Jeova i Lidim Wok Blong Hem Blong Mekem Stamba Tingting Blong Hem i Kamtru

“[God] i stap lidim olgeta samting folem rod we hem i wantem.”​—EFESAS 1:​11, NW.

1. ?From wanem ol Witnes blong Jeova bambae oli hivap long ol kongregesen blong olgeta long Eprel 12, 2006?

LONG Wenesde, Eprel 12, 2006, samwe long 16 milian man bambae oli hivap long defdefren ples blong tingbaot ded blong Kraes. Long ol wanwan haos miting blong olgeta, bambae i gat wan tebol we long tebol ya oli putum bred we i no gat is long hem, hemia i minim bodi blong Kraes, mo red waen we i minim blad blong Kraes. Klosap long en blong tok we bambae oli givim long naet ya blong talem mining from wanem man i mas mekem Memoriol blong ded blong Jisas, bambae oli pasem bred, mo waen tu, i goraon long evri man we oli stap. Long sam kongregesen blong ol Witnes blong Jeova i gat samfala we bambae oli kakae bred ya mo dring waen ya. Be long plante kongregesen, bambae i no gat wan man we i kakae mo dring. ?From wanem olgeta ya we oli no plante mo we oli gat hop blong go long heven, oli kakae bred mo dring waen, be narafala bigfala hip blong man we oli gat hop blong laef long wol oli no kakae mo dring?

2, 3. (a) ?Wanem ol defdefren samting we Jeova i wokem? (b) ?From wanem Jeova i wokem wol ya wetem ol man?

² Jeova i wan God we i gat wan stamba tingting blong hem. Blong mekem stamba tingting ya i kamtru, hem i “stap lidim olgeta samting folem rod we hem i wantem.” (Efesas 1:​11, NW ) Faswan samting we hem i wokem hemia stret Pikinini boe blong hem, wan nomo we hem i gat. (Jon 1:​1, 14; Revelesen 3:14) Ale biaen, Jeova i yusum Pikinini ya blong hem blong wokem olgeta enjel we oli spirit man mo oli famle blong hem long heven. Mo hem i wokem tu, olgeta samting we oli stap long skae, wetem wol ya mo ol man we oli laef long wol ya.​—Job 38:​4, 7; Ol Sam 103:​19-21; Jon 1:​2, 3; Kolosi 1:​15, 16.

³ Jeova i no wokem wol ya olsem wan ples we ol man i pas long hem fastaem blong kasem traem nao sipos oli winim ol traem ya bambae oli save go joen long famle blong ol spirit man long heven. Plante jos blong Krisendom oli tijim samting ya, be hem i no tru. Taem Jeova i wokem wol ya, hem i gat wan tingting i stap long saed blong hem, tingting ya se “man i save stap long hem.” (Aesea 45:18) Yes, God i wokem wol ya blong man i stap long hem mo i wokem man blong i save laef long wol. (Ol Sam 115:16) Fulwol ya i mas kam wan paradaes we i fulap long ol man we oli stretgud olgeta. Ol stret man ya bambae oli mekem wol ya i kam wan paradaes mo bambae oli lukaotgud long hem. God i neva talem long Adam mo Iv se bambae oli stap smoltaem long wol ya nao biaen bambae oli save go long heven. Nogat.​—Jenesis 1:​26-28; 2:​7, 8, 15.

Wan Samting i Kam Agensem Stamba Tingting Blong Jeova

4. ?Wanem samting we Setan i mekem agensem hae rul blong Jeova long taem blong faswan man mo woman?

⁴ God i wokem olgeta enjel mo man long wan fasin we oli naf blong jusum samting we oli wantem mekem. Be wan spirit pikinini blong God i yusum fasin fri ya we hem i gat, blong spolem stamba tingting blong God. Hem i mekem stronghed mo i spolem pis we man i kasem taem i lavem Jeova mo i letem Jeova i rul long hem. Setan i pulum faswan man mo woman blong folem rod blong tufala nomo, tufala i no moa wantem we God i lidim tufala. (Jenesis 3:​1-6) Setan i no agensem paoa blong Jeova, from we i klia nomo se Jeova i gat paoa. Be hem i agensem fasin blong Jeova blong rulum ol samting, mo long rod ya i olsem we hem i talem se Jeova i no gat raet blong rul. Long taem ya nao, long stat blong laef blong man long wol ya, bigfala kwestin i stanap se: ?Jeova i rili gat raet blong rulum ol man?

5. ?Wanem narafala tok agens we Setan i sakem mo samting we hem i talem i agensem hu bakegen?

⁵ Antap long kwestin ya long saed blong hae rul blong Jeova, Setan i stanemap wan narafala kwestin bakegen long taem blong Job. Hem i jajem ol man blong Jeova we oli stap obei long hem. Setan i talem se ol man ya oli stap obei long God from risen ya nomo se God i stap givim samting long olgeta, be sipos oli kasem bigfala trabol bambae oli lego God. (Job 1:​7-11; 2:​4, 5) I tru se Setan i putum kwestin ya long saed blong wan man blong Jeova long wol ya, be semfala kwestin ya i stanap tu long saed blong ol spirit pikinini blong God, mo long stret Pikinini blong God.

