Haf 9
Olsem Wanem Yumi Save Se Yumi Stap Long “Ol Las Dei”
1, 2. ?Olsem wanem yumi save se yumi stap long ol las dei?
?OLSEM wanem yumi save sua se yumi stap long taem ya we Kingdom blong God bambae i agensem fasin blong rul blong man naoia? ?Olsem wanem yumi save se yumi stap kolosap long taem ya we God bambae i finisim olgeta fasin nogud mo ol trabol?
2 Hemia nao olgeta samting we ol disaepol blong Jisas oli wantem save. Oli askem long hem, wanem “saen” bambae i soemaot we hem i kasem paoa blong rul long Kingdom, mo “wol ya i finis.” (Matyu 24:3) Long ansa blong hem, Jisas i talem ol bigfala samting mo ol trabol we oli mas kamaot long wol, olgeta samting ya oli joen blong soemaot we ol man oli stap long “taem blong en,” “taem blong Lasdei” blong fasin ya blong naoia. (Daniel 11:40; 2 Timote 3:1) ?Yumi luksave saen ya long laswan handred yia? !Yes, yumi luk saen ya, fulwan!
Ol Faet Blong Wol
3, 4. ?Olsem wanem ol faet long laswan handred yia oli laenap wetem ol profet tok blong Jisas?
3 Jisas i talem finis: “Ol man bambae oli save mekem faet long ol narafala man. Mo ol kantri bambae oli save mekem faet long ol narafala kantri.” (Matyu 24:7) Long 1914, wol i joen long wan faet we ol man mo ol kantri oli agensem olgeta bitim ol faet we oli hapen bifo. Pruf ya i mekem se ol man blong raetem histri oli kolem taem ya Bigfala Faet. Hemia faswan bigfala faet we i kamaot long histri, faswan faet blong wol. Samwe 20 milyan soldia mo ol man we oli no soldia oli lusum laef, bitim ol narafala faet we i hapen bifo.
4 Faswan Bigfala Faet Blong Wol i makem stat blong ol las dei. Jisas i talem se hemia i joen wetem ol narafala trabol tu we “oli stat blong ol trabol we i blong mekem man i harem nogud.” (Matyu 24:8, NW) Samting ya i tru nomo, from we Namba Tu Faet Blong Wol hem i nogud moa, i kilim bitim 50 milyan soldia mo ol man we oli no soldia oli ded. !Long laswan handred yia, bitim 100 milyan man oli ded long taem blong ol faet, hemia samting olsem fo taem namba blong ol man we oli ded long ol 400 yia we oli pas finis! !Samting ya i pruvum bigwan se rul blong man i nogud!
Ol Narafala Pruf
5-7. Talemaot sam pruf we oli soemaot se yumi stap long ol las dei.
5 Jisas i talem sam narafala saen tu we oli save makemaot ol las dei: “Bambae graon i save seksek bigfala. Mo olbaot long wol ol man bambae oli gat hadtaem blong kasem kakae, mo bambae i gat ol strong sik [ol sik we oli pas kwiktaem i go long ol narafala man] oli kam spolem olgeta.” (Luk 21:11) Ol samting ya oli stret long taem ya we yumi luk stat long 1914, from we ol man oli harem nogud moa taem ol trabol ya oli stap kam antap.
6 Oltaem plante man oli ded from we graon i seksek bigfala. Biaen long Faswan Faet Blong Wol, bigfala sik ya we oli kolem Flu blong Spen, i kilim samwe 20 milyan man i ded—sam man oli talem se namba ya i save kasem 30 milyan, mo i save go antap. AIDS (SIDA) i kilim plante handred taosen man, mo ol narafala milyan tu oli save ded i no longtaem. Evri yia, plante man oli ded from sik blong hat, kansa mo ol narafala sik bakegen. Plante milyan narafala oli ded sloslou from we oli sot long kakae. I klia se ol ‘man blong resis long hos blong Revelesen’ oli resis, long ol faet we oli mekem, long taem we kakae i sot mo ol strong sik oli tekem laef blong plante man i stat long 1914.—Revelesen 6:3-8.
7 Jisas i talem tu se fasin blong brekem loa bambae i kam antap olsem we yumi luk long olgeta kantri. Hem i se: “Bambae ol fasin nogud oli kam bigfala moa, nao bighaf blong ol man bambae oli no moa laekem God.”—Matyu 24:12.
