Toktok Long Fasin We Yu Bilif Strong Long Samting We Yu Talem

TAEM wan man i toktok long fasin we i bilif strong long samting we hem i talem, ol narafala oli luk se hem i sua gud long ol save ya. Ol man oli luksave samting ya long aposol Pol taem hem i prij. Pol i raet i go long olgeta long Tesalonaeka we oli bilif long gud nius, i se: “Taem mitrifala i tekem gud nius i kam long yufala, mifala i no toktok nating nomo. . . . Mifala i bilif strong se gud nius ya i tru.” (1 Tes. 1:5) Hem i soemaot bilif ya long ol toktok blong hem mo long fasin blong laef blong hem. Yumi tu, yumi mas soemaot se yumi bilif strong long ol trutok blong Baebol we yumi talemaot.

Man we i bilif strong long samting we hem i talem, i no toktok long fasin we i tinghae long hem wan. Hem i no tokbaot wan samting se i tru sipos i no gat pruf blong hem, mo hem i no tok flas. Taem yu bilif strong long samting we yu tokbaot long Baebol, toktok blong yu tu bambae i soemaot strong bilif.—Hib. 11:1.

Stret Taem Blong Soemaot Se Yu Bilif Strong. Taem yu stap prij, i impoten tumas blong toktok long fasin we yu bilif strong long samting we yu talem. Plante taem i no toktok blong yu nomo we ol man oli makem, be fasin blong yu tu. Oli luksave se yu tingting olsem wanem long samting we yu talem. Taem yu bilif strong long samting we yu talem, hemia i givim paoa long ol tok blong yu, nao ol man oli luksave se samting we yu talem i impoten tumas.

Taem yu stap givim wan tok long fored blong ol Kristin brata mo sista, long taem ya tu yu mas toktok long fasin we yu bilif strong long samting we yu talem. Long fas leta we tabu spirit i pulum aposol Pita blong raetem, hem i ‘leftemap tingting blong ol brata, mo i talemaot se gudfala fasin blong God blong lavem yumi tumas mo blong mekem i gud tumas long yumi, hem i prapawan.’ Mo hem i talem long ol brata ya se: “Yufala i mas stanap strong.” (1 Pita 5:12) Taem aposol Pol i raetem leta i go long kongregesen long Rom, hem i toktok long fasin we i bilif strong, mo leta ya i givhan bigwan long olgeta. Hem i raetem se: “Mi mi save finis we i no gat wan samting nating we i save tekemaot yumi long Kraes we hem i lavem yumi tumas. Bambae yumi ded, be hemia i no save tekemaot yumi, mo laef blong yumi i no save mekem. I no gat sam enjel, no sam haeman, no sam narafala paoa long heven we i save mekem. I no gat wan samting we i stap finis, no wan samting we bambae i kam, we i save mekem. I no gat samting blong ples blong God, mo i no gat samting long Hom blong ol Dedman, we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i lavem yumi ya tumas, we yumi joen long Jisas Kraes, Masta blong yumi.” (Rom 8:38, 39) Long wan narafala leta we Pol i raetem, hem i toktok long fasin we i bilif strong, taem hem i wantem pulum ol Kristin blong oli prij. From we hem wan i gohed strong long wok blong prij, oli luksave klia we hem i bilif strong se wok ya i impoten. (Wok 20:18-21; Rom 10:9, 13-15) Tede, taem ol Kristin elda oli tijim ol man long Tok blong God, olgeta tu oli mas toktok long fasin we oli bilif strong long samting we oli talem.

Taem ol papa mama oli mekem Baebol stadi long ol pikinini blong olgeta, mo long ol narafala taem tu, toktok blong olgeta i mas soemaot se oli bilif strong long ol trutok blong Baebol. Ol papa mama oli mas lavem God wetem fulhat blong olgeta, mo oli mas laekem ol rod blong hem tu. Nao ol tok we oli talem long ol pikinini blong olgeta bambae i soemaot se oli bilif strong long ol save ya. Baebol i talem se: “Taem man i tok, hem i stap talemaot ol samting we tingting blong hem i fulap long hem.” (Luk 6:45; Dut. 6:5-7) Sipos ol papa mama oli bilif strong long ol trutok ya, bambae oli givim gudfala eksampol long ol pikinini blong olgeta, blong olgeta tu oli gat ‘fasin blong bilif we i no blong giaman.’—2 Tim. 1:5.