6. ?Olsem wanem Jeova i soemaot se hem i no lego stamba tingting blong hem mo i wok folem mining blong nem blong hem?

⁶ Jeova i no save lego stamba tingting blong hem mo i mas mekem ol wok we oli laenap wetem mining blong nem blong hem. Taswe hem i mekem wok olsem wan Profet mo wan Sevia.a Hem i talem long Setan se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem leg blong hem.” (Jenesis 3:​15, NW ) Tru long laen blong “woman” ya, we i minim ogenaesesen blong Jeova long heven, bambae Jeova i ansa long ol tok ya we Setan i sakem agensem hem. Mo semtaem bambae hem i wokem rod blong ol pikinini blong Adam oli save kam fri long sin, mo oli save laef olwe.​—Rom 5:21; Galesia 4:​26, 31.

‘Samting Ya We Hem i Wantem Mekem, i Wan Tabu Tok Haed’

7. ?Long ol tok blong aposol Pol, Jeova i soemaot se stamba tingting blong hem i blong mekem wanem?

⁷ Aposol Pol i raetem wan leta i go long ol Kristin long Efesas mo long leta ya hem i eksplenem gud olsem wanem Jeova i lidim ol samting blong mekem stamba tingting blong hem i kamtru. Pol i raetem se: “Hem i talemaot long yumi samting ya we hem i wantem mekem, we fastaem i wan tabu tok haed. Samting ya i laenap wetem wanem we hem nomo i glad blong mekem, mo i stanap long tingting blong hem. Long stret taem we hem i makemaot finis, hem i lidim wok blong karem olgeta samting oli kam wanples bakegen long Kraes, hemia olgeta samting long heven mo olgeta samting long wol.” (Efesas 1:​9, 10, NW) Stamba tingting ya blong Jeova i gud tumas, hem i wantem mekem se olgeta laef samting long heven mo long wol oli joen tugeta we evriwan oli glad blong stap aninit long rul blong hem. (Revelesen 4:11) Long rod ya bambae Jeova i karemaot doti we Setan i sakem long nem blong hem, bambae i pruvum se Setan i wan man blong giaman, mo bambae i mekem wanem we hem i wantem mekem i kamtru long “wol, olsem we i kamaot long heven.”​—Matiu 6:​10, NW.

8. ?Wanem mining blong tok ya we yumi tanem i kam “lidim wok”?

⁸ Samting we Jeova “i glad blong mekem,” hemia stamba tingting blong hem, bambae i kamtru folem ‘wan wok we hem i lidim.’ Tok ya we Pol i yusum i minim stret se “wok blong lukaot long famle.” Hemia wan tok we oli yusum blong tokbaot fasin we man i lidim wan wok we i stap long han blong hem, be i no minim wan gavman olsem Kingdom blong Mesaea.b Rod ya we bambae Jeova i folem blong mekem stamba tingting blong hem i kamtru, hem i wan “tok haed” we sloslo bambae hem i stap soemaot long ol man taem ol yia oli pas.​—Efesas 1:10; 3:​9, lukluk futnot long NW.

9. ?Olsem wanem Jeova i soemaot tabu tok haed long saed blong wanem we hem i wantem mekem?

⁹ Jeova i mekem defdefren kontrak wetem ol man. Tru long ol kontrak ya nao hem i soemaot olsem wanem stamba tingting blong hem se laen blong woman ya we hem i tokbaot long garen blong Iden bambae i kamtru. Kontrak we hem i mekem wetem Ebraham i olsem wan promes se laen blong woman ya bambae i kamtru long Ebraham mo tru long laen ya nao God bambae i ‘blesem olgeta man blong ol narafala kantri.’ Kontrak ya i soemaot tu se bambae i gat sam narafala man oli joen wetem impoten man long laen blong woman ya. (Jenesis 22:​17, 18) Kontrak blong Loa we Jeova i mekem wetem neson blong Isrel i soemaot se Jeova i gat tingting blong mekem wan “kingdom blong pris.” (Eksodas 19:​5, 6, NW ) Kontrak we Jeova i mekem wetem Deved i soemaot se impoten man ya long laen blong woman ya bambae i Lida blong wan Kingdom we rul blong hem bambae i no save finis samtaem. (2 Samuel 7:​12, 13; Ol Sam 89:​3, 4) Afta we kontrak blong Loa i lidim ol man Jiu i go kasem Mesaea, Jeova i soemaot sam narafala haf blong stamba tingting blong hem. (Galesia 3:​19, 24) Ol man we oli joen wetem impoten man ya we bambae i bon long Laen blong woman, bambae oli mekemap wan “kingdom blong pris” mo bambae oli joen long wan “niufala kontrak” we i blong niufala “Isrel,” hemia Isrel long saed blong spirit.​—Jeremaea 31:​31-34, NW; Hibrus 8:​7-9, NW.c

10, 11. (a) ?Olsem wanem Jeova i soemaot hu ya Pikinini blong woman ya? (b) ?From wanem stret Pikinini blong God i kam long wol?

