Japta 54

“Prapa Bred We i Kamaot Long Heven”

PLANTE samting i bin hapen long dei ya. Jisas i mekem merikel we i givim kakae long plante taosen man. Biaen, hem i ronwe long ol man we oli traem fosem hem blong i kam king long olgeta. Long naet, hem i wokbaot antap long bigsi long bigfala lugun long Galili. Mo taem Pita i traem wokbaot i kam long hem antap long wora nao i stat draon, Jisas i sevem hem. Mo hem i kwaetem bigfala win, blong mekem se bot we i karem ol disaepol blong hem i no draon.

Nao ol man we Jisas i givim kakae long olgeta long not-is saed blong bigfala lugun long Galili, oli klaem long ol bot, nao oli gokros long lugun ya blong lukaot Jisas bakegen. Taem oli faenem hem kolosap long Kapaneam, oli askem long hem se: “?Tija, yu yu kam long ples ya long wetaem?” Jisas i tok strong long olgeta se oli stap lukaot hem from we oli kakae bred ya olsem we oli wantem nomo. Nao oli stap lukaot kakae bakegen. Hem i talem long olgeta se i nogud we oli stap hadwok blong kasem kakae ya we i blong wan dei nomo. Be oli mas hadwok blong kasem kakae ya we i save stap longtaem, we i blong laef ya we i no save finis. Nao olgeta oli askem long hem se: “?Mifala i mas mekem olsem wanem, blong mekem ol wok we God i wantem?”

Nao Jisas i talemaot nambawan wok long olgeta, i se: “Yufala i mas bilif long mi ya, we God i sanem mi. Hemia nao wok ya we God i wantem.”

Nating we Jisas i mekem plante merikel finis, be ol man ya oli no soemaot bilif long hem. Nating we olgeta oli luk ol merikel we hem i bin mekem, be oli askem long hem se: “?Be bambae yu yu mekem wanem saen, blong mifala i luk, nao mifala i save bilif long yu? ?Bambae yu yu mekem wanem wok? Taem ol bubu ya blong yumi bifo oli stap long drae ples, oli stap kakae samting ya mana. Hemia i olsem we Baebol i talem, i se ‘Hem i givim bred ya we i kamaot long heven, blong olgeta oli kakae.’ ”

Taem olgeta oli askem Jisas blong givim wan saen long olgeta, Jisas i talem stret long olgeta hu i stampa blong ol merikel, i se: “Tru mi talem long yufala, hemia i no Moses ya we i givim bred ya we i kamaot long heven blong yufala i kakae. Papa blong mi yes. Naoia hem i givim prapa kakae we i kamaot long heven blong yufala i kakae. From we bred ya we God i givim, hemia bred we i aot long heven, i kamdaon long wol, mo i save givim laef long ol man long wol.”

Olgeta oli askem long hem se: “Masta, plis, i gud yu givim bred ya oltaem long mifala.”

Nao Jisas i talem long olgeta, i se: “Bred blong laef, mi ya. Man we i kam long mi, hem bambae i no save hanggri bakegen. Man we i bilif long mi, hem bambae i no save tosta bakegen. Be mi mi talem long yufala finis, se ‘Yufala i luk mi finis, be yufala i no bilif long mi yet.’ Olgeta man we Papa blong mi i givim long mi bambae oli save kam long mi. Mo man we i kam long mi, bambae mi mi no save ronem hem blong i goaot bakegen, from we mi mi no kamaot long heven blong mekem ol samting we mi nomo mi wantem. Mi kam blong mekem ol samting we hemia we i sanem mi, hem i wantem. Nao hemia we i sanem mi, hem i wantem we bambae mi mi no lusum wan man long olgeta ya we hem i givim long mi. Hem i wantem we bambae long Lasdei, mi mi mekem olgeta ya oli laef bakegen long ded. Yes, Papa blong mi i wantem we olgeta we oli luk mi mo oli bilif long mi, mi Pikinini blong hem, bambae oli gat laef we i no save finis.”

Nao ol man Isrel oli stat toktok agens long hem, from we hem i talem se: “Bred we i aot long heven, i kamdaon long wol, mi ya.” Olgeta oli tingbaot Jisas olsem pikinini blong Josef mo Meri nomo. Oli gat sem tingting olsem ol man ples blong Jisas long Nasaret. Taswe oli tok olsem se: “?Olsem wanem ya? Man ya Jisas ya, pikinini blong Josef. Yumi save papa mo mama blong hem finis. ?Weswe hem i stap talem se ‘Mi mi kamaot long heven, mi kamdaon long wol’?”

Nao Jisas i ansa long olgeta i se: “I nogud yufala i stap toktok long yufala olsem, from mi. I no gat man i save kam long mi, sipos Papa blong mi we i sanem mi, hem i no pulum hem i kam. Be man we hem i pulum i kam long mi, mi bambae mi mekem i laef bakegen long ded long Lasdei. Ol profet bifo oli bin raetem tok se ‘God ya [Jeova] bambae i tijim olgeta.’ Man we i harem tok blong Papa blong mi mo i lan long hem, hemia man we i save kam long mi. Tok ya i no min se i gat man we i luk Papa blong mi, no gat. Mi ya we mi kamaot long God, mi nomo mi luk Papa blong mi. Tru mi talem long yufala, olgeta man we oli bilif long mi, oli gat laef ya we i no save finis.”

Nao Jisas i talem bakegen long olgeta se: “Bred ya blong laef, mi ya. Ol bubu ya blong yufala bifo oli stap kakae mana ya long drae ples, be oli ded finis. Be bred ya we i aot long heven i kamdaon long wol, hemia i narafala. Man we i kakae bred ya bambae hem i no save ded. Bred ya we i laef, we i aot long heven i kamdaon long wol, mi ya. Man we i kakae bred ya, hem bambae i laef gogo i no save finis.” Yes, man we i soemaot se hem i bilif long Jisas, we God i sanem hem, hem i save gat laef we i no save finis. !Mana mo ol narakaen bred oli no save givim samting ya!

Hemia nao toktok blong Jisas wetem ol man taem oli faenem hem kolosap long Kapaneam. Be store long saed blong bred ya we i kamaot long heven i no finis long ples ya. Biaen, taem Jisas i stap tij long haos prea long Kapaneam, hem i storeyan bakegen long samting ya. Jon 6:25-51, 59; Ol Sam 78:24; Aesea 54:13; Matyu 13:55-57.

▪ ?Wanem i kamaot bifo we Jisas i storeyan long ol man long saed blong bred we i kamaot long heven?

▪ ?Taem yumi tingbaot ol samting we Jisas i jes mekem, from wanem i no stret we oli askem hem blong givim wan saen long olgeta?

▪ ?From wanem ol man Isrel oli toktok agens long Jisas taem hem i talem se hem i prapa bred we i kamaot long heven?

▪ ?Taem oli stap storebaot bred we i kamaot long heven, oli stap weples?