“Yu Talem Long Mifala. ?Wetaem Bambae Ol Samting Ya Oli Kamtru?”

1. ?Olsem ol aposol, yumi wantem tumas blong save wanem?

I NO longtaem, Jisas bambae i finisim wok blong hem long wol ya, mo ol disaepol blong hem oli wantem tumas blong save samting we bambae i hapen long fiuja. Ale, sam dei bifo we Jisas i ded, fo aposol blong hem oli askem se: “?Wetaem bambae ol samting ya oli kamtru? ?Mo wanem saen bambae i soemaot se yu stap, mo klosap wol i finis?” (Mat. 24:3, NW; Mak 13:3) Jisas i ansa long olgeta, taem hem i talem profet tok we i stap long Matiu japta 24 mo 25. Long profet tok ya, Jisas i talem plante impoten samting we bambae oli hapen. Ol tok blong hem oli impoten long yumi from we yumi tu yumi wantem save samting we bambae i hapen long fiuja.

2. (1) ?Blong plante yia, ol tabu brata oli stadi dip blong kasem save klia long wanem? (2) ?Wanem trifala kwestin we bambae yumi tokbaot?

² Blong plante yia, ol tabu brata we oli lidim wok blong Jehova long wol, oli stadi dip long profet tok blong Jisas long saed blong ol las dei. Oli wantem save se ol tok blong Jisas bambae oli kamtru wetaem. Bambae yumi tokbaot tri kwestin blong soemaot olsem wanem yumi kasem save long ol samting ya. ?Wetaem “bigfala trabol” bambae i stat? ?Wetaem bambae Jisas i jajem “ol sipsip” mo “ol nani”? ?Wetaem bambae Jisas i ‘kamtru’?—Mat. 24:21; 25:31-33.

?WETAEM BIGFALA TRABOL BAMBAE I STAT?

3. ?Bifo, wanem tingting we yumi gat long saed blong bigfala trabol?

³ Bifo, yumi ting se bigfala trabol i stat long 1914 wetem Wol Wo Wan. Mo tu, yumi ting se long 1918, Jehova i “katem taem” blong faet ya, blong mekem se ol tabu Kristin oli save talemaot gud nius long olgeta man long wol. (Mat. 24:21, 22) Afta we wok blong prij i finis, rul blong Setan bambae i lus. Taswe bifo, yumi gat tingting ya se bigfala trabol i gat tri haf blong hem: (1) Bambae hem i stat samples long 1914 kasem 1918, (2) bambae hem i stop smoltaem (stat long 1918 i kam), mo (3) bambae hem i stat bakegen blong go finis long Amagedon.

4. ?Wanem save i kam klia moa long saed blong profet tok blong Jisas?

⁴ Be taem yumi stadi moa long profet tok blong Jisas long saed blong ol las dei, yumi luksave se sam haf blong profet tok ya i kamtru long tu defren taem. (Mat. 24:4-22) Hem i kamtru fastaem long Judia long yia 33 kasem yia 70, mo bambae hem i kamtru bakegen long taem blong yumi, long wan fasin we i bigwan moa. From we save ya i kam klia moa, yumi mas jenisim sam tingting blong yumi long saed blong profet tok ya.a

5. (1) ?Ol samting we oli hapen long 1914, oli stat blong wanem? (2) ?Taem ya i sem mak long wanem samting?

⁵ Yumi luksave tu se bigfala trabol i no stat long 1914. ?From wanem? Hemia from we profet tok blong Baebol i soemaot se bigfala trabol bambae i stat wetem faet agensem ol giaman skul, be i no faet bitwin ol kantri. Taswe, ol samting we oli hapen long 1914, oli no stat blong bigfala trabol. Be oli stat blong wan taem we Baebol i talem se i olsem we ‘bak blong woman i soa blong i bonem pikinini.’ (Mat. 24:8) Taem ya i sem mak long samting we i hapen long Jerusalem mo Judia long yia 33 kasem yia 66.

6. ?Bambae yumi save olsem wanem se bigfala trabol i stat?

