?Yu Yu Gat “Tingting Blong Kraes”?

“God ya we i stap mekem yufala i stanap strong mo i harem gud, hem i mekem se yufala . . . i gat sem tingting olsem we Jisas Kraes i gat.”—ROM 15:5, NW.

1. ?Plante pija blong Krisendom oli soemaot Jisas olsem wanem kaen man, mo from wanem ol pija ya oli no stret long Jisas?

“OL MAN oli neva luk se hem i laf.” Hemia wan tok we wan man i raetem long saed blong Jisas. Man we i raetem tok ya, hem i giaman se wan haeman blong Rom bifo, hem nao i bin raetem tok ya. Hanraet ya, ol man oli gat save long hem stat long ol yia 1000. Mo plante man oli talem se hanraet ya nao i givim tingting long olgeta ya we oli mekem ol pija blong Jisas.a Plante long ol pija ya, oli soem Jisas olsem wan man we i stap sore oltaem, we neva hem i smael. Be ol pija ya oli no stret long Jisas from we ol Gospel oli tokbaot hem olsem wan man we i frengud wetem narafala, i kaen mo i gat dip filing.

2. ?Olsem wanem yumi save wokem ‘sem tingting olsem we Jisas Kraes i gat,’ mo samting ya bambae i mekem yumi naf blong mekem wanem?

² I klia se, blong save trufala Jisas, yumi mas fulumap tingting mo hat blong yumi wetem stret save long saed blong Jisas, se hem i wanem kaen man taem hem i stap long wol ya. Taswe i gud we naoia yumi luk sam stori long ol Gospel, blong save moa long “tingting blong Kraes”—hemia ol filing blong hem, fasin blong hem blong luksave samting, ol tingting blong hem, mo fasin blong hem blong tingting gud. (1 Korin 2:16) Taem yumi mekem olsem, i gud yumi tingbaot olsem wanem yumi save wokem ‘sem tingting olsem we Jisas Kraes i gat.’ (Rom 15:5) Long rod ya, bambae yumi kam we yumi naf moa blong folem eksampel blong hem long ol samting we yumi mekem long laef blong yumi mo long ol fasin we yumi mekem long narafala.—Jon 13:15.

Ol Man Oli No Fraet Blong Kam Long Hem

3, 4. (a) ?Stori we Mak 10:13-16 i tokbaot, i hapen weples? (b) ?Jisas i mekem wanem taem ol disaepol blong hem oli traem blokem ol smol pikinini blong oli no kam long hem?

³ Fasin blong Jisas i pulum ol man oli kam long hem. Plante taem, olgeta man oli no fraet blong kam long hem. Ol olfala, ol yangfala, ol pikinini, mo ol man blong narafala laen, olgeta evriwan oli wantem kam long Jisas. Tingbaot stori ya we i stap long Mak 10:13-16. Samting we stori ya i tokbaot i hapen klosap long en blong minista wok blong Jisas, hemia long laswan taem we hem i stap wokbaot i go long Jerusalem, blong i safa bigwan mo i ded.—Mak 10:32-34.

⁴ Traem pijarem wanem we i hapen long taem ya. Ol man oli stat blong tekem ol pikinini blong olgeta, wetem ol smosmol bebi tu, oli kam long Jisas blong hem i blesem olgeta.b Be, ol disaepol oli traem blokem ol pikinini ya blong oli no kam long Jisas. Maet oli ting se Jisas i no wantem ol pikinini oli mekem trabol long hem long ol laswan wik ya we oli strong tumas long hem. Be tingting blong olgeta i rong. Taem Jisas i luksave samting we ol disaepol oli stap mekem, hem i no glad nating. Ale Jisas i singaot ol pikinini oli kam long hem, i se: “!Yufala i no blokem ol pikinini ya! Yufala i letem olgeta oli kam long mi.” (Mak 10:14) Nao hem i mekem wan samting we i rili soemaot fasin kaen mo lav. Stori ya i gohed i se: “Hem i putum han blong hem i goraon long ol pikinini ya, mo i putum han blong hem long olgeta, i blesem olgeta.” (Mak 10:16) I klia se ol pikinini ya oli no fraet taem Jisas i putum han blong hem i goraon long olgeta.

