Jeova i Yusum Tabu Spirit Blong Mekem Stamba Tingting Blong Hem i Kamtru
“Tok blong mi bambae . . . i mekem evri samting we mi mi sanem hem blong i mekem.”—AES. 55:11.
1. Eksplenem olsem wanem wan plan i defren long wan stamba tingting.
TINGBAOT tu man we tufala i wantem go samples long trak blong tufala. Be tingting blong tufala i no sem mak. Wan man i lukluk map, nao i makemaot stret rod we bambae hem i folem. Narawan i save ples we hem i wantem go long hem, be hem i tingbaot plante rod we hem i save folem blong kasem ples ya. Ale, hem i rere blong jenisim rod blong hem sipos i gat wan samting i blokem hem. Eksampol ya i soemaot olsem wanem wan plan i defren long wan stamba tingting. Wan plan i wan rod we man i makemaot blong folem. Wan stamba tingting i wan mak we man i wantem kasem, be i gat plante rod we hem i save folem blong kasem mak ya.
2, 3. (a) ?Wanem stamba tingting blong Jeova? ?Hem i tekem wanem aksen taem Adam mo Iv tufala i mekem sin? (b) ?From wanem yumi mas mekem laef blong yumi i laenap oltaem wetem stamba tingting blong Jeova?
2 Jeova i no makemaot wan rod nomo blong mekem samting we hem i wantem i kamtru, olsem man ya we i mekem wan plan. Be hem i gat wan stamba tingting, we sloslo hem i stap mekem i kamtru. (Efes. 3:11) Stamba tingting ya, hemia samting we God i tingbaot fastaem, long saed blong ol man mo wol ya. Hem i wantem we wol ya i kam wan paradaes. Nao ol man we oli stretgud oli save stap long pis long paradaes ya, mo bambae oli glad gogo i no save finis. (Jen. 1:28) Be Adam mo Iv tufala i mekem sin. Taem samting ya i hapen, Jeova i tekem aksen blong mekem se stamba tingting blong hem bambae i kamtru yet. (Ridim Jenesis 3:15.) Hem i talem se woman blong hem bambae i gat wan spesel “pikinini,” we bambae i spolemgud Setan, stamba blong olgeta trabol. Mo bambae Pikinini ya i mekem evri samting we Setan i spolem finis, i kamgud bakegen.—Hib. 2:14; 1 Jon 3:8.
3 I no gat wan samting long heven no long wol we i gat paoa blong blokem stamba tingting ya. Stamba tingting blong God bambae i mas kamtru. (Aes. 46:9-11) ?From wanem i olsem? From we Jeova i stap yusum tabu spirit blong hem. I no gat wan samting we i save winim paoa blong tabu spirit. Spirit ya ‘bambae i mekem olgeta samting’ we God i sanem hem blong mekem. (Aes. 55:10, 11) From samting ya, oltaem yumi mas lukluk gud olsem wanem God i stap mekem stamba tingting blong hem i kamtru, mo yumi mas mekem laef blong yumi i laenap wetem. Stamba tingting blong God i mas kamtru sipos yumi wantem kasem gudfala laef long fiuja. Mo tu, taem yumi luk olsem wanem Jeova i yusum spirit blong hem, samting ya i mekem bilif blong yumi i strong moa. Taswe, i gud yumi tokbaot olsem wanem Jeova i yusum tabu spirit long taem bifo, naoia, mo long fiuja, blong mekem stamba tingting blong hem i kamtru.
Jeova i Yusum Tabu Spirit Long Taem Bifo
4. ?Olsem wanem Jeova i soemaot sloslo, stamba tingting blong hem?
4 Long olgeta yia we ol man oli stap raetem Baebol, sloslo Jeova i soemaot stamba tingting blong hem. Fastaem olgeta, i no gat wan man i save se spesel Pikinini ya we God i promes blong sanem, hem i hu. ‘God i haedem’ samting ya. (1 Kor. 2:7) Afta we tu taosen yia i pas, Jeova i jes tokbaot Pikinini ya bakegen. (Ridim Jenesis 12:7; 22:15-18.) Jeova i mekem wan promes long Ebraham, we i givim plante moa save long saed blong Pikinini ya mo ol blesing we bambae oli kamtru from hem. Taem Jeova i tokbaot “olgeta we bambae oli kamaot biaen” long Ebraham, hem i soemaot klia se Pikinini ya bambae i mas kamaot long laen blong Ebraham. Yumi save se Setan i stap lesingud long save ya we Jeova i givim. Enemi ya i wantem tumas blong spolem laen blong Ebraham, blong mekem se stamba tingting blong God i no save kamtru. Be hem i no save spolem. ?From wanem? From we spirit blong God we man i no save luk, i stap wok. ?Spirit ya i mekem wanem wok?