8. ?Wanem ol profet tok blong 2 Timote japta 3 we i stretgud long taem blong yumi?
8 Antap moa, ol profet tok blong Baebol oli talem se ol gudfala fasin bambae oli godaon bigwan long taem blong yumi olsem yumi luk long evri ples long wol: “Long taem blong Lasdei blong wol, laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkyu, mo oli no save tingbaot God. Bambae oli no man blong sore, oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud nomo, oli agens long hem. Bambae oli man blong spolem ol fren blong olgeta, oli man we oli no kea, we flas i mekem tingting blong olgeta i lus. Bambae oli man we oli wantem tumas ol samting we oli stap harem gud long hem, i winim we oli stap laekem God. Long fes blong ol man, bambae olgeta oli stap folem fasin blong Kristin man, be oli no wantem paoa blong God nating long laef blong olgeta. . . . Ol man nogud, mo ol man blong gyaman oli save gohed moa yet, bambae oli save gyaman moa long ol man, mo bambae olgeta tu oli save bilif long ol gyaman tok blong olgeta.” (2 Timote 3:1-13) Olgeta samting ya oli kamtru finis.
Wan Narafala Samting
9. ?Wanem i hapen long heven taem ol las dei oli stat long wol?
9 Wan narafala samting i mekem ol trabol i kam antap bigwan long laswan handred yia. Long semtaem we las dei i stat long 1914, i gat wan samting i hapen we i mekem moa trabol long ol man. Long taem ya, olsem wan profet tok we i stap long las buk blong Baebol i talem, “Nao i gat bigfala faet i stat long heven. Maekel [Kraes taem i kasem paoa long heven] wetem ol enjel blong hem oli stap faetem bigfala algita ya [Setan]. Bigfala algita ya wetem ol enjel blong hem oli traem faetem olgeta, be oli lus, nao oli no moa gat ples blong olgeta long heven. Bigfala algita ya, hem i snek ya blong bifo we nem blong hem ‘Setan’ no ‘Man we i agensem man’. Hem i gyaman long olgeta man long wol finis, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.”—Revelesen 12:7-9.
10, 11. ?Stat long taem ya we Setan mo ol devel blong hem oli kamdaon long wol, wanem frut ol man oli kasem?
10 ?Wanem ol frut we oli kamaot long famle blong man? Profet tok ya i gohed: “Be trabol tumas long yu, graon, mo long yu, solwora, from we Devel [Setan] i kamdaon finis long yufala. Mo hem i kros tumas, from we hem i save se i gat smoltaem nomo blong hem i stap yet.” (NW) Yes, Setan i save we rul blong hem kolosap i finis nao, hem i traem evri rod blong mekem se ol man oli agensem God bifo we hem wan mo wol blong hem bambae oli finis. (Revelesen 12:12; 20:1-3) !Oli kamdaon olgeta, ol speret man blong hem, from we oli no yusumgud fasin fri blong olgeta blong jus! !Mo ol fasin nogud nomo oli stap long wol ya taem wol i stap aninit long paoa blong hem, i tru moa stat long 1914!
11 I no wan sapraes we Jisas i tokbaot taem blong yumi se: “Mo long wol, ol nesen bambae oli harem nogud tumas, mo oli no moa save faenem rod blong stretem ol trabol blong olgeta . . . Ol man bambae oli kam slak from fraet mo from we oli stap tingbaot ol samting we bambae oli save kamaot long wol.”—Luk 21:25, 26, NW.
Rul Blong Man Mo Ol Devel Kolosap i Finis
12. ?Wanem wan long ol laswan profet tok ya we oli mas kamtru bifo we fasin blong naoia i finis long wol?
12 ?Hamas profet tok blong Baebol oli stap yet we bambae oli mas kamtru bifo we God i finisim rul blong naoia? !Smol nomo! Wan long ol las profet tok ya i stap long 1 Tesalonaeka 5:3, we yumi ridim se: “Taem oli stap tokbaot pis mo seftaem, wantaem nomo trabol bambae i kasem olgeta.” (The New English Bible) Samting ya i soemaot we en blong fasin blong naoia bambae i stat “taem oli stap tokbaot.” Wan taem we wol i no save nating, trabol bambae i kasem olgeta long taem we oli no moa tingbaot, mo taem we ol man oli putum tingting blong olgeta i stap long pis mo seftaem we oli hop blong kasem.
