Talemaot Gud Nius Wetem Strongfala Bilif
1 Long faswan handred yia, Jisas i givim oda long ol man blong hem blong oli talemaot gud nius blong Kingdom mo ‘go long ol man long olgeta ples long wol, blong pulum olgeta oli man blong hem.’ (Mat. 24:14; 28:19, 20) Ol Witnes blong Jeova oli tinghevi mo oli folem gud oda ya. Taswe long en blong ol yia 1900, namba blong ol Kristin brata blong yumi i go antap bitim 5,900,000 disaepol long 234 kantri. !Hemia i olsem wan bigfala voes we i singaot blong presem Papa blong yumi long heven!
2 Naoia yumi kam long ol yia 2000. Enemi blong yumi i stap traem blong putum ol trap blong blokem stamba wok blong yumi blong talemaot Kingdom mo mekem disaepol. Hem i stap yusum ol hadtaem long wol blong tede blong traem mekem tingting blong yumi i gowe long wok ya, blong yumi westem taem blong yumi mo ol paoa blong yumi long ol samting we oli no impoten tumas. Yumi no letem wol ya blong tede i talem long yumi wanem nao i moa impoten long laef. Be, tru long Tok blong God, yumi pruvum se samting we i impoten hemia blong mekem ol wok blong God. (Rom 12:2) Hemia i minim se yumi obei long advaes we i stap long Baebol blong ‘talemaot tok blong hem,nating we ol man oli wantem harem tok ya no oli no wantem harem be yumi mas finisim olgeta wok ya we God i givim long yumi blong mekem.’—2 Tim. 4:2, 5.
3 Wokem Fasin Blong Stanap Strong Long Bilif: Ol Kristin oli nidim blong ‘stanap strong long bilif blong olgeta, we oli kasem gud fasin blong Masta blong yumi mo oli save gud hem, mo we oli strong blong mekem olgeta samting we God i wantem.’ (Kol. 4:12) Tok ya “strong long bilif’’ i minim “wan strongfala tingting no bilif we i pulum man; fasin ya we man i sua fulwan long wan samting.” Olsem ol Kristin, yumi mas bilif strong se ol profet tok blong God oli tru, mo se naoia yumi stap klosap moa long taem blong en. Yumi mas gat bilif we i strong olsem hemia blong aposol Pol, we i talem se gud nius “hem i paoa blong God blong sevem olgeta man we oli bilif long hem.”—Rom 1:16
4 Devel Setan i stap yusum ol rabis man mo ol man blong giaman, we olgeta oli folem rong rod finis, blong pulum narafala mo lidim olgeta tu oli go long rong rod. (2 Tim. 3:13) From we yumi kasem woning finis long saed ya, yumi mas mekem sam samting blong bilif blong yumi i kam strong moa se trutok i stap wetem yumi. Yumi mas gohed blong putum ol wok blong Kingdom long fasples long laef blong yumi, i bitim we yumi letem ol wari blong laef oli daonem strong tingting we yumi gat. (Mat. 6:33, 34) Mo tu, yumi no wantem blong lusum tingting ya se yumi stap long wan taem we i impoten tumas, nao maet yumi gat filing ya se en blong olgeta samting i stap longwe yet. Taem ya blong en i stap kam klosap tumas. (1 Pita 4:7) Nating sipos yumi harem se wok blong seremaot gud nius i no karem bigfala frut long sam kantri we wok blong givim witnes i gohed longtaem finis long hem, be wok ya blong givim woning i mas gohed.—Esik. 33:7-9.
5 Ol kwestin we yumi mas askem long yumi long let taem ya se: ‘?Mi mi stap tinghevi long oda blong Jisas blong mekem disaepol? ?Taem mi stap talemaot gud nius, mi soem se mi rili bilif fulwan long Kingdom se hem i tru? ?Mi mi gat strong tingting blong mekem wan bigfala haf blong wok ya blong sevem man, go kasem mak we mi naf blong mekem?’ Taem yumi luksave hamas taem i stap yet bifo we en i kam, yumi mas lukaot gud long fasin blong yumi mo wok blong yumi blong prij mo tij. Samting ya i save sevem yumi mo olgeta we oli lesin long yumi. (1 Tim. 4:16)?Olsem wanem yumi evriwan i save mekem bilif blong yumi i kam strong long wok blong prij ?
