Ol Yangfala Oli Askem . . .

?Olsem Wanem Mi Save Prij Long Ol Fren Blong Mi Long Skul?

“Mi mi stap prij, nao mi sek long wan yangfala we mi save hem. Mi fraet we mi fraet, mi no moa save toktok. Brata we mi prij wetem hem i mas toktok long ples blong mi.”—Alberto.

“Mi save se haos blong wan fren blong mi long skul i stap samples long rod ya. Taswe mi talem long brata blong mi blong toktok long evri haos. Hem i mekem olsem, gogo hem i taed mo i askem long mi blong toktok long nekis haos. Ale, mi kilim doa, mo—ei, no—!hemia fren blong mi ya! !Mi fraet bitim mak!”—James.

PLANTE yangfala oli harem se i “narakaen” blong tokbaot Baebol. Be, ol yangfala we oli trufala Kristin, oli tinghae long nambawan janis we God i givim long olgeta taem hem i talem se oli mas serem bilif blong olgeta wetem ol narafala. Taswe, plante taosen yangfala Witnes blong Jeova oli joen long wok ya blong prij long evri haos. Be sam long olgeta, oli fraet se maet oli mitim wan yangfala we oli skul wetem hem. Sam yia i pas, Jennifer i finis long haeskul, be hem i talem se: “Mi mi stap seksek yet taem mi mitim wan man no woman we mi bin skul wetem hem.”

Sipos yu yu wan yangfala Kristin, maet yu tu yu gat semfala filing. I tru, yumi evriwan i harem nogud taem narafala i no wantem yumi. Taswe, i stret nomo we yu fraet lelebet blong tokbaot bilif blong yu wetem ol fren blong yu long skul.a Be i no nid blong fraet bitim mak. ?Yu yu rimemba stori long Baebol long saed blong “wan man Aramatia, nem blong hem Josef?” Man ya i bilif long ol samting we Jisas i bin tijim long hem. Be Baebol i talem se Josef “i stap haedem samting ya, from we hem i fraet long ol lida blong ol laen blong Isrel.” (Jon 19:38) ?Bambae yu yu glad long wan fren we i wantem haedem se hem i fren blong yu? (Luk 12:8, 9) Taswe, yumi no sapraes we God i wantem ol Kristin blong “talemaot” bilif blong olgeta. (Rom 10:10) Hemia i min se yu mas talemaot long ol yangfala long skul tu.

Josef blong Aramatia i winim fraet blong hem, kasem mak we hem i askem sipos hem i save berem Jisas taem hem i ded. ?Olsem wanem yu yu save winim fraet blong yu?

Wokem Tingting Ya Blong Wantem Prij

Aposol Pol i no sem nating blong serem bilif blong hem wetem ol narafala. Long Rom 1:15, hem i talem se hem i wantem tumas blong talemaot tok blong Baebol long ol narafala. ?Wanem samting i mekem se hem i wantem tumas? Hem i talem long vas 16 se: “Mi mi no sem nating long gud nius ya, from we hem i paoa blong God blong sevem olgeta man we oli bilif long hem.” ?Olsem wanem long yu? ?Yu yu pruvum finis se Tok blong God i tru? (Rom 12:2) ?Yu yu bilif fulwan se tok blong Baebol hem i “paoa blong God blong sevem olgeta man”?

I no naf we yu folem papa mama blong yu i go long ol Kristin miting nomo. Wan yangfala we nem blong hem Deborah i talem se: “I isi nomo blong go long ol miting, from we papa mama blong mi i talem long mi blong go. Be taem ol man oli askem kwestin long mi long saed blong Baebol, mi faenem i had blong talemaot wanem i stap long tingting blong mi.” Wan narafala yangfala, nem blong hem Mi Young, i talem sem samting, i se: “Mifala i mas pruvum long tingting blong mifala se hemia trutok.”

