‘Blokem Olgeta Fasin Ya Blong Wantem Samting Blong Narafala Man’
“Maet man i gat plante samting blong hem, be stamba blong prapa laef blong man i no stap long ol samting ya.”—LUK 12:15.
1, 2. (a) ?Yu yu luk we ol man tede oli wantem wanem mo oli ronem wanem? (b) ?Wanem i save mekem we sloslo yumi tekem fasin mo tingting blong wol?
OL MAN oli wantem gat wan laef we i gud mo oli wantem hivimap samting naoia we bambae i mekem fiuja blong olgeta i gud mo i sef. Bighaf blong ol man ya oli ting se oli save kasem samting ya sipos oli gat mane, graon, gudnem, wan wok we pei blong hem i gud, no sipos oli mared mo oli gat pikinini. Nating se long kantri we i rij no kantri we i pua, tingting blong plante man i stap long sem samting nomo. Oli wantem tumas ol samting we oli save kasem long saed blong bodi mo ol samting we i save mekem laef blong olgeta i gud, mo oli ronem ol samting ya. Ale, sipos oli bin gat smol intres long God mo long wosip blong hem, be kwiktaem nomo intres ya i lus.
2 Baebol i bin talemaot samting ya finis, i se: “Yu mas save samting ya se, taem blong ol las dei bambae i strong tumas, bambae i had blong winim ol trabol. From we bambae ol man oli save laekem olgeta nomo, bambae oli laekem mane tumas . . . oli laekem moa ol pleplei, i winim we oli laekem God. Long fes blong ol man, i luk olsem we oli stap fasgud long God, be oli giaman nomo, oli no wantem nating we paoa blong God i wok long laef blong olgeta.” (2 Timoti 3:1-5, NW) Ol Kristin oli laef mo oli wok wetem ol man blong wol ya, taswe evri dei nomo, ol tingting mo ol fasin blong wol i stap traem pulum olgeta blong oli karem tingting olsem wol mo blong oli folem fasin blong laef blong wol. ?Wanem i save halpem yumi blong faet strong agensem wol ya we i stap traem ‘fosem yumi blong yumi kam olsem hem’?—Rom 12:2, The New Testament in Modern English, by J. B. Phillips.
3. ?Wanem advaes we Jisas i givim we bambae yumi tokbaot long stadi ya?
3 Jisas Kraes, we hem i “Man we God i yusum blong givim bilif long yumi mo mekem bilif ya blong yumi i stret gud,” hem i givim ol nambawan tijing blong halpem yumi. (Hibrus 12:2, NW) Wan taem, Jisas i toktok long wan grup blong ol man, hem i stap givim moa save long olgeta sam impoten samting we oli joen wetem wosip blong God. Ale wan man i katem toktok blong Jisas blong askem wan samting long hem, i se: “Tija. Papa blong mi i ded finis. Plis yu talem long brata blong mi blong i seraot ol samting ya, we papa blong mitufala i putum i stap se i blong mitufala.” Nao Jisas i toktok long man ya mo long olgeta we oli stap lesin long hem, i givim sam advaes we oli impoten tumas. Hem i talemaot wan strong woning long olgeta se oli mas lukaot long fasin blong wantem samting we i blong narafala man, mo blong makemgud woning ya long tingting blong ol man, hem i talem wan parabol. I gud yumi tingbaot wanem we Jisas i talem long taem ya mo olsem wanem advaes blong hem i save mekem i gud long yumi taem yumi folem.—Luk 12:13-21.
Samting We Hem i Askem i No Stret
4. ?From wanem samting we man ya i askem long Jisas long taem ya i no stret?
4 Bifo we man ya i katem toktok blong Jisas, Jisas i stap talem long ol disaepol blong hem mo ol narafala man we oli lesin, se oli mas lukaot long fasin tu fes, oli no mas fraet blong talem se oli man blong Jisas, mo i gat tabu spirit i stap blong givhan long olgeta. (Luk 12:1-12) Tru ya, ol samting we Jisas i stap tokbaot oli ol save we oli impoten tumas mo ol disaepol oli mas tinghevi long ol save ya. Be taem Jisas i stap gohed blong talem ol save ya we oli pulum man blong tingting dip, wantaem nomo man ya i katem tok blong Jisas. Hem i askem Jisas blong stretem wan raorao long famle blong hem, we raorao ya hem i long saed blong ol samting blong bodi. Yumi save lanem wan impoten lesen long stori ya.
5. ?Samting we man ya i askem, i soemaot wanem long saed blong hem?