5. ?Stori we i stap long Mak 10:13-16 i soemaot long yumi se Jisas i wanem kaen man?

⁵ Sotfala stori ya i soemaot plante samting long yumi long saed blong Jisas se hem i wanem kaen man. Makemgud se, ol man oli no fraet blong kam long hem. Nating se hem i bin gat wan haeples long heven, hem i neva mekem ol sinman oli fraet long hem no i daonem olgeta. (Jon 17:5) Traem tingbaot. Ol pikinini tu oli no fraet blong kam long hem. Sipos Jisas i wan man we i no gat filing, i no glad, i neva smael no laf, i sua se ol pikinini ya bambae oli no save wantem blong kam long hem. Enikaen man nomo, nomata hamas yia oli gat, be oli kam long Jisas from we oli luksave se hem i wan man we i kaen, i kea long olgeta, mo oli trastem se bambae hem i no talem long olgeta blong oli gowe long hem.

6. ?Olsem wanem ol elda oli save mekem se ol narafala oli no fraet blong kam long olgeta?

⁶ Taem yumi tingbaot stori ya, yumi save askem long yumi wan se, ‘?Mi mi gat tingting blong Kraes? ?Ol man oli no fraet blong kam toktok wetem mi?’ Naoia, we laef i kam strong tumas, ol sipsip blong God oli nidim ol man blong lukaot sipsip we oli olsem “strong sefples we man i save go haed long hem blong ronwe long hariken.” (Aesea 32:1, 2; 2 Timoti 3:1) Ol elda, wetem fulhat blong yufala, yufala i mas soem trufala intres long ol brata sista blong yufala mo yufala i mas rere blong givhan long olgeta. Sipos yufala i mekem olsem, bambae oli luksave se yufala i kea long olgeta. Taem oli luk fes blong yu, harem voes blong yu, mo luk fasin blong yu, bambae oli luksave samting ya. Trufala filing blong fren gud mo kea long narafala bambae i mekem se narafala i trastem yufala. Nao bambae i moa isi long ol narafala, wetem ol pikinini tu, blong oli kam long yufala. Wan Kristin woman i talem from wanem hem i glad blong toktok long wan elda, i se: “Hem i toktok long mi long wan fasin we i kaengud mo i gat sore. Sipos hem i no bin mekem olsem, maet bambae mi no save talemaot wan tok nating. Hem i mekem mi mi harem se mi no fraet blong toktok.”

Tingbaot Ol Narafala

7. (a) ?Olsem wanem Jisas i soemaot se hem i tingbaot ol narafala? (b) ?From wanem Jisas i mekem ae blong wan blaen man i kam gud sloslou?

⁷ Jisas i tingbaot ol narafala. Hem i kasem save long filing blong ol narafala man. Taem hem i luk olgeta we oli kasem trabol, oli stap harem nogud, hem i sore tumas long olgeta, i mekem olgeta oli haremgud bakegen. (Matiu 14:14) Mo tu, hem i tingbaot wanem we narafala i no naf blong mekem mo i tingbaot ol samting we oli nidim. (Jon 16:12) Wantaem, ol man oli tekem wan blaenman i kam long Jisas mo oli askem hem blong mekem man ya i kamgud bakegen. Be, taem Jisas i mekem man ya i lukluk bakegen, man ya i no lukluk klia wantaem nomo. Fastaem, hem i luk “ol man oli stap wokbaot, be oli olsem ol tri nomo.” Ale biaen, Jisas i mekem hem i lukluk olgeta samting i klia gud. ?From wanem Jisas i mekem man ya i kamgud sloslou olsem? Maet hemia blong mekem se man ya we i lan blong stap long tudak, i no sek wantaem blong luk laet blong san mo ol samting we oli stap raonabaot long hem.—Mak 8:22-26.