5, 6. ?Olsem wanem Jeova i yusum spirit blong hem blong lukaot gud long laen ya we spesel Pikinini ya i kamaot long hem?
5 Jeova i yusum spirit blong hem, blong lukaot gud long ol man long laen ya we spesel Pikinini ya i kamaot long hem. Jeova i talem long Ebram (Ebraham) se: “Bambae mi mi stap blokemgud yu, blong i no gat wan samting i save kam spolem yu.” (Jen. 15:1) Hemia i no wan giaman promes. Tingbaot samting we i hapen long yia 1919 B.K.T.a Long taem ya, Ebraham mo Sera tufala i mekem ples blong tufala long Gerara. Abimelek, we i king blong Gerara, i no save se Sera i woman blong Ebraham. Ale king ya i tekem Sera blong bambae i kam woman blong hem. ?Olsem wanem? ?Setan i stap biaen long samting ya? ?Hem i stap traem blong blokem Sera, blong i no karem pikinini blong Ebraham? Baebol i no talem stret. Be Baebol i talem se Jeova i blokem king ya. Long wan drim, hem i givim woning long Abimelek se hem i no mas tajem Sera.—Jen. 20:1-18.
6 I no long taem ya nomo we Jeova i lukaot gud long laen blong Ebraham. Plante taem Jeova i sevem Ebraham mo famle blong hem. (Jen. 12:14-20; 14:13-20; 26:26-29) Long saed blong Ebraham mo ol pikinini blong hem, man blong raetem Sam i talem se: “Hae God i no letem ol man long ol ples ya oli spolem olgeta. Hem i tok long ol king from olgeta, i talem se, ‘!Yufala i lukaot! Yufala i no spolem ol man blong mi we mi mi jusumaot olgeta, mo yufala i no tajem ol profet ya blong mi.’”—Sam 105:14, 15.
7. ?Olsem wanem Jeova i lukaot gud long neson blong Isrel bifo?
7 Jeova i yusum spirit blong hem bakegen blong lukaot gud long neson blong Isrel, we Pikinini ya i mas kamaot long hem. Jeova i yusum spirit blong hem blong givim Loa long ol man Isrel. Taem oli folem Loa ya, trufala wosip i stanap strong, mo oli no mekem wan samting blong spolem fasin fren blong olgeta wetem Jeova. Oli stap klin long ol fasin blong olgeta mo long saed blong bodi tu. (Eks. 31:18; 2 Kor. 3:3) Long taem blong ol Jaj long Isrel, spirit blong Jeova i givim paoa long sam long olgeta blong winim ol enemi blong Isrel. (Jaj. 3:9, 10) Long ol handred yia bifo we Jisas, impoten Pikinini ya long laen blong Ebraham, i bon, tabu spirit i wok blong lukaot gud long Jerusalem, Betlehem, mo haos blong God. Olgeta ples ya oli mas stap gud, from we plante profet tok long saed blong Jisas bambae oli kamtru long ol ples ya.
8. ?Olsem wanem tabu spirit i wok long laef blong Jisas stret, mo long wok blong prij we hem i mekem?
8 Tabu spirit i wok long laef blong Jisas stret, mo long wok blong prij we hem i mekem. Tabu spirit i mekem wan samting i hapen long yangfala gel ya Meri, we i neva hapen bifo long taem ya, mo i no hapen bakegen afta long taem ya. Nating se yangfala gel ya i gat sin, tabu spirit i mekem se hem i gat bel, mo i bonem wan pikinini boe we i no gat sin. Pikinini ya i no save ded from sin. (Luk 1:26-31, 34, 35) Biaen, spirit ya i lukaot gud long bebi Jisas, blong i no gat wan samting i spolem laef blong hem. (Mat. 2:7, 8, 12, 13) Taem Jisas i gat 30 yia blong hem, God i makemaot hem wetem tabu spirit. God i jusumaot hem blong i sidaon long jea blong King Deved, mo i givim wok long hem blong prij. (Luk 1:32, 33; 4:16-21) Tabu spirit i givim paoa long Jisas blong mekem ol merikel. Jisas i tekemaot sik, i givim kakae long plante man, mo i mekem dedman i laef bakegen. Ol bigbigfala wok ya oli soemaot ol blesing we yumi save kasem long fiuja, aninit long rul blong king ya Jisas.
9, 10. (a) ?Long faswan handred yia, tabu spirit i mekem wanem long ol disaepol blong Jisas? (b) ?Long faswan handred yia, Jeova i stanemap wanem niufala samting we i givhan blong mekem stamba tingting blong hem i kamtru?
