Baebol i Talem Wanem
Ol Fasin Blong Laef We Oli Narakaen—?God i Agri Long Olgeta?
WAN gel we hem i gat 13 yia blong hem, i raetem leta i go long wan niuspepa we i stap givim advaes long ol yangfala. Hem i askem se: “?Wetaem bambae mi save sipos mi wantem slip wetem wan boe no wetem wan gel?” Kwestin blong hem i soemaot tingting blong plante man mo woman we oli harem se oli fri blong jusum enikaen fasin blong laef we oli wantem folem.
Tingting blong samfala i fasfasgud from we oli no sua se oli gat filing blong woman no filing blong man long saed blong seks. Sam narafala oli no sem blong folem wan narakaen fasin blong laef, olsem man we i slip wetem man bakegen. Sam gel oli putum klos blong boe mo tekem fasin blong boe, sam boe oli putum klos blong gel mo tekem fasin blong gel. Sam man oli askem dokta blong katem olgeta blong oli kam olsem woman, mo sam woman oli kam olsem man. I gat samfala tu we oli ting se i oraet nomo we ol bigman mo woman oli slip wetem pikinini.
?Olsem wanem? ?I stap long ol man mo woman wanwan blong jusum wanem fasin we bambae oli folem long saed blong seks, mo blong jusum sipos oli wantem kam man no oli wantem kam woman? ?Tok blong God i talem wanem?
‘Hem i Mekem Wan We i Man Mo Wan We i Woman’
Long Baebol, buk blong Jenesis i talem se God i wokem man mo woman we tufala i defdefren. Hem i se: “[God] i mekem man, mo man ya i tekem fasin blong hem . . . Hem i mekem tu man nomo, wan we i man mo wan we i woman. Nao hem i blesem tufala, mo i talem long tufala se, ‘I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.’ ”—Jenesis 1:27, 28.
God i wokem ol man, we oli fri blong jusum wanem we oli wantem, mo hem i givim janis long olgeta blong yusum fasin fri ya long plante rod. (Ol Sam 115:16) Insaed long wok ya we God i givim long man blong lukaotgud long olgeta laef samting long wol, hem i letem man i jusum nem blong ol anamol. (Jenesis 2:19) Be, long saed blong seks, God i givim ol klia loa.—Jenesis 2:24.
Adam i no obei long God, ale, from samting ya, yumi evriwan i sinman, nao yumi mas faet agensem ol samting we bodi mo tingting blong yumi i wantem we oli no laenap wetem stamba tingting blong God. Taswe, long ol loa we God i givim long Moses, hem i makemaot ol fasin blong seks we hem i no laekem nating—olsem, man i stilim woman blong narafala man, man i slip wetem wan famle blong hem nomo, man i slip wetem man bakegen, mo man i go long anamol. (Levitikas 18:6-23) Mo tu, God i talem se i tabu blong woman i werem klos blong man, mo i tabu blong man i werem klos blong woman, sipos oli mekem samting ya blong folem ol rabis fasin blong seks. (Dutronome 22:5) Baebol i talem bakegen mo bakegen se i gat wan fasin blong seks nomo we God i agri long hem, hemia se man we i mared i slip wetem woman blong hem nomo. (Jenesis 20:1-5, 14; 39:7-9; Ol Proveb 5:15-19; Hibrus 13:4) ?Olsem wanem? ?Ol loa ya oli strong tumas?
?Wanwan Man i Save Jusum?
Baebol i talem se yumi stap long han blong God ya we i Wokem yumi, olsem graon we i stap long han blong man blong wokem graonpot. Hem i se: “Yu yu man nomo, yu no gat raet blong tokbak long God olsem. Wan graonpot i no save tokbak long man we i wokem hem se, ‘?From wanem yu wokem mi olsem?’ ” (Rom 9:20) I klia se God i mekem man mo woman blong filing blong tufala i pulum tufala blong slip tugeta. Hemia i stret nomo. Be filing we i pulum man blong i slip wetem man bakegen, no blong i go long anamol, no blong i slip wetem pikinini, hemia i no stret nating.—Rom 1:26, 27, 32.
