante milian man oli save ol tok blong prea ya baehat mo oli talem prea ya bakegen mo bakegen. Wan buk i talem se “prea ya hem i wan stamba haf blong wosip blong olgeta Kristin.” Be plante man we oli talem prea ya bakegen mo bakegen, oli no save se Kingdom hem i wanem, mo oli no save wanem samting we Kingdom ya bambae i mekem taem hem i kam.—Matiu 6:9, 10, NW.

Yumi no sapraes long samting ya from we ol lida blong ol skul we oli talem se oli Kristin, oli tijim defdefren samting long saed blong Kingdom. I no isi blong kasem save long ol tijing blong olgeta mo oli mekem tingting blong ol man i fasfas. Wan lida blong skul i raetem se Kingdom blong God “i wan samting we God i mekem, . . . wan samting insaed long ol man mo ol woman, we i mekem se oli klosap long God ya we i laef . . . , mo i wan samting we i hapen long laef blong ol man mo ol woman, nao oli lukluk long God blong i sevem olgeta.” Wan narafala lida blong skul i talem se tijing blong Kingdom i minim “ol save long saed blong jos.” Mo buk ya Catechism of the Catholic Church i talem se: “Kingdom blong God hem i stret fasin mo pis mo glad we man i kasem long Tabu Spirit.”

Long pej 2 blong magasin ya, i eksplenem klia moa se Kingdom blong God hem i wanem. Hem i talem se: “Kingdom ya i wan trufala gavman long heven mo i no longtaem bambae hem i finisim ol rabis fasin mo mekem wol ya i kam wan paradaes.” Bambae yumi luk se samting we Baebol i talem i laenap wetem tingting ya.

Olgeta We Bambae Oli Rulum Wol Ya

Wan kingdom i wan gavman we wan king i rul long hem. King blong Kingdom blong God hemia Jisas Kraes we i laef bakegen. Profet Daniel i luk wan vison we i tokbaot samting we i hapen taem Jisas i kam king long heven. Daniel i raetemdaon samting we hem i luk, i se: “Long vison ya, mi luk wan man we i olsem man blong wol ya. Hem i stap kam stret long mi, mo klaod i stap raonabaot long hem. Nao hem i go stanap long fes blong Olfala ya we i stap fastaem bifo olgeta, mo bambae i stap gogo i no save finis. Nao Olfala ya i putumap man ya i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem. Hem i king we paoa blong hem bambae i stap oltaem nomo, mo rul blong hem bambae i no save finis samtaem.”—Daniel 7:13, 14.

Buk blong Daniel i soemaot tu se God i stanemap Kingdom ya, mo Kingdom ya bambae i finisim olgeta gavman blong ol man, mo bambae rul blong Kingdom ya i no save finis samtaem. Long Japta 2, Daniel i tokbaot wan drim we God i mekem king blong Babilon i luk. King i luk wan bigfala pija blong man. Pija ya i minim ol gavman we oli gat bigfala paoa long wol, we oli rul, wan afta long narawan. Profet Daniel i talemaot mining blong drim ya long King blong Babilon. Hem i talem se: “[God] i soemaot long yu finis ol samting ya we bambae i kamtru long fiuja. . . . God ya we i stap long heven bambae i stanemap wan king [“kingdom,” NW] we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”—Daniel 2:28, 44.

Bambae i gat sam narafala we oli rul wetem King ya long Kingdom blong God. Taem Jisas i stap mekem wok blong prij long wol ya, hem i promes long ol gudfala aposol blong hem se olgeta mo sam narafala man bakegen, bambae oli laef bakegen long heven mo oli sidaon long ol gudfala jea, olsem jea blong king. (Luk 22:28-30) Jisas i no minim ol tru jea blong king, from we hem i talem se Kingdom ya bambae i stap long heven. Baebol i tokbaot ol man ya we bambae oli rul wetem Jisas se oli kamaot long “olgeta kala, mo long olgeta kantri, mo long olgeta laen, mo long olgeta lanwis.” Olgeta ya bambae oli “pris blong mekem wok blong God blong mifala, mo bambae oli king, oli rul long olgeta man long wol.”—Revelesen 5:9, 10.

?From Wanem Nius Blong Kingdom Ya i Gud?

Yumi luk se God i givim paoa long Jisas blong rul long “olgeta man blong olgeta kantri mo olgeta kala mo olgeta lanwis,” mo olgeta we oli joen wetem Jisas “bambae oli king, oli rul long olgeta man long wol.” Ale, ?hu ol man we bambae oli stap aninit long rul blong Kingdom ya? Hemia olgeta we oli glad blong lesin long gud nius ya we ol man blong God oli stap talemaot tede. Mo ol man we oli ded, bambae oli laef bakegen long wol ya mo oli save kasem laef we i no save finis. Olgeta tu bambae oli stap aninit long rul blong Kingdom ya.

Baebol i talemaot klia ol blesing we ol man bambae oli kasem aninit long rul blong Kingdom ya. Hemia sam long olgeta:

“Hem i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”—Ol Sam 46:9.

“Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.”—Aesea 65:21, 22.

“[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.

“Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.”—Aesea 35:5, 6.

“I nogud yufala i sapraes long samting ya, from we i gat taem i stap kam we ol dedman bambae oli harem voes blong mi [Jisas], nao bambae oli aot long beregraon blong olgeta. Olgeta we bifo oli stap mekem ol gudfala fasin, oli mas stanap bakegen blong kasem laef.”—Jon 5:28, 29.

“Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11.

!Tru, hemia gud nius ya! Mo narafala samting we i nambawan, hemia se ol profet tok long Baebol oli soemaot we yumi klosap nomo long taem we Kingdom ya bambae i rul long olgeta ples long wol long fasin we i stret.

?Gud Nius Ya i Long Saed Blong Wanem?

“Gud nius ya . . . ”—MATIU 24:14.

OL KRISTIN oli mas talemaot ‘gud nius ya blong kingdom’ long ol narafala, taem oli go prij mo oli eksplenem se Kingdom ya i wan gavman we bambae i rulum wol ya long fasin we i stret. Be Baebol i yusum tok ya “gud nius” long saed blong sam narafala samting tu. Yumi luk se Baebol i tokbaot “gud nius ya we [God] i sevem yumi” (Ol Sam 96:2); “gud nius blong God” (Rom 15:16); mo “gud nius blong Jisas Kraes.”—Mak 1:1.

Blong talem long toktok we i klia nomo, gud nius hem i olgeta trutok we Jisas i tokbaot mo olgeta trutok we ol disaepol blong hem oli raetemdaon. Bifo we Jisas i go antap long heven, hem i talem long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Yes, wok blong ol tru Kristin i no blong talemaot Kingdom nomo, be oli mas traehad blong pulum ol man oli kam ol disaepol blong Jisas.

?Olsem wanem long ol jos? ?Oli stap mekem samting ya? Plante man oli no kasem save se Kingdom hem i wanem. Taswe oli no save tijim ol man long saed blong Kingdom ya. Be oli talemaot ol samting we man i glad blong harem, olsem fasin blong God blong fogivim ol sin mo fasin blong bilif long Jisas. Mo oli mekem ol wok blong givhan long ol man, blong traem pulum ol man oli kam long jos blong olgeta. Oli bildim ol hospital mo ol haos blong ol puaman. Ating ol samting ya oli pulum ol man blong joen long jos blong olgeta, be oli no pulum ol man blong kam ol tru Kristin we oli traehad blong folem ol tijing blong Jisas long laef blong olgeta.

Wan man we i stadi long ol jos i raetem se: “Plante man we oli stadi dip long Baebol mo plante lida blong ol skul we oli talem se oli Kristin, oli save se yumi mas pulum ol man oli kam disaepol blong Jisas, blong oli biaen long Jisas, mo yumi mas tijim olgeta blong mekem ol samting we Jisas i talem. . . . Tok we Jisas i talem i klia long saed ya. Be yumi no mekem wanem we hem i talem. Yumi no traehad nating blong mekem gud wok ya. Mo i luk olsem se yumi no save olsem wanem blong mekem wok ya.”

Wan stadi we ol man oli mekem long sam Katolik long Yunaeted Stet, i soemaot se samting ya i tru. I gat 95 pesen blong olgeta, oli agri se oli mas talemaot gud nius long ol man, blong God i glad long wosip blong olgeta. Be klosap olgeta ya evriwan oli ting se rod we i nambawan blong mekem samting ya, i no blong talemaot gud nius, be blong mekem ol samting long laef blong olgeta, we i givim gudfala eksampol long narafala. Wan long olgeta we oli askem kwestin long hem i talem se: “Wok blong talemaot gud nius i no blong toktok, toktok, toktok. Laef blong yumi i mas soemaot Gud Nius ya.” Ol man we oli mekem stadi ya oli wokem buk ya U.S. Catholic. Long buk ya, oli talem se “ol stori long saed blong nogud fasin blong ol lida blong skul, mo ol raorao long saed blong ol tijing blong jos, oli spolem nem blong jos,” mo from samting ya nao plante man oli no talemaot bilif blong olgeta long narafala.

Long wan narafala kantri, wan bisop blong Metodis jos i talem se hem i harem nogud from we ol man long jos blong hem oli seraot mo oli konfius, oli fraet blong mekem wok blong olgeta, mo fasin blong olgeta i klosap sem mak long ol man we oli no go long jos. Hem i harem nogud lelebet taem hem i askem se: “?Hu ya olgeta we oli mekem wok ya blong karem tijing long saed blong Kingdom i go long ol man?”

Bisop ya i no ansa long kwestin ya. Be kwestin ya i gat ansa blong hem. Yu save faenemaot ansa long nekis haf.

[Tok blong makem poen long pej 6]

Gud nius ya i long saed blong Kingdom blong God mo long saed blong fasin blong God blong sevem ol man we oli bilif long Jisas Kraes