‘Tijim Olgeta Blong Oli Folem Olgeta Tok Ya Blong Mi’

‘Nao from samting ya, yufala i mas pulum ol man oli kam man blong mi. . . . Yufala i mas tijim olgeta blong oli folem olgeta tok ya we mi mi givim finis long yufala.’​—MATIU 28:​19, 20.

1. ?Wanem storian we disaepol ya Filip i gat wetem wan man Itiopia?

WAN man Itiopia i wokbaot longwe blong kam long Jerusalem. Hem i kam long ples ya blong mekem wosip long God ya we hem i lavem, hemia Jeova. Man ya i lavem Tok blong God. Taem hem i stap long kat blong hem, i stap gobak long hom blong hem, hem i stap ridim wan hanraet blong profet Aesea. Long taem ya, Filip we i wan disaepol blong Kraes i kam mitim hem. Filip i askem long man Itiopia ya se: “?Yu yu save mining blong tok ya we yu stap ridim?” Man ya i ansa se: “?Bambae mi mi save olsem wanem? I no gat man blong i talemaot mining blong hem long mi.” Ale, Filip i halpem man ya we i wantem tumas blong stadi Baebol, mo hem i kam wan disaepol blong Kraes.​—Ol Wok 8:​26-39.

2. (a) ?Olsem wanem tok blong man Itiopia ya i gat mining? (b) ?Wanem tufala kwestin we bambae yumi tokbaot long saed blong oda ya we Jisas i givim blong pulum man i kam disaepol?

² I gud blong makem bakegen toktok ya we man Itiopia i talem long Filip. Hem i talem se: ‘?Bambae mi save olsem wanem sipos i no gat man blong i talemaot mining blong hem long mi?’ Yes, man ya i nidim narafala blong lidim hem, blong soemaot mining long hem. Toktok ya i soemaot wan impoten advaes we Jisas i givim wetem oda ya blong pulum man i kam disaepol. ?Wanem advaes ya? Blong faenem ansa, i gud yumi gohed blong stadi long ol tok blong Jisas long Matiu japta 28. Long faswan stadi blong yumi, yumi tokbaot ol kwestin ya se from wanem yumi mas mekem wok ya mo wea nao yumi mekem wok ya. Naoia bambae yumi tokbaot tu narafala kwestin we oli joen wetem oda ya blong Jisas blong pulum man i kam disaepol. ?Wanem mesej we yumi mas karem i go long ol man? mo ?Bambae yumi mekem wok ya go kasem wetaem?

“Tijim Olgeta Blong Oli Folem Olgeta Tok Ya”

3. (a) ?Olsem wanem wan man i save kam disaepol blong Jisas Kraes? (b) ?Blong pulum man i kam disaepol, yumi mas tijim olgeta long wanem samting?

³ ?Wanem samting we yumi mas tijim long ol man blong oli kam ol disaepol blong Kraes? Jisas i givim oda long ol man blong hem olsem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:​19, 20) Taswe, yumi mas tijim ol man long ol samting ya we Kraes i talem finis.a ?Be olsem wanem yumi save meksua se man ya we yumi tijim ol tok blong Jisas long hem, bambae i kam wan disaepol mo bambae i stap oltaem olsem wan disaepol? Wan impoten poen long saed ya i stap long ol tok we Jisas i yusum. Hem i no talem nomo se, ‘Tijim olgeta long ol samting we mi mi talem finis long yufala.’ Be hem i talem se: “Tijim olgeta blong oli folem olgeta tok ya we mi mi givim finis long yufala.” (Matiu 19:17) ?Olsem wanem blong mekem samting ya?

4. (a) ?Taem man i folem wan oda, hem i mekem wanem? (b) Talem wan pijatok we i soem olsem wanem yumi tijim wan man blong i folem oda blong Kraes.

⁴ Taem yumi folem wan oda we yumi kasem, hemia i min se yumi ‘tekem aksin’ folem oda ya. Olsem se, yumi obei long oda ya. ?Olsem wanem yumi tijim wan man blong folem, no obei, long olgeta samting ya we Kraes i bin talem? I gud yumi tingbaot wan pijatok long saed blong man we i tijim narafala man blong draevem trak mo blong folem ol loa blong rod. Tija ya bambae i tijim ol studen blong hem long ol rul blong rod taem olgeta oli stap long klasrum. Be blong tijim ol studen blong hem blong oli obei long ol rul ya, hem i mas lidim olgeta taem oli tekem trak mo oli draev long medel blong ol narafala trak mo taem oli stap traehad blong folem ol tok ya we oli bin lanem finis. Long sem fasin, taem yumi stadi Baebol wetem ol man, yumi tijim olgeta long olgeta loa blong Kraes. Be afta long hemia, yumi mas lidim ol studen ya tu, taem oli traehad blong folem ol rul blong Kraes long laef blong olgeta evri dei mo long wok blong prij. (Jon 14:15; 1 Jon 2:3) Taswe, blong folem oda blong Kraes blong pulum man i kam disaepol, yumi mas mekem wok blong tija mo lidim narafala semtaem. Long rod ya, yumi folem eksampol we Jisas mo Jeova tufala i soem.​—Ol Sam 48:14; Revelesen 7:17.