6 Mekem Olsem Ol Man Tesalonaeka: Taem aposol Pol i tingbaot had wok we ol brata long Tesalonaeka oli mekem, hem i talem long olgeta se: “Taem mitrifala i tekem gud nius i kam long yufala, mifala i no toktok nating nomo. Mifala i toktok mo mifala i stap mekem ol merikel long paoa blong tabu spirit, mo mifala i bilif strong se gud nius ya i tru. Mo long taem ya mifala i stap wetem yufala, yufala i luksave gudfala fasin we mifala i mekem, blong soemaot rod long yufala. Nao yufala i stap folem sem rod ya we mifala i stap folem, mo we masta blong yumi tu i folem. Taem yufala i kasem tok ya blong gud nius, i tru we yufala i kasem plante trabol, be tabu spirit i mekem yufala i harem gud tumas.“ (1 Tes. 1:5, 6) Yes, Pol i tok blong leftemap kongregesen blong ol man Tesalonaeka from we nating se oli kasem ol bigfala traem, oli stap talemaot gud nius wetem strong tingting mo strong bilif.?Wanem nao i halpem olgeta blong mekem olsem? Wan bigfala samting we i gat paoa long olgeta, hemia strong tingting mo bilif we oli luk long aposol Pol mo ol man we oli wok wetem hem.?Olsem wanem samting ya i gat paoa long olgeta?
7 Laef blong Pol mo olgeta we oli wok wetem hem, i pruvum se oli gat spirit blong God mo se oli bilif fulwan long wanem we oli stap talemaot. Bifo we Pol mo Saelas tufala i kam long Tesalonaeka, ol man oli tok nogud long tufala long Filipae. Ol man ya oli no tekem tufala i go long kot, be oli kilim tufala, putum tufala long kalabus mo lokem tufala long wan wud we i olsem bigfala hankaf. Be traem ya i no daonem strong tingting blong tufala long saed blong gud nius. God i mekem tufala i kam fri. Samting ya i jenisim tingting blong man blong lukaot long kalabus ya mo olgeta we oli stap long haos blong hem, mo i mekem rod blong ol brata ya oli save gohed long minista wok blong olgeta.—Wok 16:19-34.
8 Wetem paoa blong spirit blong God, Pol i kam long Tesalonaeka. Long ples ya nao hem i wok blong kasem ol samting we hem i nidim long saed blong bodi mo i yusum fulwan taem blong hem blong tijim trutok long ol man Tesalonaeka. Hem i no blokem hem wan blong talemaot gud nius long evri jans we hem i kasem. (1 Tes. 2:9) Gud nius we Pol i talemaot wetem strong bilif, i gat paoa mo i wok long ol man we oli stap long taon ya. Taswe samfala oli lego wosip we oli stap mekem long ol aedol, mo oli kam ol man blong wok blong trufala God, Jeova.—1 Tes. 1:8-10.
9 Ol bigfala traem oli no blokem ol man blong bilif blong oli talemaot gud nius. Niufala bilif, mo tingting blong olgeta we i sua fulwan se bambae oli save kasem ol blesing blong olwe, i pusum ol man Tesalonaeka blong go talemaot trutok ya we oli bin glad tumas blong lanem. Kongregesen ya i kam strong mekem se nius blong bilif mo strong tingting we oli gat i go kasem ol narafala ples blong Masedonia mo long Akaia tu. From samting ya, taem Pol i raetem fasfala leta blong hem i go long ol man Tesalonaeka, ol man oli gat save finis long ol gudfala wok we oli stap mekem. (1 Tes. 1:7) !Hemia i wan nambawan eksampel.
10 Lav We Oli Gat Long God Mo Man i Pusum Olgeta: ?Olsem wanem yumi save mekem sem mak long ol man Tesalonaeka, mo holem wan strong bilif taem yumi talemaot gud nius tede? Blong tokbaot olgeta, Pol i raetem se: “Mifala i no save fogetem wok blong yufala we i soemaotgud bilif blong yufala, mo hadwok blong yufala we i kamaot from we yufala i lavem God tumas.” (1 Tes. 1:3, NW futnot) I klia nomo se lav we oli gat long Jeova God mo long ol man we oli prij long olgeta, i wan lav we i dip mo we i kamaot long hat. Hemia sem lav ya we i pusum Pol mo ol fren blong hem blong oli no “tingbaot blong talemaot gud nius ya nomo“ long ol man Tesalonaeka, be ‘oli rere tu blong lego laef blong olgeta from olgeta.“—1 Tes. 2:8.
