“Kam Biaen Long Mi”
1 Fulap man oli spenem laef blong olgeta blong mekem ol samting we olgeta nomo oli wantem, be plante taem oli no glad. Defren olgeta, Jisas i givim advaes blong yumi blong folem fasin ya blong givim, we i save karem trufala glad. (Wok 20:35) Hem i talem se: “Man we i wantem kam biaen long mi, hem i mas blokem ol samting we hem nomo i wantem, . . . i mas biaen long mi.” (Mak 8:34) Hemia i no min se sam samtaem nomo yumi lego sam samting we yumi wantem. I min se evri dei yumi laef blong mekem Jeova i glad, i no blong mekem yumi nomo i glad.—Rom 14:8; 15:3.
2 Tingbaot eksampol blong Pol. Pol i ‘kasem samting we i moa gud olgeta, we hem i save Jisas Kraes,’ taswe hem i stop blong ronem ol samting we hem nomo i wantem mo i wok strong blong mekem wok blong Kingdom i kam bigwan moa. (Fil. 3:7, 8) Hem i talem se: “Mi mi glad blong lusum olgeta samting blong mi, mo laef blong mi tu, blong givhan” long ol narafala. (2 Kor. 12:15) I gud yumi wanwan i askem kwestin ya: ‘?Olsem wanem mi mi yusum taem, paoa, save, mo mane blong mi? ?Mak blong mi i blong mekem ol samting we mi nomo mi wantem, no mi mi traehad blong mekem Jeova i glad?’
3 Ol Defren Janis Blong Givim: Evri yia, ol man blong God oli givim bitim wan taosen milian aoa long wok ya we i save sevem laef blong ol man, hemia wok blong talemaot Kingdom. Insaed long kongregesen, ol yangfala mo ol olfala oli mekem ol defren wok blong givhan long ol narafala. I gat plante wok blong mekem tu long ol defren asembli, mo wok blong bildim mo riperem ol haos we yumi yusum blong mekem trufala wosip i kam antap moa. Mo tingbaot ol brata we oli wok long Komiti we i Toktok wetem ol Dokta (HLC) mo long Grup we i Visitim Sikman (PVG), olgeta oli soem lav mo givhan long yumi taem yumi nidim. !Traehad blong ol brata ya we oli rere blong lego samting we olgeta nomo oli wantem, blong mekem wok ya, i wan blesing blong kampani ya blong ol Kristin brata sista!—Sam 110:3.
4 Taem wan disasta no wan trabol i kamaot, yumi gat plante janis blong yusum ol defren rod blong givhan long narafala. Be plante taem, maet yumi luksave se wan Kristin brata no sista i nidim we yumi leftemap tingting blong hem no givhan long hem. (Prov. 17:17) Taem yumi glad blong givim taem mo ol samting blong yumi blong givhan long ol narafala mo blong mekem wok blong Kingdom i kam bigwan moa, yumi stap folem eksampol blong Jisas. (Fil. 2:5-8) I gud we yumi traehad blong gohed olsem.