Japta 6
Pikinini We i Mekem Wan Promes i Kamtru
JOSEF mo Meri tufala i no gobak long Nasaret. Tufala i stap nomo long Betlehem. Taem Jisas i gat eit dei blong hem, olgeta oli kam mekem sakomsaes long hem, stret long Loa we God i givim finis long Moses. I luk olsem we kastom blong olgeta i blong putum nem long pikinini boe long namba eit dei tu. Ale oli putum nem long pikinini ya se Jisas. Hemia nem ya we enjel Gabriel i bin talem fastaem long Meri.
Moa long wan manis i pas, nao Jisas i gat 40 dei blong hem. ?Papa mama blong hem tufala i tekem hem i go wea? Tufala i tekem hem i go long haos blong God long Jerusalem. Taon ya i kolosap nomo long ples we tufala i stap long hem, sam kilomita nomo. Tufala i stap folem loa we God i givim long Moses, se taem pikinini boe i gat 40 dei blong hem, mama blong hem i mas go long haos blong God, nao hem i mas givim sakrafaes i go long God blong i kam klin long fes blong God.
Ale Meri i mekem olsem ya. Hem i karem tu smol pijin blong givim i go long God. Samting ya i soemaot long yumi se Josef mo Meri tufala i no gat plante mane. Loa blong Moses i talem se oli mas givim wan pikinini man sipsip. Samting ya i sas moa i winim ol pijin. Be sipos mama blong pikinini i no gat naf mane blong pem wan sipsip, hem i save givim tu sotleg no tu nawemba nomo.
Long haos blong God, wan olfala man i tekem Jisas, i holem hem long han blong hem. Nem blong man ya, Simeon. God i talemaot long hem finis we bambae hem i no save ded, gogo hem i luk man ya we Jeova i promes finis blong sanem i kam, hemia Kraes no Mesaea. Nao long dei ya we Simeon i kam long haos blong God, tabu speret i lidim hem i kam long pikinini ya we Josef mo Meri tufala i holem hem.
Nao Simeon i holem Jisas, mo hem i talem tangkyu long God, i se: “Hae God, mi mi man blong wok nomo blong yu, be naoia yu save letem mi mi finis, we tingting blong mi i stap kwaet, from we promes blong yu i kamtru finis. Long ae blong mi nomo, mi mi luk rod blong yu blong sevem man. Long fes blong ol man blong olgeta ples, yu yu mekem rod ya i rere finis. Hemia i wan laet blong givim laet long ol hiten man, mo hem bambae i leftemap nem blong mifala man Isrel, we mifala i man blong yu.”
Taem Josef mo Meri tufala i harem tok ya blong Simeon, tufala i sapraes tumas. Nao Simeon i blesem tufala mo hem i talem long Meri se pikinini boe blong hem bambae “hem i mekem plante man Isrel oli foldaon,” mo bambae hem “i mekem plante oli kam antap.” Mo tu, hem i talem se bambae sore i mas kasem tingting blong Meri olsem wan naef blong faet we i stikim sol blong hem.
Long taem ya, i gat wan woman i stap we nem blong hem Ana, we hem tu i profet. Hem i gat 84 yia blong hem. Oltaem nomo hem i stap long haos blong God. Nao stret long taem ya we Simeon i stap tok, hem i kam kolosap long olgeta. Nao hem i talem tangkyu long God, mo hem i stap tokbaot Jisas long olgeta we oli wantem harem.
!Josef mo Meri tufala i glad tumas long ol samting ya we oli kamaot long haos blong God! Tru ya, ol samting ya i pruvum long tufala se pikinini ya hem i Trufala Man we God i Promes finis blong sanem i kam. Luk 2:21-38; Levitikas 12:1-8.
▪ ?I luk olsem we long kastom blong ol man Isrel, wetaem oli putum nem long pikinini boe?
▪ ?Taem pikinini boe i gat 40 dei blong hem, woman Isrel we hem i mama blong boe i mas mekem wanem? ?Samting we Meri i mekem long taem ya i soemaot se hem i gat plante mane no no gat?
▪ ?Long taem ya, hu i luksave se Jisas hem i man we God i promes finis blong sanem i kam? ?Mo olsem wanem oli soemaot samting ya?