8, 9. (a) ?Wanem i hapen smoltaem afta we Jisas mo ol disaepol blong hem oli kamtru long Dekapolis? (b) Talem olsem wanem Jisas i mekem wan man we sora blong hem i fas, i kam gud bakegen.

⁸ Tingbaot wan narafala samting we i hapen afta long Pasova blong yia 32 K.T. Hemia taem Jisas mo ol disaepol blong hem oli stap long Dekapolis, long is saed blong lugun blong Galili. Long ples ya, ol man oli faenem olgeta mo oli tekem ol sikman mo olgeta we samting i rong long bodi blong olgeta, oli kam long Jisas, nao hem i mekem olgeta oli kamgud bakegen. (Matiu 15:29, 30) Be i gud blong save se, long taem ya, Jisas i soem spesel intres long wan man nomo. Mak, wan man blong raetem Gospel, hem nomo i tokbaot samting we i hapen long taem ya.—Mak 7:31-35.

⁹ Man ya we Jisas i soem spesel intres long hem, sora blong hem i fas mo hem i no save toktok gud. Ating Jisas i luksave se man ya i fraet lelebet mo maet i sem tu. Nao, Jisas i mekem wan samting we i narakaen lelebet. Hem i tekem man ya, tufala i gowe long ol narafala man, we tufala nomo i stap. Ale, Jisas i mekem saen blong soemaot long man ya wanem we bambae hem i mekem. Jisas i “putum fingga blong hem long sora blong man ya, mo i tekem spet blong hem, i putum long tang blong man ya.” (Mak 7:33) Nao, Jisas i lukluk i go antap long heven, i talem wan prea, we tingting blong hem i hevi mo i pulum win from. Taem Jisas i mekem samting ya, i olsem we hem i stap talem long man ya se, ‘Samting we bambae mi mekem long yu i kamaot long paoa blong God.’ Biaen, Jisas i talem se: “Yu open.” (Mak 7:34) Nao wantaem nomo sora blong man ya i open, mo hem i save toktok gud.

10, 11. ?Olsem wanem yumi save soem se yumi tingbaot filing blong ol narafala insaed long kongregesen? insaed long famle?

¹⁰ !Tru ya, Jisas i wan man we i rili tingbaot ol narafala! Hem i kasem save long filing blong olgeta, mo samting ya i pusum hem blong tekem aksin we i no spolem filing blong olgeta. Yumi ol Kristin, i gud yumi traehad blong wokem mo soemaot sem tingting olsem Kraes long saed ya. Baebol i givim advaes long yumi se: “Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon.” (1 Pita 3:8) Hemia i minim se yumi mas tingbaot filing blong ol narafala taem yumi toktok mo mekem wan samting.

¹¹ Insaed long kongregesen, yumi save soem se yumi tingbaot filing blong ol narafala, taem yumi ona long olgeta, mo mekem i gud long olgeta olsem we yumi wantem blong oli mekem long yumi. (Matiu 7:12) Hemia i minim se yumi mas lukaot gud long ol samting we yumi talem, mo fasin blong yumi blong talem ol samting ya. (Kolosi 4:6) Tingbaot se ‘man we i stap toktok be i no tingtinggud fastaem, tok blong hem i olsem naef blong faet we i stikim man.’ (Ol Proveb 12:18) ?Olsem wanem long famle? Wan hasban mo waef we tufala i rili lavlavem tufala bambae tufala i kasem save filing blong tufala. (Efesas 5:33) Tufala i mas lukaot gud blong no sakem ol strong tok, ol tok we oli daonem narafala oltaem, mo ol tok we oli stikim narawan—hemia ol fasin blong toktok we i save spolem filing blong narawan mo oli save mekem man i harem nogud longtaem. Ol pikinini tu oli gat filing, mo ol papa mama we oli gat lav bambae oli tingbaot samting ya. Taem i nidim blong stretem ol pikinini, papa mama we i gat lav bambae i stretem olgeta long fasin we i soem respek mo i no mekem olgeta oli sem blong nating nomo.c (Kolosi 3:21) Taem yumi tingbaot filing blong ol narafala long ol fasin mo toktok blong yumi, yumi soemaot se yumi gat tingting blong Kraes.

