Japta 21

Long Haos Blong Prea Long Ples Blong Jisas

TAEM Jisas i kambak long ples blong hem, Nasaret, ating ol man oli sapraes, mo nyus ya i goraon kwik. Bitim wan yia bifo, hem i aot long ples ya, i go luk Jon blong hem i baptaesem hem. Long taem ya, ol man long taon ya oli tingbaot Jisas olsem wan man blong wokem haos nomo. Be naoia, fulap man oli save hem long ol ples olbaot, from we oli luk ol bigfala merikel we hem i bin mekem. Nao ol man ples blong Jisas oli wantem tumas we hem i mekem sam merikel long ples blong olgeta tu.

Jisas i go insaed long haos prea blong tij, olsem hem i mekem evritaem. Ol man oli stap lukluk hem from we oli ting se maet hem i mekem wan merikel. Nao Jisas i stanap blong ridim Baebol, mo olgeta oli givim buk blong profet Aesea long hem, blong i rid long hem. Nao hem i openem buk ya, i ridim tok ya we i talemaot Man ya we tabu speret blong Jeova i makemaot hem. Long Baebol blong yumi tede, profet tok ya i stap long Aesea japta 61.

Hem i ridim profet tok ya we i talem se man ya bambae i talemaot long ol man we oli stap kalabus, se: ‘Yufala i save kam fri.’ Bambae hem i talemaot long ol man we oli blaen, se: ‘Ae blong yufala i save kamgud.’ Mo profet tok ya i tokbaot stret taem we Jeova bambae i givhan long ol man blong hem. Taem Jisas i finisim riding ya, hem i satem buk ya bakegen, i givimbak long man we i stap lukaot long ol buk, mo hem i sidaon. Nao olgeta man long haos blong prea ya oli stap lukluk i kam long hem. Nao hem i stat tok long olgeta, mo ating hem i gohed longtaem lelebet, i eksplenem se: “Tede, long taem ya we yufala i stap lesin long ol tok ya blong Baebol, God i stap mekem ol samting we tok ya i talem, oli kamtru.”

Nao ol man ya oli glad tumas mo oli sapraes tu from we “tok blong hem i gud tumas.” Oli stap asaskem se: “Hemia pikinini blong Josef ya. ?Olsem wanem ya?” Be Jisas i save se oli wantem we hem i mekem sam merikel. Taswe hem i talem se: “Mi mi harem olsem we yufala i wantem talem olfala tok ya long mi we ol man oli stap talem bifo, we i talem se ‘Dokta, i gud yu mekem bodi blong yu i gud fastaem . . . Ol samting ya we oli talem se yu mekem finis long Kapaneam, i gud yu kam mekem olgeta bakegen long ples ya blong yu.’ ” Ol man ples blong Jisas oli ting se fastaem i mas mekem ol gudfala wok blong hem long ples blong hem nomo. Hem i mas givhan long ol man ples blong hem fastaem. From we Jisas i no mekem olsem, oli ting se hem i mekem i no stret long olgeta.

Jisas i save tingting blong olgeta, nao hem i talemaot sam samting we oli hapen long taem bifo, we oli stret long bisnes ya. Long taem blong profet ya Elaeja bifo, i gat plante wido long Isrel. Be God i no sanem Elaeja i go long olgeta. Elaeja i go long wan wido long Saedon. Wido ya i blong narafala laen. Nao hem i mekem wan merikel we i sevem laef blong hem. Mo tu, long taem blong profet Elaesa bifo, i gat plante man we oli kasem sik ya leprosi. Be Elaesa i tekemaot sik ya long wan man Siria nomo, nem blong hem Neman.

Nao taem olgeta man long haos prea oli harem tok ya, oli kros tumas, from we ol eksampel ya we Jisas i talem oli soemaot se ol man ya oli tingbaot olgeta nomo, mo oli sot long bilif. Ale oli girap, oli holem Jisas, oli pulum hem i goaot long velej, nao oli go long wan hae ples long hil ya we velej blong olgeta, Nasaret, i stap long hem. Oli wantem sakem hem i godaon long klif ya. Be Jisas i aot long medel blong olgeta, nao i gowe. Luk 4:16-30; 1 King 17:8-16; 2 King 5:8-14.

▪ ?From wanem ol man Nasaret oli sapraes, mo i gat nyus i goraon?

▪ ?Wanem tingting blong ol man taem Jisas i stanap long haos prea, i ridim profet tok blong Aesea? ?From wanem ol man ya oli kam kros?

▪ ?Ol man ya oli traem mekem wanem long Jisas?