Gohed Blong “Karem Plante Frut”
1 Jisas i yusum wan pijatok blong talem se hem i olsem prapa rop ya grep, Papa blong hem i olsem man blong lukaot long rop ya, mo ol man blong hem we tabu spirit i makemaot olgeta, oli olsem ol han blong rop ya we oli stap karem frut. Taem Jisas i tokbaot wok blong Jeova, we i olsem man blong lukaot long rop ya, hem i makem gud se i impoten blong ol Kristin oli fas strong long rop blong grep ya. (Jon 15:1-4) Pijatok tok ya i tijim yumi se olgeta we oli gat gudfala fasin fren wetem Jeova oli mas olsem ol han blong “prapa rop ya,” Jisas Kraes, mo oli mas karem plante frut. Yumi mas gohed blong karem plante “frut blong spirit” mo frut blong Kingdom.—Gal. 5:22, 23, NW; Mat. 24:14; 28:19, 20.
2 Ol Frut Blong Spirit: Sipos yumi soemaot ol frut blong tabu spirit long laef blong yumi, hemia i pruvum se yumi stap gohed gud long saed blong spirit. ?Olsem wanem? ?Yu yu stadi mo tingting dip oltaem long Tok blong God blong givhan long yu blong wokem ol frut blong tabu spirit blong God? (Fil. 1:9-11) Yu no mas fraet blong prea from tabu spirit. Tabu spirit ya i save givhan long yu blong wokem ol gudgudfala fasin we oli leftemap nem blong Jeova mo oli givhan long yu blong yu gohed gud long saed blong spirit.—Luk 11:13; Jon 13:35.
3 Mo tu, taem yumi wokem ol frut blong spirit, hemia i givhan long yumi blong wok strong long wok blong prij. Olsem nao, nating se yumi bisi tumas, be lav mo bilif i pulum yumi blong makemaot taem long program blong yumi blong joen oltaem long wok blong prij. Ol gudfala fasin olsem pis, longfala tingting, kaen fasin, kwaet fasin, mo fasin blong bos long tingting i save givhan long yumi taem ol man oli agensem yumi. Glad i save mekem se yumi haremgud long wok blong prij, nating sipos ol man oli no intres.
4 Ol Frut Blong Kingdom: Yumi wantem karem ol frut blong Kingdom tu. Hemia i min se yumi mekem “sakrefaes long [Jeova], we i blong presem hem. Sakrefaes ya i olsem frut blong maot blong yumi we i talemaot nem blong hem long ol man.” (Hib. 13:15, NW ) Yumi mekem olsem taem yumi wok strong blong talemaot gud nius mo yumi holemtaet fasin ya. ?Olsem wanem? ?Yu yu traehad blong kam moagud long wok blong prij blong yu save karem plante moa frut blong Kingdom?
5 Jisas i soem se sam man blong hem we oli fasgud long hem bambae oli karem plante frut, mo sam narafala bambae oli karem smol nomo. (Mat. 13:23) From samting ya, yumi no mas skelem wok blong yumi wetem wok blong ol narafala, be yumi mas givim bes blong yumi long Jeova. (Gal. 6:4) I gud yumi yusum Tok blong God blong skelemgud ol samting long laef blong yumi. Hemia bambae i givhan long yumi blong “karem plante frut,” mo long rod ya bambae yumi gohed blong leftemap nem blong Jeova.—Jon 15:8.