Ol Presen We Papa Blong Yumi i Givim

1. ?Jehova i givim wanem long yumi we i save mekem i gud long yumi?

JEHOVA i laef olwe, mo hem i talem samting we yumi mas mekem blong yumi save laef olwe. Ol samting ya we hem i talem oli no jenis. Baebol i talem se, “tok blong Hae God bambae i stap oltaem, gogo i no save finis.” (1 Pita 1:23-25) Yumi glad tumas se Jehova i givim Baebol long yumi wetem ol impoten save we i stap long hem.

2. ?God i wantem se yumi save wanem?

² Jehova i wantem se yumi evriwan i save nem blong hem. Taem Baebol i tokbaot olsem wanem God i mekem heven mo wol, hem i talem nem blong God. Hemia fas taem we Baebol i talemaot nem ya. (Jen. 2:4)a God i raetem ol Tenkomanmen long ston blong givim long Moses. Long tufala ston ya, God i raetem nem blong hem plante taem. Faswan long ol Tenkomanmen ya i talem se: ‘Mi mi Jehova, mi God blong yufala.’ (Eks. 20:1-17) Setan i no wantem se yumi save God mo nem blong hem. Taswe hem i wantem tumas blong spolem Baebol. Be Jehova i no letem Setan i win.

3. ?Wanem narafala samting we God i wantem se yumi lanem long Baebol?

³ Plante man oli gat rong tingting long God. Be Jehova i wantem we yumi evriwan i save trutok. Yumi mas glad tumas se Baebol i talemaot trutok long yumi. (Ridim Ol Sam 43:3, 4.) Taem yumi kasem trutok ya, i olsem we yumi gat laet long wol ya we i tudak.—1 Jon 1:6, 7.

YUMI KASEM OL PRESEN WE OLI SPESEL

4, 5. ?Long yia 1931, yumi kasem wanem?

⁴ Ol man we oli laef long sem aelan oli folem sem kastom mo fasin blong laef, nao oli tijim ol pikinini blong olgeta tu blong oli folem. Ol samting ya oli olsem ol presen we oli pasem i go long ol pikinini blong olgeta. Yumi ol Witnes blong Jehova, yumi kasem ol presen tu. Jehova i givhan long yumi blong yumi save trutok long saed blong hem mo stamba tingting blong hem. Mo tu, hem i leftemap yumi, taem hem i letem yumi blong yumi karem nem blong hem.

⁵ Bifo, yumi karem nem ya ol Baebol Studen. Be long yia 1931, long wan asembli blong tri dei long Columbus Ohio, Yunaeted Stet, yumi karem nem ya Witnes blong Jehova. Long program blong asembli ya oli raetem “JW” long hem. Wan sista i talem se taem ol brata mo sista oli luk tufala leta ya, oli no kasem save se i minim wanem. Be long 26 Julae 1931, i gat wan spesel tok we i talemaot long olgeta se tufala leta ya “JW” i minim Witnes blong Jehova (Jehovah’s Witnesses long Inglis). Evriwan we oli stap long taem ya oli agri blong karem nem ya. Dei ya i wan bigfala dei blong glad, from we yumi karem nem ya we i kamaot long Baebol. (Ridim Aesea 43:12.b) Wan brata i talem se: “Bambae mi no save fogetem taem ya we ol brata mo sista oli klapem han, mo oli singsingaot bigwan from we oli glad tumas.” I no gat wan narafala skul long wol we i wantem karem nem ya. Be Jehova i letem we yumi karem spesel nem blong hem blong bitim 80 yia finis.

6. ?Wanem save we Jehova i givim long yumi olsem presen?

⁶ Wan narafala samting we i olsem presen, hemia save we Baebol i talem blong tokbaot ol man blong wok blong God bifo. Ol save ya i stret mo i impoten. Yu traem tingbaot. Baebol i talem long yumi wanem i hapen long Ebraham, Aesak, mo Jekob. I sua se olgeta oli storian wetem famle blong olgeta long ol samting we oli mas mekem blong Jehova i glad long olgeta. Ol storian olsem oli givhan long Josef blong i ronwe, taem woman blong Potifa i traem pulum hem blong i slip wetem hem. (Jen. 39:7-9) Taem ol fas Kristin oli stap wanples, olgeta tu oli laekem blong tokbaot ol save blong God. Hemia nao samting we Pol i mekem. Olgeta save long saed blong Kakae blong Masta we Jisas i pasem i kam long hem, hem i tokbaot long kongregesen. (1 Kor. 11:2, 23) Ol save ya i stap long Baebol blong soemaot long yumi stret rod blong wosipim God. (Ridim Jon 4:23, 24.) Baebol i save givhan long olgeta man, be yumi ol Witnes blong Jehova, yumi mas talem tangkiu moa long Jehova from Baebol.