5 Wan man i raetem long wan buk se ‘plante taem, samting we man i stap tingbaot taem hem i lesin long ol storian long saed blong God, i soemaot se hem i wanem kaen man.’ Taem Jisas i stap tokbaot sam impoten samting we oli joen wetem wosip blong God, ating man ya i stap tingbaot wanem we hem i save mekem blong kasem mane no olting we papa blong hem i putum se i blong hem. Maet i tru we ol famle blong hem oli bin mekem i no stret long hem, nao oli no givim ol samting ya we i blong hem. Maet man ya i luk se Jisas i gat paoa mo i waesgud long fasin blong skelem ol bisnes long laef blong man, ale hem i traem yusum Jisas blong stretem wan bisnes blong hem. (Aesea 11:3, 4; Matiu 22:16) Nomata se i olsem wanem, kwestin blong man ya i soemaot klia se hem i gat wan problem long saed blong spirit. Yes, hem i no tinghae nating long ol toktok blong God mo wosip blong Hem. Ating i gud sipos yumi skelem yumi wan long saed ya tu. ?Olsem wanem taem yumi stap long ol Kristin miting? I isi blong letem tingting blong yumi i flae olbaot, mo i isi blong tingbaot ol samting we bambae yumi mekem taem miting i finis. Be i gud yumi traem putum tingting blong yumi i stap strong long ol toktok we yumi harem. I gud yumi tingbaot olsem wanem blong mekem ol save ya we yumi kasem i wok long laef blong yumi blong bambae yumi frengud moa wetem Jeova God, Papa blong yumi long heven, mo ol Kristin brata sista blong yumi.—Ol Sam 22:22; Mak 4:24.
6. ?From wanem Jisas i no wantem mekem wanem we man ya i askem?
6 Yumi no save wanem i pusum man ya blong askem wan samting olsem, be Jisas i no mekem wanem we man ya i askem. Defren olgeta, Jisas i talem long hem se: “Maefren. Mi mi no gat raet blong jajem bisnes blong yutufala, mo blong seraot ol samting blong yutufala.” (Luk 12:14) Jisas i talem olsem from we ol man long taem ya oli savegud se folem Loa blong Moses, i gat ol jaj oli stap long evri taon we wok blong olgeta nao i blong jajem ol bisnes no problem olsem. (Dutronome 16:18-20; 21:15-17; Rut 4:1, 2) Tru ya, Jisas i gat wan samting blong tingbaot we i moa impoten i bitim wok blong jaj. Hem i mas talemaot trutok blong Kingdom mo i mas tijim ol man long ol samting we God i wantem mekem. (Jon 18:37) I gud yumi folem eksampol blong Jisas. Yumi no letem ol problem no wari blong laef evri dei oli pulum yumi i gowe long stret rod. Defren olgeta, yumi yusum taem mo paoa blong yumi blong talemaot gud nius mo ‘pulum ol man long olgeta ples long wol oli kam disaepol.’—Matiu 24:14; 28:19.
Lukaot Long Fasin Blong Wantem Samting Blong Narafala
7. ?Wanem samting we Jisas i luksave?
7 Jisas i naf blong luksave wanem i stap long hat blong man. Hem i luksave se man ya i gat wan problem we i moa bigwan i bitim problem ya long famle blong hem. Ale, Jisas i no wantem stretem problem blong man ya, be hem i traem stretem man ya from tingting we i pusum hem blong tingbaot moa ol prapa bisnes blong hem. Hem i se: “Yufala i lukaot gud. Yufala i mas blokem olgeta fasin ya we yufala i wantem samting blong narafala man. Maet man i gat plante samting blong hem, be stamba blong prapa laef blong man i no stap long ol samting ya.”—Luk 12:15.
8. ?Man we i wantem samting blong narafala, hem i olsem wanem? ?Mo fasin ya i save pulum man blong mekem wanem?
8 Fasin ya blong wantem samting blong narafala man i no minim nomo se man i wantem gat mane no sam samting, we maet ol samting ya oli stret nomo mo hem i nidim. Fasin ya we Jisas i tokbaot, i defren. Hem i wan fasin we i pulum man bitim mak blong wantem mane mo olting blong narafala. Hem i wan fasin we i mekem man i no skelgud long tingting blong hem from we hem i wantem tumas blong kam rij, i wantem tumas blong gat plante samting, no i wantem tumas blong kasem ol samting olsem we narafala man i gat. Fasin ya i pulum man blong wantem samting oltaem, mo nating se hem i kasem finis, be i wantem moa yet. Hem i luk samting we narafala man i gat, nao hem tu i mas kasem sem samting, be hem i no tingbaot sipos hem i rili nidim samting ya, mo i no kea tu sipos hem i spolem sam man raonabaot long hem. Man we i wantem samting blong narafala, tingting blong hem i stap nomo long samting ya we hem i wantem tumas, nao i letem samting ya i bos long olgeta tingting mo fasin blong hem gogo i olsem we samting ya i kam wan god blong hem. Aposol Pol i talem se man we i stap wantem evri samting, hem i sem mak nomo long man we i stap mekem wosip long ol narafala god, mo man ya bambae i no save kasem ol blesing we Kingdom blong God bambae i givim.—Efesas 5:5; Kolosi 3:5.
