Japta 128

!Jisas i Laef Bakegen!

TAEM ol woman oli luk we bodi blong Jisas i no moa stap long hol ya long ston, Meri, woman Magdala, i resis blong go talemaot nyus ya long Pita mo Jon. Be ol narafala woman oli stap stanap kolosap long gref. I no longtaem, wan enjel i kamtru long olgeta, i singaot olgeta blong oli go insaed long hol blong ston.

Long ples ya ol woman oli luk wan narafala enjel bakegen. Wan long tufala enjel ya i talem long olgeta i se: “Yufala i no fraet. Mi mi save we yufala i stap lukaot Jisas, man Nasaret ya we oli nilim hem long [pos, NW]. Be hem i no stap long ples ya. Hem i laef bakegen finis long ded. Yufala i kam luk. Hemia ples ya we oli putum hem. Be yufala i mas go talem long ol man blong hem, [se hem i girap bakegen finis long ded, NW].” Ol woman ya oli glad tumas, be oli fraet tu. Nao oli resis i go blong talemaot nyus ya long ol man blong Jisas.

Long taem ya, Meri i faenem Pita mo Jon. Nao hem i talem long tufala se: “Olgeta oli tekemaot bodi blong Masta blong yumi long hol ya long ston, nao mifala i no save weples oli putum.” Nao tufala aposol ya i resis wantaem i go. Jon i yangfala moa long Pita, taswe hem i resis strong moa, i winim Pita. Nao hem i kasem hol ya fastaem. Ol woman oli goaot long beregraon finis, ale i no moa gat man i stap. Jon i bendaon, i lukluk i go insaed long gref, mo i luk ol longfala pis kaliko ya oli stap. Be hem i no go insaed.

Ale biaen Pita i kamtru. Wantaem nomo hem i go insaed long hol ya long ston. Hem i luk ol longfala pis kaliko ya oli stap, mo hem i luk kaliko ya tu we fastaem hem i stap kavremap hed blong Jisas. Hemia i no stap wetem ol narafala kaliko, be i olsem we man i putum gud hem, nao i stap hem wan. Nao Jon tu i go insaed long hol ya. Hem i luk ol samting ya, nao hem i bilif long tok ya we Meri i talemaot finis. Be kam kasem taem ya, Pita mo Jon tufala i no kasem save se Jisas i laef bakegen long ded, nating we Jisas i talemaot long olgeta plante taem se samting ya i mas kamaot. Meri i gobak long beregraon, nao hem i stap stanap afsaed long hol blong ston. Nao tufala man ya i livim hem, tufala i gobak bakegen long ples blong tufala, be tufala i no kasem save long mining blong ol samting ya.

Semtaem, ol narafala woman oli hareap blong go talemaot long ol disaepol blong Jisas se hem i laef bakegen finis long ded, olsem ol enjel oli bin talem long olgeta blong mekem. Taem olgeta oli stap resis i go, Jisas i kam mitim olgeta, i talem halo long olgeta. Olgeta oli foldaon long hem, oli ona long hem. Nao Jisas i talem long olgeta i se: “Yufala i no fraet. Yufala i go talem long ol brata blong mi blong oli go long Galili. Nao long ples ya, bambae oli save luk mi.” (NW)

Bifo finis, taem graon i seksek mo tufala enjel i kamtru, ol soldia we oli gadem gref blong Jisas oli fraet tumas, oli seksek, nao oli kam olsem dedman nomo. Taem oli kamgud bakegen, oli girap, nao wantaem nomo oli gobak long taon, oli go talemaot long ol jif pris olgeta samting ya we i kamtru. Nao olgeta ya oli singaot ol “elda” blong ol man Isrel oli kam, nao oli tokbaot ol samting ya. Nao oli givim mane long ol soldia ya blong oli no talemaot bisnes ya long narafala man. Oli talem long olgeta se: “Yufala i mas talemaot long ol man, se ‘Ol man blong hem oli kam long naet, oli stilim bodi blong hem taem we mifala i slip, nao oli tekem i go.’ ”