⁶ ?Wanem samting bambae i soemaot se bigfala trabol i stat? Jisas i talem se: “Bambae yufala i save luk rabis god blong ol hiten man we hem i nogud we i nogud, we Profet Daniel i bin tokbaot bifo. Olgeta bambae oli go stanemap rabis god ya insaed long haos blong God, long Rum ya we i Tabu. Man we i ridim tok ya i mas save. Taem yufala i luk samting ya, yufala we i stap long Judia, yufala i mas ronwe i go haed long ol hil.” (Mat. 24:15, 16) Profet tok ya i kamtru fastaem long yia 66, taem ami blong Rom (“rabis god”) i spolem Jerusalem mo haos tempol blong hem (we ol man Jiu oli tinghae long hem se i tabu). Profet tok ya bambae i kamtru fulwan, taem Yunaeted Neson (“rabis god” long taem blong yumi) i spolem ol skul we oli talem se oli Kristin (we ol giaman Kristin oli tinghae long olgeta se oli tabu) mo ol narafala haf blong Bigfala Babilon. Revelesen 17:16-18 i tokbaot faet ya tu. Hemia nao stat blong bigfala trabol.

7. (1) ?Wanem i mekem se ol tabu Kristin oli “save stap laef” long yia 66? (2) ?Jehova bambae i mekem wanem long taem blong bigfala trabol?

⁷ Jisas i talem tu se: ‘God bambae i katem taem blong trabol ya.’ Samting ya i kamtru fastaem long yia 66, taem ol ami blong Rom oli faet agensem Jerusalem. Long taem ya, God i “katem taem” blong faet blong olgeta. Ale, ol tabu Kristin long Jerusalem mo long Judia oli ronwe blong “oli save stap laef.” (Ridim Matiu 24:22; Mal. 3:17) ?Wanem bambae i hapen long taem blong bigfala trabol? Jehova bambae i “katem taem” blong faet we Yunaeted Neson i mekem agensem ol giaman skul. Olsem nao bambae Yunaeted Neson i no spolem trufala skul wetem ol giaman skul. Jehova i mekem olsem blong meksua se ol man blong Hem bambae oli sef.

8. (1) ?Wanem ol samting we bambae oli hapen, afta we bigfala trabol i stat? (2) ?Wetaem bambae ol las memba blong 144,000 oli kasem praes blong olgeta long heven? (Yu lukluk sam moa save.)

⁸ ?Wanem bambae i hapen afta we bigfala trabol i stat? Jisas i tokbaot sam narafala samting we bambae oli hapen bifo we Amagedon i stat. ?Wanem ol samting ya? Ansa i stap long Esikel 38:14-16 mo Matiu 24:29-31. (Ridim.)b Nao biaen, Amagedon i kam, mo hemia en blong bigfala trabol. Taem ya i sem mak long taem we Jerusalem i lus long yia 70. (Mal. 4:1) Bigfala trabol bambae i wan samting “we neva man i luk olsem bifo, i stat long taem we God i mekem wol ya, i kam kasem tede.” (Mat. 24:21) Afta long Amagedon, Kraes bambae i stat blong rul blong wan taosen yia.

9. ?Profet tok ya blong bigfala trabol i givhan long ol man blong Jehova olsem wanem?

⁹ Profet tok ya long saed blong bigfala trabol i givim paoa long yumi. ?From wanem? From we hem i mekem tingting blong yumi i strong se nomata wanem hadtaem we yumi kasem, be Jehova bambae i sevem olgeta man blong hem long bigfala trabol. (Rev. 7:9, 14) Mo tu, yumi glad tumas from we long Amagedon, Jehova bambae i soemaot se hem nomo i gat raet blong rul mo nem blong hem i tabu.—Sam 83:18; Esik. 38:23.

?WETAEM BAMBAE JISAS I JAJEM OL SIPSIP MO OL NANI?

10. ?Bifo, yumi ting se Jisas i jajem ol man se oli sipsip no oli nani wetaem?

¹⁰ Naoia bambae yumi luk narafala haf blong profet tok blong Jisas. Hemia parabol blong Jisas long saed blong ol sipsip mo ol nani. (Mat. 25:31-46) Bifo, yumi ting se Jisas i jajem ol man se oli sipsip no oli nani, long taem blong ol las dei, hemia stat long 1914 i kam. Yumi bin talem se olgeta we oli no wantem lesin long gud nius blong Kingdom mo oli ded bifo we bigfala trabol i stat, oli ol nani. Bambae oli no moa save laef bakegen.

11. ?From wanem long 1914, Jisas i no jajem ol man yet se oli sipsip no oli nani?

