Japta 43

Jisas i Yusum Pija Tok Blong Tijim Ol Man

JISAS i stap long Kapaneam taem hem i tok strong long ol Farisi. Long sem dei ya, Jisas i aot long haos, i go sidaon kolosap long bigfala lugun blong Galili. I gat plante man tumas oli kam long hem, nao hem i klaem long wan bot, i sidaon long hem. Ol man oli stap olbaot long soa, nao hem i stap talem plante samting long olgeta long saed blong Kingdom blong heven. Hem i yusum ol parabol no pija tok blong tijim olgeta. Ol pija tok ya, oli isi nomo, oli long saed blong ol samting we oli stap kamaot long laef blong olgeta nomo.

Fastaem, Jisas i storebaot wan man we i go blong planem sid long garen blong hem. Taem hem i stap saksakem ol sid ya i go, sam oli foldaon long rod. Biaen, ol pijin oli kam oli kakae evriwan. Mo sam sid oli foldaon long ples we i gat ston daon, be i no gat tumas graon antap. Ale, oli gru kwik. Be taem san i kam antap, hem i bonem ol gru blong olgeta oli drae wantaem, from we rus blong olgeta i no naf. Mo sam narafala sid oli foldaon long ples blong rop we i gat nil long hem. Biaen, rop ya i kam bigfala, i kavremap ol gru blong olgeta, gogo oli ded. Mo sam narafala sid bakegen oli foldaon long wan gudfala graon, mo oli gat frut blong olgeta. Sam oli karem handred frut, sam oli karem sikiste mo sam oli karem tate.

Long wan narafala pija tok, Jisas i talem se Kingdom blong God i olsem wan man we i planem sid long graon. Long naet, man i stap slip, mo long dei hem i stap wokbaot. Nao sid i gru, mo taem gru blong hem i stap kam bigwan, be man ya i no save weswe samting ya i kamaot. Graon nomo i wokem we sid i gru, nao gru i putum lif, i putum flaoa, i kasem frut blong hem. Be taem frut blong hem i raep, man ya i save go karem, from we taem blong hem i stret.

Nao Jisas i talem wan narafala pija tok bakegen. Hem i storebaot wan masta we hem i go planem ol gudfala sid blong wit long garen blong hem. Be taem ol man oli stap slip, wan enemi blong hem i kam, i planem ol sid blong wan rabis gras long garen ya, nao i gowe. Ale ol sid blong wit oli gru, oli kam bigwan, oli gat kakae. Nao ol man blong wok blong masta ya oli kam long hem, oli askem long hem sipos hem i wantem we olgeta oli pulumaot ol rabis gras ya. Be hem i talem se: “No, livim. Sipos yufala i go pulumaot ol rabis gras ya, maet yufala i save pulumaot ol wit ya tu, tufala wantaem. Tufala i save gru wantaem gogo i kasem taem blong tekem kakae blong wit i kam. Long taem ya, bambae mi save talem long ol man we oli go blong katem wit, blong oli go katem ol rabis gras fastaem, oli fasem long bandel blong sakem i go long faea. Biaen, oli save go katem ol wit blong karem i kam long haos.”

Nao Jisas i talem tu moa pija tok bakegen long ol man we oli stap olbaot long soa. Hem i eksplenem se ‘Kingdom blong heven’ i olsem wan sid we oli kolem ‘sid blong masted tri’ we wan man i planem. Sid ya i smol moa, i bitim ol narafala sid. Be taem i gru, i kam wan tri, hem i bigfala moa, i bitim ol narafala tri. Nao ol pijin oli save mekem bed blong olgeta long ol han blong hem.

Sam man tede oli agens long pija tok ya blong Jisas, oli talem se i gat sam sid we oli smol moa i bitim sid blong masted tri. Be Jisas i no stap givim wan lesen long saed blong ol tri no ol sid. Ol man Galili oli save sid blong masted tri, mo oli save se sid ya i smol moa, i bitim ol narafala sid long ples ya. Ale Jisas i wantem soemaot long olgeta se wan smosmol samting olsem sid ya i save kam wan ­bigbigfala samting.