7. ?Wanem promes i olsem wan presen we God i givim long yumi?

⁷ Long taem blong yumi tu, Jehova i stap givhan long ol man blong hem. (Sam 118:7) Taem yumi ridim ol buk blong yumi, yumi luksave ol samting we Jehova i stap mekem blong lukaot gud long ol man blong hem. Taswe, nating we ol man oli mekem i nogud long yumi, be yumi no fraet. Long Baebol, God i mekem promes ya se eni tul blong faet we man i yusum blong agensem yumi, mo ol tok we man i talem blong mekem yumi harem nogud, be bambae oli no save win. Mo tu, sipos i gat sam man we oli girap oli tok agensem ol man blong Jehova long kot, biaen bambae i kam klia se oli rong. Hemia from we stret fasin blong yumi i kamaot long Jehova. Samting ya tu i olsem wan presen we Jehova i givim long yumi. (Aes. 54:17) Setan bambae i no save spolem yumi blong olwe.

8. ?Long stadi ya mo long nekis stadi, bambae yumi tokbaot wanem?

⁸ Setan i traehad finis blong spolem Baebol. Hem i traehad blong blokem ol man blong oli no save nem blong Jehova. Mo hem i traehad tu blong haedem trutok. Be hem i no win. Long stadi ya mo long nekis stadi, bambae yumi tokbaot tri samting: (1) ?God i mekem wanem blong lukaot gud long Baebol mo ol impoten save long hem? (2) ?Jehova i mekem wanem blong ol man oli save long nem blong hem? (3) ?Jehova i mekem wanem blong lukaot gud long trutok kam kasem taem blong yumi?

JEHOVA I LUKAOT GUD LONG BAEBOL

9-11. ?Jehova i mekem wanem blong lukaot gud long Baebol?

⁹ Plante man oli traehad bigwan blong spolem Baebol, be Jehova i lukaot gud long hem. Long yia 1229, Kaonsel blong Katolik Jos long Toulouse i blokem ol man blong oli no ridim Baebol long lanwis blong olgeta. Long yia 1234, Kaonsel blong Katolik Jos long Spen tu, i putum tabu ya long ol man. Mo long yia 1559, Pop Pol 4 i putum tabu ya se ol man oli no mas gat wan Baebol no printim wan Baebol long lanwis blong olgeta.

¹⁰ Nating se plante man oli traehad blong spolem Baebol, be Jehova i lukaot gud long hem. Fas Baebol we oli tanem i go long Inglis, i kamaot long yia 1382. John Wycliffe i tanem Baebol ya. William Tyndale tu i tanem Baebol i go long Inglis, mo from samting ya, long yia 1536, oli kilim hem i ded. Taem hem i stap hang long pos, hem i singaot bigwan i talem se: “God, plis yu openem ae blong king blong Inglan.” Afta we hem i talem tok ya, oli jokem nek blong hem mo oli bonem hem long faea.

¹¹ Long yia 1535, Miles Coverdale tu i tanem Baebol i go long Inglis. Hem i tekemaot wan haf long Baebol blong Tyndale. Sam narafala haf, hem i tekemaot long Baebol long lanwis Latin mo long Baebol blong Martin Luther long lanwis blong Jemani, nao hem i tanem i go long Inglis. Long taem blong yumi, ol Witnes blong Jehova oli wokem Baebol ya New World Translation of the Holy Scriptures. Baebol ya i klia, mo i stret long olfala hanraet, mo i isi blong yusum long wok blong prij. Yes, Setan mo ol man oli no naf nating blong spolem Baebol.

JEHOVA I WANTEM TUMAS WE YUMI SAVE NEM BLONG HEM

12. ?Baebol ya New World Translation i givhan long ol man olsem wanem blong oli save nem blong God?