¹¹ Long 1995, Wajtaoa i tokbaot Matiu 25:31, we i talem se: “Long taem ya we mi, mi Pikinini blong Man bambae mi King mi gat olgeta paoa, bambae mi kamtru wetem olgeta enjel blong heven, nao mi go sidaon long bigfala jea blong mi.” Wajtaoa ya i eksplenem se Jisas i sidaon olsem King long Kingdom blong God long 1914, be hem i no ‘sidaon long bigfala jea blong hem’ blong jajem “olgeta man blong wol.” (Mat. 25:32; skelem wetem Daniel 7:13) Parabol ya blong sipsip wetem nani, i soemaot wok ya we Jisas bambae i mekem blong jajem olgeta man. (Ridim Matiu 25:31-34, 41, 46.) From we long 1914, Jisas i no mekem wok blong jajem olgeta man blong wol yet, hemia i soemaot se hem i no stat blong jajem ol sipsip mo ol nani long yia ya.c Sipos i olsem, ?wetaem Jisas i stat blong mekem wok ya blong jajem ol man?

12. (1) ?Wetaem bambae Jisas i jajem olgeta man blong wol? (2) ?Wanem ol samting we Matiu 24:30, 31 mo Matiu 25:31-33, 46 i tokbaot? (Yu lukluk sam moa save.)

¹² Profet tok blong Jisas long saed blong ol las dei, i soemaot se bambae hem i jajem olgeta man blong wol, afta we ol giaman skul oli lus. Matiu 24:30, 31 i tokbaot sam long ol samting we oli hapen long taem ya, olsem we yumi tokbaot finis long haf 8. Taem yu stadi gud long ol vas ya, bambae yu luk se Jisas i stap tokbaot ol samting we oli sem mak long hemia we hem i tokbaot long parabol blong ol sipsip mo ol nani. Hemia ol samting olsem: Pikinini blong man i gat olgeta paoa mo i kam wetem ol enjel blong hem; olgeta laen mo olgeta man blong wol oli kam wanples; olgeta we hem i talem se oli sipsip oli ‘leftemap hed blong olgeta’ from we bambae oli kasem “laef we i no save finis.”d Olgeta we hem i talem se oli nani “bambae oli krae” from we bambae oli kasem “panis ya we i no save finis.”—Mat. 25:31-33, 46.

13. (1) ?Wetaem bambae Jisas i jajem ol man se oli sipsip no oli nani? (2) ?Save ya i givhan long yumi olsem wanem long wok blong prij?

¹³ ?Yumi lanem wanem? Yumi lanem se Jisas bambae i jajem ol man se oli sipsip no oli nani, long taem blong bigfala trabol. Ale, long Amagedon, olgeta man we oli olsem nani, bambae oli lus blong olwe. ?Save ya i givhan long yumi olsem wanem long wok blong prij? Hem i givhan long yumi blong yumi luksave se wok blong prij i impoten. Go kasem taem we bigfala trabol i stat, ol man oli gat taem blong jenisim tingting blong olgeta mo folem smol rod ya we i “go kasem laef.” (Mat. 7:13, 14) Tede, maet ol man oli mekem ol fasin we i soemaot se oli sipsip no oli nani. Nating se i olsem, yumi mas tingbaot se laswan taem we Jisas bambae i jajem ol man se oli sipsip no oli nani, hemia long taem blong bigfala trabol. From samting ya, yumi mas gohed blong givhan long plante man blong oli gat janis ya blong harem gud nius blong Kingdom mo blong oli obei long hem.

?WETAEM BAMBAE JISAS I KAMTRU?

14, 15. ?Wanem fofala vas we i tokbaot taem we Jisas bambae i kamtru blong jajem olgeta man?

¹⁴ Naoia we yumi stadi moa long profet tok ya blong Jisas, ?Olsem wanem? ?Yumi nidim blong jenisim tingting tu long saed blong taem blong ol narafala samting we bambae oli kamtru? Bambae yumi luk profet tok ya blong faenem ansa.

¹⁵ Long profet tok blong Jisas long Matiu 24:29–25:46, hem i tokbaot ol samting we bambae oli hapen long ol las dei, mo long taem blong bigfala trabol. Jisas i tokbaot eit taem se bambae hem i “kamtru.”e Hem i tokbaot samting we bambae i hapen long taem blong bigfala trabol i se: “Bambae oli save luk mi, mi Pikinini blong Man, mi kamaot long klaod long skae.” “Yufala i no save wanem dei, mi, mi Masta blong yufala, bambae mi kamtru long hem.” “Mi Pikinini blong Man, bambae mi kamtru long taem we yufala i no tingbaot.” Mo long parabol blong ol sipsip mo ol nani, Jisas i talem se: “Long taem ya we mi, mi Pikinini blong Man bambae mi King mi gat olgeta paoa, bambae mi kamtru.” (Mat. 24:30, 42, 44; 25:31) Fofala vas ya wanwan i tokbaot taem ya we Jisas bambae i kamtru, blong jajem olgeta man. ?Wanem ol narafala vas long profet tok ya we Jisas i tokbaot fo taem bakegen se bambae hem i kamtru?