¹⁰ Ale, Jeova i lidim ol samting blong mekem we Pikinini blong woman ya i bon long wol ya folem stamba tingting blong Jeova. Jeova i sanem enjel Gabriel i kam long wol blong talem long Meri se bambae hem i bonem wan pikinini boe we bambae nem blong hem Jisas. Enjel ya i talem long hem se: “Hem bambae i wan haeman, mo ol man bambae oli save singaot hem, se Pikinini blong God ya we i hae we i hae. Hae God bambae i mekem hem i King, olsem King Deved, olfala bubu blong hem bifo. Hem bambae i King blong ol laen blong Jekob ya bifo, mo hem bambae i rul, gogo i no save finis.” (Luk 1:​32, 33) Long taem ya nao God i soemaot klia hu ya pikinini ya we i olsem laen blong woman ya.​—Galesia 3:16; 4:4.

¹¹ Stret Pikinini blong God, wan nomo we hem i gat, i mas kam long wol ya mo kasem traem. Sipos Jisas i holemstrong long Jeova taem hem i stap long wol ya bambae hem i givim stret ansa agensem tok we Setan i sakem. ?Olsem wanem? ?Bambae Jisas i soemaot se hem i fasgud long Papa blong hem no nogat? Blong mekem olsem, hem i mas mekem olsem we tabu tok haed i bin talem. Aposol Pol i tokbaot wok blong Jisas long saed ya i se: “Tok haed blong fasin blong prea blong yumi i hae tumas. Tok haed ya i talem se ‘Kraes ya, God i mekem hem i kam man, blong yumi save hem, [tabu spirit i witnes] long hem se ‘Hemia nao man ya,’ mo ol enjel tu oli luk hem. Ol hiten man oli harem gud nius blong hem, mo ol man olbaot long wol oli bilif long hem. Nao God i tekem hem i go stap antap wetem hem, long heven.’ ” (1 Timoti 3:​16, NTB) Yes, from we Jisas i stanap strong gogo kasem we hem i ded, hem i givim klia mo stret ansa agensem tok blong Setan. Be i gat sam narafala haf blong tabu tok haed ya we oli mas kamtru yet.

‘Tok Haed Blong Kingdom Blong God’

12, 13. (a) ?Wanem wan samting we i joen long ‘tabu tok haed ya blong kingdom blong God’? (b) ?Taem Jeova i jusum sam man long wol ya blong go long heven, hem i mas mekem wanem?

¹² Wan taem, taem Jisas i stap prij raon long Galili, hem i soemaot se tabu tok haed ya i joen wetem Kingdom gavman blong hem we hem i Mesaea. Hem i talem long ol disaepol blong hem se: “Yufala ya, God i openem rod long yufala, blong yufala i save ol tok haed blong [“Kingdom blong heven,” NW ],” mo long Mak 4:11 (NW ) i talem “Kingdom blong God.” (Matiu 13:11) Folem tok haed ya, Jeova i jusum wan “smol kampani” blong 144,000 man long wol ya blong oli joen wetem Pikinini ya olsem laen blong woman ya. Olgeta ya bambae oli rul long heven wetem Kraes.​—Luk 12:32; Revelesen 14:​1, 4.

¹³ God i wokem ol man blong oli laef long wol. Be nao, hem i jusum sam man long wol ya blong oli go long heven. Blong mekem samting ya, Jeova i mas mekem ol man ya oli kam “niufala man.” (2 Korin 5:17) Aposol Pita i wan long olgeta ya we oli kasem spesel hop ya blong go long heven. Nao hem i raetem se: “I gud yumi talem tangkiu long God we hem i God mo Papa blong Jisas Kraes, Masta blong yumi. God ya, hem i sore tumas long yumi, nao from samting ya, hem i mekem we yumi bon bakegen, yumi gat niufala laef. Samting ya hem i mekem, taem hem i mekem Jisas Kraes i laef bakegen long ded. Nao from we yumi kam ol niufala man, tingting blong yumi i stap strong long Jisas Kraes, mo i stap kam strong moa oltaem long hem. Mo yumi save se bambae yumi kasem ol gudgudfala samting ya we God i putumgud olgeta oli stap long heven, se oli blong ol man blong hem. Long ples ya ol samting ya oli no save kam nogud, mo oli no save kam roten, mo oli no save lus, from we God i stap lukaot gud long olgeta.”​—1 Pita 1:​3, 4.

14. (a) ?Olsem wanem ol man we oli no man Jiu oli kam insaed long ‘tabu tok haed ya blong kingdom blong God’? (b) ?From wanem yumi naf blong kasem save ol “tingting blong God we man i no save faenemaot”?