Sipos ol soldia blong Rom oli slip taem oli stap mekem wok blong gad, oli save kasem panis ya, ded. Taswe ol pris oli promes long olgeta se: “Mo sipos gavman i harem nyus blong bisnes ya [ripot ya se oli bin slip], bambae mifala i go mekem i stret long hem. Bambae yufala i no save kasem trabol long hem.” From we oli givim plante mane long olgeta, ol soldia ya oli mekem olsem we ol jif pris oli talem. Nao gyaman store ya se ol man blong Jisas oli stilim bodi blong hem, i stap goraon long ol man Isrel.

Meri, woman Magdala, we hem i stap stanap afsaed long gref blong Jisas, hem i stap krae. ?Jisas i go wea? Nao hem i bendaon, i lukluk i go insaed long hol ya. Nao i luk tu enjel i stap insaed, we kaliko blong tufala i waet. !Tufala enjel ya i kamtru bakegen! Tufala i stap sidaon long ples ya we bifo, bodi blong Jisas i stap, wan i stap long ples blong hed mo wan i stap long ples blong leg. Nao tufala i askem long hem, i se: “?Woman, yu yu stap krae from wanem?”

Meri i ansa long tufala, i se: “From we olgeta oli tekemaot bodi blong Masta blong mi, nao mi mi no save weples oli putum.” Taem hem i talem tok ya, hem i tanem hem, nao i luk wan man we hem i askem sem kwestin long hem bakegen, i se: “?Woman, yu yu stap krae from wanem?” Mo man ya i askem wan moa kwestin bakegen i se: “?Yu yu stap lukaot hu?”

Be Meri i ting se man ya i man blong lukaot long garen ya we gref blong Jisas i stap long hem. Nao hem i talem long man ya, i se: “Fren, sipos yu yu tekemaot bodi blong man ya, plis yu talem long mi, blong mi save go tekem. ?Yu yu putum hem long weples?”

Man ya i ansa i se: “Meri.” Wantaem nomo Meri i save se man ya i Jisas from we Meri i save gud fasin blong Jisas blong toktok long hem. Nao Meri i talem se: “!Rabuni!” (we i minim “!Tija!”) Meri i glad bitim mak. Hem i holem Jisas. Be Jisas i talem se: “Yu no holem bodi blong mi, from we mi mi no go antap long Papa blong mi yet. Be yu go luk ol brata blong mi, yu talem long olgeta se ‘Hem i talem se Mi mi stap go antap long hemia we i Papa blong mi mo Papa blong yufala tu, we i God blong mi mo i God blong yufala tu.’ ”

Nao Meri i resis i go long ples we ol aposol mo disaepol oli hivap long hem finis. Ol narafala woman oli bin talem long olgeta finis we oli luk Jisas i laef bakegen long ded. Nao Meri i talemaot store blong hem antap long store blong olgeta bakegen. Be i luk olsem we ol man ya we oli no bilif long faswan store blong ol woman, oli no bilif long Meri tu. Matyu 28:3-15; Mak 16:5-8; Luk 24:4-12; Jon 20:2-18.

▪ ?Taem Meri, woman Magdala, i luk we gref blong Jisas i emti, hem i mekem wanem? ?Wanem i kamaot long ol narafala woman tu?

▪ ?Taem Pita mo Jon tufala i luk we gref i emti, tufala i mekem wanem?

▪ ?Taem ol narafala woman oli stap resis i go blong talemaot long ol disaepol blong Jisas se hem i laef bakegen long ded, wanem i hapen long olgeta?

▪ ?Wanem i hapen finis long ol soldia we oli stap gadem gref blong Jisas? ?Taem oli ripotem bisnes ya long ol jif pris, ol pris ya oli mekem wanem?

▪ ?Taem Meri, woman Magdala, i stap stanap hem wan long gref blong Jisas, wanem i hapen? ?Taem ol woman oli storeyan long ol disaepol long ol samting we i kamaot finis, wanem tingting blong ol disaepol?