Japta 74

Hem i Givim Advaes Long Mata, Mo Hem i Tokbaot Prea

JISAS i stap mekem minista wok blong hem long Judia, nao hem i wokbaot i go long wan velej, nem blong hem Betani. Hemia velej blong Mata, mo Meri, mo brata blong tufala Lasros. Ating Jisas i mitim trifala ya finis long minista wok blong hem, taswe hem i frengud wetem trifala. Ale hem i go long haos blong Mata, nao Mata i mekem welkam long Jisas.

Mata i wantem mekem i gud tumas long Jisas taem hem i stap long haos blong hem. Hemia i wan bigfala blesing we Mesaea i kam long haos blong hem. Nao Mata i stap mekemrere bigfala kakae blong Jisas mo hem i gohed long ol narafala wok blong hem tu. Hem i wantem we Jisas i glad blong stap long haos blong hem mo i harem gud.

Be sista blong Mata, Meri, i gat defren fasin. Hem i kam sidaon long floa kolosap long leg blong Jisas, nao hem i stap lesin long ol tok blong hem. Be Mata i stap harem nogud, i kam talem long Jisas, i se: “?Masta, olsem wanem yu yu no tingbaot we sista blong mi i ronwe long mi, nao mi mi stap mekem ol wok ya, mi wan? Plis yu tok long hem blong i kam givhan long mi.”

Be Jisas i no mekem olsem. Hem i no tok long Meri, be hem i tok long Mata, from we Mata i tingting tumas long ol samting blong laef nomo. Long kaengud fasin Jisas i stretem Mata, i se: “Mata, Mata, yu yu stap harem nogud, no yu stap trabol long plante samting. Be i gat wan samting nomo i stap, we yufala i mas mekem.” Jisas i stap talem long Mata se hem i no mas yusum fulap taem blong mekemrere ol bigbigfala kakae. Smol kakae nomo i naf.

Samting we Mata i mekem i gud nomo. Hem i wantem mekem i gud long Jisas from we hem i kam stap long haos blong hem. Be from we hem i stap tingting tumas long ol samting long saed blong bodi, hem i save mestem wan jans blong harem ol gudfala tok blong stret Pikinini blong God. Taswe Jisas i talem long hem se: “Meri ya, hem i jusumaot stret samting ya finis, mo mi mi no save tekemaot samting ya long hem.”

Biaen, Jisas i stap long wan ples, ale wan disaepol blong hem i kam long hem, i askem long hem se: “Masta, plis yu tijim mifala blong mifala i prea, olsem we Jon Baptaes i bin tijim ol man blong hem bifo.” Wan yia haf bifo, taem Jisas i stap tijim ol man antap long hil, hem i storeyan long ol disaepol blong hem olsem wanem oli mas prea. Be ating disaepol ya i no stap long taem ya. Ale, Jisas i talem bakegen ol rul long saed blong prea, nao hem i talem moa. Hem i yusum wan pija tok blong makem long tingting blong olgeta we oli mas prea oltaem.

Jisas i talem se: “Yufala i traem tingbaot fasin ya. Long medel naet, wan fren blong yu we i stap wokbaot, hem i kamtru long haos blong yu, mo yu yu no gat kakae blong givim long hem. Nao yu girap, yu go askem long wan man ples blong yu, se ‘?Brata, yu gat sam hafkakae i stap, we yu save letem long mi? Wan fren blong mi i jes kamtru long mi naoia, mo mi mi no gat kakae nating blong givim long hem.’ ?Bambae man ples ya i save talem olsem wanem? ?Yu ting se hem i save talem se ‘A, yu gowe. Mi mi satem doa finis. Mi wetem ol pikinini blong mi, mifala i slip finis. Mi no save girap bakegen blong givim kakae long yu’? Mi mi talem long yufala, maet hem i no wantem girap blong givim kakae long yu from we yu man ples blong hem. Be from we yu no gat sem blong askem, askem, askem long hem, bambae hem i save girap blong givim evri samting long yu we yu yu sot long hem.”

Pija tok ya i no min se Jeova God i no wantem givim ol samting we yumi askem long hem, olsem man ples long store ya. No gat. Jisas i stap soemaot se nating we man ples ya i no wantem givim ol samting we fren blong hem i nidim, be hem i givim from we man ya i askem, askem, mo askem bakegen. Sipos wan man nomo i save givim olsem, ?olsem wanem long Papa blong yumi long heven, we i laekem yumi tumas? Yes, hem i save go moa olgeta blong ansarem prea blong yumi. Nao Jisas i talem se: “From samting ya, mi mi talem tok ya long yufala. Taem yufala i wantem wan samting, yufala i mas askem, nao bambae yufala i save kasem, mo yufala i mas lukaot, nao bambae yufala i save faenem, mo yufala i mas kilkilim doa, nao bambae doa i save open. From we man we i stap askem samting, oltaem hem i save kasem samting ya. Mo man we i stap lukaot samting, oltaem hem i save faenem samting ya. Mo man we i stap kilkilim doa, oltaem doa i save open long hem.”

Nao Jisas i tokbaot ol fasin blong ol papa blong yumi, we oli no stret olgeta, oli sinman nomo. Jisas i talem se: “?I gat wan papa long yufala we taem pikinini blong hem i askem fis long hem, be hem i no save givim fis, i givim snek long hem? ?No i gat wan papa we taem pikinini blong hem i askem eg blong hem, be hem i save givim skopion long hem? Yufala i man nogud, be yufala i save givim ol gudgudfala presen long ol pikinini blong yufala. Be Papa blong yufala long heven, hem i save go moa olgeta blong givim Tabu Speret long olgeta we oli askem long hem.” Tru tumas, gudfala tok ya blong Jisas i pulum ol man blong prea oltaem nomo. Luk 10:38 kasem 11:13.

▪ ?From wanem Mata i mekemrere wan bigfala kakae blong Jisas?

▪ ?Meri i mekem wanem? ?From wanem Jisas i talem se fasin blong Meri i moa gud i winim fasin blong Mata?

▪ ?From wanem Jisas i tokbaot prea bakegen wetem ­olgeta?

▪ ?Jisas i talem wanem pija tok blong soemaot se yumi mas askem, askem, mo askem bakegen long God?