Japta 5

?Jisas i Bon Weples Mo Wetaem?

HED gavman blong ol man Rom, nem blong hem Sisa Ogastas, hem i mekem wan loa. Hem i talem se olgeta man oli mas gobak long ples we oli bon long hem, blong rejistarem nem blong olgeta. Ale Josef i wokbaot i go long ples we hem i bon long hem, hemia taon ya Betlehem.

Betlehem i fulap long ol man we oli kam blong rejista. Taswe Josef mo Meri tufala i save faenem wan ples nomo blong slip, hemia haos blong ol anamol. Insaed long haos ya i gat ol dongki mo ol narafala anamol oli stap. Long ples ya nao, Jisas i bon. Meri i kavremapgud hem long ol pis kaliko, nao i putum hem i slip long wan bokis we oltaem ol man oli stap putum gras long hem, blong ol anamol oli kakae.

I klia se God i pulum Sisa Ogastas blong mekem loa se ol man oli mas rejista. From samting ya Jisas i save bon long taon ya Betlehem. Long taem bifo, Baebol i talemaot se king ya we God i promes finis long hem, bambae i bon long taon ya.

!Naet ya i impoten tumas! Afsaed long open ples, wan bigfala laet i saen long sam man we oli stap lukaot long ol sipsip. !Laet ya i kamaot long Jeova! Mo enjel blong Jeova i talem long olgeta se: “Yufala i no fraet. Mi mi gat wan gud nyus blong talem long yufala, we i save mekem olgeta man oli harem gud tumas. Long naet ya nomo, long velej ya blong King Deved bifo, i gat wan pikinini i jes bon, we hem bambae i sevem yufala. Hemia man ya we God i promes finis blong sanem i kam. Hem i Mesaea ya we i Masta blong yumi. Mo hemia saen blong samting ya. Bambae yufala i save faenem pikinini ya we oli kavremapgud hem long kaliko, nao oli putum hem i slip long wan bokis we oltaem ol man oli stap putum gras long hem blong ol anamol oli kakae.” Nao wantaem nomo, i gat fulap enjel blong heven oli kam joen wetem enjel ya. Nao oli stap singsing se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.”

Taem ol enjel oli gowe, ol man ya blong lukaot long sipsip oli stap taltalem long olgeta se: “E, i gud yumi go long Betlehem blong luk ol samting ya we oli jes kamtru, we Hae God [Jeova, NW] i talemaot long yumi.” Ale olgeta oli go kwik. Nao oli luk Jisas we i stap slip long bokis blong kakae blong ol anamol, olsem enjel i bin talem. Nao ol man blong lukaot long sipsip oli talemaot ol tok we ol enjel oli talemaot finis long olgeta. Olgeta we oli harem ol tok ya oli sapraes tumas long ol samting ya we olgeta oli talemaot. Be Meri, hem i no fogetem ol samting ya. Hem i holem ol tok ya i stap long hat blong hem.

Tede, plante man oli bilif se Jisas i bon long Desemba 25. Be long Betlehem, manis ya Desemba i taem blong ren mo kolkol. Long taem ya, ol man blong lukaot long sipsip oli no stap afsaed long klia ples long naet, wetem ol sipsip blong olgeta. Mo tu, ol man oli no laekem hed gavman blong Rom, Sisa, oli wantem agensem hem. Taswe ating Sisa i no save talem long olgeta blong wokbaot long koltaem blong go rejista. Sipos hem i mekem olsemia, oli save agensem hem moa. I klia se Jisas i bon bifo we koltaem i stat. Luk 2:1-20; Maeka 5:2.

▪ ?From wanem Josef mo Meri, tufala i wokbaot i go long Betlehem?

▪ ?Long naet we Jisas i bon, wanem samting i kamaot we i mekem ol man oli sapraes tumas?

▪ ?Olsem wanem yumi save se Jisas i no bon long Desemba 25?