Japta 112

Kolosap Nao Jisas i Mekem Laswan Pasova

HEMIA Tusde, Naesan 11. Jisas i bin tijim ol aposol blong hem antap long bigfala Hil blong ol Oliftri, nao dei ya kolosap i finis. Jisas i bisi long dei ya, mo hem i bin wok had tu. Nao ating Jisas wetem ol aposol blong hem oli stap wokbaot oli gobak long Betani blong slip. Ale, hem i talem long olgeta se: “Yufala i save, i gat tu dei i stap blong kasem lafet blong Pasova. Mo long taem ya bambae oli putum mi, mi Pikinini blong Man, mi go long han blong ol man, blong oli nilim mi long [pos] blong mi ded.”

Long nekis dei, hemia Wenesdei, Naesan 12, i luk olsem we Jisas wetem ol aposol blong hem oli stap kwaet nomo. Yestedei, hem i bin tok agens long ol lida blong ol man Isrel long open ples. Hem i luksave se oli mekem plan blong holem hem blong kilim hem i ded. Ale, long Wenesdei, hem i no wokbaot long open ples. Hem i wantem tumas mekem Lafet blong Pasova wetem ol aposol blong hem, long nekis dei, long sapa. Taswe hem i no wantem we wan samting i blokem hem.

Long taem ya, ol jif pris mo ol olfala blong ol man Isrel, oli hivap long yad blong hae pris Kaeafas. Oli harem nogud from ol strong tok we Jisas i talem long olgeta long dei we i pas finis. Oli stap lukaot wan rod blong tekem Jisas blong kilim hem i ded. Be oli wantem mekem long rod blong stil, from we oli stap talem se: “Yumi no save mekem long taem blong lafet, from we bambae ol man man oli faetem yumi ya.” Oli fraet long ol man, from we ol man ya oli laekem Jisas.

Taem ol lida blong ol man Isrel oli stap mekem rabis plan ya blong kilim Jisas i ded, i gat wan man i kamtru. Oli sapraes tumas, from we man ya i wan long ol twelef aposol blong Jisas, nem blong hem Judas Iskariot. Setan i kam stap long Judas, nao hem i givim wan tingting long hem se hem i mas letem Masta blong hem i go long han blong ol enemi blong hem. Nao Judas i askem long olgeta se: “?Sipos mi mi letem Jisas i go long han blong yufala, bambae yufala i givim wanem long mi?” Olgeta ya oli glad tumas, nao oli promes blong pem hem tate bigfala selva mane. Long Loa blong Moses, hemia praes we wan man i mas pem blong kasem wan slef. Oraet, nao i stat long taem ya, Judas i stap lukaot jans blong hem blong letem Jisas i go long han blong olgeta, long taem we olgeta man oli no stap.

Long Wenesdei, taem san i godaon, Naesan 13 i stat. Long wik we i pas finis, Jisas i aot long Jeriko, mo i kamtru long Betani long Fraede. Ale, hemia namba sikis naet mo laswan naet we Jisas i stap long Betani. Long nekis dei, Tasde, oli mas mekemrere ol samting blong Lafet blong Pasova, from we lafet ya i stat taem san i godaon long dei ya. Long taem ya nao, oli mas kilim wan smol sipsip i ded, nao oli mas rusum hem fulwan. ?Bambae oli mekem lafet ya weples? ?Mo hu bambae i mekemrere ol samting blong lafet ya?

Jisas i no talemaot ansa long tufala kwestin ya. Ating hem i mekem olsem from we hem i no wantem se Judas i go talemaot bisnes ya long ol jif pris, ale oli kam holem Jisas taem oli stap mekem Lafet blong Pasova. Long Tasde nomo, ating long aftenun, Jisas i sanem Pita mo Jon, tufala i aot long Betani, ale i talem long tufala se: “Yutufala i go, yutufala i mekem ol samting ya blong Pasova oli rere, blong bambae yumi kakae.”

Nao tufala ya i askem long hem se: “?Yu wantem mifala i go long weples blong mekem ol samting ya oli rere?”

Hem i talem long tufala, i se: “Yutufala i lesin gud. Taem yutufala i go insaed long taon, wan man we i stap karem wan bigfala botel wora bambae i faenem yutufala. Nao yutufala i biaen long hem, yutufala i go insaed long haos we hem bambae i go insaed long hem. Nao bambae yutufala i talem long masta blong haos ya, se ‘?Tija i sanem mifala blong askem long yu se rum ya we hem wetem ol man blong hem bambae oli mekem lafet blong Pasova long hem, hem i stap wea?’ Nao hem bambae i tekem yutufala i go long wan bigfala rum antap, we ol samting blong hem oli stap finis. Long ples ya nao bambae yutufala i save mekem kakae blong yumi blong lafet i rere.”

I klia we masta blong haos i wan disaepol blong Jisas finis. Ating hem i save se Jisas bambae i askem wan rum long haos blong hem, blong oli mekem spesel lafet ya long hem. Nating we i olsem wanem, be taem Pita mo Jon tufala i kamtru long Jerusalem, tufala i faenem evri samting i stret olsem Jisas i talem. Bambae i gat tatin man we oli mekem lafet ya blong Pasova, hemia Jisas wetem ol twelef aposol blong hem. Ale tufala i tekem wan pikinini sipsip, mo tufala i mekemrere ol narafala samting we ol tatin man ya bambae oli nidim. Matyu 26:1-5, 14-19; Mak 14:1, 2, 10-16; Luk 22:1-13; Eksodas 21:32.

▪ ?I luk olsem we Jisas i mekem wanem long Wenesdei? ?From wanem?

▪ ?From wanem ol man oli hivap long haos blong hae pris? ?Mo from wanem Judas i go luk ol lida blong ol man Isrel?

▪ ?Long Tasde, Jisas i sanem hu i go long Jerusalem? ?From wanem?

▪ ?Taem oli kamtru long taon ya, oli faenemaot wanem we i soemaot se Jisas i gat bigbigfala paoa?