¹⁴ Wan narafala samting insaed long tabu tok haed blong Kingdom gavman hemia se God i wantem ol man we oli no man Isrel tu blong oli kam insaed long grup ya we bambae oli go rul wetem Kraes long heven. Pol i eksplenem samting ya we Jeova i mas mekem taem hem i “lidim wok” blong hem, hemia i minim taem hem i mekem stamba tingting blong hem i kamtru, i se: “Long taem blong ol man bifo, God i no talemaot tok ya. Be naoia, hem i yusum Spirit blong hem blong soemaot tok ya long ol tabu aposol mo ol profet blong hem. Tok ya i olsem. From gud nius blong Kraes, ol man we oli no laen blong Isrel oli gat raet wetem ol laen blong Isrel, blong kasem ol gudgudfala samting we God i stap givim. Olgeta ya evriwan, oli olsem ol haf blong wan bodi nomo. Mo promes ya we God i mekem long Jisas Kraes, hem i mekem wantaem nomo long ol narafala man tu.” (Efesas 3:​5, 6) Save long saed blong tabu tok haed ya, God i soemaot long ol “tabu aposol.” Long sem fasin tede, sipos tabu spirit i no stap blong halpem yumi, bambae yumi no naf blong kasem save ol “tingting blong God we man i no save faenemaot.”​—1 Korin 2:10; 4:1; Kolosi 1:​26, 27.

15, 16. ?From wanem Jeova i jusum sam man long wol ya blong go rul wetem Kraes?

¹⁵ I gat “wan handred foti fo taosen man” we Jon i luk oli stap stanap wetem “Smol Sipsip” long Hil ya Saeon antap long heven. Olgeta ya “God i pemaot olgeta, i tekemaot olgeta long wol ya,” ‘i tekemaot olgeta long ol narafala man, oli blong God mo blong Smol Sipsip ya, olsem ol fas kakae blong garen.’ (Revelesen 14:​1-4) Jeova i jusum wan long ol spirit pikinini blong hem se bambae i bon long laen blong woman ya we hem i tokbaot long Iden. ?Ale from wanem hem i tekem sam man long wol ya blong go rul wetem Kraes? Aposol Pol i eksplenem se ‘God i singaot [wan smol namba blong man] finis stret long rod we hem i makemaot,’ yes “hemia i tingting blong hem nomo, mo hem i glad blong mekem.”​—Rom 8:​17, 28-30; Efesas 1:​5, 11; 2 Timoti 1:9.

¹⁶ Stamba tingting blong Jeova i blong karemaot doti we Setan i sakem long haefala tabu nem blong hem mo blong soemaot se hem nomo i gat raet blong rulum heven mo wol. Fasin blong Jeova blong “lidim wok” blong hem i waes olgeta. Long rod ya nao hem i sanem fasbon Pikinini blong hem i kam long wol, nao pikinini ya i kasem traem gogo hem i ded. Antap long hemia, Jeova i wokem rod blong bambae i gat sam man blong wol ya tu we oli joen long Kingdom blong Mesaea. Ol man ya we hem i jusum, olgeta tu oli sapotem hae rul blong Hem gogo kasem ded.​—Efesas 1:​8-12; Revelesen 2:​10, 11.

17. ?From wanem yumi glad se Kraes mo ol man we oli rul wetem hem oli bin laef long wol ya bifo?

¹⁷ Jeova i sanem Pikinini blong hem i kam long wol, mo i jusum sam man long wol ya blong oli go rul long Kingdom wetem Kraes. Tufala samting ya i soemaot bigfala lav we hem i gat long ol pikinini blong Adam. ?Olsem wanem samting ya i mekem i gud long ol man we oli stap tru long Jeova stat long Ebel i kam kasem naoia? Olgeta man oli no stretgud olgeta taem oli bon, oli slef blong sin mo ded. Taswe oli nidim we wan man i hilim olgeta long saed blong spirit mo bodi tu, nao i mekem olgeta oli kam stret man bakegen, olsem we Jeova i wantem taem i wokem faswan man mo woman. (Rom 5:12) Ol man we oli gat hop blong laef olwe long wol ya oli haremgud tumas blong save se King blong olgeta bambae i soem lav mo kaengud fasin long olgeta olsem we hem i bin mekem long ol disaepol blong hem taem hem i stap long wol bifo. (Matiu 11:​28, 29; Hibrus 2:​17, 18; 4:15; 7:​25, 26) !Mo oli glad tu blong tingbaot se olgeta king mo pris ya we bambae oli rul wetem Kraes, oli ol man mo woman we oli holemstrong long bilif nating se olgeta tu oli gat sam slak fasin mo oli fesem sam trabol olsem yumi!​—Rom 7:​21-25.

Stamba Tingting Blong Jeova We i Mas Kamtru

18, 19. ?From wanem ol tok blong Pol long Efesas 1:​8-11 i klia moa nao long yumi? ?Bambae yumi tokbaot wanem long nekis stadi?

¹⁸ Naoia yumi kasem save long mining blong ol tok we Pol i raetem i go long ol tabu Kristin long Efesas 1:​8-11 (NW ). Hem i talem long olgeta se Jeova i soemaot “tabu tok haed” ya blong hem long olgeta, mo bambae ‘oli rul’ wetem Kraes, mo God i ‘jusumaot olgeta fastaem folem stamba tingting blong hem, mo hem i stap wokem olgeta samting folem rod we hem i wantem.’ Yumi luksave se samting ya i laenap stret wetem ‘wok we Jeova i lidim’ blong mekem stamba tingting blong hem i kamtru. Samting ya i halpem yumi blong kasem nao se from wanem smol man nomo oli kakae bred mo dring waen long taem blong Memoriol blong ded blong Kraes.

