Japta 131

Ol Laswan Taem We Jisas i Soemaot Hem, Mo Pentekos Long 33 K.T.

JISAS i mekem plan finis wetem ol leven aposol blong hem, blong oli mitim hem long wan bigfala hil long Galili. I luk olsem we oli singaot sam narafala disaepol tu, from we i gat moa long 500 man oli hivap long ples ya. !Hemia i glad taem ya! !Jisas i kamtru long olgeta, nao hem i stat tijim olgeta!

Jisas i tijim bigfala grup ya blong ol man long plante samting. Mo hem i eksplenem long olgeta se God i givim long hem olgeta paoa long heven mo long wol. Nao hem i talem long olgeta se: “From samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala.”

!Tingbaot! Ol man, ol woman, mo ol pikinini tu, Jisas i singaot olgeta evriwan blong oli joen long wok blong mekem ol man oli kam disaepol. Bambae i mas gat sam man we oli traem blokem olgeta long wok blong prij mo blong tijim ol man. Be Jisas i leftemap tingting blong olgeta i se: “Mo yufala i mas save, bambae mi mi stap wetem yufala oltaem, gogo [olfala fasin blong] wol ya i finis.” From tabu speret, bambae Jisas i save stap wetem ol man blong hem, blong givhan long olgeta blong mekem minista wok blong olgeta.

Biaen we Jisas i laef bakegen long ded, hem i stap soemaot hem long ol disaepol blong hem gogo 40 dei i pas. Taem hem i kamtru long olgeta hem i stap tijim olgeta long saed blong Kingdom blong God. Mo hem i makem long tingting blong olgeta wanem wok we ol disaepol blong hem oli mas mekem. Wan taem, hem i kamtru long brata blong hem Jemes. Bifo, Jemes i no bilif long Jisas. Ale Jisas i storeyan long hem gogo hem i pulum hem blong bilif we Jisas i trufala Kraes.

Taem ol aposol oli stap yet long Galili, Jisas i talem long olgeta se oli mas gobak long Jerusalem. Taem hem i stap mekem miting wetem olgeta long ples ya, hem i talem se: “Yufala i mas no lego Jerusalem. Yufala i mas wet blong kasem samting ya we Papa blong mi i promes finis blong givim long yufala, olsem we mi mi talem long yufala finis. Bifo, Jon i mekem baptaes long wora, be bambae i no longtaem, God i mekem baptaes long yufala long Tabu Speret.”

Biaen Jisas i mitim ol aposol blong hem bakegen, nao hem i lidim olgeta oli aot long taon ya, oli go long wan ples, nem blong hem Betani. Hem i stap long is saed blong Hil blong ol Oliftri. !Yumi sapraes long olgeta! Nating we Jisas i talem plante samting long olgeta blong soemaot se kolosap nao bambae hem i go antap long heven, be stil, oli ting se bambae hem i stanemap Kingdom blong hem long wol ya nomo. Ale oli askem long hem se: “?Masta, i stret taem nao blong yu stanemap Kingdom long Isrel bakegen?” (NW)

Jisas i no traem stretem rong tingting ya blong olgeta. Hem i talem nomo se: “I no blong yufala i save ol taem ya mo ol dei ya we Papa blong mi nomo i gat raet blong jusumaot.” Nao bakegen, hem i makem long tingting blong olgeta wanem wok we oli mas mekem, i se: “Be taem Tabu Speret i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo i finisim olgeta ples long wol.”

Taem oli stap lukluk hem yet, Jisas i stat go antap. Nao wan klaod i kam kavremap hem, oli no moa luk hem bakegen. Yes, Jisas i lego gyaman bodi blong hem we i luk olsem bodi blong wan man, nao hem i go antap long heven long speret bodi nomo. Taem we ol 11 man ya oli lukluk long skae yet, wantaem nomo tufala man we klos blong tufala i waet, tufala i kam stanap wetem olgeta. Tufala enjel ya we tufala i tekem bodi blong man, i askem se: “!E, ol man Galili! ?Yufala i stap stanap, yufala i stap lukluk go antap long skae olsem blong wanem? Jisas ya we God i tekemaot long yufala blong i go antap long heven, hem bambae i mas kambak bakegen long sem fasin ya we yufala i luk, taem hem i go antap long heven.”

Fasin ya we olgeta i luk, taem Jisas i aot long wol ya, i olsem: Hem i kwaet fasin, i no gat wan bigfala selebresen blong makem taem ya. Mo i no gat plante man i stap, ol trufala man blong hem nomo oli luk hem. Bambae hem i mas kambak long sem fasin: Long kwaet fasin, i no gat bigfala selebresen, mo ol trufala man blong hem nomo bambae oli luksave se hem i kambak finis, mo hem i stap, hem i rul long Kingdom blong hem.

Nao ol aposol oli aot long Hil blong ol Oliftri, oli krosem smol krik ya, Kidron, oli gobak long Jerusalem bakegen. Oli obei long oda we Jisas i givim long olgeta, oli stap nomo long Jerusalem. Ten dei i pas finis, nao oli mekem lafet blong ol man Isrel, nem blong hem Pentekos, long 33 K.T. Samwe long 120 disaepol oli stap wanples, long wan rum antap long wan haos, long Jerusalem. Nao wantaem nomo, i gat wan noes we i olsem wan bigfala win i blu, nao noes ya i kavremap olgeta ples long haos ya. Nao olgeta ya oli luk wan samting we i olsem faea i laet. Faea ya i seraot, nao laet blong hem i kam kasem evri man. Mo olgeta disaepol evriwan, oli stat toktok long ol defren lanwis. !Hemia i paoa blong tabu speret, we Jisas i promes blong givim long olgeta! Matyu 28:16-20; Luk 24:49-52; 1 Korin 15:5-7; Ol Wok 1:3-15; 2:1-4.

▪ ?Long wan hil long Galili, Jisas i talem ol laswan tok blong hem long hu? ?Wanem ol oda we hem i givim long taem ya?

▪ ?Olsem wanem Jisas i leftemap tingting blong ol disaepol blong hem? ?Bambae hem i stap wetem olgeta olsem wanem?

▪ ?Biaen we Jisas i laef bakegen long ded, hem i stap soemaot hem long ol disaepol blong hem gogo hamas dei i pas? ?Mo hem i tijim olgeta long wanem samting?

▪ ?Jisas i kamtru long wanem man, we hem i no wan disaepol bifo we Jisas i ded?

▪ ?Wanem tu laswan miting we Jisas i mekem wetem ol aposol blong hem? ?Mo wanem i kamaot long tufala taem ya?

▪ ?Olsem wanem Jisas bambae i kambak long sem fasin we oli luk, taem hem i go antap long heven?

▪ ?Wanem i kamaot long Pentekos long 33 K.T.?