Rere Blong Trastem Ol Narafala

12. ?Jisas i gat wanem stret tingting long ol disaepol blong hem?

¹² Jisas i gat stret tingting long saed blong ol disaepol blong hem. Hem i save gud se oli no stret gud olgeta. Tingbaot, hem i save luk samting we i stap long hat blong ol man. (Jon 2:24, 25) Nating se i olsem, Jisas i no lukaot slak fasin blong olgeta, be hem i stap luk ol gudfala fasin we oli gat. Mo tu, hem i luk wanem we ol man ya we Jeova i pulum olgeta oli kam long hem, oli save mekem long fiuja. (Jon 6:44) Gudfala tingting we Jisas i gat long ol disaepol blong hem, i kam klia long ol fasin we hem i mekem long olgeta. Wan eksampel hemia se hem i rere blong trastem olgeta.

13. ?Olsem wanem Jisas i soemaot se hem i trastem ol disaepol blong hem?

¹³ ?Olsem wanem Jisas i soemaot se hem i trastem olgeta? Taem hem i lego wol ya, hem i givim wan bigfala wok long ol disaepol blong hem we tabu spirit i makemaot olgeta. Hem i putum wok blong talemaot Kingdom long fulwol i stap long han blong olgeta. (Matiu 25:14, 15; Luk 12:42-44) Long minista wok blong hem, hem i soemaot long plante rod se hem i trastem olgeta. Taem hem i mekem merikel blong givim kakae long plante man, hem i letem ol disaepol blong hem oli seremaot ol kakae ya.—Matiu 14:15-21; 15:32-37.

14. ?Olsem wanem yumi save eksplenem stori we i stap long Mak 4:35-41?

¹⁴ Tingbaot wan narafala stori we i stap long Mak 4:35-41. Wan taem, Jisas mo ol disaepol blong hem oli klaem long wan bot, mo oli wantem krosem lugun blong Galili. Smoltaem afta we oli aot, Jisas i go ledaon long af blong bot ya, nao i slip, we i slip ded olgeta. Nao wantaem nomo, “wan bigfala win i girap, i blu strong, i mekem wota long bigfala lugun ya i raf we i raf.” Plante taem, strongfala win olsem i stap kamaot long lugun blong Galili. From we lugun ya i stap daon (samwe long 200 mita daon, aninit long level blong solwota), win i hot moa i bitim ol narafala ples raonabaot. Samting ya i mekem weta long ples ya i stap jenis oltaem. Antap long hemia, i gat strongfala win i stap kamdaon long Bigfala Hil ya Hemon we i stap long not. Strong win ya i stap blu i kam long Flatples blong Jodan Reva mo i kamdaon kasem lugun ya. Taswe, nating se lugun ya i kwaet gud, be strong win i save girap wantaem nomo, i mekem wota blong lugun ya i raf we i raf. Tingbaot samting ya: Jisas i save gud se wota blong bigfala lugun ya i save raf bigwan, from we hem i bin gruap long Galili. Nating se i olsem, hem i stap slip gud nomo. Hem i trastem ol disaepol blong hem, we sam long olgeta oli man blong huk, se oli save gud solwota, bambae oli naf blong stiarem gud bot ya.—Matiu 4:18, 19.

15. ?Olsem wanem yumi save folem fasin blong Jisas we hem i rere blong trastem ol disaepol blong hem?

