Japta 51

Oli Kilim Jon i Ded Long Lafet Blong Betde

JISAS i toktok long ol 12 aposol blong hem, mo biaen hem i sanemaot olgeta oli go tu tu. Ating Pita i go wetem Andru, we i brata blong hem. Mo ating Jemes i go wetem Jon, Filip wetem Batolomiu, Tomas wetem Matyu, Jemes wetem Tadeas, mo Saemon wetem Judas Iskariot. Ol sikis grup ya oli go talemaot gud nyus blong Kingdom mo oli mekem plante merikel long evri ples we oli go long hem.

Long taem ya, Jon Baptaes i stap kalabus. Kolosap tu yia finis, hem i stap long presin. Maet yu yu rimemba we Jon i tok long Herod Antipas long fes blong ol man from nogud samting we hem i mekem. From we brata blong Herod, nem blong hem Filip, hem i bin mared long wan woman, nem blong hem Herodias. Nao Herod Antipas i tekemaot woman ya, i mared long hem. Be Herod Antipas i stap talem long ol man se hem i stap folem ol loa blong Moses. Taswe i stret nomo we Jon i talemaot nogud fasin blong Herod, we hem i tekem woman blong narafala man. From samting ya, Herod i sanem sam man blong hem oli go blong holem Jon, oli fasem hem, oli sakem hem long kalabus. Maet hem i mekem olsem from we Herodias i tok long hem.

Herod i save se Jon hem i wan tabu man blong God we i stret gud. Oltaem hem i glad blong lesin long tok blong Jon. Tok blong Jon i mekem hem i tingting tumas. Be Herodias i stap kros long Jon, hem i wantem se Herod i kilim hem i ded. Gogo, hem i kasem jans blong hem.

Kolosap long Pasova long yia 32 K. T., Herod i stap mekem bigfala kakae blong makem dei we hem i bon. Hem i singaot ol haeman blong hem wetem ol hed kapten blong ol soldia blong hem, wetem ol haeman long Galili tu, blong oli kam joen wetem hem. Nao gel blong Herodias, nem blong hem Salome [hem i pikinini we Filip i givim long Herodias,] i kam insaed long lafet ya, i stap danis long fes blong olgeta. Taem ol man long lafet ya oli luk danis ya, oli glad tumas long hem.

Mo Herod tu i glad tumas long hem. Hem i talem long gel ya se: “Wanem samting yu yu askem long mi, bambae mi givim long yu.” Mo hem i talem strong tok blong joenem promes blong hem, i se: “Tru antap, wanem samting we yu yu wantem, nating we i kasem stret haf blong olgeta samting blong kingdom blong mi, be mi mas givim long yu.”

Salome i no ansa long hem. Fastaem, hem i go askem long mama blong hem se: “?Mbae mi askem wanem samting long hem?”

!Hemia nao jans blong Herodias! Wantaem nomo hem i ansa long gel ya: “Yu go askem hed blong Jon Baptaes.”

Ale Salome i resis i kambak long Herod, i talem long hem se: “Mi mi wantem we naoia nomo yu tekem hed blong Jon Baptaes, yu putum long wan plet, yu tekem i kam, yu givim long mi.”

Tok ya i mekem king i harem nogud tumas. Nating we hem i save se Jon i wan stret man, be hem i no save talem ‘No’ long gel ya bakegen, from we hem i promes olsem long fes blong ol fren blong hem. Ale, wantaem nomo, hem i sanem wan soldia, blong i go tekem hed blong Jon i kam. Nao man ya i go long kalabus, i katemaot hed blong Jon, i putum long wan plet, i tekem i kam, i givim long Salome. Nao gel ya i go givim long mama blong hem. Taem ol disaepol blong Jon oli harem nyus blong samting ya, oli kam tekem bodi blong hem, oli go berem hem. Nao oli go, oli talemaot long Jisas.

Biaen, Herod i stap harem nyus blong ol wok we Jisas i stap mekem, we hem i stap mekem ol sikman oli gud bakegen, mo we hem i stap ronemaot rabis speret long ol man. Nao Herod i fraet, from we sam man oli talem se Jisas i Jon Baptaes we i laef bakegen long ded. From samting ya hem i wantem luk Jisas. Hem i no wantem harem tok blong Jisas. Be hem i wantem luk sipos samting we hem i harem i tru, no no gat. Matyu 10:1-5; 11:1; 14:1-12; Mak 6:14-29; Luk 9:7-9.

▪ ?From wanem Jon i stap long kalabus? ?From wanem Herod i no wantem kilim hem i ded?

▪ ?Olsem wanem Herodias i kasem jans blong hem blong kilim Jon i ded?

▪ ?Taem Jon i ded finis, from wanem Herod i wantem luk Jisas?