Japta 44

Jisas i Blokem Wan Bigfala Win

JISAS i bisi long dei ya. Hem i tijim fulap man long sanbij. Mo biaen, taem hem i stap wetem ol disaepol blong hem nomo, hem i eksplenem mining blong fulap pija tok long olgeta. Nao taem san i godaon, hem i talem long ol disaepol blong hem, i se: “Yumi go long narasaed bigfala lugun ya.”

Long narasaed bigfala lugun blong Galili, hemia is saed blong hem, oli kolem ples ya Dekapolis. Nem ya i kamaot long tu Grik wod, deʹka, we i minim “ten” mo poʹlis, we i minim “bigfala taon.” Ol bigfala taon ya long ples ya Dekapolis, oli stampa blong ol kastom blong ol man Gris. Be fulap man Jyu oli stap long ol taon ya tu. Long ples ya, Jisas i mekem smol wok nomo. Nao hem i visitim ples ya bakegen, be hem i no save stap longtaem tu. Biaen, bambae yumi luksave from wanem.

Ale, ol disaepol blong Jisas oli aot long ol man, oli klaem long wan bot wetem Jisas, nao oli go. Be plante man oli luk olgeta taem oli go. Ale, sam narafala bot tu oli biaen long olgeta. Narasaed bigfala lugun blong Galili i no longwe tumas. Stat long not saed blong lugun ya go kasem saot saed, i gat samwe long 20 kilomita blong hem. Stat long is saed go kasem wes saed, i gat 12 kilomita.

Yumi save se Jisas i mas taed from ol wok blong hem. Ale taem bot i ron, hem i godaon long af, i stap slipgud long wan pilo. Sam aposol blong Jisas, oli man blong pulum fis, mo oli savegud solwora blong bigfala lugun ya. Ale olgeta nomo oli holem stia blong bot.

Be trep ya i no isi. Wan bigfala win i girap, i blu strong, i mekem bigfala lugun ya i gat bigsi long hem. Plante taem samting ya i kamaot long lugun ya, from we hem i stap 212 mita daon, aninit long level blong ol narafala solwora. Lugun ya i hot lelebet, be win we i stap kamdaon long ol bigfala hil kolosap long lugun ya, i kolkol lelebet. Ale, taem win i blu strong, i kamdaon, i kasem lugun ya, wantaem nomo wan bigfala win i save girap. Ale bigsi ya i kilim bot blong olgeta, wora i stap kam insaed we kolosap bot i draon. !Be Jisas i stap slip yet!

Ale ol man ya we oli savegud long solwora, oli traehad blong holem stia blong bot. Plante taem bifo oli winim bigsi long ples ya, be naoia oli gat trabol. Oli no moa save nao olsem wanem blong mekem. Oli fraet se bambae oli draon, ale oli wekemap Jisas. Oli talem long hem se: ‘Tija, yu no tingbaot, be bambae yumi lus ya. Yu sevem yumi. Yumi lus nao.’

Nao Jisas i girap, i tok long win ya blong blokem hem, mo i tok long wora, i talem se: “Yu finis, yu kwaet.” Nao win ya i finis, bigsi ya i kam kwaet. Nao Jisas i tanraon, i talem long ol disaepol blong hem se: “?From wanem yufala i fraet olsem? ?Weswe yufala i no bilif yet?”

Be olgeta oli fraet tumas, oli stap taltalem long olgeta, se: “!E, man! ?Wanem man ya? !Win mo wora, be tufala i harem tok blong hem, tufala i obei long hem!”

Yes, paoa blong Jisas i bigwan mo oli sapraes tumas long hem. Yumi glad tu we King blong yumi i gat paoa olsem. Taswe taem Kingdom blong hem i rul long wol, bambae ol man oli save stap sefgud. Oli no moa fraet long ol samting we oli save kamaot, olsem big win, no etkwek, no hariken, from we paoa blong Jisas i naf blong blokem ol trabol ya.

Nao Jisas wetem ol disaepol blong hem, olgeta oli kamtru long narasaed blong bigfala lugun ya, oli gosoa long is saed. Ating ol narafala bot we oli biaen long olgeta oli no kasem big win olsemia, ale, oli gohom sef nomo. Mak 4:35 kasem 5:1; Matyu 8:18, 23-27; Luk 8:22-26.

▪ ?Ples ya Dekapolis i stap wea? ?Hem i olsem wanem?

▪ Long bigfala lugun blong Galili, plante taem i gat bigfala win. ?From wanem?

▪ ?Taem ol disaepol blong Jisas oli no save winim bigsi ya, oli mekem wanem?