11 I sem mak tede, dip lav we yumi gat long Jeova mo ol man i pusum yumi blong wantem joen fulwan long wok ya blong talemaot gud nius, we God i givim blong yumi mekem. Wetem lav ya nao, yumi luksave se hemia prapa wok blong yumi wanwan, we God i givim, blong serem gud nius long narafala. Taem yumi tingting dip long olgeta samting we Jeova i mekem long yumi blong lidim yumi i go long “laef ya we i prapa wan,” samting ya i pusum yumi blong talemaot ol nambawan trutok ya we yumi bilivim wetem ful hat blong yumi, i go long ol narafala.—1 Tim. 6:19.
12 Taem yumi stap bisi long wok blong prij, lav we yumi gat long Jeova mo ol man i mas gohed blong gru. Sipos i olsem, bambae lav ya i pusum yumi blong joen mo mekem moa long wok blong prij long ol haos wanwan mo blong folem eni narafala rod we yumi gat blong prij. Bambae yumi yusum gud ol jans blong prij long ol famle blong yumi, ol man we oli stap raonabaot long yumi, mo ol gudfala fren blong yumi. Nating se maet plante man oli no laekem gud nius we yumi talemaot, mo samfala oli gohed blong traem blokem wok blong talemaot Kingdom, yumi kasem wan glad we i stap insaed long yumi. ?From wanem? From we yumi save se yumi mekem bes blong yumi blong tokbaot Kingdom mo halpem ol man blong kasem sef. Mo Jeova bambae i blesem ol traehad we yumi mekem blong faenem olgeta we hat blong olgeta i stret. Nating se ol hadtaem blong laef oli traem blokem yumi, mo Setan i traem blong karemaot glad we yumi gat, yumi save holemtaet strong long bilif blong yumi mo strong tingting we yumi gat blong prij long ol narafala. Taem evriwan i mekem wok blong hem, frut we i kamaot se ol kongregesen oli kam strong mo oli gat strong tingting blong mekem wok, olsem hemia long Tesalonaeka.
13 No Mas Lego Nating Se I Gat Traem: I nidim strongfala bilif tu, taem yumi kasem ol defren kaen traem. (1 Pita 1:6, 7) Jisas i mekem i klia long ol disaepol blong hem se sipos oli folem hem, bambae ‘olgeta man oli no laekem olgeta nating, oli agens long olgeta.’ (Mat. 24:9) Pol mo Saelas, oli fesem samting ya taem oli stap long Filipae. Stori we i stap long Ol Wok japta 16, i talem se oli sakem Pol mo Saelas i go long wan kalabus we i insaed olgeta, mo lokem tufala long wan wud we i olsem bigfala hankaf. Plante taem, ol bigfala kalabus oli olsem wan bigfala rum we i gat bigfala ples blong wokbaot long medel blong hem, long ol saed blong ples blong wokbaot ya, i gat ol smolsmol rum we i gat laet mo win i pas tru long ol. Be kalabus we i stap insaed olgeta, i no gat laet, mo smol win nomo i save kam insaed. Pol mo Saelas, tufala i mas stap long wan rum olsem, we i tudak, i hot tumas, mo smel blong hem i nogud tumas. ?Yu yu tingbaot soa we tufala i filim, taem tufala i fas i stap insaed long wud ya we oli lokem tufala long hem blong plante aoa, we blad i stap ron long baksaed blong tufala from we oli bin wipim tufala?
14 Nating se Pol mo Saelas tufala i kasem ol traem olsem, tufala i holem strong long bilif blong tufala. Tufala i soemaot klia se strongfala bilif i stap long hat blong tufala, mo i mekem tufala i kam strong naf blong mekem wok blong Jeova nomata se oli kasem ol traem ya. Vas 25 blong japta 16, i tokbaot strongfala bilif blong tufala. Hem i talem se Pol mo Saelas tufala i stap “prea, mo tufala i stap singsing long ol sing blong presem God.” Tru ya, nating se tufala stap long wan rum insaed olgeta, tufala i sua se God i glad long tufala. !Samting ya i mekem se tufala i singsing bigwan we ol narafala presina oli save harem tufala! Yumi mas gat semfala strong bilif tede, taem ol samting oli kam traem bilif blong yumi.