5. ?From wanem maet wan Baebol stadi i fraet blong folem oda blong Kraes we i blong pulum man i kam disaepol?

⁵ Taem yumi tijim narafala blong folem ol tok blong Jisas, yumi halpem olgeta blong obei long oda ya tu blong pulum man i kam disaepol. Sam long olgeta we oli stadi Baebol wetem yumi, maet oli harem se oli fraet blong mekem samting ya. Maet bifo, oli memba blong narafala jos we i talem se i Kristin, be ating ol lida blong jos blong olgeta oli neva tijim olgeta blong go pulum ol narafala man oli kam disaepol. Sam lida blong jos oli talem stret se long saed blong wok ya blong tijim ol sipsip blong prij, ol jos blong Krisendomb oli mestem mak fulwan. Wan man we nem blong hem John R. W. Stott, i tokbaot oda ya we Jisas i givim blong go long olgeta ples long wol mo halpem olkaen man blong oli kam man blong hem. Man ya i talem se: “Bigfala slak fasin blong olgeta Kristin jos tede hemia nao se oli slak blong obei long oda ya.” Hem i gohed se: “I olsem we yumi stap longwe long ol man ale yumi stap singaot i go long olgeta blong oli harem gospel. Fasin ya i olsem wan man we i luk narafala i stap draon long solwota, be hem i stanap nomo long sanbij i stap singaot i go long narafala ya blong talem long hem wanem blong mekem. I olsem we yumi no wantem jam long solwota blong go sevem ol man. Yumi fraet blong wetwet.”

6. (a) ?Taem yumi halpem wan Baebol studen, olsem wanem yumi save folem fasin blong Filip? (b) ?Olsem wanem yumi save soem se yumi kea long wan Baebol studen taem hem i stat blong prij?

⁶ Sipos wan man we i stadi Baebol wetem yumi i memba blong wan long ol jos ya we oli “fraet blong wetwet,” bambae hem i faenem i had blong winim fraet ya we hem i gat, i minim se bambae hem i faenem i had blong obei long oda blong Jisas blong pulum man i kam disaepol. Hem i nidim we yumi halpem hem. Taswe yumi mas gat longfala tingting wetem hem. Yumi mas tijim hem mo lidim hem long wei we bambae i mekem save blong hem i gru nao bambae hem i wantem mekem wok ya. Hemia nao samting we Filip i mekem. Hem i givim save long man Itiopia ya mo samting ya i pusum man ya blong wantem tekem baptaes. (Jon 16:13; Ol Wok 8:​35-38) Antap long hemia, yumi wanwan i mas wantem tijim ol Baebol studen blong oli folem oda ya blong pulum man i kam disaepol. Taswe bambae yumi wok wetem ol Baebol studen ya taem oli jes statem wok ya blong talemaot Kingdom.​—Prija 4:​9, 10; Luk 6:40.

“Olgeta Tok Ya”

7. ?Taem yumi tijim ol narafala blong oli “folem olgeta tok ya,” i min se yumi tijim olgeta tu long wanem tufala loa?

⁷ Be wok blong yumi i no jes blong tijim ol niufala disaepol blong oli pulum narafala man i kam disaepol. Jisas i talem long yumi se yumi mas tijim ol man blong oli “folem olgeta tok ya” we hem i talem finis. Hemia i minim tufala stamba loa ya tu, blong lavem God mo lavem ol man raonabaot long yumi. (Matiu 22:​37-39) ?Olsem wanem yumi save tijim wan niufala disaepol blong i folem tufala loa ya?