9 Stat long lafet blong Pentekos long yia 33 K.T., Jeova i yusum spirit blong hem blong makemaot sam narafala man, blong olgeta tu oli kasem blesing ya we hem i promes blong givim long Ebraham. Plante long olgeta oli no prapa laen blong Ebraham. (Rom 8:15-17; Gal. 3:29) Mo long faswan handred yia, tabu spirit i wok long ol disaepol blong Jisas, blong oli prij wetem strong tingting, mo blong oli gat paoa blong mekem merikel. (Wok 1:8; 2:1-4; 1 Kor. 12:7-11) Taem tabu spirit i givim paoa long olgeta blong mekem ol merikel ya, hemia i soemaot wan niufala samting we Jeova i stanemap, we bambae i givhan blong mekem stamba tingting blong hem i kamtru. Jeova i no moa wantem we ol man oli mekem wosip long hem long fasin we oli bin mekem plante handred yia finis, hemia long haos blong hem long Jerusalem. Hem i no moa glad long fasin ya, naoia hem i glad long niufala Kristin kongregesen. Kam kasem tede, Jeova i yusum grup blong ol man ya we tabu spirit i makemaot olgeta, blong givhan long stamba tingting blong hem.
10 Jeova i yusum spirit blong hem blong lukaot gud long ol man blong hem long taem bifo, givim paoa long olgeta, mo makemaot olgeta. Hemia sam rod nomo we hem i yusum spirit blong hem long hem, blong mekem stamba tingting blong hem i kamtru. ?Be olsem wanem long taem blong yumi? ?Olsem wanem Jeova i stap yusum spirit blong hem naoia blong mekem stamba tingting blong hem i kamtru? Yumi mas save ansa blong kwestin ya, from we yumi wantem se spirit ya i lidim yumi. Taswe, bambae yumi tokbaot fo wok we tabu spirit blong Jeova i stap mekem naoia.
Jeova i Yusum Tabu Spirit Tede
11. ?Wanem i soemaot se tabu spirit i stap givhan long ol man blong God blong oli stap klin long fes blong hem? ?Olsem wanem yu save soemaot se spirit ya i stap lidim yu?
11 Faswan wok we tabu spirit i mekem tede, se hem i givhan long ol man blong God blong oli stap klin long fes blong hem. Ol man we oli mekem wok blong Jeova folem stamba tingting blong hem, oli mas klin long ol fasin blong olgeta. (Ridim 1 Korin 6:9-11.) Sam man we oli bin mekem ol rabis fasin olsem slip olbaot, stilim woman blong narafala man, mo slip wetem man bakegen, oli jenisim fasin blong olgeta mo oli kam ol trufala Kristin. I no isi blong kilimaot ol rabis tingting we oli pulum man blong mekem ol nogud fasin. (Jem. 1:14, 15) Be ol man ya, ‘God i wasemaot ol sin blong olgeta blong mekem olgeta oli klin.’ Tok ya i soemaot se ol man ya oli jenisim fasin blong olgeta, blong oli kam ol man we God i glad long olgeta. ?Be wanem i givhan long man we i lavem God, blong i blokem ol tingting we oli save lidim hem blong mekem nogud fasin? Fas Korin 6:11 i talem se, ‘spirit blong God’ i save mekem hem i naf blong blokem ol samting ya. Taem yu yu stap klin long ol fasin blong yu, yu soemaot se spirit ya i stap lidim yu.
12. (a) ?Vison blong Esikel i soemaot se Jeova i yusum wanem blong lidim ogenaesesen blong hem? (b) ?Olsem wanem yu yu soemaot se tabu spirit i stap lidim yu?
12 Seken wok we tabu spirit i mekem tede, se hem i lidim ogenaesesen blong Jeova long rod we Hem i wantem. Esikel i luk wan vison blong wan kat we i stap ron i go blong mekem stamba tingting blong Jeova i kamtru. Kat ya i pija blong ogenaesesen blong Jeova long heven. ?Wanem i givim paoa long kat ya blong ron i go long rod we Jeova i wantem? Hemia tabu spirit. (Esik. 1:20, 21) Yumi no mas fogetem se ogenaesesen blong Jeova i gat tu haf blong hem, wan haf we i stap long heven mo narafala haf we i stap long wol ya. Sipos tabu spirit i lidim ogenaesesen ya long heven, hem i mas lidim long wol tu. Sipos yu obei mo stap tru long ogenaesesen blong God long wol ya, yu yu soemaot se yu stap biaen long kat blong Jeova long heven, mo yu stap letem spirit blong hem i lidim yu.—Hib. 13:17.