Long laswan pija tok blong Jisas, hem i talem se ‘Kingdom blong heven’ i olsem is we woman i putum long wan bigfala besin flaoa. Nao is ya oli no moa luk, be i mekem olgeta bred ya i solap.

Taem Jisas i talemaot ol faef pija tok ya finis, hem i sanem ol man oli gohom, nao hem tu i gobak long haos we hem i stap long hem. I no longtaem ol twelef aposol blong hem wetem sam narafala man tu oli kam long hem.

Ol Pija Tok Blong Jisas Oli Save Givhan Long Olgeta

Jisas i talem ol pija tok ya long ol man we oli hivap wanples long sanbij blong lesin long hem. Biaen, ol disaepol oli kam long hem, oli wantem faenemaot moa long saed blong nyufala fasin we Jisas i yusum blong tijim ol man. Bifo finis Jisas i talem sam pija tok long olgeta, be oli neva harem Jisas i talem ol pija tok we oli kavremap plante poen olsem we hem i jes talem. Taswe oli askem long hem se: “?Yu yu stap tok long olgeta long parabol, from wanem?”

Faswan risen, blong mekem profet tok ya i kamtru: “Bambae mi tijim yufala long ol parabol, mo bambae mi talemaot mining blong ol tok haed ya blong bifo.” Be i no hemia nomo. Ol pija tok we Jisas i talem, oli mekem se ol man oli soemaot wanem i stap long hat mo tingting blong olgeta.

Tru, bighaf long ol man ya oli intres long Jisas from ol gudfala store mo ol merikel nomo. Oli no wantem ona long hem olsem masta blong olgeta. Mo oli no rere blong livim ol samting blong olgeta blong folem hem. No gat. Oli no wantem jenisim tingting blong olgeta no fasin blong laef blong olgeta. Oli no wantem se mesej blong Jisas i tajem hat blong olgeta, nao i pulum olgeta blong mekem olsem.

Ale Jisas i gohed, i se: “Taswe mi stap tok long olgeta long parabol, from we oli lukluk, be oli no luksave long hem mo oli stap lesin, be oli no harem, mo oli no haremsave tu. Fasin blong olgeta i mekem tok ya i kamtru we profet Aesea i bin talemaot bifo, we God i talem se ‘ . . . Tingting blong olgeta i kam strong finis.’ ”

Nao Jisas i talem long olgeta, i se: “Be yufala ya, yufala i save harem gud, from we ae blong yufala i save luk ol samting ya, mo sora blong yufala i save harem ol tok ya. Tru mi talem long yufala, bifo i gat plante profet mo plante stret man we oli wantem tumas blong luk ol samting ya we yufala i stap luk, be neva oli luk. Mo oli wantem tumas blong harem ol tok ya we yufala i stap harem, be neva oli harem.”

Yes, ol twelef aposol mo olgeta we oli joen wetem olgeta, oli gat gud hat. Oli rere blong harem tok blong Jisas. Taswe Jisas i talem long olgeta, i se: “Yufala ya, God i openem rod long yufala blong yufala i save ol tok haed blong [kingdom blong heven, GNB]. Be olgeta ya, hem i no openem rod long olgeta olsem.” Ol disaepol blong Jisas oli wantem tumas blong kasem save long ol pija tok we hem i talem. Taswe hem i gohed nao, i talemaot mining blong pija tok blong man we i planem sid.

Jisas i talem se: “Sid ya, hemia tok blong God.” Mo graon ya, hemia hat blong ol man. Nao Jisas i tokbaot sid we i foldaon long rod, we graon i strong tumas, i se: “Nao Setan i kam tekemaot tok ya long tingting blong olgeta, blong oli no save bilif, nao God i no sevem olgeta.”

Be ol sid we oli foldaon long graon we i gat ston daon, hemia olgeta we fastaem oli harem tok ya oli glad long hem. Be oli olsem gru we i no gat rus. Oli save bilif blong smoltaem nomo, from we tok blong God i no go dip long hat blong olgeta. Ale taem ol samting oli kam blong traem olgeta, oli foldaon.