¹⁵ ?Yumi save folem fasin blong Jisas we hem i rere blong trastem ol disaepol blong hem? Samfala oli faenem i had blong givim wan wok long narafala. Sipos oli givim wok long narafala, oli mas stap klosap long man ya oltaem blong lukluk mo bos long samting we hem i stap mekem. Maet oli gat tingting se, ‘!Sipos mi mi wantem se wan wok i stret gud, mi nomo mi mas mekem wok ya!’ Be sipos yumi traem blong mekem evri samting yumi wan, yumi stap long denja. Bambae yumi kam taed, mo tu, maet bambae yumi spenem fulap taem long ol wok ya, nao yumi no moa gat taem blong spenem wetem famle blong yumi. Antap long hemia, sipos yumi no stap givim sam wok mo responsabiliti long ol narafala, yumi no givhan nating long olgeta blong oli lanem wan wok mo kasem trening. I moa waes we yumi lanem blong trastem ol narafala, mo givim sam wok long olgeta blong mekem. I gud we yumi askem long yumi wan se, ‘?Mi mi gat tingting blong Kraes long saed ya? ?Mi mi rere blong givim sam wok long ol narafala, mo mi trastem olgeta se bambae oli mekem gud ol wok ya?’

Hem i Soemaot Se Hem i Trastem Ol Disaepol Blong Hem

16, 17. Long laswan naet blong Jisas long wol ya, ?hem i mekem ol aposol blong hem oli sua long wanem samting, nating we hem i save se bambae oli lego hem?

¹⁶ Jisas i mekem wan narafala impoten samting blong soemaot se hem i gat gudfala tingting long saed blong ol disaepol blong hem. Hem i mekem olgeta oli save se hem i trastem olgeta. Samting ya i klia long ol tok we hem i talem long ol aposol blong hem long laswan naet blong hem long wol ya. Makemgud wanem we i hapen.

¹⁷ Jisas i mekem plante samting long naet ya. Hem i givim wan lesen long ol aposol blong hem blong gat tingting daon taem hem i wasem leg blong olgeta. Afta long samting ya, hem i stanemap lafet ya we bambae ol man oli mekem blong tingbaot ded blong hem. Biaen, ol aposol oli stat blong agiu long saed ya se hu long olgeta i hae moa. Jisas, we i gat longfala tingting oltaem, i no tok strong long olgeta, be i mekem olgeta oli tingting. Nao hem i talemaot long olgeta, wanem we bambae i mas hapen: “Long naet ya, bambae bilif blong yufala evriwan i save foldaon from mi, from we long Baebol God i talem se, ‘Bambae mi mi kilim man blong lukaot long sipsip, nao bambae ol sipsip oli go wanwan olbaot.’” (Matiu 26:31; Sekaraea 13:7) Hem i save se ol gudfala fren ya blong hem bambae oli lego hem long taem ya we bambae hem i kasem trabol. Nating se i olsem, hem i no agensem olgeta. Defren olgeta, hem i talem se: “Be taem mi laef bakegen long ded, bambae mi mi go fastaem long Galili, yufala i kam biaen.” (Matiu 26:32) Yes, hem i mekem sua long olgeta se nating we oli lego hem, be bambae hem i no save lego olgeta. Taem trabol soa ya we hem i kasem i finis, bambae hem i mitim olgeta bakegen.

18. ?Long Galili, Jisas i givim wanem impoten oda long ol disaepol blong hem, mo olsem wanem ol aposol oli folem oda ya?

¹⁸ Jisas i holem tok blong hem. Biaen, long Galili, Jisas we i laef bakegen long ded, i kamtru long ol 11 aposol ya we oli stap tru long hem. Long taem ya, i gat plante narafala man tu oli stap wetem olgeta. (Matiu 28:16, 17; 1 Korin 15:6) Long ples ya, Jisas i givim wan impoten oda long olgeta se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Spirit. Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Buk blong Ol Wok i givim klia pruf se ol aposol oli bin folemgud oda ya. Oli lidim wok ya blong talemaot gud nius long faswan handred yia.—Ol Wok 2:41, 42; 4:33; 5:27-32.

