Japta 80
Ol Yad Blong Sipsip Mo Man Blong Lukaot Long Sipsip
JISAS i kam long Jerusalem blong mekem wan lafet we oli kolem Lafet blong Dedekesen no ‘Hanuka.’ Lafet ya i makem taem we olgeta oli mekem haos blong God i klin, i tabu blong God bakegen. Samwe long 200 yia bifo, long yia 168 B. K.T., wan man, nem blong hem Antiokas namba 4 Epifan, mo ol ami blong hem, oli kam insaed long Jerusalem. Nao oli tekem Jerusalem i aot long han blong ol man Jyu, oli spolem haos blong God mo olta blong hem. Be tri yia biaen, ol man Jyu oli tekembak taon blong olgeta mo oli mekem haos blong God i klin, i tabu bakegen. Nao, evri yia oli mekem wan lafet blong tingtingbak long taem ya.
Oli mekem lafet blong Dedekesen long manis Kislev namba 25, long kalenda blong ol man Jyu. Long kalenda blong yumi tede, hemia en blong manis Novemba mo stat blong manis Desemba. Ale oli mekem lafet ya samwe long 100 dei bifo long impoten Lafet blong Pasova long 33 K.T. Aposol Jon i talem se hemia “kol taem.”
Nao Jisas i talem wan pija tok long olgeta. Hem i storebaot trifala yad blong ol sipsip mo wok blong hem wan, we hem i olsem gudfala man blong lukaot long sipsip. Ol sipsip we oli stap insaed long faswan yad i minim ol man Jyu long taem bifo, we God i mekem spesel kontrak wetem olgeta. Loa blong Moses i olsem wan fenis we i blokem ol man Jyu, blong no joen long rabis fasin blong ol narafala man we God i no mekem spesel kontrak wetem olgeta. Jisas i eksplenem se: “Tru mi talem long yufala, man we i no pas long doa, i stap klaemap long stonwol blong go insaed long yad blong sipsip, hem i man blong stil mo blong kilim man. Be man we i stap pas long doa, hem i man blong lukaot long ol sipsip ya.”
I gat sam man we oli talem se oli Mesaea no Kraes, be olgeta oli no prapa man blong lukaot long sipsip. Jisas i gohed blong tokbaot prapawan, i talem se: “Man we i stap lukaot long doa, hem i save openem doa long man ya, mo ol sipsip oli save harem voes blong hem. Hem i save singaot ol sipsip blong hem wanwan long nem blong olgeta, nao i save lidim olgeta oli go afsaed. . . . Be oli no save biaen long wan strenja, oli mas ronwe long hem, from we oli no save voes blong ol strenja.”
“Man we i stap lukaot long doa” blong faswan yad blong ol sipsip, hemia Jon Baptaes. Taem Jon i givhan long ol man blong luksave Jisas, i olsem we hem i ‘openem doa’, blong Jisas i save lidim ol sipsip oli go afsaed. Ol sipsip ya, Jisas i save singaot olgeta wanwan long nem blong olgeta. Ale biaen oli go insaed long wan narafala yad blong ol sipsip. Hem i talem olsem: “Tru mi talem long yufala, doa ya blong ol sipsip, mi ya.” Hem i stap tokbaot doa blong seken yad blong ol sipsip. Taem Jisas i mekem nyufala kontrak wetem ol disaepol blong hem, mo biaen hem i sanem tabu speret i go long olgeta long Pentekos, long taem ya oli kam insaed long seken yad blong ol sipsip.
Jisas i eksplenem moa ol wok blong hem, i se: “Doa ya, mi ya. Sipsip we i pas long mi blong go insaed, hem bambae i stap long sef ples. Nao bambae hem i save pas bakegen, i save kam, i save go, i save faenem kakae blong hem. . . . Mi mi kam blong mekem rod blong ol sipsip oli save gat laef, mo blong laef ya blong olgeta i save fulap gud long evri samting. . . . Gudfala man ya blong lukaot long ol sipsip, mi ya. Olsem we Papa blong mi i save mi, mo mi mi save Papa blong mi, oraet, long sem fasin, mi mi save ol sipsip blong mi mo ol sipsip blong mi oli save mi. Mo mi mi save givim laef blong mi blong sevem ol sipsip blong mi.”
I no longtaem, Jisas i bin mekem ol disaepol blong hem oli harem gud, taem hem i talem long olgeta se: “Yufala we i smol kampani blong mi, yufala i no fraet. Papa blong yufala hem i glad tumas blong givim Kingdom blong hem long yufala.” “Smol kampani” ya blong ol sipsip i mas kasem 144,000 man. Olgeta ya nao oli kam insaed long seken yad blong ol sipsip. Be Jisas i storeyan moa, i se: “ Mo mi gat ol narafala sipsip tu blong mi we oli no blong yad ya. Bambae mi mas tekem olgeta ya tu oli kam. Olgeta ya tu bambae oli save harem voes blong mi, nao bambae olgeta sipsip ya evriwan oli kam wan kampani nomo, we i gat wan man nomo blong lukaot long olgeta.”
“Ol narafala sipsip ya” oli “no blong yad ya.” Taswe yumi save se olgeta oli blong wan narafala yad bakegen, namba tri yad. ‘Smol kampani’ blong ol sipsip we oli stap long seken yad bambae oli go long heven blong rul wetem Kraes. Be “ol narafala sipsip” we oli stap long namba tri yad, bambae oli stap laef long paradaes long wol. Nating we ol sipsip ya oli no stap long sem yad, be oli no jelas, mo oli no seraot. Olsem Jisas i talem finis, “olgeta sipsip ya evriwan oli kam wan kampani nomo, we i gat wan man nomo blong lukaot long olgeta.”
Gudfala Man ya blong Lukaot long Sipsip, Jisas Kraes, hem i givim laef blong hem blong sevem olgeta sipsip ya long tufala kampani ya. Hem i talem se: “Mi ya mi save letem laef blong mi, olsem we mi nomo mi wantem. Mi mi gat paoa blong letem laef blong mi, mo mi gat paoa blong tekem laef blong mi bakegen. Hemia, Papa blong mi i talem long mi se mi mas mekem olsem.” Taem ol man Isrel oli harem ol tok ya blong Jisas, oli seraot bakegen.
Plante long olgeta oli stap talem se: “Wan devel i stap long man ya. Hed blong hem i krangke finis. ?Weswe yufala i stap lesin long hem?” Be sam narafala oli stap talem se: “Tok ya i no tok blong man we devel i stap long hem.” Oli stap tingtingbak long merikel we Jisas i mekem tu manis bifo. Wan man, taem hem i bon, ae blong hem i blaen. Nao Jisas i mekem se hem i save luk olgeta samting. Ale, ol man ya oli talem se: “?Yufala i ting se devel i save mekem se ae blong blaenman i kamgud olsem?” Jon 10:1-22; 9:1-7; Luk 12:32, GNB; Revelesen 14:1, 3; 21:3, 4; Ol Sam 37:29.
▪ ?Wanem Lafet blong Dedekesen? ?Oli mekem lafet ya wetaem?
▪ ?Faswan yad blong ol sipsip i minim wanem? ?Hu ya man we i stap lukaot long doa?
▪ ?Olsem wanem man we i stap lukaot long doa i openem doa long man blong lukaot long sipsip? ?Afta, man blong lukaot long sipsip i lidim ol sipsip oli go wea?
▪ ?Ol sipsip we oli stap long seken yad, i minim hu? ?Ol sipsip we oli stap long namba tri yad, i minim hu? ?Olgeta evriwan ya oli mekem hamas kampani?