8. Talem wan pijatok blong soemaot olsem wanem wan niufala disaepol i save lanem fasin lav.

⁸ Tingbaot pijatok ya blong man we i stap lanem blong draevem trak. Studen i stap draevem trak long big rod wetem tija blong hem klosap long hem. Hem i stap lanem samting taem tija i toktok long hem, mo tu, hem i lanem samting taem hem i wajem fasin blong ol narafala draeva. Tija ya maet hem i soemaot long studen wan draeva we i gat kaen fasin mo i letem narafala draeva i ron i go fastaem long hem. Maet hem i soemaot wan draeva we hem i katem tos blong trak blong hem blong no spolem draeva long ol narafala trak we oli stap ron i kam. No maet hem i soem wan draeva we hem i rere blong halpem narafala man we trak blong hem i brokdaon. Ol eksampol ya oli tijim studen long sam gudfala fasin we hem i save mekem taem hem i draev. Long sem fasin, wan niufala disaepol we i stap wokbaot folem rod blong kasem laef, hem i lanem samting from eksampol blong tija blong hem mo from eksampol blong olgeta tu we hem i luk long kongregesen.​—Matiu 7:​13, 14.

9. ?Olsem wanem wan niufala disaepol i lanem samting we hem i mas mekem blong folem oda ya blong soem lav?

⁹ Tingbaot. Maet wan Baebol studen i luk we wan mama we i no gat man blong hem, i traehad blong kam oltaem long Haos Kingdom wetem ol pikinini blong hem. Maet hem i luk wan brata no wan sista we tingting blong hem i foldaon be i kam oltaem long miting. Maet hem i luk wan olfala wido we i stap yusum trak blong hem blong karem sam narafala olfala oli kam long ol miting, no i luk wan yangfala we i givhan blong klinim Haos Kingdom. Maet Baebol studen ya i luk wan elda long kongregesen we i wok strong long wok blong prij nating se hem i gat plante narafala wok blong mekem insaed long kongregesen. Maet Baebol studen ya i mitim wan Witnes we hem i handikap no we i sik bigwan mo i no save aot long haos blong hem, be maet studen i luk we Witnes ya i strong long saed blong spirit mo i leftemap tingting blong ol man we oli kam visitim hem. Studen ya maet i luk wan man wetem woman blong hem we tufala i mekem sam bigfala jenis long laef blong tufala blong tufala i save lukaot long olfala papa mama blong tufala. Taem niufala disaepol ya i wajem fasin blong ol Kristin we oli kaen, oli rere blong givhan mo we narafala i save trastem olgeta, hem i lanem olsem wanem blong obei long oda ya blong Kraes, hemia blong lavem God mo ol man raonabaot long yumi, antap moa olgeta we oli gat sem bilif olsem yumi. (Ol Proveb 24:32; Jon 13:35; Galesia 6:10; 1 Timoti 5:​4, 8; 1 Pita 5:​2, 3) Long rod ya, ol wanwan memba blong Kristin kongregesen oli save stap​—no oli mas stap—​olsem ol tija mo ol man blong lidim narafala.​—Matiu 5:16.

“Oltaem, Gogo Wol Ya i Finis”

10. (a) ?Bambae yumi gohed blong pulum man i kam disaepol gogo kasem wetaem? (b) ?Wanem eksampol we Jisas i soem long saed blong fasin we yumi mas gat blong mekem wok ya we i stap long han blong yumi?

¹⁰ ?Wok ya blong pulum man i kam disaepol bambae i gohed kasem wetaem? Go kasem taem we wol ya i finis. (Matiu 28:20) ?Bambae yumi naf blong mekem wok ya go kasem en? Yumi evriwan tugeta, hemia kongregesen blong fulwol, yumi gat strong tingting blong mekem olsem. Long ol yia we oli pas, yumi bin glad blong givim taem, paoa, mo olting blong yumi blong faenem ol man ya we “oli stret blong kasem laef blong olwe.” (Ol Wok 13:​48, NW ) Tede, raon long wol, ol Witnes blong Jeova oli spenem moa long tri milian aoa evri dei blong talemaot Kingdom mo pulum ol man oli kam disaepol. Yumi mekem olsem from we yumi folem eksampol blong Jisas. Hem i talem se: “Kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Hemia wan samting we yumi tu yumi wantem tumas long hat blong yumi. (Jon 20:21) Yumi wantem statem wok ya we Kraes i putum long han blong yumi. Be i no hemia nomo. Yumi wantem finisim wok ya tu.​—Matiu 24:13; Jon 17:4.

11. ?Wanem i stap hapen long sam Kristin brata sista blong yumi, mo yumi mas askem wanem long yumi wan?

¹¹ Be, yumi sore tu blong luk se sam Kristin brata sista blong yumi oli kam slak long saed blong spirit mo, from samting ya, oli no moa joen plante, no oli no moa joen nating, long wok ya blong pulum man i kam disaepol. ?I gat rod blong halpem olgeta blong oli joen bakegen wetem kongregesen mo blong oli joen bakegen long wok blong pulum man i kam disaepol? (Rom 15:1; Hibrus 12:12) Taem ol aposol blong Jisas oli kam slak blong smoltaem, Jisas i halpem olgeta. I gud yumi folem fasin ya blong Jisas tede tu.

