Jpata 78

!Stap Rere!

JISAS i talem finis long ol man se oli mas blokem fasin ya we oli wantem samting blong narafala man, mo oli no mas tingting tumas long ol samting blong laef. Nao Jisas i leftemap tingting blong olgeta, i se: “Yufala we i smol kampani blong mi, yufala i no fraet. Papa blong yufala hem i glad tumas blong givim kingdom blong hem long yufala.” (GNB) Tok blong Jisas i min se wan smol kampani nomo (biaen Baebol i talem se 144,000 man) bambae oli go antap long heven blong rul long Kingdom blong God. Bighaf blong ol man we oli kasem laef blong olwe bambae oli stap long wol, aninit long rul blong Kingdom blong God.

Traem tingbaot nambawan presen ya: ‘!God i glad blong tekem olgeta oli kam insaed long Kingdom blong hem!’ Blong soemaot long ol disaepol blong hem se oli mas harem gud tumas long promes ya blong God, Jisas i talem long olgeta se: “Yufala i mas ­salemaot olting blong yufala, yufala i mas givim presen long ol puaman.” Yes, oli mas yusum olting blong olgeta blong givhan long ol narafala man long saed blong speret. Olsem ya nao, oli save ‘putumgud ol gudgudfala samting blong olgeta oli stap long heven.’

Nao Jisas i talem long ol disaepol blong hem se oli mas stap rere, oli mas wet long hem blong i kambak bakegen. Hem i talem se: “Oltaem, yufala i mas olsem man we i putum klos blong hem, i taetem strap blong hem mo i laetem laet blong hem finis. Oltaem yufala i mas rere blong mekem wok. Yufala i mas olsem ol man blong wok we oli stap wet long masta blong olgeta we i jes mared, blong i aot long kakae blong mared, i kamhom. Taem hem i kam kilkilim doa, wantaem nomo oli save openem doa long hem. Taem we masta i kam, i luk we ol man blong hem oli no slip, oli stap rere long hem olsem, ol man ya oli save harem gud. Tru mi talem long yufala, masta ya i save putum klos blong wok blong hem, i save singaot olgeta oli kam kakae, nao hem i save lukaot long olgeta blong givim kakae long olgeta.”

Long pija tok ya, ol man oli pulum ol longfala klos blong olgeta oli kam antap, nao oli taetem strap blong olgeta. Mo oli no slip, be oli laetem laet blong olgeta, ale oli stap lukaot long wok blong olgeta long naet tu. Long ol fasin ya, oli soemaot se oli stap wet long masta blong olgeta. Nao Jisas i eksplenem long olgeta se: ‘Mo sipos hem i kamtru long medel naet, no long taem we faol i singaot, be ol man ya oli stap rere olsem, bambae oli save harem gud.’

Masta ya i givim narakaen presen long ol man blong hem. Hem i singaot olgeta oli kam kakae, nao hem nomo i lukaot long olgeta, i givim kakae long olgeta. Hem i no mekem olsem we oli man blong wok long hem. No gat. Be hem i mekem olsem we oli trufala fren blong hem. Yes, masta i givim gudfala presen ya long olgeta from we taem oli stap wet long hem blong kambak, oli stap wok strong long wok blong hem, nating we tudak i kam finis. Ale Jisas i talem long olgeta: “Nao yufala tu i mas stap rere. From we mi, mi Pikinini blong Man, bambae mi kamtru long taem we yufala i no tingbaot.”

Nao Pita i askem long hem, i se: “?Masta, yu yu talem parabol ya blong mifala nomo, no blong olgeta man?”

Blong ansa long kwestin blong Pita, Jisas i talem wan parabol bakegen. Hem i talem se: “?No, be hu man we i olsem man blong wok we i gat hed, we i save holem ol wok blong masta blong hem? Man blong wok olsem, masta blong hem i save putumap hem i bos long ol narafala man blong hem, blong i seraot ol kakae long olgeta long stret taem blong hem. Mo taem we masta blong man olsem i kamtru, i faenem we hem i stap mekem ol wok olsem, man ya i save harem gud. Tru mi talem long yufala, masta ya i save putumap hem blong i lukaot long olgeta samting blong hem.”

“Masta” ya, hem i Jisas Kraes. “Man blong wok we i gat hed,” hem i ‘smol kampani’ blong ol disaepol blong Jisas. Mo “ol narafala man blong hem,” hemia ol man blong smol kampani ya wanwan, ol 144,000 we bambae oli rul long Kingdom blong God long heven. Man blong wok ya i mas lukaot long “olgeta samting” blong masta blong hem. Ale, hem i mas lukaot long ol samting blong masta blong hem long wol, mo long ol man blong masta blong hem long wol, we oli stap aninit long rul blong Kingdom.

Jisas i go moa long pija tok ya, i talem se bambae i gat sam memba blong kampani ya we oli no stap tru long hem. Hem i se: “Be sipos man ya i ting se ‘A, masta blong mi i tektaem tumas, i no save kam kwik,’ nao i stat kilim ol narafala man mo woman blong wok, mo i stap go kakae mo i stap go dring we i stap drong, bambae masta blong hem i no save glad long hem. Bambae masta blong man olsem i kamtru long hem long wan dei we hem i no tingbaot . . . Nao masta ya bambae i givim bigfala panis long man ya blong hem.”

Nao Jisas i talem long olgeta se ol man Jyu oli save kasem trabol from hem. Bambae i gat samfala we oli glad blong harem tok blong hem, be samfala bambae oli sakem ol tijing blong hem. Tri yia finis hem i baptaes long wora. Naoia hem i stap kam kolosap long taem we bambae hem i mas baptaes long ded. Hem i talem olsem: “Mi mi stap harem nogud tumas oltaem, gogo samting ya bambae i kamtru, i finis.”

Jisas i talem ol samting ya long ol disaepol blong hem nomo, nao hem i tok long ol man bakegen. !Sore tumas long ol stronghed ya! Oli no wantem luksave ol saen we oli soemaot Jisas mo mining blong laef blong hem. Nao hem i talem long olgeta se: “Taem yufala i luk ol klaod oli stap hivap daon long wes, wantaem nomo yufala i save talem se ‘Bambae i ren ya’, mo bambae i olsem. Mo taem yufala i harem we saot win i stap blu, yufala i save talem se ‘Ei, bambae i hot tumas ya’, mo bambae i olsem. Man, yufala i man blong tu tingting. Yufala i save luk long graon mo skae blong talemaot we bambae taem i olsem wanem. ?Olsem wanem yufala i no save luksave ol saen blong taem ya blong mi?” Luk 12:32-59.

▪ ?I gat hamas man long ‘smol kampani’? ?Olgeta i kasem wanem presen?

▪ ?Olsem wanem Jisas i makem long tingting blong ol man blong hem se oli mas stap rere?

▪ ?Long pija tok blong Jisas, hu ya “masta”? ?Hu ya “man blong wok we i gat hed”? ?Hu ya “ol narafala man blong hem”? ?Wanem “olgeta samting blong hem”?