Japta 45

Wan Man We i Narakaen i Kam Disaepol Blong Jisas

TAEM Jisas i gosoa long narasaed bigfala lugun ya, wan samting i hapen we i save mekem man i fraet. Wantaem nomo tu man i kamaot long beregraon we i stap kolosap long ples ya. Tufala ya i gat ol devel i stap long tufala, nao tufala i wael tumas. Ale tufala i resis i kam long Jisas. Ating wan long tufala i wael moa bitim narafala, mo ating ol devel oli stap long hem longtaem moa bitim narafala. Taswe Baebol i talem plante samting moa long saed blong man ya, i bitim narafala.

Sore tumas, be longtaem finis man ya i no moa putum klos, mo i no moa stap long haos blong hem, i stap long beregraon nomo. Oltaem, long dei no long naet, hem i stap singaot nogud, mo i stap tekem ston, i stap katem bodi blong hem. From we hem i wael tumas, ol man oli fraet blong pas long rod long ples ya. Plante taem oli fasem hem long jen mo hankaf, be hem i pulum jen gogo i brok. Mo hankaf tu, hem i brekem. Nao i no gat man we i strong i naf blong mekem hem i stap kwaet.

Nao man ya i resis i kam long Jisas, i nildaon long hem, nao ol devel we oli stap long hem, oli mekem hem i singaot bigfala, i se: “?Jisas yu Pikinini blong Hae God ya we i antap tumas, yu kam blong mekem wanem long mi? Mi askem strong long yu, plis yu no mekem bodi blong mi i soa.”

Nao Jisas i talem plante taem, i se: “Yu devel, yu kamaot long man ya.” Nao Jisas i askem long hem se: “?Wanem nem blong yu?”

Hem i ansa i se: “Nem blong mi Bigfala Kampani, from we mifala i plante.” Taem ol devel oli luk se wan man i harem nogud from we paoa blong olgeta i stap long hem, oli glad. Oli glad tumas from we olgeta oli plante mo paoa blong olgeta i bigwan, be paoa blong man ya i smol, nao i isi nomo blong olgeta oli winim hem. Be taem oli luk Jisas, oli fraet. Taswe oli askem strong long Jisas, blong hem i no sanem olgeta oli go long bigfala hol. From samting ya, yumi save se Jisas i gat bigbigfala paoa. Hem i naf blong winim ol wael rabis speret. Mo tu, store ya i soemaot se ol rabis speret oli save we God bambae i jajem olgeta, nao oli mas kalabus wetem lida blong olgeta, Setan, long wan bigfala hol.

Long ples ya, long saed blong hil, i gat samwe long 2,000 pig oli stap kakae. Nao ol devel ya oli krae long Jisas oli se: “Plis yu sanem mifala i go long ol pig ya, yu letem mifala i go insaed long olgeta.” Ol rabis speret oli harem gud taem oli save go insaed long bodi blong man no anamol. Fasin blong olgeta i no stret nating, oli glad taem oli spolem bodi blong narafala no mekem hem i harem soa. Ale Jisas i letem olgeta oli go insaed long ol pig. Ale, ol 2,000 pig ya, oli resis i go long wan klif, nao oli foldaon i go long bigfala lugun ya, oli draon long wora.

Nao taem ol man we oli lukaot long ol pig ya oli luk samting ya, oli ronwe, oli go talemaot nyus ya long taon blong olgeta, mo ol ples raonabaot. Nao ol man oli kam blong luk samting ya we i hapen. Nao oli luk man ya we bifo bigfala kampani blong ol devel oli stap long hem. Be naoia i werem klos, tingting blong hem i kamgud bakegen, mo hem i stap sidaon fored long Jisas.

Nao olgeta we oli stap taem Jisas i mekem merikel ya, oli stap store wetem ol man ya, oli stap talemaot olsem wanem Jisas i ronemaot ol devel long man ya. Oli storebaot ol pig we oli foldaon long bigfala lugun ya, oli draon. Nao taem ol man ya oli harem store ya, oli fraet. Oli strong long Jisas blong i aot long ples blong olgeta. Ale, hem i klaem long bot blong gobak long narasaed bakegen. Be man ya we ol devel oli goaot long hem finis, hem i wantem tumas blong go wetem Jisas. Be Jisas i talem long hem, i se: “Yu gobak long ples blong yu. Yu go talemaot long ol man ples blong yu, ol samting ya we Hae God [Jeova, NW] i mekem long yu, we hem i sore tumas long yu.”

Plante taem finis Jisas i mekem sikman i kamgud bakegen. Be kolosap evritaem hem i talem long olgeta se oli no mas talemaot long ol man. Hem i mekem olsemia from we ating ol man ya oli save mekem ripot blong pulum tingting blong man nomo. Mo Jisas i no wantem se ol man oli bilif from sam ripot olsem. Be long taem ya, i stret nomo we man ya we bifo i gat devel i stap long hem, i talemaot samting we i hapen. ?From wanem? From we hem i save prij long ol man we ating Jisas i no gat jans blong tijim olgeta samtaem. Mo tu, man ya i save soemaot se paoa blong Jisas i wokem ol samting we i gud nomo. Olsem ya nao, hem i save blokem enikaen nogud ripot we i save kamaot long saed blong ol pig ya we oli lus.

Ale man ya we bifo i gat ol devel i stap long hem, hem i obei long tok blong Jisas, nao hem i aot i go. Hem i wokbaot i go olbaot long Dekapolis, nao hem i talemaot ol samting we Jisas i mekem long hem. Mo olgeta man we oli harem hem, oli sapraes tumas. Matyu 8:28-34; Mak 5:1-20; Luk 8:26-39; Revelesen 20:1-3.

▪ I gat tu man we ol devel i stap long tufala. ?From wanem nao Baebol i tokbaot wan man moa, i bitim narafala?

▪ ?Wanem i soemaot se ol rabis speret oli save se bambae oli mas kalabus long wan bigfala hol?

▪ ?From wanem ol rabis speret oli glad blong go insaed long bodi blong man mo anamol?

▪ ?From wanem Jisas i talem long man ya we bifo i gat ol rabis speret i stap long hem, se hem i mas go talemaot ol samting ya we Jisas i mekem long hem?