¹² Jehova God i meksua se ol man oli no karemaot nem blong hem long olgeta Baebol. Taem ol brata oli wokem Baebol ya New World Translation, oli putum nem blong God, Jehova, i gobak long evri ples we nem ya i bin stap long hem long ol olfala Baebol. Long Hibru haf blong Baebol, nem blong Jehova i stap 6,973 taem, mo long Grik haf blong Baebol, nem ya i stap 237 taem. Naoia Baebol ya New World Translation i stap long bitim 116 lanwis. Mo oli printim bitim 178,545,862 kopi.

13. ?Wanem i soemaot se ol man blong bifo oli save nem blong God?

¹³ Adam mo Iv, tufala i save nem blong Jehova mo tufala i yusum. Noa tu i yusum nem ya. Hem i talem se: ‘Yumi presem Jehova. Hem i God blong pikinini ya blong mi Sem.’ (Jen. 4:1, NW; 9:26) Taem God i stap toktok long ol man, hem i talemaot nem blong hem long olgeta. Hem i talem se: ‘!Mi nomo mi Jehova! !Hemia nao nem blong mi! Bambae ol man oli no mas leftemap nem blong narafala god.’ Mo hem i talem tu se: ‘Mi nomo mi Jehova, mo i no gat narafala god i stap.’ (Aes. 42:8; 45:5) Jehova i wantem se ol man long olgeta ples long wol oli save nem blong hem. Taswe, yumi mas harem gud tumas long blesing we yumi gat blong karem nem blong Jehova mo blong talemaot nem ya. Hemia nao mining blong tok ya blong Baebol se: ‘Bambae yumi mekem lafet from samting ya, bambae yumi stap presem God blong yumi from.’—Sam 20:5.

14. ?Wanem narafala samting we nem blong God i stap long hem?

¹⁴ Nem blong God i stap long Baebol, be i no long ples ya nomo. Yu traem tingbaot Ston blong Moab. Oli faenem Ston ya long Dhiban (bifo, nem blong hem Dibon) we i stap 21 kilometa longwe long Ded Si, long saed i go long is. Long ston ya, oli raetem wan stori we i tokbaot King Omri blong Isrel. Mo oli raetem ol tok blong King Mesaha blong Moab, taem hem i tokbaot faet we hem i mekem agens long ol man Isrel. (1 King 16:28; 2 King 1:1; 3:4, 5) Long Ston blong Moab ya oli raetem fofala leta ya YHWH, we hem i nem blong God. Mo tu, fofala leta ya i stap long ol pis graonpot we oli kolem Ol Leta blong Lakis, we oli faenem long Isrel.

15. ?Septuagint hem i wanem? ?From wanem oli nidim?

¹⁵ Bitim 2,000 yia bifo, oli tanem Hibru haf blong Baebol i go long lanwis ya Grik. Baebol ya oli kolem Septuagint. ?From wanem oli nidim Baebol long lanwis Grik? Ol man Juda oli stap kalabus 70 yia long Babilon. Taem oli kam fri long yia 537 bifo Kraes, sam long olgeta oli stap nomo long Babilon. Be biaen, plante long olgeta oli go stap long taon ya Alexandria long Ijip. Long ples ya, ol man oli toktok lanwis Grik, ale ol man Juda tu oli stat blong toktok lanwis Grik, taswe oli nidim wan Baebol long lanwis ya. Long sam kopi blong Baebol ya Septuagint, i gat nem blong God i stap long lanwis Hibru.

16. ?Nem blong God i stap long weples long Bay Psalm Book?

¹⁶ Fas buk we oli wokem long Amerika, hemia buk blong Ol Sam long lanwis Hibru we oli tanem i go long Inglis. Buk ya oli kolem Bay Psalm Book mo oli printim long yia 1640. Insaed long hem, i gat nem blong God i stap. Wan long ol ples we nem ya i stap long hem, hemia long Ol Sam 1:1, 2. Oli raetem nem ya se Iehova. Vas ya i talem se wan man blong God i no save lesin long toktok blong ol man nogud, be hem i wantem tumas ol “loa blong Iehova.” Sipos yu wantem save moa long nem blong God, plis yu lukluk buklet ya The Divine Name That Will Endure Forever (Inglis mo Franis).

JEHOVA I WANTEM TUMAS SE YUMI SAVE TRUTOK

17, 18. (1) ?Trutok hem i wanem? (2) ?Wanem sam long “ol trutok blong gud nius ya?”