Taem man i folem ol filing blong seks we oli no stret, i olsem we hem i stap rao long God. Baebol i givim woning ya se: “?Yufala i ting se wan graonpot we i sem mak wetem ol narafala graonpot, hem i save girap, i rao long man we i wokem hem? ?Yufala i ting se graon i save tok long man we i stap wokem graonpot, i talem se, ‘?Yu yu stap mekem wanem long mi?’ ” (Aesea 45:9) I stret nomo se Man we i Wokem yumi i givim ol loa we oli save lidim yumi long saed blong seks. ?Yu ting se i stret we yumi ol man, yumi mas folem ol loa ya? Yes, i stret nomo.
Bos Long Prapa Graonpot Blong Yu
Long wan haf blong Baebol we Pol i givim advaes long ol Kristin long saed blong seks, hem i yusum wan pijatok we i klosap sem mak long hemia antap. Hem i se: “Yufala wanwan i mas save olsem wanem blong bos long prapa graonpot blong yufala long fasin we i klin mo i soem ona. Yufala i no mas wantem ol nogud fasin blong seks.” (1 Tesalonaeka 4:4, 5, NW ) Pol i stap talem long ples ya se bodi blong yumi i olsem wan graonpot. Blong bos long graonpot ya, yumi mas mekem ol tingting mo filing blong yumi oli laenap wetem ol klin loa blong God.
I tru, samting ya i no isi, speseli long wan man no woman we bigman i bin mekem nogud long hem taem hem i pikinini, no we papa mama blong hem i no bin soemaot gud wanem fasin i stret blong man mo woman i mekem, no we hem i bin luk ol rabis pija blong seks taem hem i yang nomo. Mo tu, samfala oli no gat stret filing long saed blong seks from we wan samting i no stret long ol gene mo hormonea long blad blong olgeta, no maet oli sik long tingting blong olgeta. Be, yumi haremgud blong save se, Man we i Wokem yumi i save givhan long olgeta ya we oli nidim help.—Ol Sam 33:20; Hibrus 4:16.
Letem Bigfala Man Blong Wokem Graonpot i Jenisim Yu
Bifo we man i save stat blong wokem wan graonpot, hem i mas mekem se wil we hem i yusum i stap stret long medel blong graon ya we i wetwet. Nao taem wil ya i tanem, man ya bambae i pusum graon ya i goraon long wil sloslo wetem ol fingga blong hem, gogo hem i wokem wan naesfala graonpot. Long sem fasin, bifo we yumi save kam wan man we i naes long ae blong God, yumi mas mekem se ol rul mo loa blong God we oli no save jenis, oli stap stret long medel blong laef blong yumi. Nao taem yumi traehad, God i pusum yumi wetem lav, tru long ol tok blong Baebol, tabu spirit, mo ol Kristin brata, gogo yumi jenisim ol fasin blong yumi we oli no stret. Ale, long taem ya nao, yumi stat haremsave we God i stap lukaotgud long yumi wan.
I tru, yumi mas lanem blong trastem waes blong Man ya we i Wokem yumi. Yumi mas bilif se hem i save wanem we i moagud long yumi. Blong trastem hem olsem, yumi mas prea oltaem mo stadigud long Baebol. Man we i stap traehad blong winim ol filing blong seks we oli no stret, sipos hem i trastem Jeova, hem i kam olsem graon we i sofsofgud long han blong Man ya we i Wokem yumi. Fas Pita 5:6, 7 i talem se: “God i gat paoa, mo yufala i mas putum yufala i stap daon, aninit long han blong hem. Nao long taem we hem i luk se i stret, hem bambae i leftemap yufala. Yufala we i stap wari tumas, yufala i mas putum ol trabol blong yufala long han blong hem, from we oltaem hem i stap tingbaot yufala.”
Sipos yumi ridim Baebol oltaem, bambae yumi save stori blong plante gudfala man blong God we oli bin faet agensem ol samting we tingting blong olgeta nomo i wantem, mo we oli no lego long faet ya. !Eksampol blong olgeta i save leftemap tingting blong yumi bigwan! Yumi kasem save long filing blong olgeta, olsem aposol Pol we sam samtaem hem i kros long hem wan bakegen, nao i tok strong se: “Man. Mi mi no save harem gud nating. ?Hu man we bambae i save pulumaot mi long laef ya we i stap holemtaet mi, we bambae mi ded from?” Be biaen, hem i soemaot hu nao i save givhan long yumi, taem hem i ansa long kwestin blong hem bakegen se: ‘!Tangkiu tumas long God we hem bambae i yusum Masta blong yumi Jisas Kraes, blong mekem samting ya!’—Rom 7:24, 25.