9. ?Wanem ol samting blong narafala we maet wan man i wantem tumas? Givim sam eksampol.
9 I gud blong makem we Jisas i tok agensem ‘olgeta fasin ya we man i wantem samting blong narafala man.’ Yes, i gat plante defdefren kaen samting we man i wantem. Laswan long ol Tenkomanmen i talem sam long ol samting ya i se: “Bambae yufala i no mas letem tingting blong yufala i stap long ol samting blong narafala man blong tekem i blong yufala. Bambae yufala i no mas letem we woman blong hem, no slef blong hem, no buluk blong hem, no dongki blong hem, no ol narafala samting we hem i gat i pulum tingting blong yufala olsem.” (Eksodas 20:17) I gat plante stori long Baebol we oli soemaot olsem wanem sam man oli bin mekem bigfala sin from we oli wantem tumas samting we i blong narafala man. Setan i faswan we i wantem samting blong narafala. Hem i wantem glori, ona, mo hae posisen we oli blong Jeova nomo. (Revelesen 4:11) Iv i wantem kasem raet blong jusum evri samting olsem we hem nomo i wantem mo from we hem i letem tingting ya i trikim hem, hem i karem sin mo ded i kam long olgeta man long wol. (Jenesis 3:4-7) Ol rabis enjel “oli no glad blong holem hae nem we God i givim long olgeta, nao oli livim prapa ples blong olgeta, oli gowe long hem” blong tekem wan samting we oli no gat raet long hem. (Jud 6; Jenesis 6:2) Tingbaot Balam, Akan, Gehasi, mo Judas. Olgeta ya oli no glad long wanem we oli gat finis. Oli wantem mane bitim mak, gogo oli no moa tinghae long wok we i stap long han blong olgeta, nao oli spolem laef blong olgeta.
10. ?Olsem wanem yumi save folem advaes blong Jisas se yumi mas ‘lukaot gud’?
10 Bifo we Jisas i tok agensem fasin blong wantem samting blong narafala man, hem i statem toktok blong hem se “yufala i lukaot gud.” !Ol tok ya oli stret nomo! ?From wanem? From we i isi long yumi blong luk se narafala man i griri no i wantem samting blong narafala, be plante taem yumi no luksave se yumi wan yumi gat fasin ya. Aposol Pol i talem se “fasin blong laekem mane tumas, hem i stamba blong olgeta fasin nogud.” (1 Timoti 6:9, 10) Disaepol Jemes i talem se taem man i wantem wan samting we i no stret, “fasin ya bambae i kam bigwan moa long hem, nao bambae man ya i stap mekem ol samting nogud from.” (Jemes 1:15) I gud yumi folem advaes blong Jisas blong ‘lukaot gud.’ I no blong lukaot gud se narafala i no gat fasin ya, be i blong lukaot gud long yumi wan, se yumi stap putum tingting blong yumi i strong long wanem samting. Olsem nao yumi save ‘blokem olgeta fasin ya blong wantem samting blong narafala man.’
Man We i Gat Plante Samting Long Laef
11, 12. (a) ?Wanem woning we Jisas i givim long man we i wantem samting blong narafala? (b) ?From wanem yumi mas folem woning blong Jisas?
11 I gat wan narafala risen from wanem yumi mas blokem fasin ya blong wantem samting blong narafala. Ridim tok ya we i Jisas i talem biaen, i se: “Maet man i gat plante samting blong hem, be stamba blong prapa laef blong man i no stap long ol samting ya.” (Luk 12:15) Yumi mas tingtinggud long samting ya we Jisas i talem from we yumi laef long wan taem we ol man oli tingbaot tumas ol samting long saed blong bodi, oli ting se glad mo gudfala laef i kamaot taem man i gat plante samting. Jisas i soem se ol samting we wan man i gat oli no save mekem we laef blong hem i gat mining mo i glad, nating se ol samting ya oli plante we oli plante.
