?Jeova Bambae i Tingbaot Yu Olsem Wanem?
“GOD blong mi, plis yu tingbaot mi.” Plante taem Nehemaea i yusum ol tok ya long ol prea blong hem long God. (Nehemaea 5:19; 13:14, 31) I stret nomo se taem ol man oli harem nogud, oli askem God long prea blong tingbaot olgeta.
?Be, ol man oli gat wanem tingting, taem oli askem God blong tingbaot olgeta? I klia se, oli hop we God bambae i mekem moa i bitim we hem i jes tingbaot nem blong olgeta. Olgeta oli hop olsem wan blong tufala man ya we oli ded klosap long Jisas. Man ya, we i defren long narawan, i askem strong long Jisas se: “Taem we yu yu kam King, nao yu kam long paoa blong yu, plis yu tingbaot mi bakegen.” Hem i wantem se Jisas i no jes tingbaot hem se i hu, be hem i wantem se Jisas i mekem wan samting long hem—blong mekem hem i laef bakegen long ded.—Luk 23:42
Plante taem, Baebol i soem se taem God i tingbaot, “tingbaot” i minim se hem i tekem strong aksin. Eksampel, afta we bigfala ren i foldaon blong 150 dei mo wota i kavremap ful wol, “God i stap tingbaot Noa yet . . . , nao i sanem wan win i blu long wota ya, mo wota i stat blong godaon bakegen.” (Jenesis 8:1) Plante handred yia biaen, ol man Filistaen oli spolem ae blong Samson mo oli fasem hem long jen. Samson i prea long God se: “Hae God, yu yu Masta blong mi. Plis mi wantem blong yu yu tingbaot mi bakegen. God, plis yu mekem mi mi kam strong bakegen wan taem moa.” Jeova i tingbaot Samson, i givim paoa long hem we i bigwan moa bitim paoa blong man, blong Samson i save givimbak ol samting nogud we ol enemi blong God oli mekem long hem. (Jajes 16:28-30) Long saed blong Nehemaea, Jeova i blesem ol traehad blong hem, mo trufala wosip i stanap bakegen long Jerusalem.
Aposol Pol i raetem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Sipos yumi tingbaot Jeova mo yumi traehad blong mekem wil blong hem, olsem ol man blong hem bifo, yumi save sua se Jeova bambae i tingbaot yumi mo i givhan long yumi blong kasem ol samting we yumi nidim evri dei. Mo tu God bambae i halpem yumi long ol trabol blong yumi, mo bambae i protektem yumi taem hem i mekem jajmen blong hem i kamtru long ol man we oli no ona long hem.—Matiu 6:33; 2 Pita 2:9