¹⁷ Yumi glad tumas blong mekem wok blong Jehova, ‘God ya we i stamba blong trutok.’ (2 Jon 2) ?Wanem ya trutok? Long ol olfala Baebol, tok ya we oli tanem i kam “trutok” i minim samting we i tru, i stret, mo we yumi save trastem.

¹⁸ Jehova i mekem rod blong yumi save kasem trutok long taem blong yumi. Mo hem i gohed blong givhan long yumi, blong yumi kasem save moa long trutok. (2 Jon 1, 2) Hemia nao samting we buk blong Ol Proveb 4:18 i talem, i se: “Rod we ol stret man oli stap wokbaot long hem, fasin blong hem i olsem eli moning, we i stat brok delaet, we oltaem, ol samting oli stap kam klia moa, gogo i delaet gud, mo san i kam antap.” Jisas i prea long God se: “Tok blong yu i tru olgeta.” (Jon 17:17) Long Baebol i gat “ol trutok blong gud nius ya,” we hemia olgeta save we yumi ol Kristin yumi bilif se i tru. (Gal. 2:14) ?Wanem sam long ol save ya? Hemia ol save long nem blong Jehova, mo hae rul blong hem, mo sakrefaes blong Jisas, mo laef bakegen, mo Kingdom. Naoia bambae yumi luk olsem wanem God i blokem Setan blong i no haedem trutok.

JEHOVA I BLOKEM SETAN BLONG I NO HAEDEM TRUTOK

19, 20. ?Nimrod hem i hu? ?Taem hem i rul, ol man oli traem blong mekem wanem?

¹⁹ Afta we bigfala wota i ron long taem blong Noa, i gat wan man we nem blong hem Nimrod. Hem i wan man blong lukaot anamol blong kilim olgeta. Be hem i “agensem Jehova.” (Jen. 10:9, NW) Taem Nimrod i agensem Jehova, hem i stap mekem samting we Setan i wantem. Hem i sem mak long ol man ya we biaen oli agensem Pikinini blong God. Jisas i tok long ol man ya i se: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting we hem i wantem.” Setan, “neva hem i stap wetem olgeta we oli tok tru.”—Jon 8:44.

²⁰ Nimrod i rul long Babel, mo long ol narafala taon we oli stap long medel blong tufala reva ya, Taegris mo Yufretes. (Jen. 10:10) Ating Nimrod nao i stat blong bildim taon blong Babel mo taoa blong hem. Hemia samwe long yia 2269 bifo Kraes. Ol man we oli bildim taon ya oli talem se: “I gud yumi wokem wan taon blong yumi we bambae i gat wan haos long hem we i hae we i hae, i go antap kasem skae. Nao wok ya bambae i mekem nem blong yumi i go antap, mo bambae yumi no moa stap wanwan olbaot long evri ples long wol, bambae yumi save stap wanples nomo.” Be Jehova i no wantem se ol man oli stap laef long wan ples nomo. Ale hem i ‘mekem lanwis blong olgeta man long wol i paspas,’ nao ol man ya oli no moa finisim taon ya. Oli aot long Babel oli go stap wanwan olbaot. (Jen. 11:1-4, 8, 9) Setan i wantem spolem tru wosip. Hem i wantem se ol man oli mekem wosip long hem nomo. Be Jehova i lukaot gud long tru wosip, mo naoia evri dei plante man oli kam joen wetem ol man blong Jehova blong wosipim hem.

21, 22. (1) Nating se plante man oli traem spolem tru wosip, be oli neva win. ?From wanem? (2) ?Bambae yumi tokbaot wanem long nekis stadi?

²¹ Nating se plante man oli traem spolem tru wosip, be oli neva win. ?From wanem? From we Bigfala Tija blong yumi, Jehova, i lukaot gud long Baebol, mo i meksua se yumi save nem blong hem, mo yumi save trutok. (Aes. 30:20, 21) Taem yumi mekem wosip long Jehova olsem we hem i wantem, yumi glad tumas. Be yumi mas lukaot se samting we yumi bilif long hem i tru, mo yumi mas letem tabu spirit i lidim yumi.

²² Long nekis stadi, bambae yumi luk olsem wanem ol skul oli stat blong tijim ol giaman tijing. Bambae yumi luk se Baebol i no tijim ol samting ya. Mo tu, bambae yumi luk se Jehova i blesem yumi taem hem i givim ol save we oli tru long yumi. Olgeta samting ya oli ol spesel presen we Jehova i givim long yumi.