Soem Se Yu Kea

12. (a) ?Smoltaem bifo we Jisas i ded, ol aposol oli mekem wanem? (b) ?Jisas i mekem wanem nating se ol aposol oli mekem sam bigfala mastik?

¹² Klosap long en blong wok blong Jisas long wol ya mo ded blong hem, ol aposol oli “lego hem, oli ronwe.” Jisas i bin talemaot samting ya finis. Hem i se bambae oli ‘go wanwan long ol ples blong olgeta.’ (Mak 14:50; Jon 16:32) ?Jisas i mekem wanem long ol fren ya blong hem we oli slak smoltaem long saed blong spirit? Smoltaem afta we Jisas i laef bakegen, hem i talem long sam long ol man blong hem se: “Yufala i no fraet. Yufala i go talem long ol brata blong mi blong oli go long Galili. Nao long ples ya, bambae oli save luk mi.” (Matiu 28:10) Nating se ol aposol oli mekem sam bigfala mastik, Jisas i gohed yet blong singaot olgeta se ‘ol brata blong mi.’ (Matiu 12:49) Hem i no lusum tras we hem i gat long olgeta. Long rod ya, Jisas i soem sore mo i rere blong fogif, sem mak olsem we Jeova i gat sore mo i rere blong fogif. (2 King 13:23) ?Olsem wanem yumi save folem fasin blong Jisas?

13. ?Wanem tingting we yumi mas gat long olgeta we oli kam slak long saed blong spirit?

¹³ Yumi mas tingbaot olgeta we oli no moa joen plante no we oli no moa joen nating long wok blong prij. Yumi mas tingbaot wok we olgeta ya oli bin mekem bifo, we i soemaot lav blong olgeta. Sam long olgeta ya oli bin mekem wok ya blong plante yia, bifo we oli kam slak. (Hibrus 6:10) Yumi harem nogud from we oli no moa kampani wetem yumi. (Luk 15:​4-7; 1 Tesalonaeka 2:17) ?Olsem wanem yumi save soem se yumi stap tingbaot olgeta?

14. ?Olsem wanem yumi save folem fasin blong Jisas taem yumi halpem wan we i slak long saed blong spirit?

¹⁴ Jisas i talem long ol aposol we tingting blong olgeta i foldaon, se oli mas go long Galili, mo long ples ya bambae oli save luk hem. Tru ya, i olsem we Jisas i singaot olgeta oli kam long wan spesel miting. (Matiu 28:10) Long sem fasin, tede, yumi traem pulum olgeta ya we oli slak long saed blong spirit, blong oli kam long ol miting blong Kristin kongregesen. Mo ating i no naf we yumi talem samting ya wan taem nomo, yumi mas talem bakegen mo bakegen. Toktok we Jisas i bin talem long ol aposol i karem frut, from we biaen, “ol leven man blong Jisas oli go long Galili, long wan bigfala hil we Jisas i bin talem long olgeta bifo blong oli go long hem.” (Matiu 28:16) !Tru, yumi glad tumas taem yumi singaot wan brata no sista blong yumi i kam long ol Kristin miting, nao yumi luk se hem i kam!​—Luk 15:6.

15. ?Olsem wanem yumi save folem fasin blong Jisas blong welkamem olgeta we oli slak taem oli kam long miting?

¹⁵ ?Bambae yu mekem wanem taem yu luk wan Kristin we i slak i kam insaed long Haos Kingdom? Tingbaot fasin blong Jisas. ?Hem i mekem wanem taem hem i luk aposol blong hem, we bilif blong olgeta i bin slak smoltaem, oli stap long stret ples blong miting? ‘Jisas i kam klosap long olgeta, i toktok long olgeta.’ (Matiu 28:18) Hem i no stanap longwe mo lukluk olgeta, hem i go long olgeta. !Ating ol aposol oli harem gud tumas taem oli luk we Jisas i mekem olsem! I gud we yumi tu, yumi mekem olsem mo yumi welkamem olgeta we oli slak long saed blong spirit taem oli kambak long miting blong Kristin kongregesen.

16. (a) ?Yumi lanem wanem from fasin we Jisas i mekem long ol man blong hem? (b) ?Olsem wanem yumi save gat sem tingting olsem Jisas long olgeta we oli slak? (Lukluk futnot.)