¹⁹ Long nekis stadi bambae yumi tokbaot wanem we Memoriol blong ded blong Kraes i mekem long ol Kristin we oli gat hop blong go long heven mo from wanem plante milian man we bambae oli laef foreva long wol oli intres long mining blong Memoriol ya.

[Ol Futnot]

Karem Olgeta Samting Long Heven Mo Long Wol Oli Kam Wanples Bakegen

“Samting ya i laenap wetem wanem we hem nomo i glad blong mekem, . . . blong karem olgeta samting oli kam wanples bakegen long Kraes, hemia olgeta samting long heven mo olgeta samting long wol.”​—EFESAS 1:​9, 10, NW.

1. ?Wanem samting we Jeova i “glad blong mekem” long heven mo wol?

!PIS LONG HEVEN MO WOL! Hemia nao stamba tingting blong Jeova, we i ‘God blong pis.’ (Hibrus 13:20) Hem i pulum aposol Pol blong raetem se samting we hem i “glad blong mekem” hemia blong “karem olgeta samting oli kam wanples bakegen long Kraes, hemia olgeta samting long heven mo olgeta samting long wol.” (Efesas 1:​9, 10, NW ) ?I minim wanem se ‘karem i kam wanples bakegen’? Wan man we i stadi long ol tok ya blong Baebol, nem blong hem J. B. Lightfoot, i talem se: “Tok ya i minim fasin we fulwan yunivas i joen, we i no moa gat wan samting i spolem pis, mo Kraes nao i olsem stamba samting we i joenem olgeta samting ya tugeta. Sin mo ded, krae mo ol slak fasin mo fasin safa, evriwan bambae oli finis.”

“Olgeta Samting Long Heven”

2. ?Hu ya “olgeta samting long heven” we oli mas kam wanples?

² Aposol Pita i tokbaot nambawan fiuja blong ol trufala Kristin taem hem i raetem se: “God i promes finis blong putum niufala skae [“heven,” NW ] mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.” (2 Pita 3:13) Promes blong God blong putum “niufala heven” i minim rul blong wan niufala gavman, hemia Kingdom blong Mesaea. Long leta we Pol i raetem i go long ol man Efesas hem i talem se “olgeta samting long heven” bambae oli mas kam wanples “long Kraes.” Hem i stap tokbaot smol grup blong ol man blong wol ya we God i jusum olgeta blong oli go rul wetem Kraes long heven. (1 Pita 1:​3, 4) Ol 144,000 Kristin ya we tabu spirit i makemaot olgeta, “God i pemaot olgeta, i tekemaot olgeta long wol ya,” “i tekemaot olgeta long ol narafala man,” blong oli joen wetem Kraes long Kingdom blong hem long heven.​—Revelesen 5:​9, 10; 14:​3, 4; 2 Korin 1:21; Efesas 1:11; 3:6.

3. ?Olsem wanem ol tabu Kristin ya oli kasem ‘hae nem long heven’ nating se oli stap yet long wol ya?

³ Ol tabu Kristin oli bon bakegen long tabu spirit nao oli kam ol spirit pikinini blong Jeova. (Jon 1:​12, 13; 3:​5-7, NTB) Jeova i karemaot olgeta, olsem we i adoptem olgeta oli kam “pikinini” blong hem, mo oli kam brata blong Jisas. (Rom 8:15; Efesas 1:5) From samting ya, taem we oli stap yet long wol be Baebol i talem se ‘God i joenem olgeta long Jisas Kraes, hem i leftemap olgeta wetem hem, i givim hae nem long olgeta wetem hem long heven.’ (Efesas 1:3; 2:6) Oli holem spesel posisen ya long saed blong spirit from we tabu spirit i makemaot olgeta mo ‘hem i saen blong promes long olgeta, we bambae oli save kasem ol samting ya, we God i makemaot finis se oli blong olgeta’ long heven. (Efesas 1:​13, 14, NTB; Kolosi 1:5) Hemia nao “olgeta samting long heven” we Jeova i talem finis se olgeta hamas evriwan, mo hem i mas hivimap ful namba ya.

Wok i Stat Blong Karem Olgeta Samting i Kam Wanples

4. ?Wetaem God i stat karem “olgeta samting long heven” i kam wanples, mo samting ya i stat olsem wanem?

⁴ Jeova i ‘lidim wok blong hem,’ taswe “long stret taem we hem i makemaot finis,” hem i stat karem “olgeta samting long heven” i kam wanples. (Efesas 1:​10, NW ) Stret taem ya hemia long lafet blong Pentekos long yia 33 K.T.a Long dei ya, God i kafsaedem tabu spirit blong hem long ol aposol mo long wan grup blong ol man mo woman we oli disaepol blong Kraes. (Ol Wok 1:​13-15; 2:​1-4) Hemia i pruvum se niufala kontrak i stat. Hem i makem taem tu we faswan Kristin kongregesen i stanap mo wan niufala neson i bon, hemia neson blong Isrel long saed blong spirit, “Isrel blong God.”​—Galesia 6:​16, NW; Hibrus 9:15; 12:​23, 24.

