Japta 72

Jisas i Sanem 70 Man Oli Go Prij

NAOIA i kolosap long yia ya 33 K.T. Tri yia i pas finis, i stat long taem we Jisas i tekem baptaes. Hem wetem ol disaepol blong hem oli jes mekem Lafet ya we oli wokem ol Wansaed Haos long Jerusalem. Nao i luk olsem we oli stap samples kolosap long Jerusalem yet. Sikis manis i stap yet we Jisas i save gohed long minista wok blong hem. Bighaf blong sikis manis ya hem i prij long Judia mo narasaed long Jodan Reva long ples we nem blong hem Perea. Ol man long ples ya tu oli nidim blong harem ol gudfala tok blong Jisas.

Long yia 30 K.T., taem Jisas i mekem Lafet blong Pasova finis, hem i stap eit manis long Judia blong mekem wok blong prij. Be long Pasova long 31 K.T., ol lida blong ol man Jyu oli wantem kilim hem i ded long ples ya. Ale, hem i aot i go long Galili. Nao hem i stap tij wan yia haf long Galili nomo. Long taem ya hem i hivimap wan bigfala kampani blong ol man, nao hem i trenem gud olgeta blong oli naf blong mekem wok blong prij. Hem i neva gat wan kampani olsem bifo. Nao hem i rere blong mekem las bigfala wok blong hem, blong prij long ol man Judia.

Blong mekem wok ya, Jisas i jusumaot 70 disaepol blong hem, nao hem i sanemaot olgeta oli go tu tu. Oli go fastaem, Jisas wetem ol aposol blong hem oli kam biaen. Olgeta ya oli go talemaot Kingdom long ol velej mo ol narafala ples. Ale i no longtaem, Jisas wetem ol aposol blong hem tu oli kam long ol ples ya.

Jisas i no sanem ol 70 man ya oli go long ol haos prea nomo long ol velej ya, no gat. Hem i sanem olgeta oli go long ol haos wanwan. Hem i eksplenem wok ya long olgeta, i se: “Taem yufala i go stap long wan haos, yufala i mas tokgud long olgeta se ‘Pis i stap wetem yufala.’ Sipos olgeta long haos ya oli gudfala man, tok ya blong yufala blong pis i save stap long olgeta.” ?Olgeta oli mas talemaot wanem mesej long ol man? Jisas i talem se: “Yufala i mas talemaot long olgeta, se ‘Naoia, long taem blong yufala, i taem blong God i kam king blong ol man blong hem.’ ” Long saed blong wok blong ol 70 man ya, wan buk (Matthew Henry’s Commentary) i talem se: “Olgeta oli folem fasin blong Masta blong olgeta nomo. Long ol ples we oli go long olgeta, oli prij long olgeta haos wanwan.”

Ol rul we Jisas i givim long ol 70 man ya oli kolosap sem mak long ol rul we hem i givim long ol 12 aposol blong hem wan yia bifo, taem hem i sanemaot olgeta oli go prij long ol velej mo ol ples long Galili. Hem i givhan long ol 70 man ya blong tingting rere long ol wok we oli mas mekem, nao hem i givim woning long olgeta se bambae i gat sam man we oli agensem olgeta. Mo hem i givim paoa long olgeta blong oli save mekem ol sikman oli kamgud bakegen. Olsemia, taem Jisas i kam biaen long olgeta, bambae i gat plante man we oli glad blong luk Masta blong ol disaepol ya we oli save mekem ol merikel ya.

Nao Jisas i sanemaot ol 70 man ya, mo hem wetem ol aposol blong hem oli kam biaen long olgeta. Be wok blong olgeta i no gohed longtaem. Ol 70 man ya we oli stap talemaot Kingdom oli kambak bakegen long Jisas, oli glad tumas. Olgeta oli stap talem se: “Masta, ol devel ya be taem mifala i talem nem blong yu, oli stap obei long mifala.” Jisas i harem gud tumas long gudfala ripot ya, nao hem i talem long olgeta i se: “Mi mi luk Setan i aot long heven finis, i foldaon olsem we wan laetning i foldaon. Yufala i lesin. Mi mi givim paoa finis long yufala, nao yufala i save purumbut long ol snek mo skopion we taem oli kakae man, man i mas ded from, be bambae yufala i no save ded from.”

Jisas i save finis we long ol las dei, taem Kingdom blong God i stanap long heven, hem i mas sakem Setan wetem ol rabis enjel blong hem oli aot long heven. Wok ya we ol 70 man blong Jisas oli stap mekem, blong ronemaot ol devel long ol man, i soemaot klia se samting ya i mas kamtru long fyuja. Taswe Jisas i tokbaot samting we bambae i kamaot long Setan long heven olsem we hem i kamaot finis long hem. Tok we Jisas i talem long ol 70 man ya se bambae oli save purumbut long ol snek mo skopion, i olsem wan saen blong soemaot paoa we hem i givim long olgeta. Be Jisas i givim woning long olgeta se: “Be i nogud yufala i stap glad olsem from samting ya nomo, we ol devel ya oli stap obei long yufala. I moa gud yufala i glad from we olgeta oli raetemdaon nem blong yufala, oli stap long heven finis.”

Nao Jisas i harem gud tumas, ale hem i presem Papa blong hem long fes blong ol man ya from we hem i yusum ol man blong hem we tingting blong olgeta i stap daon blong mekem bigfala wok ya. Nao Jisas i tanraon, i talem long ol man blong hem nomo se: “Yufala we i stap lukluk ol samting ya, yufala i save harem gud. Mi mi talem long yufala, bifo i gat plante profet mo plante king we oli wantem tumas blong luk ol samting ya we yufala i stap luk, be neva oli luk. Mo oli wantem tumas blong harem ol tok ya we yufala i stap harem, be neva oli harem.” Luk 10:1-24; Matyu 10:1-42; Revelesen 12:7-12.

▪ ?I stat long taem we Jisas i tekem baptaes go kasem tri yia biaen, hem i prij wea? ?Nao long las sikis manis long laef blong hem, hem i prij wea?

▪ ?Jisas i sanem ol 70 man blong hem oli go prij long ol haos prea, no weples?

▪ ?From wanem Jisas i talem se hem i luk Setan i aot long heven finis, i foldaon?

▪ ?Wanem mining blong tok blong Jisas taem hem i talem long ol man blong hem se oli save purumbut long ol snek mo skopion?