¹⁶ ?Jisas i mekem wanem moa? Fastaem hem i talemaot tok ya se: “God i givim olgeta paoa long mi.” Seken samting, se hem i givim wan wok: “Yufala i mas go long ol man long olgeta ples long wol, blong pulum olgeta oli kam man blong mi.” Mo namba tri samting, hem i mekem promes ya se: “Bambae mi stap wetem yufala oltaem.” ?Be yu luk wan samting long ples ya we hem i no mekem? Hem i no stretem ol disaepol blong hem from we sam oli mestem no sam oli gat tu tingting. Nogat. (Matiu 28:17) ?Fasin ya blong hem i gud? Yes. I no longtaem biaen, ol aposol blong hem oli stat bakegen blong ‘tijim ol man mo talemaot gud nius.’ (Ol Wok 5:42) Yumi folem fasin blong Jisas taem yumi tingbaot olgeta we oli slak mo yumi mekem i gud long olgeta. Ale bambae yumi luk ol gudfala frut we oli kamaot long kongregesen blong yumi from fasin ya.c​—Ol Wok 20:35.

“Bambae Mi Stap Wetem Yufala Oltaem”

17, 18. ?Olsem wanem ol tok ya blong Jisas, se “Bambae mi stap wetem yufala oltaem” i save givim paoa long yumi?

¹⁷ Laswan tok blong Jisas se, “Bambae mi stap wetem yufala oltaem.” Hemia wan tok we i givim paoa long yumi evriwan we yumi traehad blong obei long oda ya blong Kraes, blong pulum man i kam disaepol. Nating sipos ol man oli agensem wok blong talemaot Kingdom mo nating se oli tok nogud long yumi olsem wanem, be yumi no fraet. ?From wanem? !From we Jisas hem i Lida blong yumi, hem i gat ‘olgeta paoa long heven mo long wol,’ mo hem i stap wetem yumi!

¹⁸ Mo tu, promes ya we Jisas i mekem se, “Bambae mi stap wetem yufala oltaem,” i leftemap tingting blong yumi bigwan. Taem yumi stap traehad blong obei long oda blong Kraes blong pulum man i kam disaepol, yumi gat glad, be i gat sam taem tu we yumi harem nogud. (2 Kronikel 6:29) Sam long yumi i krae plante from wan famle no fren we i ded. (Jenesis 23:2; Jon 11:​33-36) Sam long yumi oli stap harem nogud from we oli olfala, nao bodi blong olgeta i no moa strong. (Prija 12:​1-6) Sam narafala bakegen, wanwan taem tingting blong olgeta i foldaon olgeta. (1 Tesalonaeka 5:14) Mo plante long yumi oli stap wokhad from i gat trabol long saed blong mane. Nating se i olsem, yumi naf blong mekem wok blong prij from we Jisas i stap wetem yumi “oltaem,” long taem ya tu we yumi stap harem nogud long laef blong yumi.​—Matiu 11:​28-30.

19. (a) ?Oda ya we Jisas i givim blong pulum man i kam disaepol i soemaot wanem long saed blong wok ya? (b) ?Wanem i mekem se yumi naf blong mekem bigfala wok ya?

¹⁹ Long stadi ya mo long faswan stadi tu, yumi luk we oda ya blong Jisas blong pulum man i kam disaepol hem i ansarem evri kwestin we yumi gat long saed blong wok ya. Jisas i talem from wanem mo weples yumi mas mekem wok ya. Mo tu, hem i talem wanem samting we yumi mas tijim long man mo go kasem wetaem bambae yumi mas mekem olsem. I tru, hemia wan bigfala wok ya. Be from we Jisas Kraes i stap wetem yumi mo i givim paoa long yumi, yumi naf blong mekem wok ya. ?Yu yu agri se yumi naf blong mekem olsem?

[Ol Futnot]

?Bambae Yu Yu Ansa Olsem Wanem?

• ?Olsem wanem yumi tijim ol man blong folem oda blong Jisas?

• ?Wanem lesen we ol niufala disaepol oli save lanem taem oli lukluk fasin blong ol narawan insaed long kongregesen?

• ?Yumi save mekem wanem blong halpem olgeta we oli kam slak long saed blong spirit?

• ?Promes ya blong Jisas, se “Bambae mi stap wetem yufala oltaem” i givim paoa mo i leftemap tingting blong yumi olsem wanem?

[Tok blong pija long pej 15]

Yumi mas tijim man mo lidim hem tu

[Tok blong pija long pej 17]

Wan niufala disaepol i lanem sam gudfala lesen long eksampol blong narafala