Jisas i gohed blong talem se ol sid we oli foldaon long medel blong rop we i gat nil long hem, hemia olgeta we oli harem tok ya, be oli no gat gudfala frut long laef blong olgeta. Olgeta oli stap tingting tumas from ol samting blong laef blong olgeta, no oli kam rijman, no oli gat gud taem long laef blong olgeta. Nao ol samting ya oli blokem tok ya blong laef, ale i no gat frut blong hem.

Nao Jisas i talem se ol sid we oli foldaon long wan gudfala graon, hemia olgeta we oli harem tok ya, we tingting blong olgeta i tru mo i gud. Olgeta ya oli holem tok ya i stap strong long hat blong olgeta, nao oli gat frut blong tok ya oltaem blong laef blong olgeta.

Ol disaepol we oli lukaot Jisas blong faenemaot mining blong ol tijing blong hem, oli save harem gud tumas. Jisas i wantem se olgeta oli kasem save long mining blong ol pija tok ya, blong oli save talemaot trutok long ol narafala tu. Nao Jisas i askem long olgeta, i se: “?Taem yufala i tekem laet i kam, yufala i save kavremap long baket? ?No yufala i save putum i stap aninit long bed? !No gat! Yufala i mas putum i stap antap, long ples blong laet.” Nao Jisas i talem long olgeta se: “Tok ya we yufala i stap lesin long hem, yufala i mas tingbaotgud long hem.”

Oli Harem Gud From We Jisas i Tijim Moa Olgeta

Ol disaepol oli lesingud long mining blong pija tok blong man we i planem sid, nao oli wantem save moa. Oli askem long Jisas se: “?Plis yu talem long mifala, wanem mining blong parabol ya blong rabis gras we i gru long garen?”

Fasin blong ol disaepol blong Jisas i defren olgeta long fasin blong ol narafala man long sanbij ya. Ol narafala man oli no traehad blong faenemaot mining blong ol pija tok we Jisas i talem. Oli glad blong lesin long tok blong Jisas, hemia nomo. Be ol disaepol blong Jisas oli no mekem olsemia. Oli kam lukaot hem insaed long haos, blong askem sam moa kwestin long hem. Taswe Jisas i talem long olgeta se:

“Bambae yufala i save kasem, i stret long mak blong yufala we yufala i traehad long hem. Mo bambae God i givim save long yufala antap bakegen.” Ol disaepol blong Jisas oli traehad blong lesingud long ol tok blong Jisas, mo haremsave tok blong hem. From samting ya, God i blesem olgeta, hem i givim moa save long olgeta antap bakegen. Ale, Jisas i ansa long ol disaepol blong hem, i se:

“Masta ya we i planem ol gudfala sid, hemia mi ya, mi Pikinini blong Man. Garen ya, hemia wol ya. Mo ol gudfala sid ya, hemia ol [pikinini blong Kingdom, NW]. Ol rabis gras ya, hemia ol man blong Setan ya, mo enemi ya we i go planem ol sid blong rabis gras, hemia Setan ya. Taem blong tekem kakae blong wit, hemia en blong wol ya. Mo ol man blong wok ya we oli go blong katem wit, hemia ol enjel ya.”

Jisas i talemaot mining blong olgeta haf blong pija tok ya, nao hem i talemaot en blong hem. Hem i talem se long en blong wol, ol man blong katem wit—hemia ol enjel—bambae oli pulumaot ol rabis gras—hemia ol gyaman Kristin. Nao olgeta oli no moa save stap wetem ol trufala “pikinini blong Kingdom.” Bambae oli makemaot “ol man blong Setan [ol pikinini blong rabis man ya, NW]” se oli mas lus. Be ol pikinini blong Kingdom blong God, “ol stret man,” bambae oli go long Kingdom blong God. Nao long ples ya bambae oli saen olsem san.

Nao ol disaepol blong Jisas we oli wantem save moa, oli harem gud long tri moa pija tok we Jisas i talem long olgeta. Fastaem hem i talem se: “[Kingdom blong heven, GNB] i olsemia. I gat wan bigfala bokis mane we man i bin haedem long wan graon, nao wan man i faenem bokis mane ya. Hem i berem bakegen, nao from we hem i harem gud tumas, hem i go, i salemaot olgeta samting we hem i gat, i kam pemaot pis graon ya i blong hem.”