?Wanem i save mekem se yu wantem serem save blong yu long Baebol wetem ol narafala? Yu mas stadi Baebol yu wan. Yangfala ya Sean i talem se: “Taem yu stat blong stadi Baebol yu wan, yu stat blong kasem prapa bilif blong yu long trutok. Yu stadi blong pruvum long yu wan se Baebol i tru.” I tru se i no evriwan we oli laekem blong stadi. Gel ya Shevon i talem se: “Mi mi no laekem blong rid. Taswe, fastaem i had long mi blong ridim Wajtaoa mo Wekap! mo blong ridim Baebol evri dei. Be sloslo, mi lanem blong mekem olsem.”

?Wanem bambae i kamaot sipos yu traehad blong stadi? Aposol Pol i talem se: “Ol man oli stap bilif long God, taem oli harem gud nius ya.” (Rom 10:17) Taem bilif blong yu i stap kam bigwan moa, tingting blong yu bambae i jenis tu. Wan yangfala long Brasil, nem blong hem Elisângela, i talem se: “I wan bigfala ona blong stap olsem wan Kristin. Hem i wan samting we yumi neva mas sem from.” Tru ya, taem bilif blong yu i stap kam strong, bambae yu faenem se yu wantem talemaot bilif ya long ol narafala, mo long ol fren blong yu long skul tu. Pol i talem se: “Mifala . . . i tok, from we mifala i bilif.” (2 Korin 4:13) ?Antap long hemia, sipos yu no wantem givimaot save blong sevem laef blong ol yangfala we yu luk olgeta evri dei, olsem wanem yu save talem se “sipos wan long yufala i lus, be i no fol blong mi”?—Ol Wok 20:26, 27.

Sam yangfala Kristin oli harem se oli no naf blong tokbaot Baebol long ol narafala. Yangfala Joshua i talem se: “Sipos yu no save wanem blong talem, yu no harem gud blong prij.” Bakegen, sipos yu traehad blong kasem moa save blong Baebol, bambae yu gat gudhan moa blong yusum. (2 Timoti 2:15) Long ol kongregesen blong ol Witnes blong Jeova, ol yangfala oli save go luk ol elda mo askem help blong oli kamgud moa long fasin blong tijim narafala. Wan yangfala blong Jemani, nem blong hem Matthias, i talem se: “Mi stat blong harem gud long wok blong prij taem mi lanem blong storian wetem ol man, i no jes seremaot ol buk.”

Laswan samting se, yu save prea long God blong askem hem blong halpem yu blong no fraet taem yu toktok wetem narafala. (Ol Wok 4:29) God i givhan long aposol Pol long saed ya. Tok blong Pol i stap long 1 Tesalonaeka 2:2, i se: “God blong yumi i mekem tingting blong mifala i strong blong kam talemaot gud nius blong hem long yufala, long fes blong plante man we oli agens long tok ya.” Wan buk i talem se yumi save tanem vas ya olsem: “God i tekemaot fraet we i stap long hat blong mifala.” Taswe, i gud yu prea long God blong askem long hem blong tekemaot fraet we i stap long hat blong yu.

Talemaot Se Yu Yu Hu

Blong wok folem prea ya, yu mas mekem tingting blong yu i strong mo tekem aksin. Yangfala Chic blong Inglan i givim advaes ya: “Talemaot long ol fren blong yu long skul se yu yu wan Kristin.” Yu no mas ‘haedem se yu yu disaepol blong Kraes.’ Wan yangfala we nem blong hem Rebecca i talem se fastaem hem i fraet tumas long wok blong prij, from we hem i ting se maet bambae hem i mitim wan fren blong hem. Be hem i luk se “sipos yu talem long olgeta se yu yu wan Kristin mo se yu stap go storian long ol man long olgeta haos, maet samfala oli askem se: ‘?Bambae yu kam long haos blong mi samtaem?’ ”

Yu no nid blong wet kasem taem we yu sek long wan fren blong yu long wok blong prij. Lukaot ol janis blong serem bilif blong yu wetem olgeta long skul. Tingbaot ol kwestin we aposol Pol i bin askem: “?Sipos man i no go talemaot nius blong God, bambae ol man oli save harem nius ya olsem wanem? ?Mo sipos ol man oli no harem nius ya, bambae oli save bilif long hem olsem wanem?” (Rom 10:14) Yu yu gat wan nambawan janis blong halpem ol yangfala long skul blong harem nius ya. Gel ya Iraida, i talem se: “Long skul, mifala i gat wan teritori we mifala nomo i save wok long hem.” Taswe, plante yangfala oli yusum evri janis we oli gat blong prij long ol yangfala long skul.