5. ?From wanem Jeova i wokem wan niufala “neson” blong tekem ples blong neson blong Isrel?

⁵ Nating se Jeova i mekem kontrak blong Loa wetem neson blong ol man Isrel, olgeta ya oli no kam wan “kingdom blong pris mo wan tabu neson” we bambae i mekem wok blong God blong olwe long heven. (Eksodas 19:​5, 6, NW ) Jisas i talem long ol lida blong skul blong ol man Jiu se: “God bambae i tekemaot kingdom blong Hem long yufala, mo bambae i givim i go long wan neson we bambae i karem frut we i stret.” (Matiu 21:​43, NW ) Neson ya, hemia Isrel long saed blong spirit. Ol Kristin we tabu spirit i makemaot olgeta, olgeta ya nao oli mekemap neson ya, mo oli joen long niufala kontrak. Aposol Pita i raet i go long olgeta ya i se: “Be yufala i ‘wan laen we God i jusumaot, wan kampani blong pris mo king, wan tabu neson, ol man we oli blong God nomo, blong yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem. Bifo, yufala i no wan neson, be naoia yufala i kam neson blong God.” (1 Pita 2:​9, 10, NW ) Jeova i finisim kontrak we hem i bin mekem wetem prapa neson blong Isrel. (Hibrus 8:​7-13) Olsem Jisas i bin talem, God i tekemaot janis ya we oli bin gat blong joen long Kingdom blong Mesaea, mo hem i givim janis ya long ol 144,000 memba blong Isrel long saed blong spirit.​—Revelesen 7:​4-8.

Oli Joen Long Kontrak Blong Kingdom

6, 7. ?Wanem spesel kontrak we Jisas i mekem wetem ol brata blong hem we tabu spirit i makemaot olgeta, mo hemia i min se bambae wanem i hapen long ol man ya?

⁶ Long naet ya we Jisas i stanemap Memoriol blong tingbaot ded blong hem, hem i talem long ol gudfala aposol blong hem se: “Yufala ya nao, oltaem yufala i stap wetem mi long olgeta hadtaem we mi mi gotru long hem. Nao olsem we Papa blong mi i putumap mi blong bambae mi mi King, mi tu mi putumap yufala, blong bambae yufala i save sidaon wetem mi blong kakae wetem mi long taem ya we mi bambae mi King. Mo long taem ya, bambae yufala tu i gat ol gudfala jea blong yufala, olsem jea blong king. Nao bambae yufala i hed blong ol twelef laen blong Isrel, blong rul long olgeta.” (Luk 22:​28-30) Long ples ya, Jisas i stap tokbaot spesel kontrak ya we hem i mekem wetem ol 144,000 brata blong hem we tabu spirit i makemaot olgeta, mo we oli “win long faet” from we oli “stanap strong gogo [oli] ded.”​—Revelesen 2:10; 3:21.

⁷ Ol man insaed long smol grup ya oli lego hop blong laef foreva long wol ya wetem bodi blong mit mo blad. Bambae oli go rul wetem Kraes long heven, mo bambae oli jajem ol man long wol. (Revelesen 20:​4, 6) Naoia i gud yumi ridim sam narafala vas blong Baebol we oli tokbaot ol tabu Kristin ya mo we oli soem from wanem ol “narafala sipsip” oli no kakae bred mo dring waen long Memoriol.​—Jon 10:16.

8. ?Taem ol tabu Kristin oli kakae bred oli soemaot wanem? (Lukluk bokis antap)

⁸ Ol tabu Kristin oli safa olsem Kraes mo oli rere nomo blong ded olsem Kraes. Pol we i wan tabu Kristin tu, i talem se hem i rere blong lego evri samting from we hem i wantem ‘kasem Kraes, blong savegud Kraes, mo blong kasem paoa ya we God i yusum blong mekem hem i laef bakegen long ded, mo blong kasem haf blong ol samting we oli mekem hem i harem nogud long bodi blong hem.’ Yes, Pol i rere blong “folem fasin blong ded blong [Kraes].” (Filipae 3:​8, 10) Plante tabu Kristin oli safa bigwan long bodi blong olgeta long wol ya, oli ‘stap soemaot ded blong Jisas long bodi blong olgeta.’​—2 Korin 4:10.

9. ?Bred blong Memoriol i pija blong wanem bodi?

⁹ Taem Jisas i stanemap Memoriol, hem i talem se: “Hemia bodi blong mi.” (Mak 14:22) Hem i stap minim trufala bodi blong hem we i no longtaem bambae ol man oli kilim mo blad blong hem bambae i ron. Bred we i no gat is long hem, i wan nambawan pija blong bodi blong Kraes. ?From wanem? From we, long Baebol, is i pija blong sin no rabis fasin. (Matiu 16:​4, 11, 12; 1 Korin 5:​6-8) Jisas i stretgud olgeta, mo hem i gat bodi olsem man long wol ya be i no gat sin long hem. Hem i givim bodi ya nao we i stretgud olgeta olsem wan sakrefaes blong pemaot ol man. (Hibrus 7:26; 1 Jon 2:2) Long rod ya hem i mekem i gud long olgeta Kristin we oli holem bilif, nomata se oli gat hop blong laef long heven no blong laef olwe long paradaes long wol ya.​—Jon 6:51.