13, 14. ?Wanem taem blong ol trabol Jisas i bin talem, mo wanem bigfala mak blong hem?
13 Taem blong wol ya we i stap long paoa blong Setan hem i kam sot. Kolosap nao bambae i finis long taem blong bigfala trabol olsem Jisas i talem: “Bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem.”—Matyu 24:21.
14 Hae mak blong “bigfala trabol” hem i Amageden, faet blong God. Hemia taem ya we profet Daniel i tokbaot se God bambae “i smasem mo i finisim olgeta kingdom ya.” Hemia nao en blong rul blong olgeta man long taem blong yumi, we oli no dipen long God. Kingdom blong hem we i stap long heven bambae i rul antap long ol man. Olsem Daniel i talem, paoa blong rul long wol bambae i no moa go long “han blong narafala nesen.”—Daniel 2:44; Revelesen 16:14-16.
15. ?Bambae wanem i hapen long Setan mo ol devel blong hem we oli gat paoa long ol man?
15 Yes, long taem ya Setan mo ol devel blong hem bambae oli no moa gat paoa long wol ya. Ol speret man we oli agensem God bambae oli no moa gat paoa, blong oli no moa ‘gyaman long ol man, blong pulum olgeta oli go krangke.’ (Revelesen 12:9; 20:1-3) Olgeta oli mas ded, oli stap wet blong bambae oli lus blong olwe. !Ol man bambae oli haremgud blong kam fri long olgeta we paoa blong olgeta i stap spolem ol man!
?Hu Bambae i Stap Laef? ?Hu Bambae i Lus?
16-18. ?Hu bambae i stap laef taem fasin blong naoia i finis, mo hu bambae i lus?
16 ?Hu bambae i stap laef taem God i mekem jajmen blong hem long wol? ?Hu bambae i lus? Baebol i soemaot we olgeta we oli laekem rul blong God bambae oli stap sef mo bambae oli stap laef. Olgeta we oli no wantem rul blong God bambae oli no save sef, be bambae oli lus wetem wol blong Setan.
17 Proveb 2:21, 22 i talem se: “Ol stret man [olgeta we oli wantem stap aninit long rul blong God] bambae oli stap long wol, mo ol man we i no gat poen long olgeta, bambae oli stap. Be ol rabis man [olgeta we oli no wantem stap aninit long rul blong God], God bambae i tekemaot olgeta long wol. Mo ol man blong tanem baksaed, bambae hem i pulumaot olgeta long wol.”
18 Sem mak bakegen, Ol Sam 37:10, 11 i talem se: “Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” Long vas 29 i gohed: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”
19. ?Wanem advaes yumi mas mekem i wok long laef blong yumi?
19 Yumi mas mekem advaes blong Ol Sam 37:34 i wok long laef blong yumi we i talem se: “Yu mas trastem Jeova mo holem ol wei blong hem, mo hem bambae i leftemap yu blong yu tekem wol ya i blong yu. Taem ol rabis man bambae oli lus, yu bambae yu stap lukluk.” (NW) Yumi ridim long vas 37 mo 38: “Yu luklukgud long gudfala man, we laef blong hem i stret, mo we hem i wantem pis, yu traem makem fasin blong hem. Ol pikinini we oli kamaot biaen long hem oli plante we plante. Be ol man nogud, Hae God [Jeova, NW] i stap spolemgud olgeta. Ol pikinini we oli kamaot biaen long olgeta, hem i stap brumumaotgud olgeta.”
20. ?From wanem yumi save talem se yumi stap long wan taem we yumi save glad?
20 !Hemia i save mekem man i haremgud, yes, i leftemap tingting blong yumi blong save we God i rili kea long yumi mo kolosap nao bambae hem i finisim raf fasin mo ol trabol! !Yumi glad from we yumi save se ol profet tok ya bambae oli kamtru i no longtaem!
[Tok blong pija long pej 20]
Baebol i talemaot ol haf blong ‘saen’ blong ol las dei
[Tok blong pija long pej 22]
Smoltaem nomo, long Amageden olgeta we oli no stap aninit long rul blong God bambae oli lus. Olgeta we oli stap aninit long rul blong God bambae oli stap laef blong go insaed long nyufala wol we stret fasin i stap long hem