Paoa We i Save Jenisim Fasin Blong Yumi
Yumi save letem tabu spirit tu i halpem yumi. Hemia wan strong paoa we i save jenisim fasin blong yumi. Tabu spirit i save givhan long yumi blong ‘finis long olfala laef ya blong yumi bifo’ mo ‘kam niufala man, we God i mekem . . . se laef blong yumi i folem trutok blong hem, mo i stret gud, i tabu, i blong hem nomo.’ (Efesas 4:22-24) Oltaem Papa blong yumi long heven we i lavem yumi, bambae i ansa long ol prea blong yumi taem yumi askem wetem fulhat blong yumi, blong hem i givim tabu spirit blong halpem yumi blong jenis. Jisas i promes se Papa blong yumi bambae i “givim Tabu Spirit long ol man we oli askem long hem.” (Luk 11:13) Be yumi mas prea bakegen mo bakegen, olsem Baebol i talem se: “Yufala i mas gohed blong askem, nao bambae yufala i save kasem.” (Matiu 7:7) Yumi mas mekem samting ya moa, taem yumi stap traehad blong bos long ol strong filing blong seks.
God i save yusum ol Kristin brata blong yumi tu blong givhan long yumi. I gat ol brata mo sista we oli kamaot long ol defdefren ples mo ol defdefren fasin blong laef. Long faswan handred yia, i gat sam Kristin long kongregesen blong Korin we bifo, oli “man we oli gat fasin blong woman,” mo oli “man we oli stap slip wetem man.” Be oli jenisim fasin blong olgeta. Blad blong Kraes i mekem olgeta oli kam klin, nao God i agri long olgeta. (1 Korin 6:9-11, NW ) Samfala tede oli mas jenisim ol semfala fasin ya. Kristin kongregesen i save givhan long olgeta blong faet agensem ol nogud fasin we tingting blong olgeta nomo i wantem.
?Olsem wanem? ?Samting ya i min se, taem wan man olsem i kam wan Kristin, bambae hem i no moa save gat ol filing we oli no stret long saed blong seks, mo ol filing we oli hafhaf? Si, maet hem i gat sam filing we oli no stret yet. Be samfala we oli gohed oltaem blong folem ol rul blong Baebol, oli luk se laef blong olgeta i kam stret. Ol Kristin ya oli no faenem i isi, oli mas gohed evri dei blong faet agensem ol filing we oli no stret. Oli gohed blong mekem wok blong God nating se i gat samting olsem “nil blong aranis” we i stap stikim olgeta oltaem. (2 Korin 12:7) Sipos oli gohed nomo blong faet agensem ol filing we oli no stret mo oli mekem stret fasin, God i save luk olgeta olsem ol gudfala man blong hem we oli klin. Oli save wet wetem glad long taem ya we bambae ol man “oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.”—Rom 8:21.
Go kasem taem ya, olgeta we oli wantem mekem God i glad oli mas folem ol stret loa blong hem. Ol trufala Kristin oli jusum blong mekem wok blong God, oli no jusum blong folem ol samting we tingting blong olgeta nomo i wantem. Olgeta we oli gat tingting daon mo oli mekem samting we God i wantem long evri haf long laef blong olgeta, bambae oli kasem blesing blong stap glad olwe, gogo i no save finis.—Ol Sam 128:1; Jon 17:3.
[Futnot]
a Wan kemikol long blad we i wekemap sam haf insaed long bodi blong oli wok.
[Tok blong pija long pej 13]
Long saed blong seks, God i givim ol klia loa
[Tok blong pija long pej 14]
Long faswan handred yia, i gat sam Kristin long kongregesen blong Korin we bifo, oli “man we oli gat fasin blong woman,” mo oli “man we oli stap slip wetem man.” Be oli jenisim fasin blong olgeta
[Tok blong pija long pej 15]
Man we i stadigud long Baebol i lanem ol stret fasin