Japta 69
?Hu i Papa Blong Olgeta?
TAEM lafet ya i stap gohed, Jisas i storeyan plante taem wetem ol lida blong ol man Isrel. Be evritaem tok blong olgeta i stap kam moa strong. Nao hem i talem long olgeta se: “Mi save finis we yufala i kamaot long laen blong Ebraham. Be yufala i stap lukaot rod blong kilim mi mi ded, from we yufala i no wantem harem tok blong mi. Mi mi stap tokbaot ol samting we mi luk long Papa blong mi, be yufala i stap mekem ol samting we yufala i harem long papa blong yufala.”
Jisas i no talemaot long olgeta se papa blong olgeta i hu. Be Jisas i talem klia long olgeta se papa blong hem i narafala long papa blong olgeta. Ol lida blong ol man Isrel oli no save tingting blong Jisas, nao oli ansa long hem, se: “Be papa ya blong mifala, we mifala i kamaot long hem fastaem, hemia Ebraham ya.” Oli ting se bilif blong olgeta i strong olsem bilif blong Ebraham bifo, we Baebol i talem se hem i fren blong God.
Nao Jisas i talem wan samting long olgeta we oli sek from, i se: “Sipos yufala i prapa laen blong Ebraham, bambae yufala i save mekem ol wok olsem we Ebraham i mekem bifo.” Tru ya, wan prapa pikinini i mas folem fasin blong papa blong hem. Nao Jisas i gohed moa, i se: “Mi mi stap talemaot ol trutok ya nomo long yufala, we mi harem long God. Be yufala i wantem kilim mi mi ded. ?Yufala i ting se hemia i fasin blong Ebraham?” Nao Jisas i talem bakegen long olgeta se: “!Yufala i stap folem fasin blong papa blong yufala nomo!”
Olgeta oli no kasem save long ol tok blong Jisas yet, se papa blong olgeta hem i hu. Oli holemtaet tingting ya se oli prapa laen blong Ebraham. Nao oli se: “!Man! Mifala ya i no pikinini blong rod ya.” Oli bilif se oli stap wosip tru olsem Ebraham bifo, taswe oli talem se: “Mifala i gat wan Papa nomo. !Hemia God ya!”
?Be God hem i papa blong olgeta tru? Jisas i talem long olgeta, i se: “Sipos God i papa blong yufala tru, bambae yufala i save laekem mi, from we mi mi aot long hem, mi kam long ples ya. Be hem i no papa blong yufala nating. Mi mi no kam long ples ya from we mi mi wantem olsem, be from we hem i sanem mi. ?Yufala i wantem save, from wanem yufala i no save kasem mining blong tok ya we mi stap talem?”
Jisas i talem ol tok ya blong traem soemaot long ol lida ya ol frut blong fasin blong no laekem Jisas. Be nao hem i talem stret long olgeta, i se: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting ya we hem i wantem.” ?Wanem fasin blong papa blong olgeta, Setan? Jisas i talem se hem i man blong kilim man. Mo tu hem i talem se: “Hem i man blong gyaman, we i stampa blong ol gyaman toktok.” Nao Jisas i ademap ol tok blong hem, i se: “Man we i kamaot long God, hem i save harem ol tok blong God. Be yufala i no kamaot long God, taswe yufala i no save harem ol tok ya.”
Ol lida blong ol man Isrel oli kros tumas from we Jisas i tok agens long olgeta, nao oli talem long hem se: “?Man, mifala i makem yu stret, a? Yu yu wan man Sameria, mo devel i stap long yu finis.” Ol man Jyu oli no laekem nating ol man Sameria. Taswe oli yusum tok ya “man Sameria,” from we oli no gat respek long Jisas nating, oli wantem spolem nem blong hem nomo.
Jisas i no ansa long tok blong olgeta taem oli talem se hem i wan man Sameria, be hem i ansa long narafala tok blong olgeta, i se: “Mi mi no gat devel i stap long mi, no gat. Mi mi stap leftemap nem blong Papa blong mi, mo yufala i wantem spolem nem blong mi.” Nao Jisas i talem wan promes we i save mekem ol man oli sapraes, i se: “Man we i holem ol tok blong mi, hem bambae i no save ded samtaem.” Jisas i no minim se olgeta we oli stap folem hem oli no save kam olfala mo bodi blong olgeta i no save kam slak gogo oli ded. No gat. Hem i stap tokbaot “seken ded,” hemia ded blong olwe, we man i no save girap long ded bakegen samtaem.
Be ol man Jyu oli no kasem save long bigfala mining blong tok blong Jisas. Oli ting se Jisas i stap tokbaot ded nomo. Ale oli talem se: “Naoia mifala i save we wan devel i stap long yu. Ebraham ya bifo, hem i ded finis. Mo ol profet ya blong bifo tu oli ded finis. Be yu yu talem se ‘man we i holem ol tok blong mi, hem bambae i no save ded samtaem.’ ?Olsem wanem? ?Yu yu hae moa long bubu ya blong mifala, Ebraham ya we i ded finis? Ol profet ya blong bifo tu oli ded. ?Yu yu ting se yu wanem?”
From ol tok blong Jisas, i klia we hem i wantem soeamot long ol man ya se hem i Mesaea we ol profet bifo oli tokbaot. Be hem i no talem stret long olgeta se hem i Mesaea. Hem i yusum narafala rod, i se: “Sipos mi nomo mi stap traem leftemap nem blong mi, hemia i no save leftemap nem blong mi nating. Be Papa blong mi, we yufala i stap tokbaot se: ‘Hemia i God blong mifala,’ hem i stap leftemap nem blong mi. Yufala i no save hem, be mi mi save hem finis. Sipos mi mi talem se ‘Mi no save hem,’ hemia bambae i mekem mi mi man blong gyaman, stret olsem yufala.”
Jisas i gohed, i tokbaot Ebraham bakegen mo strong bilif blong hem, i se: “Taem bubu ya blong yufala Ebraham i harem nyus ya se bambae hem i save luk taem blong mi, hem i harem gud tumas. Mo taem hem i luk taem blong mi, hem i glad we i glad.” Yes, long bilif blong hem, i olsem we Ebraham i luk finis taem we bambae Mesaea i kam. Be ol man Jyu ya oli no bilif long tok blong Jisas, oli se: “!Man, yu yu no gat fefte yia blong yu yet! ?Olsem wanem yu yu luk Ebraham?”
Jisas i ansa se: “Tru mi talem long yufala, taem we Ebraham ya i no bon yet, be mi ya mi stap.” Jisas i stap tokbaot laef blong hem bifo we hem i kam long wol, taem hem i stap laef olsem wan speret man long heven.
Ol man Jyu ya oli kros tumas from we Jisas i talem se hem i laef fastaem long Ebraham. Nao wantaem nomo, olgeta ya oli tekem ol ston blong oli stonem hem. Be Jisas i haed, i wokbaot i goaot long haos blong God. Jon 8:37-59; Revelesen 3:14; 21:8.
▪ ?Olsem wanem Jisas i soemaot long ol enemi blong hem se Papa blong hem i narafala long papa blong olgeta?
▪ ?From wanem ol lida blong ol man Jyu oli singaot Jisas se hem i wan man Sameria?
▪ ?Wanem mining blong tok blong Jisas taem hem i talem long olgeta we oli folem hem se: ‘Bambae oli no save ded samtaem’?