12 I gat sam man we maet oli no agri long tingting ya. Oli ting se taem man i gat plante samting long laef, hem i save hapi mo samting ya i save givhan long laef blong hem, ale hem i harem se laef i gat moa mining. Taswe, ol man ya oli spenem ful taem blong olgeta blong ronem wan wok we i save halpem olgeta blong kasem ol samting blong bodi mo ol niufala samting we i kamaot long teknoloji. Hemia nao we i mekem laef blong olgeta i gud. Be taem oli tingting olsem, oli mestem bigfala tingting we Jisas i wantem soemaot.
13. ?Wanem tingting we i skelgud long saed blong laef mo ol samting we yumi gat?
13 Toktok blong Jisas i no blong talem sipos i rong no i stret blong gat plante samting. Hem i stap tokbaot laef blong man, se laef ya i no stanap long ‘ol samting we man i gat,’ i minim ol samting we hem i gat finis. Yumi evriwan i save se blong givhan long bodi blong yumi blong i gohed blong pulum win, yumi no nidim plante samting. Yumi nidim smol kakae, sam klos, mo wan ples blong ledaon, hemia nomo i naf blong mekem yumi laef evri dei. Ol rijman oli gat plante long ol samting ya, mo ol puaman oli stap traehad evri dei blong kasem wanem we oli rili nidim. Be taem rijman mo puaman i ded, tufala i sem mak nomo—long taem ya, i no moa gat wan we i rij mo wan we i pua. (Prija 9:5, 6) Taswe sipos yumi wantem we laef blong yumi i gat mining, yumi no mas ting se taem yumi laef yumi mas kasem plante samting. Tingting blong yumi i save klia moa long saed ya sipos yumi save wanem laef ya we Jisas i stap tokbaot.
14. ?Tok ya “laef” we i stap long Gospel blong Luk i tijim yumi long wanem?
14 Jisas i talem se “laef blong man i no stap long ol samting” we hem i gat. Tok ya “laef” we Luk i raetem long Gospel blong hem (we long Grik lanwis hem i zo·eʹ) i no blong tokbaot fasin blong laef, be i blong minim laef we i stap insaed long yumi.a Jisas i wantem minim se, nomata yumi rij no yumi pua, nomata sipos yumi gat gudfala laef wetem fulap samting no yumi stap wokhad evri dei blong kasem smol kakae nomo, yumi no save bos long hamas yia we bambae yumi laef, mo yumi no save tu sipos tumoro bambae yumi stap pulum win yet. Taem Jisas i mekem bigfala toktok blong hem antap long hil, hem i se: “?Yufala i ting se taem man i stap tingting tumas from laef blong hem we i sotfala nomo, bambae i save mekem laef blong hem i kam longfala moa long fasin ya?” (Matiu 6:27) Baebol i soemaot klia se Jeova nomo i “stamba blong laef” mo hem nomo i save givim “laef ya we i prapa wan,” hemia “laef ya we i no save finis,” long ol gudfala man blong hem, we sam bambae oli kasem long heven mo sam long wol.—Ol Sam 36:9; 1 Timoti 6:12, 19.
15. ?From wanem plante man oli trastem olting we oli gat?
15 Ol tok blong Jisas oli soemaot se i isi nomo blong ol man oli no tingbaot no luk laef olsem wan samting we impoten tumas. Maet man i rij no i pua, be evriwan oli sinman we bambae oli go long sem ples nomo, hemia ded. Moses bifo, i lukluk laef blong ol man, nao hem i luksave se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti, be oltaem mifala i stap kasem trabol, mifala i stap harem nogud nomo. Laef blong mifala i save finis kwiktaem nomo, nao mifala i go lus olgeta.” (Ol Sam 90:10; Job 14:1, 2; 1 Pita 1:24) Taswe ol man we oli no wokem wan gudfala fasin fren wetem God, plante taem oli karem tingting ya se “i gud yumi gohed, yumi kakae, yumi dring, from we tumora bambae yumi ded.” (1 Korin 15:32) Sam narafala man oli gat defren tingting. Oli luksave se laef i pas hareap nomo, mo oli luksave tu se trabol i save hapen enitaem, taswe oli traem hivimap no kasem plante samting long saed blong bodi. Maet oli harem se laef blong olgeta i sefgud, mo i save longfala moa, taem oli luk wetem ae blong olgeta se oli gat plante samting. Taswe ol man ya oli wok we oli no spel nating, blong hivimap mane mo plante samting. Be oli mestem bigwan taem oli ting se mane mo olting ya i save sevem laef blong olgeta mo i save mekem oli hapi.—Ol Sam 49:6, 11, 12.