19. ?Samting we Jisas i mekem afta we hem i laef bakegen long ded, i tijim yumi wanem samting long saed blong tingting blong Kraes?

¹⁹ ?Stori ya i tijim wanem long yumi long saed blong tingting blong Kraes? Jisas i luk ol bigfala mastik we ol aposol blong hem oli mekem, be “hem i stap lavem olgeta olwe, gogo hem i givim laef blong hem from olgeta.” (Jon 13:1) Nating se oli mekem mastik, Jisas i soem long olgeta se hem i trastem olgeta. Makemgud se Jisas i no mekem wan mastik, taem hem i trastem olgeta. Ale, taem Jisas i trastem olgeta mo i bilif se oli save mekem wanem we hem i talem long olgeta, samting ya i mekem olgeta oli strong blong wantem folem oda ya we hem i givim, wetem fulhat blong olgeta.

20, 21. ?Olsem wanem yumi save soemaot gudfala tingting long saed blong ol brata sista blong yumi?

²⁰ ?Olsem wanem yu save soemaot tingting blong Kraes long saed ya? Yu no mas tingting nogud oltaem long ol brata sista blong yu. Sipos yu tingting nogud long ol narafala, bambae ol toktok mo aksin blong yu oli soemaot tingting ya. (Luk 6:45) Be, Baebol i talem long yumi se man we i lavem narafala, hem “i bilivim olgeta samting.” (1 Korin 13:7, NW) Man we i lavem narafala, hem i stap tingbaot ol gudfala saed blong ol samting, be i no ol nogud saed. Man olsem i mekem narafala man i strong, i no mekem narafala i foldaon. Ol man oli rere moa blong mekem wok, taem yumi soem lav mo leftemap tingting blong olgeta, i bitim we yumi mekem olgeta oli fraet. Yumi save mekem narafala i strong mo yumi save leftemap tingting blong olgeta, taem yumi soem long olgeta se yumi trastem olgeta. (1 Tesalonaeka 5:11) Sipos yumi mekem olsem Kraes, we yumi gat gudfala tingting oltaem long ol brata sista blong yumi, bambae yumi mekem ol fasin we oli bildimap bilif blong olgeta mo samting ya bambae i pulum olgeta blong givim bes blong olgeta long wok we oli mekem.

²¹ Man we i wokem mo i kasem tingting blong Kraes, hem i no jes mekem sam wok we Jisas i mekem, be hem i mas mekem sam samting moa. Olsem faswan stadi i soemaot, sipos yumi rili wantem mekem olsem Jisas, fastaem yumi mas lanem blong gat tingting olsem hem. Ol Gospel oli givhan long yumi blong luk wan narafala haf blong fasin blong Jisas, ol tingting mo filing we hem i gat long wok ya we God i givim long hem blong mekem. Nekis stadi bambae i tokbaot samting ya.

[Ol futnot]

?Yu Yu Save Eksplenem?

• ?Jisas i mekem wanem taem ol disaepol blong hem oli traem blokem ol pikinini blong oli no kam long hem?

• ?Long wanem rod, Jisas i soemaot se hem i tingbaot ol narafala?

• ?Olsem wanem yumi save folem fasin blong Jisas we hem i rere blong trastem ol disaepol blong hem?

• ?Olsem wanem yumi save folem fasin blong Jisas we i soem long ol aposol blong hem se hem i trastem olgeta?

[Tok blong pija long pej 16]

Ol pikinini oli no fraet taem oli stap klosap long Jisas

[Tok blong pija long pej 17]

Jisas i gat fasin we i soemaot sore long ol narafala

[Tok blong pija long pej 18]

Ol elda we man i no fraet blong kam long olgeta, oli rili wan blesing