Hem i gohed moa, i se: “Mo bakegen, [kingdom blong heven, GNB] i olsemia. I gat wan bisnesman we hem i stap lukaot ol gudgudfala perel. Taem hem i faenem wan perel we i nambawan, hem i go salemaot olgeta samting we hem i gat, i go pem perel ya i blong hem.”

Jisas hem wan i olsem man ya we i faenem bokis mane ya, mo bisnesman ya we i faenem wan nambawan perel. I olsem we hem i salemaot olgeta samting we hem i gat, from we hem i livim gudfala ples blong hem long heven blong kamdaon long wol. Nao hem i stap laef olsem wan man nomo. Taem hem i stap long wol, oli mekem nogud long hem, oli kilim hem, oli mekem ol samting blong sem long hem, be hem i winim olgeta samting ya. Ale, hem i soemaot se hem i naf blong rul olsem King long Kingdom blong God.

Nao i gat wan kwestin we ol disaepol blong Jisas oli mas ansa long hem: ?Olgeta oli rere blong salemaot ol samting blong olgeta blong kasem nambawan presen, blong rul wetem Kraes long heven, no blong stap aninit long rul blong Kingdom long wol? ?Olsem wanem long yumi tede? ?Yumi tingbaot ol presen we yumi save kasem from Kingdom blong God olsem wan samting we i sas moa bitim ol narafala samting long laef? ?Yumi tingbaot presen ya olsem wan bigfala bokis mane, no wan nambawan perel we i sas tumas?

Long laswan pija tok blong Jisas, hem i talem se ‘Kingdom blong heven’ i olsem wan net, we taem ol man oli sakem hem long solwora, oli save kasem olkaen fis long hem. Nao taem oli pulum i kamsoa, oli sidaon, oli seraot ol fis, oli putum ol gudfala fis oli go long basket blong olgeta, be ol rabis fis, oli sakem. Jisas i talem se long en blong wol, bambae i olsemia. Ol enjel bambae oli seraot ol man, ol man nogud oli go wansaed, ol gudfala man oli go wansaed. Mo bambae ol man nogud oli lus blong olwe.

Jisas hem wan i statem wok ya blong ‘pulum fis’, mo hem i singaot ol faswan disaepol blong hem blong bambae oli kam “man blong pulum man.” I stat long taem blong Jisas kam kasem naoia, ol enjel oli lukaot long wok ya blong pulum ‘ol fis.’ Long stret taem oli pulum “net” i kamsoa. “Net” ya i saen blong olgeta kampani blong wol we oli talem se oli Kristin.

Ol rabis fis, oli sakem olgeta. Be yumi glad tumas we yumi save stap long medel blong ‘ol gudfala fis’ we bambae oli stap. Sipos yumi soemaot fasin olsem ol disaepol blong Jisas, we oli wantem tumas blong kasem moa save long ol tijing blong Jisas, yumi save kasem fulap blesing. Bambae yumi save kasem moa save antap bakegen. Mo tu God bambae i givim long yumi laef we i no save finis. Matyu 13:1-52; Mak 4:1-34; Luk 8:4-18; Ol Sam 78:2; Aesea 6:9, 10.

▪ ?Wetaem Jisas i talem ol pija tok long fulap man? ?Mo weples?

▪ ?Wanem faefala pija tok we Jisas i talemaot long ol man ya?

▪ ?From wanem Jisas i talem se sid blong masted tri i smol moa, i bitim ol narafala sid?

▪ ?From wanem Jisas i talem ol pija tok ya?

▪ ?Olsem wanem ol disaepol blong Jisas oli defren long ol narafala man?

▪ ?Jisas i talem se pija tok blong man we i planem sid i minim wanem?

▪ ?Olsem wanem fasin blong ol disaepol blong Jisas i narakaen long fasin blong ol man we oli hivap long sanbij?

▪ ?Man we i planem sid, hem i saen blong hu? ?Garen ya, i minim wanem? ?Gudfala sid, hem i wanem? ?Enemi ya, hem i hu? ?Taem blong tekem kakae blong wit, hemia wetaem? ?Ol man blong katem wit, oli hu?

▪ ?Wanem tri narafala pija tok bakegen we Jisas i talem? ?Mo yumi lanem wanem long olgeta?