15 Ol traem we Devel Setan i stap putum fored long yumi oli plante tumas. Samfala maet hemia trabol we famle i mekem long olgeta. Plante long ol brata blong yumi oli fesem ol traem fored long loa blong gavman long kot. Maet samfala oli kasem traem from olgeta man blong apostasi. I gat hadtaem blong kasem mane, mo ol wari long saed blong ol samting we yumi nidim blong laef evri dei. Ol yangfala oli kasem traem long ol fren blong olgeta long skul. ?Olsem wanem yumi save fesem ol traem ya mo winim olgeta? ?I nidim wanem blong soemaot strongfala bilif?
16 Faswan samting we i stap fastaem olgeta se, yumi nidim holem wan gudfala fasin fren wetem Jeova. Taem Pol mo Saelas tufala i stap long kalabus ya, tufala i no spenem taem blong olgeta blong komplen from samting ya we i kasem tufala mo tufala i no sori from tufala i stap long kalabus. Kwiktaem nomo tufala i lukluk i go long God tru long prea mo presem hem wetem ol singsing. ?From wanem? From we tufala i gat wan gudfala fasin fren wetem Papa blong tufala long heven. Tufala i luksave se tufala i stap safa from stret fasin we tufala i mekem mo se i stap long han blong Jeova blong sevem tufala.—Sam 3:8.
17 Tede tu, taem yumi fesem ol traem, yumi mas lukluk i go long Jeova. Pol i leftemap tingting blong yumi ol Kristin blong ‘prea long God from evri samting.’ Nao “pis we hem i givim, we i bigfala moa, i bitim save blong yumi, bambae hem i putum long tingting blong [yumi] blong lukaot gud long [yumi].” (Fil. 4:6, 7)!Yumi harem gud tumas blong save se Jeova bambae i no save lego yumi stap yumiwan nomo blong fesem ol traem! (Aes. 41:10) Hem i save stap wetem yumi oltaem, sipos yumi wok blong hem wetem strongfala bilif.—Sam 46:7
18 Wan narafala samting blong soemaot strongfala bilif hemia blong stap bisi long wok blong Jeova. (1 Kor. 15:58) Ol man oli sakem Pol mo Saelas i go long kalabus from we tufala i stap bisi blong talemaot gud nius.?Tufala i no moa prij from ol traem we tufala i kasem? Nogat. Tufala i gohed blong prij taem tufala i stap long kalabus, mo afta we oli letem tufala i fri, tufala i mekem trep i go long Tesalonaeka mo go insaed long haos prea blong ol man Jiu blong “mekem plante toktok from ol tok long Baebol.“ (Wok 17:1-3) Taem yumi gat wan tingting no bilif we i pulum yumi strong i go long Jeova, mo yumi bilif strong se yumi gat trutok, bambae i no gat samting “we i save tekemaot yumi long God, we hem i lavem yumi ya tumas, we yumi joen long Jisas Kraes, Masta blong yumi.“—Rom 8:35-39.
19 Ol Eksampel Blong Strongfala Bilif Tede: I gat plante nambawan eksampel blong ol brata mo sista long taem blong yumi tede, we olsem Pol mo Saelas, oli soemaot strongfala bilif. Wan sista we i laef tru long rabis kalabus blong Auschwitz i tokbaot bilif blong hem we i no muf nating mo strongfala bilif we ol brata mo sista oli soemaot long kalabus ya. Hem i talem se: “Wan taem we oli stap askem kwestin long mifala, wan soldia i wokbaot i kam stret long mi we i taetem han blong hem olsem we mbae i faet. Hem i tok bigwan se: ‘?Bambae mifala i mekem wanem long yufala? Sipos mifala i holemtaet yufala, yufala i no kea. Sipos mifala i putum yufala long kalabus, yufala i no kea nating. Sipos mifala i putum yufala i go long rabis kalabus, samting ya bambae i no mekem yufala i wari. Taem mifala i panisim yufala blong ded, yufala i stanap olsem we yufala i no wari long wan samting nating.?Bambae mifala i mekem wanem long yufala?’ ” !Bilif blong yumi i kam strong moa, taem yumi luk bilif we ol brata blong yumi oli gat long taem olsem we i mekem se oli harem nogud tumas! Oli lukluk oltaem i go long Jeova blong kasem help blong stanap strong.