Taem wan man i askem long yu from wanem yu yu bilif olsem, i impoten tumas we yu toktok long fasin we yu bilif strong long samting we yu talem. Maet wan fren long skul, wan tija, no wan man we yu wok wetem hem, i sapraes taem yu yu no joen long wan lafet blong wol. Sipos yu tok stret mo yu givim wan ansa we i klia, maet yu givhan long hem blong i respektem desisen blong yu we i stanap long Baebol. Maet wan narafala i traem pulum yu blong mekem wan nogud fasin, olsem giaman no stil, yusum drag, no slip olbaot. Long taem olsem, yu mas talem stret mo klia se bambae yu no joen long ol fasin ya. Yu mas talem se, nating we hem i traehad olsem wanem, be bambae hem i no save pulum yu blong yu jenisim tingting blong yu. Yu mas toktok long fasin we yu sua long desisen blong yu. Taem woman blong Potifa i traem pulum Josef blong i slip wetem hem, Josef i talem stret se: ‘!Nogat! Sipos mi mi kam slip wetem yu, bambae mi mi mekem sin long fes blong God. Hemia i nogud tumas ya.’ Be woman ya i no wantem lesin, ale Josef i girap i ronwe.—Jen. 39:9, 12.

Rod Blong Soemaot Se Yu Bilif Strong. Ol wod we yu yusum oli save soemaot se yu bilif strong long samting we yu talem. Plante taem, bifo we Jisas i talem wan impoten save, hem i talem tok ya, “Tru mi talem long yu.” (Jon 3:3, 5, 11; 5:19, 24, 25) Pol tu i yusum ol tok we i soemaot se hem i bilif strong long samting we hem i talem. Hem i talem ol tok olsem: “Mi mi save finis,” ‘From we mi mi joen long Jisas, mi mi savegud,’ mo “Mi mi talem tru.” (Rom 8:38; 14:14; 1 Tim. 2:7) Samtaem Jehova i pulum ol profet blong oli talem ol tok we i soemaot se oli bilif strong long samting we oli talem. Oli talem ol tok olsem: “Bambae i mas kamtru long stret taem blong hem.” (Hab. 2:3) Taem yu yu tokbaot ol profet tok ya, yu tu yu save toktok long fasin we yu bilif strong, olsem ol profet ya. Yu no mas trastem yu wan, be yu mas trastem Jehova nomo. Sipos yu mekem olsem, mo yu toktok wetem respek, ol tok blong yu bambae i soemaot se yu gat strong bilif.

I gat wan narafala rod blong soemaot se yu bilif strong long samting we yu talem. Yu mas talem samting wetem fulhat blong yu mo tok blong yu i mas laef. Fes blong yu, mo fasin blong yu blong muvum tufala han mo bodi blong yu, oli save soemaot samting ya. I tru, ol man wanwan oli no muvum han mo bodi blong olgeta long sem fasin. Mo tu, maet yu yu wan man we yu stap sem, no yu toktok long voes we i kwaet nomo. Be nating. Taem yu bilif strong se samting we yu stap tokbaot i tru, mo se ol narafala oli mas harem ol tok ya, bambae yu toktok long fasin we yu bilif strong long samting we yu talem.

Be yumi no mas mekem giaman fasin. Fasin ya we yumi bilif strong long samting we yumi talem i mas kamaot long hat blong yumi. Sipos ol man oli luksave se tok blong yumi i no kamaot long hat blong yumi mo fasin blong yumi i blong giaman nomo, bambae oli no tinghevi long ol tok we yumi talem. From samting ya, yu mas toktok long fasin we i prapa fasin blong yu. Sipos yu stap toktok long plante man, ating yu mas toktok strong moa, mo yu mas mekem tok blong yu i laef moa. Nating se i olsem, yu mas traehad yet blong toktok long prapa fasin blong yu mo wetem fulhat blong yu.

Ol Samting Blong Givhan Long Yu Blong Soemaot Se Yu Bilif Strong. Sipos yu wantem toktok long fasin we yu bilif strong long samting we yu talem, yu mas sua gud se save ya i tru. Taswe yu mas rere gud. I no naf blong raetemdaon sam save we yu faenem long wan buk mo talemaot ol save ya nomo, nogat. Yu mas kasem save gud long samting we bambae yu talem, mo yu mas naf blong talem long ol prapa tok blong yu. Yu mas bilif strong se ol save ya i tru, mo se bambae i givhan bigwan long ol man we oli lesin. Taswe, taem yu rerem tok blong yu, yu mas tingbaot wanem kaen man we bambae yu toktok long olgeta mo yu mas tingbaot ol samting long laef blong olgeta tu. Yu mas tingbaot wanem we oli save finis, mo wanem tingting we oli gat long ol save ya.

Sipos toktok blong yu i rongud, bambae ol man oli haremsave se yu yu bilif strong long samting we yu talem. Taswe i no naf blong rerem ol gudfala save nomo, be yu mas wok had blong talemaot ol save ya long gudfala fasin. Yu tingting gud long ol haf blong tok we yu mas mekem olgeta oli laef, nao bambae yu naf blong tokbaot ol haf ya long ol prapa tok blong yu. Bambae yu no fas long ol samting we yu raetemdaon finis. Yu no mas foget blong prea long Jehova, se bambae hem i blesem yu taem yu traehad olsem. Ale ‘God bambae i mekem tingting blong yu i strong,’ nao bambae yu toktok long fasin we yu bilif strong se ol tok we yu talem i tru mo i impoten.—1 Tes. 2:2.