10. ?Olsem wanem olgeta we oli dring waen blong Memoriol oli “kam wan wetem Kraes long blad blong hem”?

¹⁰ Pol i tokbaot waen we ol tabu Kristin oli dring long taem blong Memoriol, i se: “Gudfala kap ya we yumi stap talem tangkiu tumas long God from, taem yumi dring long hem, yumi kam wan wetem Kraes long blad blong hem.” (1 Korin 10:16) ?Olsem wanem ol man we oli dring long waen ya oli “kam wan wetem Kraes long blad blong hem”? I no min se oli joen wetem Kraes blong givim ransom sakrefaes ya from we olgeta tu oli nidim we Kraes i pemaot olgeta. Be from we oli bilif se blad blong Kraes i naf blong pemaot ol man, ale, God i fogivim ol sin blong olgeta mo i mekem oli stret blong kasem laef long heven. (Rom 5:​8, 9; Taetas 3:​4-7) From blad blong Kraes we i ron, ol 144,000 man ya we bambae oli rul wetem Kraes, oli “tabu,” oli ol spesel man blong God. Blad blong Kraes i mekem oli klin long ol sin blong olgeta nao oli “gat raet insaed long ples blong God.” (Hibrus 10:29; Daniel 7:​18, 27; Efesas 2:19) Yes, blad blong Kraes nao i “pemaot ol man, oli blong God. Olgeta ya oli kamaot long olgeta kala, mo long olgeta kantri, mo long olgeta laen, mo long olgeta lanwis . . . oli kam . . . pris blong mekem wok blong God blong [yumi], mo bambae oli king, oli rul long olgeta man long wol.”​—Revelesen 5:​9, 10.

11. ?I minim wanem taem ol tabu Kristin oli dring waen long Memoriol?

¹¹ Taem Jisas i stanemap Memoriol blong tingbaot ded blong hem, hem i pasem kap waen i go long ol aposol blong hem mo i talem se: “Yufala evriwan, yufala i dring long hem, from we hemia blad blong mi, we i blong mekem promes [“kontrak,” NW ] blong God i stanap. Blad blong mi bambae i ron blong tekemaot ol sin blong plante man.” (Matiu 26:​27, 28) Blad blong ol buluk mo nani i mekem kontrak blong Loa i wok bitwin God mo neson blong Isrel. Long sem fasin, blad blong Jisas i mekem niufala kontrak i wok bitwin Jeova mo Isrel long saed blong spirit, stat long Pentekos 33 K.T. (Eksodas 24:​5-8; Luk 22:20; Hibrus 9:​14, 15) Taem ol tabu Kristin oli dring waen we i pija blong ‘blad we i mekem kontrak i stanap,’ oli soemaot se oli stap insaed long niufala kontrak ya mo oli stap kasem ol blesing blong kontrak ya.

12. ?Olsem wanem ol tabu Kristin oli baptaes blong joen long ded blong Kraes?

¹² I gat wan narafala samting tu we ol tabu Kristin oli stap tingbaot. Jisas i talem long ol disaepol blong hem se: ‘Kap ya we mi bambae mi dring long hem, yufala tu bambae i dring long hem. Mo baptaes ya we mi bambae mi baptaes long hem, yufala tu bambae i baptaes long hem.’ (Mak 10:​38, 39, NW ) Biaen, aposol Pol i tokbaot ol Kristin we oli ‘baptaes blong joen long ded blong [Kraes].’ (Rom 6:3) Ol tabu Kristin oli lego fulap samting long laef blong olgeta. Taem oli ded i olsem we oli mekem wan sakrefaes from we oli lego hop ya blong laef olwe long wol. Ol tabu Kristin ya oli baptaes blong joen long ded blong Kraes. Baptaes ya i finis afta we oli holemstrong long bilif mo oli ded, nao oli laef bakegen wetem spirit bodi blong “rul wetem [Kraes] olsem king” long heven.​—2 Timoti 2:​10-12, NW; Rom 6:5; 1 Korin 15:​42-44, 50.

Kakae Bred Mo Dring Waen

13. ?From wanem ol man we oli blong laef long wol ya oli no kakae bred mo dring waen long taem blong Memoriol, be from wanem oli kam long lafet ya?