13, 14. (a) ?Hu ya “ol man we oli stap laef naoia” we Jisas i tokbaot? (b) Tokbaot wan save we i soemaot se tabu spirit i stap mekem laet blong trutok i saenaot moa. (Lukluk bokis ya “?Yu Yu Stap Kasem Laet Blong Trutok We i Saenaot Moa Naoia?”)
13 Namba tri wok blong tabu spirit tede, se hem i mekem laet blong trutok blong Baebol i saenaot moa. (Prov. 4:18) Longtaem finis i kam, ‘slef we i stret mo waes’ i yusum Wajtaoa olsem nambawan rod blong mekem ol trutok blong Baebol oli kam klia moa. (Mat. 24:45, NW) Tingbaot save we yumi kasem finis long saed blong tok ya blong Jisas, “ol man we oli stap laef naoia.” (Ridim Matiu 24:32-34.) ?Hu ol man ya we Jisas i stap tokbaot? Wan haf blong Wajtaoa, “Kraes i Stap Finis—?Yu Mas Mekem Wanem?” i eksplenem se Jisas i no stap tokbaot ol rabis man. Be hem i stap tokbaot ol disaepol blong hem, we tabu spirit i makemaot olgeta smoltaem afta we hem i talem tok ya.b Long taem blong Jisas mo long taem blong yumi tede, ol man blong Jisas we tabu spirit i makemaot olgeta, oli luk saen ya we Jisas i tokbaot. Mo oli no luk nomo, be oli luksave mining blong saen ya tu, se ‘klosap Jisas i kamtru, olsem we hem i stap nomo long doa blong olgeta.’
14 ?From wanem save ya i impoten long yumi? I tru, yumi no save se i gat hamas yia stret long taem ya we Jisas i tokbaot se, taem blong “ol man we oli stap laef naoia.” Nating se i olsem, i gud yumi traem tingbaot sam samting long saed blong taem ya. Faswan samting se, ol man we oli laef long taem ya oli no gat semfala yia, be oli stap laef long semtaem, olsem wan papa wetem boe blong hem. Mo tu, taem ya i no longfala tumas, mo i gat en blong hem. (Eks. 1:6) Ale, ?wanem mining blong taem ya we Jisas i tokbaot se, taem blong “ol man we oli stap laef naoia”? Yumi kasem save se Jisas i stap tokbaot laef blong ol man we tabu spirit i makemaot olgeta. Sam long olgeta we oli luk saen ya i stat blong kamtru long yia 1914, laef blong olgeta i finis bifo we bigfala trabol i stat. Be samfala we oli bon afta long olgeta, bambae oli luk stat blong bigfala trabol. Taem ya we ol man ya oli laef long hem, i gat wan stat blong hem, mo bambae i gat wan en blong hem. Olgeta haf blong saen ya we oli stap kamtru, oli soemaot se taem blong bigfala trabol i klosap. Yu mas holem strong tingting se taem we i stap yet i sot nomo, mo yu mas lukaot gud oltaem. Sipos yu mekem olsem, yu soemaot se yu stap kasem laet blong trutok we i saenaot moa naoia, mo se tabu spirit i stap lidim yu.—Mak 13:37.
15. ?Olsem wanem yumi save se tabu spirit nao i givim paoa long yumi blong talemaot gud nius?
15 Namba fo wok blong tabu spirit tede, se hem i givim paoa long yumi blong talemaot gud nius. (Wok 1:8) I no gat narafala samting we i save mekem se gud nius i go long olgeta ples blong wol. Traem tingbaot. Fastaem, ating yu bin ting se neva bambae yu go prij long haos blong ol man, from we yu yu sem tumas mo yu fraet. Be naoia yu gat strong tingting blong joen oltaem long wok ya.c Plante gudfala Witnes blong Jeova oli gohed nomo blong prij nating se ol man oli agensem olgeta, mo oli kilim olgeta. Tabu spirit nomo i save givim paoa long yumi blong winim ol trabol olsem, mo blong mekem samting we yumi no naf blong mekem long prapa paoa blong yumi. (Maeka 3:8; Mat. 17:20) Taem yu joen fulwan long wok blong prij, yu soemaot se tabu spirit i stap lidim yu.
Bambae Jeova i Yusum Tabu Spirit Long Fiuja
16. ?From wanem yumi save bilif strong se Jeova bambae i lukaot gud long ol man blong hem long taem blong bigfala trabol?