Wan Fiuja We Yu Sua Long Hem
16. ?Trufala risen blong laef, i no stanap long wanem?
16 I tru se sipos man i wingud mo i save pem kakae isi nomo, mo i gat klos mo haos mo narafala samting olsem, ale hem i save gat isi laef mo maet i save kasem plante moa gudfala tritmen blong blokem sik, mo from samting ya maet i tru se hem i laef plante yia moa i bitim narafala man. ?Be olsem wanem? ?Ol samting ya nao oli risen from wanem man i laef mo ol samting ya nao oli mekem man i sua se fiuja blong hem bambae i gud? Man i save laef plante yia mo i save gat plante samting no i save pem mo yusum plante samting, be i no ol samting ya we oli olsem risen from wanem hem i laef. Aposol Pol i givim woning se yumi mas lukaot blong no putum tras blong yumi i go tumas long ol samting ya. “Yu mas tok strong long olgeta we oli rijman long ol samting blong wol ya, blong oli no letem tingting blong olgeta i go antap tumas. Mo bambae oli no putum tingting blong olgeta long ol mane blong olgeta, from we mane i no wan samting blong stap longtaem. Oli mas putum tingting blong olgeta i stap long God nomo, we hem i stap givim plante samting long yumi, blong yumi harem gud long hem.”—1 Timoti 6:17.
17, 18. (a) ?Wanem ol nambawan eksampol we yumi save folem long saed blong fasin blong gat plante samting long laef? (b) ?Wanem parabol we bambae yumi tokbaot long nekis stadi?
17 I no waes blong putum tras blong yumi long mane from we “mane i no wan samting blong stap longtaem.” Wan olfala blong bifo, we nem blong hem Job, hem i wan rijman, be taem bigfala trabol i kasem hem, olgeta samting we hem i gat oli no save givhan long hem nating, hem i lusum evri samting wan taem nomo. Fasin fren we Job i gat wetem God i strong we i strong mo samting ya nao i halpem hem blong fesem ol traem mo trabol we i kasem hem. (Job 1:1, 3, 20-22) Ebraham tu i wan man we i gat fulap samting. Be hem i no letem ol samting ya oli holembak hem blong i no mekem wanem we Jeova i talem se hem i mas mekem. Ale, Jeova i blesem hem, i mekem hem i kam “stamba blong ol man blong plante ples.” (Jenesis 12:1, 4; 17:4-6) I gat plante narafala eksampol olsem Job mo Ebraham. I gud yumi folem eksampol blong olgeta ya. Yes, nating se yumi yangfala no olfala, yumi mas jekem yumi blong luk se wanem samting long laef blong yumi i moa impoten mo se yumi stap putum tras blong yumi long wanem.—Efesas 5:10; Filipae 1:10.
18 Ol toktok ya we Jisas i talem long saed blong fasin blong wantem samting blong narafala man, mo stret tingting we man i mas gat long saed blong laef, oli save givhan gud mo tijim gud yumi tede. Be, i gat narafala tijing tu i stap long tingting blong Jisas, we hem i wantem talem long ol man. Ale, hem i talem stori, no parabol, blong wan rijman we i no yusumgud save blong hem. ?Olsem wanem parabol ya i stret wetem laef blong yumi tede, mo yumi save lanem wanem from? Nekis stadi bambae i tokbaot samting ya.
[Futnot]
a Wan narafala Grik tok blong talem “laef” hemia biʹos. Tok ya nao we i stamba blong ol Inglis tok ya olsem “biography” mo “biology.” Wan diksonari (Vine’s Expository Dictionary of Old and New Testament Words) i talem se biʹos i minim “ol yia blong laef blong wan man,” “fasin blong laef blong wan man,” mo “ol samting we i mekem man i save laef.”
?Wanem Ansa Blong Yu?
• ?Yumi lanem wanem from fasin blong Jisas we i no wantem stretem problem blong wan man wetem famle blong hem?
• ?From wanem yumi mas blokem fasin blong wantem samting blong narafala, mo olsem wanem blong blokem fasin ya?
• ?From wanem laef blong yumi i no stanap long hamas samting we yumi gat?
• ?Wanem i save mekem we yumi gat risen blong laef mo yumi save gat gudfala fiuja?
[Tok blong pija long pej 25]
?From wanem Jisas i no mekem samting we man ya i askem hem blong mekem?
[Tok blong pija long pej 25]
Fasin blong wantem samting blong narafala i save pulum trabol i kam long yumi