Haremgud Long Hop Ya We Yumi Gat
JOE i sik bigwan wetem kansa. Woman blong hem, Kirsten, wetem sam fren, oli stap sidaon klosap long bed blong hem, oli stap storian wetem hem. Kirsten i lukluk man blong hem mo i luk we wota blong ae blong hem i stap ron. Kirsten i ting se Joe i stap harem i soa long bodi blong hem. Maet i tru se bodi blong Joe i soa, be Joe i talem long woman blong hem se i no hemia we i mekem hem i krae.
Kirsten i talem se: “Long hadtaem ya, Joe i stap wetem ol gudfala fren blong hem we oli kam luk hem. Mo tu, hem i moa sua bitim ol narafala taem long laef blong hem se nambawan hop we hem i gat bambae i kamtru long hem. Mo hem i save se i no gat wan man we i save tekemaot hop ya. Hem i talem long woman blong hem se wota blong ae blong hem i stap ron from we hem i glad. Long semfala naet ya, Joe i lus.”
?Wanem hop i givim paoa long Joe taem sik i stap spolem bodi blong hem? Hemia promes blong Jeova God se yumi save gat nambawan bodi mo kasem laef we i no save finis long paradaes long wol ya. (Ol Sam 37:10, 11, 29) Revelesen 21:3, 4 i talem se: “God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo [hemia ol problem long laef tede] oli lus olgeta.”
Ol Dedman Tu Oli Gat Hop
Hop ya bambae i kamtru long Joe taem hem i laef bakegen long ded. Yes, hem i haremgud long promes blong Jisas se ‘ol man long ol gref ya we oli olsem memori’—hemia ol dedman we God i stap tingbaot olgeta—bambae oli girap bakegen, olsem we oli wekap long slip. (Jon 5:28, 29, NW ) ?Olsem wanem? ?Yu yu stap harem nogud from we yu jes lusum wan famle no fren blong yu? Sipos yes, hop ya blong laef bakegen i save leftemap tingting blong yu. I tru, hop ya i no tekemaot filing ya blong harem nogud taem wan famle no fren i ded. Jisas tu “i krae” taem fren blong hem Lasaros i lus. Be hop we yumi gat i mekem se yumi no harem nogud bitim mak.—Jon 11:14, 34, 35; 1 Tesalonaeka 4:13.
Kirsten i talem se: “Taem Joe i ded wetem kansa, mi ting se neva bambae mi save glad bakegen. Naoia sam yia biaen, mi mi luksave se laef blong mi i no save kam olsem fastaem bakegen. Taem Joe i ded, samting ya i livim wan emti ples long laef blong mi we i no gat narafala man i save fulumap. Nating se i olsem, mi save talem tru se mi gat pis long tingting blong mi mo mi haremgud.”
Ol tok ya blong Kirsten i mekem yumi luksave se long wol ya we yumi laef long hem, yumi no save glad evri minit blong evri dei. I gat ol gudtaem mo i gat plante nogud taem tu long laef blong yumi naoia. Mo tu, i gat sam taem we i stret blong harem nogud. Long ol taem olsem, i no stret blong hapi mo blong laf. (Prija 3:1, 4; 7:2-4) Antap long samting ya, samfala oli mas faet agensem tingting we i stap foldaon from plante risen. Nating se i olsem, ol promes blong Baebol oli mekem yumi haremgud, mo nambawan waes we yumi faenem long Baebol i halpem yumi blong blokem plante trabol we i save spolem glad. God i talem se: “Man we i stap lesin long mi, bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.”—Ol Proveb 1:33.
Yes, Jeova i wantem se yumi gat wan gudfala laef. Hem i wantem se yumi glad—i no long fes blong yumi nomo, be dip insaed long hat blong yumi tu. !Mo hem i wantem samting ya blong olwe, i no blong sam yia nomo! Taswe, tok we Pikinini blong God i talem bifo, i stret yet long yumi tede: “Olgeta we oli luksave se oli nidim ol samting long saed blong spirit, oli save glad.” (Matiu 5:3, NW ) Yumi waes sipos yumi mekem samting we tok ya i talem, i wok long laef blong yumi.
[Bokis/Foto blong pija long pej 9]
Naen Samting We Yumi Nidim Blong Stap Glad
1. Lanem blong tinghae long ol samting long saed blong spirit.—Matiu 5:3.
2. Haremgud long smol samting we yumi gat, mo blokem “fasin blong laekem mane tumas.”—1 Timoti 6:6-10.
3. Putum pleplei long seken ples long laef blong yumi.—2 Timoti 3:1, 4.
4. Givim presen long narafala, mo traehad blong mekem narafala i glad.—Ol Wok 20:35.
5. Talem tangkiu, mo luksave ol blesing we yumi kasem.—Kolosi 3:15.
6. Fogivim narafala.—Matiu 6:14.
7. Jusumgud ol fren.—Ol Proveb 13:20.
8. Lukaotgud long bodi blong yumi, mo sakemaot ol nogud fasin.—2 Korin 7:1.
9. ‘Haremgud long hop’ we Baebol i givim.—Rom 12:12.
[Tok blong pija long pej 9]
Hop we Baebol i givim se yumi save laef long niufala wol i mekem yumi haremgud tumas