16. ?Wanem ol narafala vas we i tokbaot taem we Jisas bambae i kamtru?

¹⁶ Jisas i tokbaot slef we i stret mo waes, i se: “Sipos masta blong man olsem i kamtru, nao i faenem we hem i stap mekem ol wok olsem, man ya bambae i save harem gud.” Long parabol blong ol yang gel, Jisas i talem se: “Olgeta oli go blong pem karsin blong olgeta. Be taem oli stap longwe yet, man ya we i jes mared i kamtru.” Long parabol blong mane, Jisas i talem se: “Nao plante yia i pas, masta blong ol man ya i kambak.” Long sem parabol ya, masta i talem se: ‘Taem mi kambak, bambae mi save tekem mane blong mi.’ (Mat. 24:46; 25:10, 19, 27) ?Wetaem bambae Jisas i kamtru, olsem ol fofala vas ya oli tokbaot?

17. ?Bifo, yumi talem se tok ya “kamtru” long Matiu 24:46 i minim wanem?

¹⁷ Bifo, yumi talem se ol fofala vas ya, oli tokbaot Jisas se hem i kamtru long 1918. Yu traem tingbaot tok blong Jisas long saed blong “slef we i stret mo waes.” (Ridim Matiu 24:45-47.)f Yumi gat tingting ya se taem ya we Jisas i kamtru we vas 46 i tokbaot, hem i joen wetem taem we Jisas i kam blong jekemap ol tabu Kristin, hemia long 1918. Mo long 1919, hem i putumap slef ya blong i lukaot long olgeta samting blong masta. (Mal. 3:1) Be taem yumi stadi gud long profet tok blong Jisas, yumi luksave se yumi mas jenisim tingting we yumi gat fastaem. ?From wanem?

18. ?Taem yumi tingting gud long profet tok blong Jisas, yumi kasem save se taem ya we bambae Jisas i kamtru, hem i wetaem?

¹⁸ Long ol vas bifo long Matiu 24:46, plante taem oli talem tok ya “kamtru” blong tokbaot taem we Jisas bambae i kam blong talemaot jajmen blong hem, mo blong jajem ol man long taem blong bigfala trabol. (Mat. 24:30, 42, 44) Mo olsem we yumi luk finis long haf 12, tok ya ‘kamtru’ long Matiu 25:31, i tokbaot sem taem ya. Taswe i stret nomo blong talem se vas blong Matiu 24:46, 47, we i tokbaot Jisas se hem i kamtru blong putumap slef ya blong i lukaot long olgeta samting blong hem, i joen wetem taem ya tu we bambae hem i kamtru long fiuja, hemia long taem blong bigfala trabol. Tru ya, taem yumi tingting gud long profet tok blong Jisas, yumi luksave se ol eit taem ya we Jisas i talem se bambae hem i kamtru, i minim long fiuja. Long taem blong bigfala trabol, bambae hem i kamtru blong jajem ol man.

19. ?Wanem ol save we oli jenis we yumi tokbaot long stadi ya? ?Mo wanem ol kwestin we bambae yumi kasem ansa blong olgeta long ol stadi we oli kam?

¹⁹ Ale, yumi lanem wanem? Long stat blong stadi ya, yumi talem se bambae yumi ansa long tri kwestin. Yumi kasem ansa blong trifala kwestin ya finis. Fastaem, yumi luk se bigfala trabol i no stat long 1914, be bambae hem i stat taem Yunaeted Neson i agensem Bigfala Babilon. Afta yumi luk se Jisas i no stat blong jajem ol man se oli sipsip no oli nani long 1914, be bambae hem i mekem samting ya long taem blong bigfala trabol. Mo biaen, yumi luk se Jisas i no kamtru long 1919, blong putumap slef ya blong i lukaot long ol samting blong hem. Be bambae hem i mekem samting ya long taem blong bigfala trabol. Tru ya, ansa blong trifala kwestin ya i tokbaot sem taem nomo, hemia bigfala trabol. ?Ol niufala save ya oli givhan long yumi olsem wanem blong yumi kasem save moa long parabol blong slef? ?Oli givhan long yumi olsem wanem blong kasem save ol narafala parabol blong Jisas, we oli stap kamtru long taem ya blong en? Bambae yumi tokbaot ol impoten kwestin ya long ol stadi we oli kam biaen.