Sam yangfala oli bin gat janis blong serem trutok blong Baebol wetem ful klas long skul. Gel ya Jaimie long Inglan i storian se: “Mifala i stap tokbaot evolusenb long klas, mo mi mi talemaot bilif blong mi. Nao wan boe i girap i laf long mi, mo i talem se ol Witnes blong Jeova oli no gat hed, mo i no stret we oli gat janis blong skul. Be wantaem nomo, ol narafala yangfala long klas oli agensem hem mo oli tekem saed blong mi.” I klia se samting ya i kamaot from we olgeta ya oli bin luk gudfala Kristin fasin blong gel ya. Jaimie i gohed se: “Frut we i kamaot se, mi gat janis blong givim buk ya Is There a Creator Who Cares About You? long wan yangfala long klas.”c

Wan gel blong Romania we i gat 14 yia, nem blong hem Roxana, i talem wan stori we i klosap sem mak, i se: “Tija blong mifala i talem se bambae klas i tokbaot strong dring, sigaret, mo ol drag. Ale mi karem Wekap! blong Maj 22, 2000 (Franis mo Inglis) i go long skul. Magasin ya i tokbaot ‘?Olsem Wanem Blong Lego Fasin blong Smok?’ Wan gel long klas i luk magasin ya, i karem, mo i no wantem givimbak. Gel ya i ridim fulwan, nao hem i talem long mi se hem i gat strong tingting blong lego ol sigaret.”

Maet i no oltaem we ol yangfala oli glad olsem. Be Prija 11:6 i givim advaes ya se: “Yu mas planem ol kakae long garen blong yu long moning, mo long sapa tu, from we yu no save weswan bambae oli gru gud.” Nating sipos i no gat frut i kamaot long skul, be taem yu storian long bilif blong yu wetem ol narafala yangfala, yu mekem rod blong storian bakegen wetem olgeta sipos yu mitim olgeta long wok blong prij. Wan yangfala blong Inglan, nem blong hem Jessica, i talem se: “Mi faenem se i moa isi blong prij long ol yangfala blong skul from we mi save olgeta finis.” Maet yu yu sapraes we sam fren blong yu long skul bambae oli wantem save plante moa samting long saed blong bilif blong yu.

I tru se i no evri yangfala we bambae oli lesin long yu. Be Jisas i givim gudfala advaes ya se: “Sipos sam man oli no wantem tekem yufala i go long haos blong olgeta, no oli no save lesin long tok blong yufala, taem yufala i aot long haos blong olgeta . . . yufala i mas ravemaot graon long leg blong yufala.” (Matiu 10:14) Tok ya i soem se, yu no mas ting se oli agensem yu stret. Livim olgeta, mo traem faenem wan narafala we hem i glad blong lesin. Samtaem bambae yu faenem samfala we oli hanggri from trutok mo oli wantem lesin. ?Bambae yu harem gud sipos wan long olgeta ya hemia wan fren blong yu long skul? Yes, long taem ya, bambae yu glad se yu bin winim fraet we yu gat blong serem bilif blong yu wetem ol fren blong yu long skul.

[Futnot]

[Tok blong makem poen long pej 20]

“Taem yu stat blong stadi Baebol yu wan, yu stat blong kasem prapa bilif blong yu long trutok.”—Sean.

[Tok blong pija long pej 18]

Yu no mas fraet blong talemaot se yu yu wan Kristin

[Tok blong pija long pej 18]

Plante taem long klas ol yangfala oli gat janis blong serem trutok blong Baebol wetem ol narafala