6. ?Wanem tok we i kamaot tri taem long buk blong Ol Wok, mo tok ya i minim wanem?

⁶ Blong luk olsem wanem Ol Wok 1:8 i kamtru, i gud blong faenem mining blong tok ya “tok blong God i stap goraon moa.” Tok ya i kamaot tri taem nomo long Baebol, mo yumi faenem long buk blong Ol Wok nomo. I gat smol samting nomo i jenis long trifala vas we tok ya i kamaot long hem. (Ol Wok 6:7; 12;24; 19:20) Long trifala vas ya, “tok blong God,” i minim gud nius​—hemia strongfala mesej blong trutok we i kamaot long God. Hem i wan mesej we i laef mo i gat paoa blong jenisim laef blong olgeta we oli wantem harem.​—Hibrus 4:12.

7. ?Folem Ol Wok 6:​7, from wanem tok blong God i goaot moa, mo wanem i hapen long dei blong Pentekos 33 K.T.?

⁷ Faswan vas we i soemaot se tok blong God i stap goaot moa, hemia Ol Wok 6:7. Vas ya i talem se: “Nao oltaem, tok blong God i stap goaot moa long ol man. Mo grup blong ol man we oli bilif long Jisas i stap kam bigwan moa long Jerusalem. Mo plante pris tu oli bilif long Jisas.” Vas ya i soem se tok blong God i stap goaot moa from we namba blong ol disaepol i stap kam antap bigwan. Long Pentekos 33 K.T.a tabu spirit blong God i bin kamdaon long samwe 120 disaepol we oli hivap wanples long wan rum antap. Nao aposol Pita i givim wan tok we i rili kasem hat blong olgeta we oli stap lesin, ale long semfala dei ya, samwe long 3,000 man bakegen oli kam Kristin. I sua se samting ya i mas mekem plante toktok i goraon. !Traem tingbaot! !Plante taosen man long Jerusalem oli stap wokbaot i go long ol ples we i gat wota long hem blong tekem baptaes long nem blong Jisas ya we, 50 dei bifo, ol man Jiu oli kilim hem i ded olsem wan man blong brekem loa!​—Ol Wok 2:41.

8. ?Olsem wanem namba blong ol disaepol i kam antap bigwan long ol yia afta long Pentekos 33 K.T.?

⁸ !Be hemia i stat nomo blong stori ya! Ol lida blong skul blong ol man Jiu oli traem bakegen mo bakegen blong stopem wok blong prij, be oli no win. Ol lida ya oli kros tumas from we, “evri dei, Hae God i stap sevem ol man, i stap joenem olgeta long grup ya blong ol aposol.” (Ol Wok 2:47) Smoltaem biaen, “namba blong ol man nomo we oli bilif, klosap i kasem faef taosen man.” Mo “oltaem, Hae God i stap joenem plante man mo woman moa we oli stap bilif long Jisas long grup blong olgeta.” (Ol Wok 4:4; 5:14) Long wan narafala taem biaen, yumi ridim se: ‘Long taem ya, ol man blong jos olbaot long evri ples long Judia, mo long Galili, mo long Sameria oli stap gud we i no moa gat man i spolem olgeta. Mo tabu spirit i stap givhan long olgeta, i stap mekem olgeta oli strong moa, mo i stap mekem namba blong olgeta i kam antap moa. Mo olgeta oli stap ona gud long Masta blong yumi.’ (Ol Wok 9:31) Sam yia biaen long taem ya, maet raonabaot long yia 58 K.T., yumi ridim se “i gat plante taosen man we oli . . . bilif long Jisas.” (Ol Wok 21:20) Long taem ya, plante Hiten man tu oli bilif.

9. ?Yu save tokbaot laef blong ol faswan Kristin se i olsem wanem?

⁹ Namba blong ol disaepol i gru bigwan from we plante moa man oli stap kam Kristin. Skul ya i jes stat nomo, be hem i gat bigfala paoa. Ol disaepol ya oli no olsem ol memba blong jos we oli sidaon mo lesin nomo, nogat. Oli givim ful laef blong olgeta blong mekem wanem we Jeova mo Tok blong hem i talem. Sam long olgeta ya oli bin lanem trutok long ol Kristin we oli fesem bigfala trabol long laef blong olgeta. (Ol Wok 16:​23, 26-33) Ol man we oli joen long Kristin Skul, oli tingting gud mo skelem gud ol samting bifo we oli joenem skul ya. (Rom 12:1) Oli kasem tijing blong wokbaot long rod blong God. Trutok i stap long tingting mo hat blong olgeta. (Hibrus 8:​10, 11) Oli rere blong ded from bilif blong olgeta.​—Ol Wok 7:​51-60.

10. ?Wanem wok we ol faswan Kristin oli agri blong mekem, mo olsem wanem samting ya i sem mak tede?

¹⁰ Ol man we oli bilif long ol Kristin tijing, oli luksave se naoia oli mas go talemaot trutok long ol narafala. Hemia wan narafala samting we i mekem se namba blong ol disaepol i gohed blong gru moa. Wan man we i stadi dip long Baebol i talem se: “Wok blong talemaot bilif, hem i no wan wok blong olgeta ya nomo we oli strong long bilif no ol man we narafala i putumap olgeta long wok ya. Nogat. Wok blong prij i wan spesel blesing we evri memba blong Jos i kasem. . . . Olgeta Kristin oli rere blong serem bilif blong olgeta wetem plante moa man. Samting ya i mekem se Kristin Skul i gat bigfala paoa long stat blong hem.” Man ya i gohed se: “Wok blong prij, hem i olsem wan paoa we i givim laef long ol faswan Kristin.” Samting ya i sem mak long ol trufala Kristin tede.