¹³ Taem yu tingbaot se man we i kakae bred mo i dring waen long taem blong Memoriol, hem i joen long wan impoten samting, i klia se sipos wan man i kakae mo i dring be God i no jusum hem blong go long heven, man ya i mekem i no stret nating. Ol man we oli gat hop blong laef olwe long wol ya oli luksave se tabu spirit i no makemaot olgeta blong oli joen long bodi blong Kraes, mo oli no stap insaed long niufala kontrak ya we Jeova i mekem wetem ol man we bambae oli rul wetem Jisas Kraes. From we “kap” ya i pija blong niufala kontrak, olgeta we oli insaed long niufala kontrak ya nomo oli dring long hem. Ol man we bambae oli laef olwe long wol ya aninit long Kingdom, oli no baptaes blong joen long ded blong Kraes, mo God i no singaot olgeta tu blong oli rul wetem Kraes long heven. Sipos oli dring mo kakae long Memoriol ya oli stap joen long wan samting we i no laenap wetem olgeta. Taswe oli no kakae mo oli no dring, be oli kam long Memoriol blong soem respek long plan ya blong God. Oli gat tangkiu long Jeova from olgeta samting we hem i mekem tru long Pikinini blong hem, mo from fasin fogif tu we oli save kasem from blad blong Kraes we i ron.

14. ?Olsem wanem ol tabu brata oli strong moa long saed blong spirit taem oli tekem bred mo waen?

¹⁴ Ol Kristin we bambae oli go rul wetem Kraes long heven, namba blong olgeta i smol nomo mo i no longtaem bambae oli go evriwan. Gogo kasem taem we ded i finisim laef blong olgeta long wol ya, ol tabu Kristin ya oli harem se oli strong moa long saed blong spirit taem oli tekem bred mo waen long Memoriol ya. Oli harem se oli joen wetem ol narafala tabu brata mo sista long bodi blong Kraes. Taem oli kakae bred mo dring waen oli tingbaot bakegen mo bakegen se oli mas holemstrong long bilif gogo kasem we oli ded.​—2 Pita 1:​10, 11.

Karem ‘Olgeta Samting Long Wol’ i Kam Wanples

15. ?Hu olgeta we oli biaenem ol tabu Kristin?

¹⁵ Stat afta long 1935, namba blong ol “narafala sipsip” i kam antap bigwan. Olgeta ya oli no blong smol kampani be oli blong laef olwe long wol. (Jon 10:16; Luk 12:32; Sekaraea 8:23) Oli wok wetem ol “brata” blong Kraes mo oli givhan bigwan blong talemaot “gud nius blong Kingdom” blong givim witnes long olgeta man. (Matiu 24:​14, NW; 25:40) From we oli mekem olsem, oli gat janis ya blong stap olsem “sipsip” we Kraes bambae i putum olgeta long raetsaed blong hem taem hem i kam blong jajem olgeta man. (Matiu 25:​33-36, 46) From we oli bilif long blad blong Kraes, oli mekemap “bigfala kampani” ya we bambae oli laef tru long “bigfala trabol.”​—Revelesen 7:​9-14, NW.

16. ?Hu olgeta we bambae oli stap olsem “olgeta samting long wol,” mo olsem wanem olgeta ya bambae oli save kam ‘pikinini blong God’?

¹⁶ Taem we laswan haf blong ol 144,000 man i go long heven finis, jajmen bambae i kam olsem strongfala “win” agensem rabis wol blong Setan. (Revelesen 7:​1-4) Biaen, Kraes wetem ol 144,000 man ya we oli king mo pris wetem hem, bambae oli rulum wol ya blong Wan Taosen Yia. Long taem ya, namba blong olgeta we oli blong bigfala kampani long wol ya bambae i gru taem ol dedman oli laef bakegen. (Revelesen 20:​12, 13) Olgeta ya bambae oli gat janis blong laef olwe long wol ya aninit long King Mesaea ya Jisas Kraes. Taem rul blong Wan Taosen Yia i finis, olgeta ‘samting long wol’ bambae oli pastru long laswan traem. Olgeta we oli holemstrong long God bambae oli kam “ol pikinini blong hem” long wol ya.​—Efesas 1:10; Rom 8:21; Revelesen 20:​7, 8.

17. ?Stamba tingting blong Jeova bambae i kamtru olsem wanem?

¹⁷ Yes, fasin blong Jeova blong ‘lidim wok blong hem’ bambae i mekem stamba tingting ya blong hem i kamtru “blong karem olgeta samting oli kam wanples bakegen long Kraes, hemia olgeta samting long heven mo olgeta samting long wol.” Olgeta spirit man long heven mo olgeta man long wol ya bambae oli kam olsem wan famle nomo we oli stap long pis, mo oli glad blong letem Jeova i rul long olgeta. Hem i Bigfala Man we i mekem ol stamba tingting blong hem oli kamtru.

18. ?Olsem wanem Memoriol bambae i givhan long ol tabu Kristin mo ol narafala sipsip?

¹⁸ !Tru ya, smol namba blong ol tabu man mo ol milian narafala sipsip ya bambae oli kam strong moa long bilif taem we bambae oli kam wanples long Eprel 12, 2006! Bambae oli tingbaot ded blong Kraes, stret olsem we Jisas i bin talem se: “Oltaem yufala i mas mekem samting ya blong tingbaot mi bakegen.” (Luk 22:19) Olgeta man we oli kam long Memoriol oli mas tingbaot gudfala samting ya we Jeova i mekem long olgeta tru long Pikinini blong hem Jisas Kraes.