Japta 49

Hem i Go Long Galili Bakegen

TU YIA finis Jisas i stap wok strong long wok blong prij. ?Yu ting se bambae hem i spel smol nao? No gat. Hem i mekem wok blong prij i kam bigwan moa. Hem i go long namba tri trep blong hem long Galili, blong prij bakegen long ol man. Hem i go long ol taon mo long ol velej, mo i stap tij insaed long ol haos prea blong olgeta. Hem i stap talemaot gud nyus blong Kingdom long olgeta. Taem hem i stap wokbaot, hem i luksave se i gat nid blong mekem wok blong prij i kam bigwan moa.

Long evri ples, Jisas i luk we ol man oli no harem gud mo oli sik long saed blong speret. Olgeta oli trabol tumas, oli no moa gat paoa, oli olsem ol sipsip we oli no gat man blong lukaot long olgeta. Hem i sore long olgeta, ale hem i talem long ol disaepol blong hem se: “Tru, i gat plante kakae tumas i stap long garen, be smol man nomo oli stap blong karem i go. Yufala i mas askem strong long masta blong garen ya, blong hem i sanem sam moa man oli kam blong karem ol kakae ya blong hem.”

Jisas i gat wan plan. Wan yia bifo, hem i jusumaot 12 aposol blong hem. Nao hem i singaot ol twelef man ya blong oli kam long hem, mo hem i sanemaot olgeta oli go olbaot long ol ples, tu i go wan ples, tu i go wan ples. Hem i talem ol rul long olgeta, i se: “Bambae yufala i no go long olgeta we i no man Isrel, mo yufala i no go insaed long ol velej blong ol man Sameria. Yufala i mas go long ol man Isrel. Olgeta ya oli olsem ol sipsip we oli lus. Mo taem yufala i wokbaot, yufala i mas prij, se [‘Kingdom blong heven i stap kolosap, NW.’]”

Kingdom ya we oli mas talemaot, hemia Kingdom we Jisas i bin lanem olgeta blong prea from. Oli save talem se Kingdom ya i kolosap from we King blong Kingdom ya, Jisas Kraes, i stap wetem olgeta. Blong mekem se ol disaepol blong hem oli naf blong karem tok blong bigfala Kingdom ya, Jisas i givim paoa long olgeta blong mekem ol sikman oli gud bakegen, mo blong mekem ol dedman oli laef bakegen. Hem i talem long olgeta se oli no mas kasem pei from wok ya.

Nao hem i talem long ol disaepol blong hem se oli no mas mekemrere ol samting blong karem i go wetem olgeta. Hem i talem se: “Bambae yufala i no holem mane long paos blong yufala. Bambae yufala i no karem basket blong yufala long rod, mo yufala i no tekem tu klos mo sandel mo wokingstik blong yufala. Taem we wan man i mekem wok blong ol man, i stret blong ol man oli givim kakae long hem.” Olgeta we oli glad long mesej blong ol disaepol bambae oli givim kakae mo ples blong slip long olgeta. Olsem Jisas i talem: “Taem yufala i go long wan taon no wan velej, yufala i mas faenem wan gudfala man we i stret blong yufala i go stap wetem hem. Nao yufala i mas stap wetem hem, gogo yufala i aot long ples ya.”

Afta, Jisas i talem long ol disaepol olsem wanem oli mas storeyan wetem ol man long saed blong Kingdom. Hem i talem se: “Taem yufala i go stap long wan haos, yufala i mas tok gud long olgeta se ‘Pis i stap wetem yufala.’ Sipos olgeta long haos ya oli gudfala man, tok ya blong yufala blong pis i save stap long olgeta. Be sipos olgeta oli no gudfala man, tok ya blong yufala i mas kambak long yufala bakegen. Mo sipos sam man oli no wantem tekem yufala i go long haos blong olgeta, no oli no save lesin long tok blong yufala, yufala i mas makem olgeta. Taem yufala i aot long haos blong olgeta no ples blong olgeta, yufala i mas ravemaot graon long leg blong yufala, blong oli save.”

Jisas i talem se ol man we oli no wantem harem gud nyus ya, bambae oli mas kasem strong panis, taem God i jajem olgeta. Hem i talem se: “Tru mi talem long yufala, long dei ya we God bambae i jajem olgeta man, panis blong olgeta ya bambae i strong moa, i winim panis we ol man ya bifo blong Sodom mo Gomora bambae oli kasem.” Matyu 9:35 kasem 10:15; Mak 6:6-12; Luk 9:1-5.

▪ ?Taem Jisas i wokbaot i go long olgeta ples long Galili long namba tri trep blong hem, hem i luksave wanem long saed blong wok blong prij?

▪ ?Taem hem i sanemaot ol 12 aposol blong hem oli go talemaot gud nyus, wanem ol rul we hem i talem long olgeta?

▪ ?From wanem i stret nomo we ol disaepol oli talem se Kingdom blong God i stap kolosap?