20 I sua se yumi tingbaot strongfala bilif we plante long ol brata blong yumi oli bin soemaot long ol yia we oli jes pas, taem we ol defdefren laen blong man oli oli no laeklaekem olgeta nating. Nating we oli stap laef long taem we i denja, ol brata we oli lidim wok long ol ples ya,oli lukaot gud se ol brata mo ol sista oli kasem ol kakae long saed blong spirit. Evriwan oli gohed wetem strongfala bilif se ‘ol samting ya blong mekem faet bambae oli no save mekem olgeta i karekil.’—Aes. 54:17
21 Plante long ol brata mo sista we ol hasban no waef blong olgeta i no stap long trutok, oli soemaot strongfala bilif mo oli stanap strong longtaem. Wan brata we i stap long Guadeloupe i fesem strong fasin agensem we i kam long waef blong hem. Waef blong hem i neva rerem kakae blong hem no wasem klos blong hem, i neva aenem klos, mo neva foldem ol klos blong hem. Waef ya i mekem olsem blong mekem se tingting blong brata ya i foldaon mo i blokem hem blong no go long ol miting. Plante dei i pas, waef ya i no toktok long hem. Be brata ya i soemaot wetem fulhat blong hem se hem i gat strongfala bilif long wok blong Jeova, mo i lukluk i go long hem nomo blong kasem help tru long prea. Ale, brata ya i naf blong stanap strong long olgeta samting ya. ?Blong hamas taem? Blong samwe long 20 yia—biaen nao, hat blong waef blong hem i jenis. Sloslou, brata ya i kasem trufala glad from we waef blong hem i akseptem hop long saed blong Kingdom blong God.
22 Laswan samting, yumi no mas fogetem strongfala bilif blong ol yangfala brata mo sista blong yumi we oli go long skul evri dei mo we oli mas fesem ol traem long ol fren blong olgeta mo sam narafala traem bakegen. Wan yangfala Witnes i tokbaot ol traem we oli kasem blong mekem i sem mak olsem ol narawan long skul, hem i se: “Taem yu stap long skul evriwan i stap pulum yu blong rebel smol. Ol narafala yangfala oli respektem yu moa sipos yu mekem wan samting we i denja.” !Hemia wan bigfala traem we ol yangfala blong yumi oli stap fesem! Oli mas mekem strongfala disisen long hat mo tingting blong olgeta blong blokem ol traem.
23 Plante long ol yangfala blong yumi oli mekem i gud taem oli holem strong long stret fasin nating se i gat ol traem. Wan eksampel hemia wan yangfala sista we i stap long Franis. Wan dei afta we oli kakae long medel dei finis, samfala boe oli traem fosem hem blong i kisim olgeta, be hem i prea mo hem i strong blong blokem samting ya, ale ol boe ya oli livim hem. Biaen, wan long ol boe ya i kambak mo i talem long yangfala gel ya se hem i tinghae long gel ya from we hem i no gat fasin fraet nating. Yangfala gel ya i givim gudfala witnes long boe ya long saed blong Kingdom. Hem i eksplenem ol haefala mak we Jeova i stanemap blong oli save harem gud long ol blesing blong Kingdom ya. Long yia ya we oli stap skul, gel ya i eksplenem bilif blong hem long evriwan long klas blong hem.
24 !Hem i wan jans we i sas tumas blong yumi save stap long medel blong olgeta ya we Jeova i glad blong yusum olgeta, blong tokbaot ol samting we hem i wantem wetem strongfala bilif! (Kol. 4:12) Antap long hemia, yumi gat nambawan jans ya blong pruvum se yumi fasgud long God taem Enemi blong yumi, Devel Setan, we i olsem wan laeon, i traem blong spolem yumi. (1 Pita 5:8, 9) Yumi no mas fogetem se Jeova i stap yusum mesej blong Kingdom blong sevem yumi we i stap talemaot mesej ya mo olgeta ya tu we oli stap lesin. I gud sipos ol disisen we yumi mekem mo fasin blong laef blong yumi evridei, oli pruvum se yumi putum Kingdom fastaem. !Yumi mas gohed blong talemaot gud nius wetem strong bilif!