16 Long fiuja, bambae Jeova i yusum tabu spirit long bigfala fasin, blong mekem stamba tingting blong hem i kamtru. Tingbaot olsem wanem hem i save lukaot gud long ol man blong hem. Yumi luk finis we Jeova i yusum tabu spirit blong lukaot gud long wanwan man blong hem long taem bifo, wetem fulwan neson blong Isrel tu. Taswe, yumi save bilif strong se bambae hem i yusum semfala spirit ya we i gat bigfala paoa, blong lukaot gud long ol man blong hem long taem blong bigfala trabol we i stap kam. Yumi no mas traem talem wanem rod stret we Jeova bambae i yusum blong lukaot gud long olgeta. Be yumi save holem gudfala tingting long saed blong fiuja, from we yumi save se, nomata weples ol man we oli lavem Jeova oli stap long hem, Jeova i save luk olgeta mo i save givim tabu spirit long olgeta.—2 Kron. 16:9; Sam 139:7-12.
17. ?Long niufala wol, bambae Jeova i yusum spirit blong hem olsem wanem?
17 ?Long niufala wol, bambae Jeova i yusum spirit blong hem olsem wanem? Spirit ya nao i paoa we bambae i lidim wok ya blong raetem ol niufala buk we bambae oli openem long niufala wol. (Rev. 20:12) ?Wanem save bambae i stap long ol buk ya? I klia se bambae oli tokbaot evri samting we Jeova i wantem yumi blong mekem long taem ya we Kraes i rul blong wan taosen yia. ?Olsem wanem? ?Yu yu wantem tumas blong stadi gud long ol buk ya? Yumi evriwan i stap wet blong go insaed long niufala wol ya. Tingting blong yumi i no naf blong kasem save long ol bigbigfala blesing we bambae yumi kasem long taem ya. Jeova bambae i yusum spirit blong hem blong mekem stamba tingting blong hem i kamtru long saed blong wol ya mo ol man blong hem.
18. ?Yu yu gat strong tingting blong mekem wanem?
18 Yumi neva mas fogetem se stamba tingting blong Jeova we i stap kamtru sloslo, bambae i kamtru fulwan. Hemia from we hem i stap yusum paoa ya we i bigwan moa i bitim ol narafala paoa long heven mo wol, hemia tabu spirit, blong mekem i kamtru. Yu tu yu stap insaed long stamba tingting ya blong God. Taswe, yu mas gat strong tingting blong prea oltaem long Jeova, blong askem long hem blong i givim tabu spirit long yu. Mo yu mas letem tabu spirit ya i lidim yu long olgeta wok blong yu. (Luk 11:13) Olsem nao, yu tu yu save kasem laef ya long fiuja we Jeova i wantem se olgeta man oli gat, hemia laef we i no save finis long Paradaes long wol.
[Ol futnot]
a B.K.T. i minim Bifo Kristin Taem.
b Lukluk Wajtaoa blong Februari 1, 2008, pej 25-29.
c Wajtaoa blong Septemba 15, 1993, pej 19, i tokbaot wan woman we i winim fasin sem mo i gohed strong blong talemaot gud nius.
?Yu Yu Rimemba?
• ?Long taem bifo, olsem wanem Jeova i yusum spirit blong hem, blong mekem stamba tingting blong hem i kamtru sloslo?
• ?Olsem wanem Jeova i stap yusum spirit blong hem tede?
• ?Long fiuja, olsem wanem Jeova bambae i yusum tabu spirit blong mekem stamba tingting blong hem i kamtru fulwan?
[Bokis blong pija long pej 20]
?Yu Yu Stap Kasem Laet Blong Trutok We i Saenaot Moa Naoia?
Jeova i stap mekem laet blong trutok i saenaot moa long ol man blong hem. ?Wanem sam trutok we oli kam klia moa long ol Wajtaoa?
▪ ?Parabol blong Jisas long saed blong is we i mekem flaoa i solap, i soemaot wanem gudfala samting long saed blong man we i stap kam wan disaepol blong Kraes? (Mat. 13:33)—Julae 1, 2008, pej 29-30.
▪ ?Wetaem Jeova i finisim wok ya blong jusumaot ol Kristin we bambae oli go laef long heven?—Mei 1, 2007, pej 30-31.
▪ ?Wosipim Jeova “long spirit” i minim wanem? (Jon 4:24, NW)—Julae 15, 2002, pej 15.
▪ ?Bigfala kampani i stap mekem wok long wanem haf blong haos blong God? (Rev. 7:15)—Mei 1, 2002, pej 30-31.
▪ ?Wetaem Jisas bambae i seraotem ol sipsip long ol nani? (Mat. 25:31-33)—Oktoba 15, 1995, pej 18-28.